هابي نيو ييير

بسم الله الرحمن الرحيم

برغم كل شئ وبرغم ان حصل حاجات كتييير جدا جدا منذ اخر بوست وفيه مليون حاجة عايز اتكلم عنها ولكن اهم حاجة انه باقى 8 ايام على بداية السنة الجديدة فكنت عايز اقلكم هابي نيو يير وعلى الله تتولدوا من جديد زيي كدة لما بتولد كل سنة من جديد :)

ويارب تكون السنة الجديدة سبب في انكو تكونوا اتقى واسعد واجمل وانقى واصفى واحسن وانضف واحلى وأأمن

الحمد لله

بسم الله الرحمن الرحيم

22-7-2008 

الحمد لله عديت ... ولكن بمسمارين في الحيط

وقدر الله وما شاء فعل

حتى اسألوا ابريق الشاي

بسم الله الرحمن الرحيم

أنا انا أنا أبريق الشاي

أيدي كده بوزي كده

أصب الشاي وأرجع كده

وأعرف برضه يا كتاكيت أحكي حواديت

كان فيه واحد أتنين تلاته

ويا أربعه خمسة تاتا تاتا

راحوا لعم علي الحلواني

عايزين بسكوت بالشيكولاته

الحلواني يا أطفال .. فكر حبه وبعدين قال

بسكوت بالشيكولاته مفيش ... يمكن فيه عند البقال

البقال قال .. أشتروا سكر !! خدوا بفلوسكم كلها سكر

احلي شيء في الدنيا السكر حتى أسألوا أبريق الشاي

أبريق الشاي أبريق الشاي

أنا انا أنا أبريق الشاي

أيدي كده بوزي كده

أصب الشاي وأرجع كده

وأعرف برضه يا كتاكيت أحكي حواديت

كان يا مكان قفطان لونه أحمر

لا بساه أموره أسمها مرمر

و قطط رومي وديك فيومي

وأنا وأنتم قاعدين نتنأور

حاجه ظريفة وعال العال

لكن فجأة حصل زلزال ... زلزال .. زلزال !!!

أتاريه الفيل أبو زلومة عمال يرقص في الأدغال

جوه الادغال الهندية .. الفيل بيغني أغينة

ويقول أنا وأنتي يا زلومتي نشبة سوى أبريق الشاي

أبريق الشاي أبريق الشاي

أنا انا أنا أبريق الشاي

أيدي كده بوزي كده

أصب الشاي وأرجع كده

وأعرف برضه يا كتاكيت أحكي حواديت

كان فيه في بلاد العاجيب

حفلة شاي لتلاتة حبايب

الدبة والبوبي والنملة ... والتعلب بره ملوش نايب

التعلب قدامهم فات و في ديله سبع لفات

كل الحفلة قالولوا يا تعلب أبعت عنا عشر يرادات

تعالوا بقه

فيها لأخفيها ... وأقلب فناجيلها وكراسيها .. وعلشان أغيظكم وأجننكم راح أخبي أبريق الشاي

أبريق الشاي أبريق الشاي

أنا انا أنا أبريق الشاي

أيدي كده بوزي كده

أصب الشاي وأرجع كده

وأعرف برضه يا كتاكيت أحكي حواديت

كان أيه فيه أيه وأحد مزكاتي

ومعاه صحبه مألفاتي

ركبوا في المركب عاموا عاموا عاموا عاموا لجزيرة القرصان زناتي

الإتنين كانوا طوال وعراض أنكمشوا بفعل الأمراض

بقوا كده من الأجواء الساقعة والسمك البلطي العضاض

القرصان قال أقفوا كويس

أأأ أحنا كده كويس

ياله نخش عليه ونميس و نغني أبريق الشاي

أبريق الشاي أبريق الشاي الغنوة ادي مش عارفها

ياله دلوقتي نألفها

أنا أنا أنا أبريق الشاي

أيدي كده بوزي كده

أصب الشاي وأرجع كده

أنا أنا أنا أبريق الشاي

أيدي كده بوزي كده

أصب الشاي وأرجع كده

دي يا ولاد قصة تأليف وكمان تلحين الغنوادى

أنا أنا أنا أبريق الشاي

أيدي كده بوزي كده

أصب الشاي وأرجع كده

أصب الشاي وأرجع كده

أصب الشاي وأرجع كدهو كدهووه

اغنية كلمات صلاح جاهين غناء سيد الملاح

ساعتها الاغنية دي بالنسبالى كانت قمة التكنولوجيا انو ازاي قدروا يعملوا واحد شبه سيد الملاح اللى في اخر الكليب ده وكنت بضحك اوي على القرصان وهوا بيرقص :) وكنت بخاف اويس من سيد الملاح شكله كان بيخوفنى وانا صغير :$

اغانى الاطفال دي ضرورية جدا للطفل في صغره خصوصا انو بيبقى في بدايه حياته ودي بتبقى وسيلة عشان تديله معلومات وتزود الحس الموسيقي عنده ده غير ان الاغاني دي بتبقى مليانة الوان ورقصات وحركة ودي حاجة الطفل بيحتاجها جدا وبتأثر في شخصيته بعد كدة

انا مش هنسى اغاني زي هم النم - الدنيا برد يا عم خليل - كوكو واوا - اش اش بتاعت عبدالمنعم مدبولى كان بيقول فيها اش اش اش انهاردة لانجة (يعني جديد ) ولو امبارح مش انهاردة مانجة سيبك من اللى يوش واسمع للى كمانجة - جدو يا جدو اللى كان بيغني فيها عبدالمنعم رياض - ماما ستو - وحاجات كتير

التلفزيون زمان كان بيقدم حاجات كتير اوي للطفل وكان بيعتبر مصدر تسلية وثقافة فعلى ... الذكريات دي فكرتنى بالاغنية اللى كان بيعلنوا بيها للاذاعة والتلفزيون كان بيبقى فيها مقطع بيقول ... كلو ثقافة وعلوم وفنون بيسلي تمام زي السيما التلفزيون التلفزيوووون

اعتقد التلفزيون كان مصدر تسلية لان مكنش فيه غيرو يعني انا فاكر مثلا كانت الناس تتجمع قدام مسلسل اوشين انكد مسلسل في حياة الناس .. وبرنامج تاكسي السهرة وبرنامج اخترنا لك وبرنامج حكاوي القهاوي بتاع سمية الاتربي كانت بتقول فيه مقدمة حلوة اوي .. لوكنت ناوي او كنت هاوي تعالى واسمع حكاوي القهاوي مش متأكد من الكلام بس متهيالى كان كدة ... وتتر البرنامج كان موسيقته حلوة اوي ... انا فاكر لما كانوا جايبين مغامرات جيليفر ...كان ساعتها حدث كبير جدا وكنت مسترهب بقى قمة التكنولوجيا ازاي يخلو راجل كبير كدة وحواليه ناس صغيرين كان جميل اوي ( ساعتها ) ... ده غير برنامج مواقف وطرائف اللى راجل كان بيذلنا وهوا بيقدمه يقلك برنامج مواقف وطرائف وعجائب وغرائب لفيت كل انحاء الدنيا وتعب عشان اجيبلكو اللقطات النادرة دي وهيا لا نادرة ولا يحزنون بس اهو الكدب ماشي في دمه

وعلى الفطارفى رمضان كانوا بيجيبوا مسلسل اطفال اسمه باور رانجرز كنت بحبه اوي زمان بس دلوقتى لقيته سخيف ... وكانوا بيجيبوا سلاحف النينجا وكانوا بيألفوا اسماء عربي مكان الاسماء الحقيقية مع انهم كانو محتفظين باسماء سلاحف النينجا بالانجليزي ..حاجة غريبة
ولا مازنجر يلاهوي كاناو بيدحكوا علينا واحنا صغيرين ويقلك لو خلصت اكلك هركبك مع مازنجر في طيارته ولما اخلص اكلى يقولي مازنجر جه وملاقكش :( فمشي :(

وبعدها عملوا جرندايزر والله يرحم ايام دوكفليد وصوره اللى كانت بتبقى في اللبان دي ونقعد نلزقها على الدواليب والسراير وبابا يزعقلنا
:D

وكان فيه كابتن ماجد اللى كذا مرة كنت بغيب من المدرسة عشان اشوفه الصبح ... وشئ اساسي لازم اتفرج على توم ان جيري اللى كنا بنقول عله ( توموجيري) كلمة على بعضها كدة :)

