Follow by Email

Monday, February 25, 2013

أنا هسامح

 بسم الله الرحمن الرحيم

 الكراهية دي عاملة زي الصدأ بياكل الواحد بالبطئ .. انك تسامح واحد دي  حاجة مش  سهلة ابداً .. لأنك ساعتها بتتخلى طوعا عن رغبتك في الانتقام  ..او بتتنازل عن رغبتك في معاقبة المسئ .. وده اختبار  قاسي اوي مبيعديش منه غير المصطفين الاخيار .. عشان كدة من أصعب الحاجات اللى الرسول عملها أنه يجي في فتح مكة ويقلهم اذهبوا فأنتم الطلقاء .. وكل الأديان بتركز على التسامح والصفاء النفسي .. بس ازاي؟ ..  خلي اللى يضحك يضحك واللى يبكي يبكي .. كل واحد قدام نفسه  وقدام ربنا عارف هو عامل ايه .. وانا كل يوم هحاول ادرب  نفسي على التسامح .. لان هوا ده الحل الوحيد .. محدش هيطبطب عليك لما تحكيله .. ومحدش هيحس بيك الا انت .. علي بن ابي طالب  رضي الله عنه  قال : لا تشكو للناس جرحا أنت صاحبه .. لا يؤلم الجرح إلا من به ألم .. 

ربنا كبير  .. ورحيم .. ولطيف .. وخبير .. انا بحب الاسماء والصفات دي .. أكتر من الجبار والمنتقم  والمتكبر والظاهر ..  وهي دي الخبرة .. الخبرة انك تغلط وتتعور وتتلسع وتتبهدل .. المهم عشان الخبرة تتراكم انك تتفادى الأخطاء دي .. لو مكناش اتلسعنا من كوباية الشاي واحنا صغيرين مكناش هنعرف ان النار  بتحرق ... والله المستعان .. ادينا  بنستعين بالصبر والصلاة اهه .. والقران احسن من اي طبيب  نفسي .. اجيب انا منين 100 جنيه في الساعة ..  طيب ما انا  بدردش اهه  ببلاش .. يلا كله  خير ومحدش بياخد غير نصيبه .. في الأزمات حاول تحس إن  ربنا بيديك فرصة تانية اهه يمكن تتعلم  .. كمان لو مشفتش الوحش هتعرف قيمة الحلو ازاي ؟؟ .. النفس  بتضعف اه.. بس لازم نعرف ان في مسير لأمر الكون ده .. وعقولنا مبتدركش الأحداث غير بعد ما بتحصل  بفترة .. وكدة كدة مش هنعرف نوقف الأحداث انها  تحصل .. احنا بس  نقدرنوسع مداركنا عشان نتقبل الأمور بطريقة أحسن .. ومفيش  حال بيدوم  للأبد .. ولا الحلو بيدوم ولا الوحش بيدوم ولا الظلم بيدوم ..ولا الذل بيدوم .. ولا العجز بيدوم .. ولا الحزن بيدوم .. كويس  اصلا انى براجع نفسي كدة وبعنفها .. بدل ما اسيب نفسي كدة واطلق لها العنان .. لا .. انا غلطت ولازم اعترف انى غلطت .. عشان معدش الغلط ده تاني .. لازم اتوب عن الذنوب .. وابقى موقن ان ربنا هيغفر .. عشان هو وحده الغفور الرحيم .. والغفور الودود .. والحمد لله الذى عافانا مما ابتلى به غيرنا .. واللهم لا شماتة .. وعسى ربي أن يهديني ويرزقني اتباع الحق بعد ما يوريهولي  .. بس كدة

3 comments:

ebrahim hanafy said...

نظرتك للدنيا دى جميلة اوى وعجبانى دماغ حضرتك الصراحة .. انا من ساعت ماقريت سلسلة ايام الجيش بتاعتك وانا كل يوم داخل على المدونة بتاعتك اشوف حاجة اقراها ... بجد ربنا يوفقك :)

ana ga3an said...

وبعد 5 سنين اعلق تاني عندك يا ريس :)
والله انا سعيد
انك متابع ولسه بتكتب في المدونات
تحياتي يا صاحبي

abdallah said...



@ana ga3an
الكومنت بتاعك اتاخد سكرين شوت يا مولانا خلاص