انما دلوقتى مفيش اغاني اطفال بالمرة وحاولوا يعملوا اغاني اطفال طلعت اغاني ممسوخة يعني ازاي اقارن اغنية بابا فين باغنية الشاطر عمر مفسش وجه للمقارنة اصلا حاجة خنيقة فعلا فترة التمانينات دي كان فيه اتجاه عالمى لادب الطفل يعني مش مصر هيا اللى كانت فركيكو يعني قبل الفترة دي مكنوش بيهتموا بالطفل انما بعد الفترة دي العالم اتقدم واحنا زي اي مجال تانى اكتفينا باللى وصلناله ... دلوقتى برامج الاطفار بتخنق الاطفال قبل الكبار حتى المذيع بيبقى قاعد مخنوق من العيال الصغيرة وناقص يقلع الحزام ويضربهم بيه فين ايام برنامج عروستى ونطى نطة يا دبدوبة مع انى مكنتش بحب البرنامج ده وانا صغير يعني بس اهو احسن من اللى موجود دلوقتى ده اذا كان فيه حاجة يعني دلوقتى بتخاطب الطفل

الطفل دلوقتى بيفتح عينه على الكومبيوتر والعاب مليانة عنف العيل يبقى عنده سنتين تلات سنين لسة يدوبك متعلم الكلام ويقلك انا دخلت المرحلة 5 اللى فيها البت المزة ...كلمة مزة دي عرفتها في اولى اعدادى باين ... ولا يمكن ساعتها كانوا لسة مخترعينها مش عارف .. المهم ان الجيل الجاي ده هيبقى وحش وافكاره مسمومة يعني هنبقى عواجيز وشاببنا زي الزفت هيبقى عندهم ميزة بس وهيا حرية التعبير وحرية الاعلام ... محدش بقى يخاف ومحدش بقى يتم التعتيم عليه اعلاميا وبقى ممكن تتأكد من صحة الخبر بسهولة

يلا ربنا يلطف بينا

سلام

كلام الناس ... بيقدم وبيأخر

بسم الله الرحمن الرحيم

لست مطالباً عزيزي القارئ بأن تقرأ هذا الموضوع بشمولية شديدة ... هذا ليس موضوعا مسبق التجهيز لذا لا تقرءه وانت مسبق الاقتناع سواء بصحته او عدمه ... كما ان هذه المقدمة ليست للتأثير عليك او محاولة منى لجذبك الى صفى الفكري ... انها فقط تأملات او لنقل انها بديهيات فخذ ما يتفق منها مع سلوكياتك واعتقادك ودع الغريب منها عنك لصاحبها فهو اولى بها . اصر على ان تفهم ان الغرض من هذه التدوينة شخصي بحت وان لم تستفد من هذا الكلام فلا عدوان على وليس لك الحق في ابداء اي اعتراض لانه سبق وان حذرت .

منذ فترة وجيزة وقعت في خطأ جسيم جدا وهو انى في احدى المرات بعد مناقشة حادة مع احدهم استسلمت للضعف الفكرى في النقاش على غير عادتي ... فوجدتنى وللمرة الاولى في حياتى اطلب منه ان يسكت ويغير الموضوع واعلنت انهزامى له على غير عادتى من التشبث بمحاولة فهم الاخر ... وما آلمنى حقا انى قمت بهذا الفعل خوفا من يغير كلامه شيئا في نفسي ... وكان هذا من اغرب ما حدثت به نفسي عندما انزويت بها افكر في اسباب هذه الانتكاسة الرهيبة التى امر بها ... فوجدت ان لاشئ يبعث على الخوف او الرهبة وان تصرفى كان نتيجة طبيعية لانى وقعت في مصيدة كنت دوما احذر نفسي من الوقوع فيها وهيا التشبث برأى من الاراء على عمى وجهل بالاراء الاخرى وان كانت خاطئة

بستغرب جدا البنى ادم اللى يكون هدفه الاول والاخير انو يحاول يخليك تعترف بانه على صواب وانك ( ان لم يكن باقى الناس برضه ) غلط في غلط والنوع ده من الناس يمكن هزمه بسهولة بمجرد انك تبينله انه صاحب الرأي الفريد واننا دراويش في تكيته والنوع ده لا يرجى منه اي خير ولا تستفيد ابدا بنقاشك معاه .

ونوع تاني يحكم على الناس بمجرد الرؤية والمظهر فاللى لابس جلابية بالنسباله شيخ واللى يصلي في المسجد بالنسباله علامة عصره واللى حافظ القران ولو سور قليلة فده في الجنة وش.... وطبعا منيش محتاج اقول انه بيفتكر ان اللى مبيصليش ده كافر ... وفيه فيرجن معدل من الناس دي يؤمن تمام الايمان بانك يا تبقى زي الشيخ محمد حسان يا اما ابقى قابلنى ان دخلت الجنة والنوع ده بيوجع دماغك يوميا انه بيفهم الناس من النظرة الاولى ومؤهل تماما انه يحللك شخصيتك بول وبراز ان استلزم الامر عشان يقلك انت فيك ايه وانك كتاب مفتوح ومراية 40 × 60 وانه بسلامته يعاني من انه يفهم الناس ويقلهم على عيوبهم وعادة ما تنتهي المناقشة بان يطلب منى اقرار مواهبه بسؤال ... ها ايه رايك مش انفع استاذ علم نفس ؟

نوع تالت يميل الى تأليه كل ما هو معجب به فلا تجرؤ على ان تقول ان فيه شيخ يقرى القران احسن من الشيخ عبدالباسط ولا واعظ اعظم من الشيخ محمد حسان وامك اكيد مش راضية عنك لما تقوله ان فيه لعبة كورة احسن من الفيفا ..... متستغربش كلامى وحاول تفهمه لو سمحت
نوع رابع يسخر منك ليل نهار وقلك انا عايز افهم انت على قدا ما بتصلى وتصوم بس بيتنجح بمقبول وايه علاقة العبادة بالدراسة انا عايز افهم ... معنى كدة ان الكافر ربنا بيسقطه ( افلا تعقلون )

على غير المتوقع لما بدأت اتعمق في فهم ديني وتقربي من ربنا بدأ الناس يحطونى في قالب جديد تماما ففجأة من يوم وليلة اصبحت عم الشيخ عبدالله ... الموضوع كان موجود من زمان بس بدأ بقى ياخد طابع رسمي لما مبقتش افوت صلاةالتراويح في رمضان وبدأت اواظب على الصلاة في المسجد بعد رمضان ... مع انى كنت مواظب على الصلاة في البيت او الكلية ولكن فرقت مع الناس اوي حكاية الصلاة في الجامع ...

في رمضان اللى فات ده حياتى اتغيرت اوي .. من ناحيتي نويت بعد كدة انى افهم الدين ده صح ومن ناحية تانية بدأت الناس تهاجمنى فمثلا ممكن يتبصلك باستغراب ممكن يوصل لاحتقار احيانا لما تقول لفلان هعدى عليك بعد المغرب مثلا ولما يقلك اقابلك فين تقله هقابلك في الجامع اللى عندكو الاقيه يضايق فعلا ويقول ربنا يتقبل يا عم الشيخ ... ساعات مبيقلهاش ببقه لكن كتير من الناس بيقولها ..... يعني مش واجب عليا كل مرة انى ابين للناس يا جماعة انه لا يستحق احد لقب شيخ في عصرنا الحالى الا لما يكون واحد متخرج من الازهر او من معاهد اعداد الدعاه المهم يبقى معاه شئ يؤهله انو يبقى شيخ مينفعش ابدأ اقول على واحد شيخ لمجرد انوبيصلى او بيقرى قران او انا " بشوفه " بيعمل كدة

واحد من الناس قالى اللى انت فيه ده يابنى مرحلة وتعدي ... سبحن الله يعني كدة بقوا يصنفوا التدين على انه نزوة عابرة زيها زي شرب الحشيش ومصاحبة البنات ..مش دي فترة وهتعدي برضه ؟

وان خلصت من دول يجيلي ناس تانية بيحاول بس انو يعمل معاك مناظرة ويكون كلامى ليه ... انت شفتنى قبل ما
" استشيخ " على حد تعبيرك كنت بشرب سجاير مثلا وبطلت او كنت مصاحب بنات ودلوقتى تبت وانبت هل كنت بتشوفنى ليل نهار عمال اسب واشتم يقلك لا ..طيب طلاما لا ايه الضرر اللى طايلك من انى بواظب على الصلاة في المسجد

حاجة غريبة جدا انى احس بخوف وانا بقرى قران او لما اعوز اقرى قران بحاول اشوف مكان مفهوش حد خوفا لحد يتريق عليا او يحطنى في قالب انا المفروض ما اتحطش فيه وفي نفس الوقت ده بدأ يجذب ناس ليا عمرهم ما كانوا بيسلموا عليا ولا يعبرونى ودلوقتى بقيت اشوفه يضحكلى وفجأة بقيت حبيبه في الله وياريت كمان اربي دقنى وكفاية " الضلال " المبين اللى كنت فيه ... طيب يا اخي الفاضل يعني هل مجرد وجودى في المسجد جنبك خلاك تعاملنى بالشكل ده طب لو انك مطمئن بالايمان كان فين ده من زمان ولا دلوقتى بقيت تصنفنى وتحطنى في قالب " الاخ"
فين تقوى الله ومعاملة الناس لوجه الله ... لا يعرف ما في نفس الانسان الا الله يبقى منحكمش على الظاهر ونسيب الناس في حالها احسن

هل من الطبيعي ومن الفطرى انى المفروض ادافع عن نفسي عشان بصلى وبقرى قران وببين اهتمامى بالفلسفة الاسلامية والتفكر في الله ... يعني المفروض اكتم ده على اساس ان كفار قريش محاصرين البيت

هل من الطبيعي اتعرض للهجوم لما زي اي انسان طبيعي عايش حياته الطبيعية بيضحك ويغضب وممكن يتفرج على فيلم او يسمع اغنية او يقول رايه في حاجة او يشجع فريق معين .. واحد مرة سمعنى بقول لواحد عايزين نروح ساقية الصاوي خدنى على جنب بعدها وبيقلى انت مش كان ربنا تاب عليك ساقية الصاوي ايه اللى عايز تروحها على اساس ان ساقية الصاوي دي porno club مثلا حاجة غريبة جدا

مين اللى قال انك عشان شفتنى بصلى الصلوات اللى هيا اصلا فرض تحطنى في القالب ده يعني المفروض ان ده كدة خلاص غاية الايمان امال لو كنت بصلى النوافل والسنن الرواتب وقيام الليل كنت قلت ايه
مين قال ان الصيام هوا صيام رمضان بس وانت مالك اصلا اصوم اتنين وخميس ولا لا ومنيش مجبر انى اقلك الاسباب كمان ... الناس لما تعرف انى صايم بالرغم انى بخبي ده بتبصلى بصة غريبة اوي بجد يعني صيام النوافل ده غاية الايمان في نظرك ولا زلام دقنى طوله امترين عشان متستغربش صيامي

واحد يقلى استعينوا على قضاء حوائجكم بالكتمان ... بس هل الكتمان يتدرج تحته كتمان في العبادة ... ده حاجة ظاهرة ومطلوب مننا اننا نظهرها منيش انا في امريكا ولا هولندا عشان اتكسف من ديني بالعكس الدول دي ممكن تلاقى فيها هناك حرية عبادة اكتر من هنا ... اللى انا فيه ده مش تدين ومينفعش تحطنى في القالب ده ليل نهار ... ليه بتضايق لما تلاقيني بقول نكتة ليه تضايق لما اقلك انى مش هخش الفيلم الفلانى عشان فيه لقطات خارجة ...طب ما انا مكنتش بخش زمان قبل ما ابقى عم " الشيخ " افلام هابطة او فيها مناظر ليه دلوقتى اتنبهت فجأة انى مبخشش الافلام دي ... عشان طلعلى علامة في جبهتى !!!

ياربى ايه ده... ليه انا مضطر ادافع عن نفسي في حاجة بديهية ومسلم بيها اللى انا بعمله ده حاجة زي ال minimum requirements يعني طبيعي جدا ان رصيدي في الحسنات يبقى صفر وعادي جدا لومدخلتش الجنة ( اللهم احفظنا ) بعد ده كله ..لانى بعمل اللى المفروض عليا اعمله وحتى لو كل يوم بقوم الليل ومش مفوت طاعة مبعملهاش يكون ليا الحق انى اعتقد انى بعملى ده هخش الجنة كدة يبقى انا بضحك على نفسي وعلى اللى حواليا

انا متشتت اوي وكل زعلى انى مضطر ادافع عن نفسي وبتهاجم واللى بيشرب خمرة وحشيش وكل يوم مع واحدة في الحرام بيكون ليه هيبة ولايضطر على الاطلاق انو يدافع عن نفسه لانه عمره ما هيتعرض للهجوم

الطف بيا يارب واهديني وثبتني وارحمنى من نفسي ... يارب عايز اقرب ليك اوي عايز ابقى عبد بمعنى عبد لو الناس فاهمة ان عبوديتك عز مش هيبقى ده حالنا يارب مش عايز اكتر من رضاك لان اي حاجة في سخطك ملهاش لازمة يارب اهديني وثبتني وصبرنى على الابتلاء يارب ... يارب مش عايز اكتر من انى ابقى في حالى والناس كمان في حالها ويارب متخليش الغرور يسترب لنفسي ... امين


الرجاء التركيز في عنوان الموضوع كويس اوي وياريت متاخدوهوش على ان الغرض منه الاستسلام لكلام الناس .... ليه معنى تاني خالص انا قاصده

سلام

simply complicated

بسم الله الرحمن الرحيم

من ربي ؟ قد يفنى عمرى ولا اجد اجابة لهذا السؤال .... ربي عظيم ... عظيم جدا ... عظيم لدرجة ان عقلى لا يقدر على استيعاب اسباب عظمته ... هل هو اقصور بعقلى ام هي عظمة لاترقى اليها عظمة ؟

لا ادرى من اين ابدأ ... كم من بشر قبلى حاولوا الوصول ولم يستطيعوا ؟ .... وهل استطاع احد ؟

اقنع نفسي بان الله قسم بعض من عظمته على خلقه فتجد الكمال في كل خلقه بهذا الجزء من العظمة فلو ادركنا عظمته كلية .. فمن يدريك اذا ان عقولنا وقلوبنا البشرية ستتحمل هذه العظمة ... ولو افترضنا حدوث ما ذكر آنفا ... حتما سنشعر بالتقصير لاننا لن نوفى حق هذه العظمة ولن ندرك لها قدرا

ماذا اراد الله ؟ .... ولو انه ليس بحاجة لذلك .... فما الذى يمنعه من ان نكون عبيدا مسخرين في البدء ... الم تسأل نفسك لماذا لم يخلقنا اساسا عابدين له ... ولماذا اساسا خلق لنا كونا وماء وهواء وصحراء وبساتين وشتاء وصيف ونهار وليل ... لو اننا خلقنا ووجدنا انفسنا مسخرين لخالق هذا الكون لما استعجبنا ولا استغربنا ... كيف نتعجب ونحن عبيد لمن خلق كل هذا .... لماذا نذنب بعد كل هذا؟ ... ولماذا يغفر الله ؟ .... قد تجد مبررا لان تذنب ... مثلا ان تقول انه لا يوجد عقابا فوريا للمذنب وان الذنب نفسه يتساوى فيه امثالك من البشر فكلهم مذنبون ولا يستطيع احد ان يطلع علينا في الصباح ويقول انا لم اذنب يوما ... ولكن لماذا يغفر الله ... بكل بساطة لانه غفور ... ولماذا هو غفور سبحانه وتعالى .. لانه رحيم هل انت متخيل رحمته ... هل لمستها يوما... هل شممتها ... او تحسستها باصبعك ... لكن لن يدركها عقلك يوما ... عزيزي القارئ لا تسألنى لماذا هو رحيم ؟ لان عقلى لا يدرك هذا التساؤل اصلا

عندما بدأ الانسان في التفكير ومقارنة النتائج والمقدمات اهمل مقدما لم يجد له نتيجة ... وتعامل مع الكون على هذا الاساس فضل وغوى وايضا ازداد ايمانا وتسليما وعبودية ... انها فكرة اللانهائية
كل شئ لم يستطيع الانسان تخيله او التعامل معه اعطاه اسم لانهائي او مجهول ... ما هو الانهائي وما هو المجهول...لن تجد اجاب هي في الاصل اشياء وضعت للشياء التى لم نجد لها اجابة ... لو اننا علمنا مجهولا ما فسيبقى مجهولا لدينا لماذا كان مجهول في الاصل ولو اننا عرفنا حقيقة اللا نهائية فسيظل هناك دائما لا نهائية وما بعدها ايضا

سبحانك عصيتك ... وعندما عصيتك عصيتك جاهلا عالما ... جاهلا لاطلاعك وطاعتك ... ولكنى كنت عالما دائما انك غفور
سلطت علينا عالم بضعفنا فان لم نتقو بك ازددنا ضعفا .... قوي عزيز جبار منتقم .. رحمن رحيم رؤوف لطيف
ليس كمثلك شئ وما هوا ذا الشئ الذى سيكون مثلك حتما ستكون انت خالقه لذلك ستبقى لا مثلك شئ ... لا تأخذك غفوة ولا نومة مهما قلت او قصرت ... كيف يحدث ذلك وانت صاحب المسافر وخالق الاجنة .. كيف يحدث ذلك وانت شافى المريض رازق للسمك في الماء وللطير في الهواء فشكروك ولما رزقت الانسان عصاك وكفر بك ولم يعرف لك قدرك فحلمت عليه ابلغ ما يكون الحلم وكلما ازداد معصية ازددت حلما ربي احمدك على كل نعمة انعمتها علي ولم احصها فان احصيت نعمك ما احصيت شكرك عليها لذلك ابقيتها لا تحصى ولا تعد ... لم نحصي عليك ثناء يا ارحم الراحمين ولكن علمتنا ما تثني به على نفسك ... فانت عالم للغيب وعالم للشهادة ... ملك .. قدوس .. سلام .. مؤمن ... مهيمن .. عزيز .. جبار ... متكبر سبحانك كيف اشرك بك الانسان وقد علم ذلك منك ولم ينكره عليك
وحدك الخالق ووحدك البارئ ووحدك المصور وحدك الصمد عند الشدائد والمستعان عند الكربات

ببساطة انت الله ... ولكن هذا الاسم معقد علي ان افهم مغزاه

متدينيش عقلك .. ولاتمشيش حافى

بسم الله الرحمن الرحيم

بتعجبنى جدا مواقف سيدنا ابراهيم في القرآن ... يعني مواقفه غالبا ما بيبقى فيها حوار منطقى ودائما ما يسحق اعداءه بالحجة المنطقية .. سيدنا ابراهيم يعتبر اكثر نبي مفضل ليا بعد سيدنا محمد صلى الله عليه وسلم ... في نظري كل الانبياء في كفة وسيدنا محمد في كفة تانية لان العناد والتعب اللى قابله سيدنا محمد كان اكبر من اي عناد وتعب قابله نبي تاني والرسول قال عن نفسه كدة ( انا سيد ولد آدم ولافخر ) ده في واقعة لما الصحابة قعدوا يفاضلوا بين الانبياء ... واللى عايز الحديث بطوله يقلى

سيدنا ابراهيم عجبني موقفين ليه اوي في الاقناع و الاقتناع
الاول لما رد على النمرود لما ادعى الاخير انه اله ( أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ أَنْ آتَاهُ اللَّهُ الْمُلْكَ إِذْ قَالَ إِبْرَاهِيمُ رَبِّيَ الَّذِي يُحْيِي وَيُمِيتُ قَالَ أَنَا أُحْيِي وَأُمِيتُ قَالَ إِبْرَاهِيمُ فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ فَبُهِتَ الَّذِي كَفَرَ وَاللَّهُ لاَ يَهْدِي الْقَوْمَ الظَّالِمِينَ) ياريت تركزوا في تسلسل الكلام والاقناع وركزوا اوي في لفظ ( فبهت الذى كفر ) ده احنا حتى لما بنفحم حد بنقول ( ده اتحرق ) او بنقول ( رجع قفاه يأمر عيش )

الموقف التاني لما طلب من ربنا يوريه كيفية احياء الموتى .. وده لا ينبغي الا لنبي ومن رايي سيدنا ابراهيم مطلبش كدة من ربنا الا لما وصل لمرحلة عالية جدا من الايمان بالله مش العكس يعني سيدنا ابراهيم محتجش كدة عشان يأكد ايمانه .. ولكن ده جه نتيجة لقوة ايمانه وانه عايز يوصل لمرحلة الاطمئنان ( وَإِذْ قَالَ إِبْرَاهِيمُ رَبِّ أَرِنِي كَيْفَ تُحْيِي الْمَوْتَى قَالَ أَوَلَمْ تُؤْمِن قَالَ بَلَى وَلَكِن لِّيَطْمَئِنَّ قَلْبِي قَالَ فَخُذْ أَرْبَعَةً مِّنَ الطَّيْرِ فَصُرْهُنَّ إِلَيْكَ ثُمَّ اجْعَلْ عَلَى كُلِّ جَبَلٍ مِّنْهُنَّ جُزْءًا ثُمَّ ادْعُهُنَّ يَأْتِينَكَ سَعْيًا وَاعْلَمْ أَنَّ اللَّهَ عَزِيزٌ حَكِيمٌ )

انا اللى حاوليا غالبا من النوع اللى مش بيقتنع الا بالطريقة دي يعني بيتطلب منى وقت ومجهود كبير انى اقعد اجيب حجج منطقية عشان اقنع اصحابي او زمايلى بحاجة .. مش شرط حاجة في الدين ( ده اذا مكنش غالبا ) ولكن اي حاجة تانية من اول محاولة اقناعهم بمدى اهمية عدم التف ( الصق ) على الارض مرورا بان البص على البنات غلط سواء على الطبيعة او الفرجة على الافلام الاباحية انتهاءا بانك لازم تصلى ... وكل مرة ربنا يوفقنى واقنعهم بس اللى في دماغهم في دماغهم .... وارجع تانى لوجع الدماغ تانى لما حد فيهم يقلى اقنعنى وانا انفذ ولما اوجع دماغى واضيع وقتى معاه ... واسأله في الاخر اقتنعت ؟ ... يقلى اقتنعت ... او يقلى انا عارف انى غلط بس مش بأيدي حاجة اعملها ... هنا بيخلص دوري ويجي دوره هوا انو مش عايز يصلح من نفسه

انا شخصيا مبحبش الجدال خصوصا اذا كان مع اشخاص سفسطائيين يجادلون من اجل الجدال فقط او مع اشخاص prethoght او مبرمجين دماغهم انهم يدخلوا الحوار ده من غير ما يكونوا ناويين يغيروا وجهة نظرهم اذا اكتشفوا انها غلط

لكن مواقف سيدنا ابراهيم اللى في القران كلها بتدلل على اهمية التفكير المنطقى ... وان لو الانسان فكر منطقيا وقاس استنتاجاته على الفطرة هيوصل لفكرة الهداية ... ده باذن الله طبعا ... وان سيدنا ابراهيم عمل كدة بناءا على توفيق الهي محض ( وَكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالأَرْضِ وَلِيَكُونَ مِنَ الْمُوقِنِينَ )

موقف سيدنا ابراهيم وهوا صغير في اكتشاف الله ... اول حاجة اقر من جواه ان الاصنام دي متنفعش الهة
وانو اصلا مينفعش للكون ده اكتر من اله ... ( وَإِذْ قَالَ إِبْرَاهِيمُ لِأَبِيهِ آزَرَ أَتَتَّخِذُ أَصْنَامًا آلِهَةً إِنِّي أَرَاكَ وَقَوْمَكَ فِي ضَلالٍ مُّبِينٍ )
قعد يتأمل وحكم المنطق في استنتاجاته ... شاف نجم قال ده ربي ... بس النجم لما جه الصبح مبقاش موجود قال في نفسه ازاي اله مش موجود الا بالليل بس ... قال يبقى القمر ربي لانه اكثر انارة ... بس القمر نفس حكاية النجوم مش بيظهر الا بالليل ... قال يبقى الشمس عيا الاله الفضل لانها اكبر وبتدينا حرارة ... بس الشمس برضه غابت وجه القمر بعدها ... ايقن ان رب الكون اكبر من انو يبقى شمس بتغرب او قمر او نجوم (فَلَمَّا جَنَّ عَلَيْهِ اللَّيْلُ رَأَى كَوْكَبًا قَالَ هَذَا رَبِّي فَلَمَّا أَفَلَ قَالَ لا أُحِبُّ الآفِلِينَ * فَلَمَّا رَأَى الْقَمَرَ بَازِغًا قَالَ هَذَا رَبِّي فَلَمَّا أَفَلَ قَالَ لَئِن لَّمْ يَهْدِنِي رَبِّي لأكُونَنَّ مِنَ الْقَوْمِ الضَّالِّينَ *فَلَمَّا رَأَى الشَّمْسَ بَازِغَةً قَالَ هَذَا رَبِّي هَذَا أَكْبَرُ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ )
قاس استنتاجه على الفطرة ووصل لنتيجة ان فيه اله واحد للكون ده وانه هوا الوحيد صاحب الهداية ( إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالأَرْضَ حَنِيفًا وَمَا أَنَاْ مِنَ الْمُشْرِكِينَ )
ولا حظوا كلمة الذي فطر السموات ... معرفش لسة اسم الله ولكن استدل على اسمه من افعاله لان محدش قادر على انو يخلق الكون ده ( السموات والارض ) الا اللى يستحق العبادة مش الاصنام اللى احنا بنعملها بادينا

بعد كدة ... ربنا اختاره للرسالة ولقنه الحجة ووفقه في مواقفه مع المشركين (وَلَقَدْ آتَيْنَا إِبْرَاهِيمَ رُشْدَهُ مِن قَبْلُ وَكُنَّا بِه عَالِمِينَ ) اول ما بدأ بدأ بابوه بالظبط زي ما كان اول المسلمين هما اهل بيت الرسول زوجته خديجة وعلى رضي الله عنه قال لابوه ازاي تعبدوا اللى انتم عاملينه بايديكم وده دلالة استخدام لفظ تماثيل بدلا من اصنام او الهة ( إِذْ قَالَ لِأَبِيهِ وَقَوْمِهِ مَا هَذِهِ التَّمَاثِيلُ الَّتِي أَنتُمْ لَهَا عَاكِفُونَ) ابوه ملقاش غير الرد اللى كل المشركين بيردوه انهم فتحوا عينهم على الدنيا لقيوا ابهاتهم بيعبدوا فعبدوا ... وده غلط ... انا كذا مرة تخيلت نفسي لو كنت في عصر الجاهلية وكنت بعبد اصنام مثلا (استغفر الله العظيم ) كانت حجتى ساعتها اذا كل اللى حواليا كدة ايه اللى يجبرني انى اصدق الراجل اللى بيقول انه رسول لله ... ولكن الرسول ده معاه ايات + ان الرسول ده ليه سمعة طيبة من قبل كدة ومحدش خد عليه قبل كدة انه كان بيكدب ... ومتأكد انه مش بيعمل كدة عشان الشهرة لانه مشهور كفاية في مناسبتين : اولهم انه اتولد عام الفيل وتانى حاجة انه حل الخلاف لما كانت قريش مختلفة على وضع الحر الاسود ... يبقى اكيد حد سحره لانه مش في عقله ... يرد عليا السحرة ويقولوا ان ده مش سحر .... يبقى الراجل ده حد بيعلمه الحاجات دي من اصحاب الراسالات السماوية اللى قبله ... بس المشكلة ان الوحيد اللى موجود في مكة عارف الكلام ده مش بيتكلم عربي يبقى الرسول هيفهم منه ازاي ... يبقى ده شعر ... بس محمد صلى الله عليه وسلم مش بيعرف شعر ومخدناش عليه قبل كدة انه شاعر .... يبقى ساعتها انا استنفذت حججي المنطقية ووجب عليا انى اتبع الرسول ده وكل اللى يقلى عليه ( على قد ما اقدر )
نرجع لسيدنا ابراهيم ونكمل حواره المنطقى سدينا ابراهيم رد على ابوه قاله انكم بتضحكوا على نفسكم وعارفين ان الاصنام اللي بتعبدوها دي مش الهة بس انتم عبدتوها لانها مش بتلزمكم بمثقلات العبادة وورثتوها كابر عن كابر وانتم عارفين ان ده غلط ( قَالُوا وَجَدْنَا آبَاءَنَا لَهَا عَابِدِينَ * قَالَ لَقَدْ كُنتُمْ أَنتُمْ وَآبَاؤُكُمْ فِي ضَلالٍ مُّبِينٍ ) ردوا عليه وقالوا نفس اللى قالته قريش وهوا انه يثبتلهم وجهة نظره ( الكفر ليه سمة واحدة على فكرة كل الكفار بحس انهم بيفكروا زي بعض .. ومن الغباء انهم مش بيتعلموا من اللى قبلهم ) (قَالُوا أَجِئْتَنَا بِالْحَقِّ أَمْ أَنتَ مِنَ اللاَّعِبِينَ ) رد عليهم وهوا ان الاله الاحق بالعبادة هو اللي خلقني مش اللى انا خلقته ( قَالَ بَل رَّبُّكُمْ رَبُّ السَّمَاوَاتِ وَالأَرْضِ الَّذِي فَطَرَهُنَّ وَأَنَا عَلَى ذَلِكُم مِّنَ الشَّاهِدِينَ )
دي كدة متسلسلات منطقية كلها ... افحمهم سيدنا ابراهيم بالحجة .. وكدة احنا خلصنا مرحلة التدبر في الكون وجه دور مرحلة ادع الى سبيل ربك بالحكمة والموعظة الحسنة ولكن من الواجب انه يغير اسلوب الدعوة دي ويوصل لمرحلة اخرى من الاقناع المنطقى ربنا الهمه انه يعمل تجربة بديهية بسيطة ويخليهم يعترفوا على نفسهم عشان يلغي فكرة انهم يبقى ليهم حجة في عبادة غير الله ( وَتَاللَّهِ لَأَكِيدَنَّ أَصْنَامَكُم بَعْدَ أَن تُوَلُّوا مُدْبِرِين) كسر الالهة بتاعتهم وحط الفاس على اكبر صنم فيهم ... لما جه الناس قالوا مين اللى عمل كدة وعرفوا ان اللى عمل كدة سيدنا ابراهيم ( قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ ) ... عملوله محاكمة ( قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ) يعني تخيلوا محاكمة فعلية ناس اتهموا سيدنا ابراهيم فهيئة المحكة بتعرض الادعاء ده ( قَالُوا أَأَنتَ فَعَلْتَ هَذَا بِآلِهَتِنَا يَا إِبْرَاهِيمُ ) ... قالهم لو كانوا دول الهة مش كانوا هيحموا نفسهم ... كمان على الاقل الصنم اللى فاضل كان هيقلكم من اللى عمل كدة ( قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِن كَانُوا يَنطِقُونَ) وهنا يجي اثبات غباءهم ( فَرَجَعُوا إِلَى أَنفُسِهِمْ فَقَالُوا إِنَّكُمْ أَنتُمُ الظَّالِمُونَ * ثُمَّ نُكِسُوا عَلَى رُؤُوسِهِمْ لَقَدْ عَلِمْتَ مَا هَؤُلاء يَنطِقُونَ) ومن غباءهم انهم عارفين الصح واتكبروا ( قَالَ أَفَتَعْبُدُونَ مِن دُونِ اللَّهِ مَا لا يَنفَعُكُمْ شَيْئًا وَلا يَضُرُّكُمْ ) ومن غباءهم انهم اتجهوا للعنف لما معرفوش يقابلوا حجته بالحجة اوقع وخافوا لتروح مهابتهم من عيون قومهم ققالوا نقتله وده عبارة عن ظلم وغباء في آن واحد ( قَالُوا حَرِّقُوهُ وَانصُرُوا آلِهَتَكُمْ إِن كُنتُمْ فَاعِلِينَ) ... وده بيحصل في مواقف كتير لما بجادل حد ويتزنق وميعرفش يرد يشتم او يغضب .. الاية اللى جاية دي سبحن الله بتبقى تمثيل لحالتى لما بزهق من كتر الجدال اللى ملوش فايدة او انى وصلت لمرحلة من الخنقة ان اللى قدامى مقتنع باللى بقوله بس بيكابر ( أُفٍّ لَّكُمْ وَلِمَا تَعْبُدُونَ مِن دُونِ اللَّهِ ) واخدين بالكوا ربنا بيقول ايه ( أَفَلا تَعْقِلُونَ ) حاجة تانية حصلت برضو بالشكل ده مع قوم نوح ... هذكر الايات من غير شرح لانها واضحة كمان الموضوع هيطول منى (وَلَقَدْ أَرْسَلْنَا نُوحًا إِلَى قَوْمِهِ إِنِّي لَكُمْ نَذِيرٌ مُّبِينٌ *أَن لاَّ تَعْبُدُواْ إِلاَّ اللَّهَ إِنِّيَ أَخَافُ عَلَيْكُمْ عَذَابَ يَوْمٍ أَلِيمٍ* فَقَالَ الْمَلأُ الَّذِينَ كَفَرُواْ مِن قَوْمِهِ مَا نَرَاكَ إِلاَّ بَشَرًا مِّثْلَنَا وَمَا نَرَاكَ اتَّبَعَكَ إِلاَّ الَّذِينَ هُمْ أَرَاذِلُنَا بَادِيَ الرَّأْيِ وَمَا نَرَى لَكُمْ عَلَيْنَا مِن فَضْلٍ بَلْ نَظُنُّكُمْ كَاذِبِينَ *قَالَ يَا قَوْمِ أَرَأَيْتُمْ إِن كُنتُ عَلَى بَيِّنَةٍ مِّن رَّبِّيَ وَآتَانِي رَحْمَةً مِّنْ عِندِهِ فَعُمِّيَتْ عَلَيْكُمْ أَنُلْزِمُكُمُوهَا وَأَنتُمْ لَهَا كَارِهُونَ *وَيَا قَوْمِ لا أَسْأَلُكُمْ عَلَيْهِ مَالاً إِنْ أَجْرِيَ إِلاَّ عَلَى اللَّهِ وَمَا أَنَاْ بِطَارِدِ الَّذِينَ آمَنُواْ إِنَّهُم مُّلاقُوا رَبِّهِمْ وَلَكِنِّيَ أَرَاكُمْ قَوْمًا تَجْهَلُون * وَيَا قَوْمِ مَن يَنصُرُنِي مِنَ اللَّهِ إِن طَرَدتُّهُمْ أَفَلاَ تَذَكَّرُونَ *وَلاَ أَقُولُ لَكُمْ عِندِي خَزَائِنُ اللَّهِ وَلاَ أَعْلَمُ الْغَيْبَ وَلاَ أَقُولُ إِنِّي مَلَكٌ وَلاَ أَقُولُ لِلَّذِينَ تَزْدَرِي أَعْيُنُكُمْ لَن يُؤْتِيَهُمُ اللَّهُ خَيْرًا اللَّهُ أَعْلَمُ بِمَا فِي أَنفُسِهِمْ إِنِّي إِذًا لَّمِنَ الظَّالِمِينَ ) كل دي حجج ولما معرفوش يردوا قالوا (قَالُواْ يَا نُوحُ قَدْ جَادَلْتَنَا فَأَكْثَرْتَ جِدَالَنَا فَأْتِنَا بِمَا تَعِدُنَا إِن كُنتَ مِنَ الصَّادِقِينَ)

ياللى عايزين تقاطعوا بضايع .. اساسا الدنمارك مش هتقف عليكوا .. وياللى عايزين تفجروا الدنمارك وياللى عايزين تقطعوا علاقات مش موجودة اساسا ... فكروا كويس وانتو تغلبوهم بالحجة
انما احنا كدة العالم بيضحك علينا .... اعملوا مظاهرات اه وقاطعوا منتجات .. بس متخلوش الموقفين دول تسجيل موقف وخلاص يعني متعملوش مظاهرة عشان الناس تقول اننا عملنا .. لا اعملوا مظاهرات مش مظاهرة واحدة عشان الادباء والكتاب يبدأوا يشغلوا مخهم ويقابلوا الاساءة بالحجة وكفاية بقى كلام عن الحضرى اللى هرب ورجع .. ارحمونا ربنا يرحمكم


سلام

اااااه يا عيني ... مذكرات قرصان

بسم الله الرحمن الرحيم

من فترة عيني اليمين طلع فيها كلكيعة كدة في الجفن وطبعا بصفتى كسول جدا ومهمل اوي في صحتى ( وده غلط طبعا ) الى ان استفحل الامر والكلكيعة دي زادت واحمرت اوي وشكلها بقى مخيف قلت مبدهاش بقى نروح للدكتور وخلاص واكيد هيكتبلى مرهم تراميسين ومضاد حيوي وخلاص
اخويا اسلام دكتور اسنان امتياز بيقضى الامتياز بتاعه في مركز الاسنان اللى في مستشفى الرمد اللى عندنا في بنها
ومش عارف ايه لازمة انهم يعملوا عيادات اسنان في مستشفى رمد .... المهم رحت معاه الصبح ودخلنا على دكتور طيب اوي كدة قالى وريني عينك وريتله الكلكيعة المهم خدنى على غفلة واتكى عليها جامد ... جسمي ارتد مرة واحدة كدة وكنت متغاظ منه اوي انو عمل كدة وحسيت انو مش بيفهم ... لكن طلع ان كدة بيشتغل صح وقعدت اقول اليه اللى ودانى مستشفى حكومى بس كنت رحت عيادة وخلاص

وطبعا بقى راسم في دماغى ان المستشفى قذرة والممرضات مهملات والعيادة هتبقى زحمة
انما شفت عكس ده تماما الممرضات لابسين لبس نضيف والعيادات نضيفة جدا والادوات محطوطة في افران التعقيم وكله تمام التمام اللى كنت متوقعه وحصل ان الدنيا كانت زحمة وده شئ طبيعة نظرا لان الكشف بجنيه
تخيلوا الجنيه اللى بيشترى جرنان او يشترى 4 طعميات او يشترى شقتين فول او 20 لبانة تشكلتس او كيسين شيبس مش بتاع احمد السقا لا الكيس اللى بيبقى فيه خمسة او ست شبسيات دول مش عارف بيعدوهم ازاي

المهم اول ما دخلت العيادة اكتشفت مدى تعلق الدكاترة باخويا كل واحدة من دول صباح الخير يا دكتور اسلام ... اخوك ده ؟ ..... وتتنرفز بقى لما السؤال يبقى متكرر برغم الشبه الواضح والفظيع بينا يعني ... معتقدش يعني اخويا هيكون جايب معاه واحد صاحبه يقزقزوا لب في المستشفى ... انا اساسا بتخنق من ان الكلمة تتقال مية مرة في ربع ساعة مثلا لما اخويا الكبير محمود كان بيتجوز كان هوا مرمى في الكوشة وانا بقى استحمل تقل وغلاسة وفظاعة كلمة الف مبروك ... انا مالى انا اسلم على 200 او 300 واحد بيقولولى الف مبروك وعقبالك ما يقولوهالو هوا وخلاص

المهم دكتورة غلسة بقى شابة برضو متهيالى انها امتياز برضو او لسة متعينة جديد ومحجبة حجاب مشخلع ومن كمية المكياج اللى هيا حاطاها انا متهيالى انها صحيت من الساعة 6 الصبح عشان تلحق تعمل المكياج ... والله الناس دي بتتعب ... قلت مكياج مكياج اهو تدب المشرط في عيني وخلاص ونخلص من الفيلم الهندي ده ... شوية قالتلى نام على السرير قلتلها ده عيني ايه لازمته النوم على السرير؟؟ .. . المهم قصرت معاها في الكلام لانها كانت رغاية اوي قامت قايدة الاباجورة في عينى ... مش عارف عاملينها يعمو بيها العيانين ولا ايه ولا الغرض منها انهم يزغللوا بيها عين الناس عشان ميشوفوش العك اللى بيتعك في عينه ...

المهم ريحة المكياج كانت وحشة اوي قصدي ان كل مكياج كان ليه ريحة فكلو عمل ميكس وانتج ريحة مقززة اوي وانا اساسا بتضايق من ريحة اي حاكة كيماوية وضوافرها كانت طويلة ... اوي والله قعدت اتخيل ان ضوافرها هتخش تخرم عيني كنت مضايق اوي وقلت يارب خلصنى من الضيق ده .. ومكملتش الجملة ولقيت الدكتور الطيب الاولانى ده دخل مسكت فيه قلتله اعملى عيني انت والنبي بلاش هيا ... معرفش انا قلت الكلمة ازاي بس الدكتورة التانية اتكسفت كدة وراحت قعدت على المكتب ... قالى متقلقش اصلا محدش بيعمل حاجة وانا موجود

المهم الدكتور قعد يرغي معايا شوية وانت في كلية ايه وبتاع وقعد يشكرلى في قسم ميكانيكا وبتاع .. اتاريه بيستخرف عقلى وعمال يقطع في عيني اول ما المشرط غرز في جفنى جالى نفس الشعور اللى بيجلك لما تاخد حقنة الم سريع وحاد وقصير ... شوية الاقى الراجل عمال يزود ويروح يمين وشمال .. كان نفسي اشوف بيعمل ايه ده الكلكيعة صغيرة اوي المهم عمو الجزار خلص ولزقلى قطنة بيضة كدة على عيني ... ومن هنا اصبحت قرصانا يشار اليه بالبنان :) واسلام اخويا قعد يضحك اوي على شكلى .... وجت الدكتورة اياها تقلى وسع اما امسكهالك ... بصتلها بقرف ( مش احتقار بس انا الحمد لله عندى ايدين سليمتين الحمد لله ) بعيني الوحيدة ومشيت واخويا يقلها معلش اصله مبيحبش الدكاترة عشان يتدارك الموقف ... ومشينا وانا ماسك عيني

المهم روحنا بقى للصيدلية اديتها الورقة بتاعت الكشف عشان الدكتور كتب فيها العلاج ادتني مرهم وشريط كبسول كدة وقطرة ومضاد حيوي كيس مليان ادورية وانا من هبلى وسذاجتى بقلها: الحساب كام يا دكتورة :)) ... ضحكت قوى وقالتلى لا ده العلاج مجانا على الكشف يا باشمهندس ..... نسيت اقلكو ابقو اكتبوا مهندس قبل اسمكوا في الكشف لزوم الفشخرة يعني :)) خدت الدوا ودعيت لوزارة الصحة ودعيت للدكتورة اياها ربنا يهديها وتخف شوية ...

بس بجد انا رحت مستشفى حكومي وراسم في دماغى اللى بنشوفه في الافلام واللى بنسمعه من الناس مكنتش اتخيل انها تبقى بالنضافة دي والاكتر من ده كله الكشف بجنيه يا جدعان ينهر ابيض والعلاج بالمجان كمان ...
بس يا ترى من يسمع ومين يشوف ... يمكن النضافة والنظام اللى شفته حالة فردية بس لازلت معجب باللى حصل

يعني مش كل حاجة في بلدنا وحشة ... اخويا بيقلى فيه حاجات زي دي تانية كتر خصوصا ان هوا نفسه بيقلى ان الخلع بجنيه والحشو مش عارف ب 5 جنيه باين
واسمع ان فيه رحلات ومصايف رخيصة برضو كدة ... ده كفاية اشتراك المترو ال 3 شهور اللى ب25 جنيه

الغرض من ده كله ان الناس الفترة الاخيرة بقت تركز اوي على الحاجات الوحشة من غير ما تتكلم عن الحاجات الحلوة ... ده حتى لو شاف زبالة مرمية في الشارع يقلك اه يا حكومة @#$@$%# مش بتشيلي الزبالة ليه

الله ادم عليناالصحة والعافية والعقل والدين واجعل امراضنا تكفيرا لذنوبنا ... آمين

سلام

حاجة تقرف

بسم الله الرحمن الرحيم

العنوان يخليك تقول انى هتكلم عن حال البلد او عن الوضع المهبب للانترنت لكن مش كدة خالص

في حاجة مضيقاني اوي وبتخلى تصفح المدونات امر بالغ القرف
ايه بقى المقرف في الموضوع ؟... المقرف في الموضوع ان فيه بعض المدونين بيحطوا مقاطع من اغاني اول لما تفتح المدونة لدرجة ان احدهم او احدهن مش فاكر والله حاطط خطبة كاملة للسديس في ابتداء المدونة يعني في شرع مين ده يارب ... ده طبعا غير الهوس اللى بيجيبلي لما افتح كذا مدونة مع بعض الاقى عمرو دياب شغال مع خطبة اتقوا النار مع موسيقى جاز مع اغنية لمنير مع قران والمشكلة مش ببقى عارف انهو مدونة اللى مشغلة الحاجة المعينة دي فبضطر اقفل كل المدونات اللى مفتوحة لحد ما اعرف مين اللى مشغل ايه !! حاجة مقرفة فعلا

واللى يقرف اكتر انك لو حاولت تلاقى مشغل الصوت اللى في المدونة عشان تقفله يا اما تلاقي صاحبه حاطه في مكان مستخبي يا اما متعرفش هوا حاطه فين اساسا وان دوست على ستوب عشان تقفله ميتقفلش ويصير لزاما عليك انك تقفل المدونة ككل


حقا إنه لعالم افتراضي مقرف

من وحي الإمتحانات

بسم الله الرحمن الرحيم

ما معنى اسم الله الكريم ؟

هل هو كريم لانه يرزق كل خلقه العاصي منهم والطائع؟

هل هو كريم لانه يمهل عباده حتى يرجعوا اليه وهوا الغنى عنهم وعن عبادتهم له ؟

هل هو كريم لانه جعل الحسنة بعشر امثالها وجعل السيئة تكتب كما هي ؟

أم يا ترى هو كريم لانه يثيب بالحسنات لمجرد التفكير في الطاعات وان فعلتها تضافعت حسناتك وان لم تفعلها اثبت ايضا على التفكير في الطاعة ؟

أم ربما كان كريما لانه يثيب ايضا من فكر في معصية ولم يفعلها ؟

احتار عقلى في الوصول لكنه عظمتك ..... فقف ايها العقل عند منتهاك

تحديث

يصادف ان يوم عاشوراء هو عيد ميلاد المدونة ... وليس لي رغبة في الحديث عنه كما يفعل الكثير

كوميديا سوداء

مره حسنى مبارك راح مدرسه ابتدائى فلما جت فتره الاسئله ولد رفع ايده
مبارك ساله اسمك ايه فقاله رامى فقاله ايه سؤالك يا رامى ؟
رامى : انا عندى اربع أسئلة
1- ليه انت رئيس بقالك 25 سنه ؟
2- لسه معينتش نائب ؟
3- ليه ولادك ماسكين كل حاجه فى البلد ؟
4- ليه مصر حالتها الاقتصاديه زفت و انت مبتعملش حاجه؟
ساعتها بالظبط رن جرس الراحه وبعد الراحه رجع مبارك وقال احنا كنا فين بقى؟

مين عنده سؤال؟
ولد صغير تانى رفع ايده فمبارك سأله اسمك ايه قاله تامر فقاله سؤالك ايه يا تامر ؟
تامر : انا عندى 6 اسئله
1- ليه انت رئيس بقالك 25 سنه ؟
2- لسه معينتش نائب ؟
3- ليه ولادك ماسكين كل حاجه فى البلد ؟
4- ليه مصر حالتها الاقتصاديه زفت و انت مبتعملش حاجه؟
5- ليه جرس الراحه رن ربع ساعه بدرى ؟
6- وبعدين فين رامى ؟؟؟؟؟؟
--------------------------------------
مبارك : عارف يا ابليس ياخويا, انا عاوز اعمل في الشعب المصري حركه تطلع من نافوخهم
أبليس : طب هات ودنك وخد الفكره دي .....وش وش وش وش
مبارك : لالا يا ابليس الفكره دي مش نافعه , عاوز حاجه أشد
أبليس : طب خد دي ...... وش وش وش وش
مبارك : لالا , برضه مش نافعه , ايه يا ابليس انت بقيت خرع كده ليه , هات بقه ودنك وانا اقولك انا نويت اعمل فيهم ايه
وش وش وش وش وش
ابليس : لا يا راجل حرام عليك

----------------------------------------
واحد اتحشر في زحمة المرور فلقى واحد بيخبطله على شباك السيارة
فتح الشباك و سأله عايز ايه
قاله : الرئيس حسنى مبارك خطفوه و الفدية 5$مليون دولار
و لو الفدية ماتدفعتش .. الخاطفين هددوا يدلقوا عليه بنزين و يولعوا فيه
و احنا بنجمع تبرعات .. تحب تشارك ؟
الرجل سأل: " و في المتوسط الناس بتتبرع بكام"
الرجل الثاني : " من 5 الى 10 لتر بنزين

-------------------------------------
كان فى سرير المرض حينما أخذ يلقى بوصاياه الأخيرة
لوزيره نظيف :
- وصيتك الحكم من بعدى يا احمد ..
- فى رقبتى يا ريس .. كله تمام والسلطة هياخدها جمال ..
(ثم راح فى غيبوبة .. أفاق منها بعد قليل )
- وصيتك الشعب من بعدى يا احمد .
- ما تخافش يا ريس .. الشعب ياكل الزلط ...
( ثم راح فى غيبوبة .. أفاق منها بعد قليل )
- احمد
- نعم يا ريس؟
- ماتنساش .. توكيل الزلط لعلاء
-----------------------------------------
كان حسني مبارك بيخطب في الشعب .. فكل شويه واحد يقوم ويقول
عاش حسني مبارك موحد الاديان ويقعد
يروح حسني مكمل كلامه وشويه ويقوم الراجل
ويقول عاش حسني مبارك موحد الاديان
فااتمسك امن دوله وطااااااااخ ويقولوله ايه الي انت
بتقوله دا ازاي موحد الاديان
دي مصر فيها مسيحين ويهود ومسلمين وطااااااخ
فرد عليهم يا باشا ماهوه اللي مكفرنا كلنا
----------------------------------
بيقولك واحد تانى لقى الفانوس السحرى ودعكه طلعله العفريت
وقاله:شبيك لبيك تطلب أيه؟
قاله الراجل: أنا عايز كوبرى بين القاهره وأسوان
العفريت قاله: دى صعبه قوى .. نقى حاجه تانيه
الراجل قاله:خلاص خلى حسنى مبارك يسيب الحكم
العفريت قاله:أنت عايز الكوبرى رايح جاى ولا رايح بس
--------------------------------
إخبرنى بصراحة يا نظيف ولا داعى للمجاملة أو النفاق .
نظيف : أمرك يا ريس
الريس : أنا الأفضل ولا عبدالناصر ؟
نظيف : انت طبعا يا ريس .. جمال مين اللى كان بيخاف من الروس !!
الريس : طيب أنا الأفضل ولا السادات ؟
نظيف : سادات مين ياريس اللى كان بيخاف من الأمريكان !!
الريس : طيب أنا الأفضل ولا عمر بن الخطاب ؟
نظيف : انت طبعا يا ريس .. عمر بن الخطاب كان بيخاف من ربنا .. انت لأ

-------------------------------
النكت منقولة

انتصار الضعف

بسم الله الرحمن الرحيم

هو يمكن العنوان غريب شوية ... ولكن اللى يدقق في الاربع سنوات الاخيرة يلاقى ان الخطاب الاسلامى ( وليس الحوار ) اتسعت دائرته اضعاف مضاعفة .. وده والحمد لله خير ... ونتمنى تتسع اكبر واكبر ولكن.... نحن في ذلك كما وصفنا الرسول صلى الله عليه وسلم كثيرون ولكن كغثاء السيل.

اديكو مثال بسيط لو فرضنا عندنا مجموعة كبيرة جدا من العدائين وكلهم ليهم نفس الكفاءة تقريبا وقلنالهم اللى هيوصل للنهاية هياخد الجايزة .. ولكن الجايزة دي فوق قمة جبل عالى والوصول للجبل عن طرييق ممر وحيد ضيق
المهم كل عداء هيغتر بقوته وسرعته وهيجروا كلهم في نفس الوقت وهيزاحموا في بعض ويقعوا بعض ويحاول كل واخد يفرض سيطرته على التاني كل واحد حسب امكاناته المتفاوتة من الذكاء والقوة المهم هيوصلوا للممر الضيق ده ويكتشفوا انو يا دوبك اللى هيعدى من الممر واحد بس
المنطق الانسانى في التفكير يخلينا نفكر في 3 حلول للمشكلة دي :

1- انهم يتفقوا فيما بينهم ويختاروا واحد يجمع بين الذكاء والقوة عشان يقدر يوصل للجايزة بس كدة  هيقسموا الجايزة بينهم بالتساوي بما فيها الفرد اللى تعب وراح جاب الجايزة

2- انهم يسيروا بنفس الاندفاع الأعمى خلال الممر الضيق ويبدؤوا يتساقطوا من على الجبل ويبقى واحد فيهم او لا يبقى فيهم احد على الاطلاق

اللى شرحته في المقطع السابق ازود عليه
3- انهم يبدأو يطلعوا الجبل عن طريق التسلق وبالتالى مش هيوصل الا قليل اوي واللى هيوصل ممكن يوصل بيه درجة من التعب انو ميقدرش ينزل وهوا معاه الجايزة ويموت من التجمد فوق الجبل

وهيا دي حالة الحوار الاسلامى .... خليني اشرحلكوا قصدي ايه

حاليا معظم مشايخ ودعاة العالم الاسلامى في نظري في حالة خطاب اسلامى وليس حوار اسلامى يعني كل واحد بينال قسط من العلم يطلق عليه لقب عالم وفي منهم يستحقون هذا اللقب وعن جدارة بس هما مختفين عن الاضواء ومنهم اللى يدوبك بيتمحك في العلم الديني وشهرته ضربت كل النكت اللى بتطلع على الحكومة
يعني ... يبدا يقلك الداعية فلان .. طب بتدعى لايه يا فلان بدعي لدين الله .. جميل بتدعى مين يا فلان ... اه .. اه بدعى المسلمين اللى اصبحوا في ضلال مبين ... على عيني وراسي طب ايه رايك تعمل اللى انت عايزه بس لازم تبقى محكوم بكتاب الله وسنة رسوله غير كدة انت ممكن تتكلم زي ما انت عايز يعني انت دلوقتى عندك حرية مشروطة .. في مشاكل يا عم الشيخ؟..  يقلك لا

دارت الايام وانشغل المسلمون عما سار عليه اباءهم واجدادهم فلو فرضنا مثلا ان التدرج الديني عبارة عن هرم نلاقي قاعدة الهرم الكبيرة هي عصر الرسول وكلما صعدنا الهرم قلت مساحة الالتزام الديني لحدما وصلنا في زماننا هذا الى قمة الهرم والله اعلم اللى بعدنا هيبقوا فين .... المهم المسلمون انشغلوا  وفقدوا السمة الوحيدة اللي  ميزت الامة دي عن اي امة تانية وهي الامر بالمعروف والنهي عن المنكر  انا مش بدعي لاي مذهب ولا انا شيخ .. انا عايزك تفكر بدماغك .

بدأت الامم اللى كانت عايشة في خير الاسلام اوروبا بالتحديد انهم يحسوا بنور العلم والنظام والانسانية من الاخر يعني بدأوا يشموا ريحة حاجة اسمها حضارة المسلمون ورثوا ميراث ضخم جدا من العلم في كل مجالاته .. علم اجتماع وفلسفة وادب وعلم نفس وعلم حيوان وعلم نبات .. الخ مش هطول عليكو زي كتب القراءة بتاعت ثانوي ... المهم بس من وجهة نظرهم شافوا ان المسلمين مش مستاهلين النعمة العظيمة اللى هما فيها فخدوا على نفسهم عهد قالوا احنا يا جماعة نحاول ننهى الحضارة دي من على الارض وان معرفناش نحاول نسوأ سمعتهم وان معرفناش خالص نستغل نقطة ضعفهم دي ونخليهم دايما ضعفاء بشرط ان السياسة دي تمشي من هنا ورايح مهما اختلفت الازمان والعصور والحكومات .. ماشي؟ .. ماشي

حصل اللى حصل في الاندلس وحصل اللى حصل في الحرب العالمية الاولى وانهارت الخلافة العثمانية ( الصورية ) واتقسمت بلاد المسلمين لاول مرة ولكن مكنوش هيعرفوا يقسموا الارض قبل ما كانوا فعلا قسموا النفوس بدأوا يقسموا فكرة المصير يعني مصر تحت احتلال بريطاني وسوريا تحت احتلال فرنسي يجي الغرب عن طريق عملاء عن طريق جواسيس عن طريق اي وسيلة هدم ويبدأوا يحسسوا المصري ان عغاية امله انه يخلص من الاحتلال الانجليزي لبلده مصر وباقى الولايات الاسلامية بقى اللى يقدر يدفع عنه المستعمر يلا معاه ربنا وليس في الامكان ابدع مما كان وحسبي الله ونعم الوكيل وربنا يطرد الظلمة من ارضنا وتحصل بعض التخاذلات من بعض الحكام وبعض الخدع من المستعمرين لحد ما ترسخت فكرة ان انا مصري وانت سورى وانا سعودي وانت مغربي .. ولعبوا على مية الف حاجة مرة حاجز اللغة مرة حاجز التعصب مرة حاجز التمييز العنصرى .. حاجات كتير ولسة مستمرة ولكن للاسف المسلمين مش بيتعلموا من اللى فات وياريت مثلا بين كل مقلب ومقلب فترة بحيث الناس تنسى .. لا..   دول كل ما يطلعوا من حفرة يقعوا في بير بيفكرونى باللى ماشي في وسط مطرة ومعاه شمسية شايف الشارع حواليه مبلول والجزمة متعاصة طينة وبرضه بيقنع نفسه انو طلاما راسه متبلتش يبقى الدنيا مش بتمطر ويبدا يفرض بغباءه احيانا وبغباء من حوله احيانا اخرى ان الارض مرشوشة مية مثلا او انو وقع في طينة وهوا مش واخد باله انما بيرفض يصدق خالص ان الدنيا بتمطر من حواليه

بس برضه الحمد لله المسلمين لسة فيهم خير فيهم كل فترة وفترة يطلع علامة فاهم الدين عن تفكير واقتناع
وبالتالى بيحقق الهدف وهوا الدعوة الحقيقية لله في الارض والفوز بالجايزة اللى الشيوخ المسلمين مش عارفين يا خدوها عشان ماشيين بمنطق العدائين اللى قلنا عليه بالرغم من ان الاحتمال الاول انسب احتمال لو رضي الشيخ الكبير انو يتساوى مع باقي المشايخ في المستوى بالرغم من انو اكتر واحد تعب
وده اللى مودينا في داهية بقى كل شوية واحد يسب الرسول صلى الله عليه وسلم وشوية واحد يتريق على الاسلام
وناس مسلمين بيتريقوا على ابناء جنسهم واختلطت المعاييز واصبحنا قطع شطرنج في ايد الغرب لما الغرب قال اننا معندناش حرية كلو طلع يقلك يا عم اقلع الحجاب عشان الحرية ومتربيش دقنك عشان الحرية ومتقراش قران عشان الحرية وشيل فقه الائمة الاربعة من مدارس الازهر وحط بداله فقه ميسر عشان نقلهم اننا عندنا حرية وبنتصرف زي ما احنا عايزين .. ولما يجي ناس من الغرب يعترفوا بفضل المسلمين ويقولوا لازم التمسك بالتقاليد ولازم كل عرق وكل طائفة تحتفظ بهويتها عندها بس بقينا نقول الدين الاسلامى دين التحرر والمسلمين متحررين والبسي الحجاب يابنتى وانتى رايحة الشغل وربي دقنك يابنى ومش مهم بقى تسرق ولا تغش ولا تكذب ولا ... ولا ... وتعامل زوجتك واولادك بالضرب والاهانة وطالما انت مربي دقنك واللى مربي دقنه مسلم والاسلام دين التحرر يبقى احنا كدة ماشيين في السليم

بعدين شيوخ وحكام مشيوا بالمنطق نمرة 2 وهو اننا مش شايفين تحت رجلينا مش هقول مش باصين لقدام لا ده احنا حتى مش شايفين تحت رجلينا ومندفعين وبنهاجم بعض ونشتم بعض ويوقع ناس ناس تانية من فوق الجبل كل واحد عامل فريق وكل الفرق ليها اتباع ووكل فريق يلعب بعواطف الناس زي ماهو عايز بالدين مرة وبالاسلام اللى رجع من جديد مرة ..  ومش واخدين بالهم انهم كلهم في سباق واحد ومش واخدين بالهم برضو انهم بيقعوا من على الجبل عشان الطريق ضيق وميعديش غير واحد بس

ونيجي للتفكير رقم 3 وهوا ان كل واحد يمشي بدماغه وطالما هفوز بالجايزة مش مهم ايه يحصلى ولا مهم ايه اللى يحصل لغيري اهم حاجة اوصل للجبل واخد الجايزة ومش مهم بقى انزل من الجبل ازاي ربنا هيبقى يسهلها يا عم .. وربك رب قلوب ... وربنا بيحاسب على النية

عشان كدة الواحد ميستغربش لما زمان نلاقي عالم كيمياء حافظ القران وله مؤلفات في الرياضيات .. وله كتاب في الفقه .. ومؤرخ وكل ده متجمع في شخص واحد والشخص الواحد ده زيه كتير فكان من الطبيعي ان العلم في مختلف فروعه يغرق العالم بافكاره وحضارته
بس ساعتها كان فيه امر بالمعروف كان فيه ناس بتؤمر الخلفاء وتقله انت من واجبك يا خليفة انك تشجع العلم .. من واجبك يا خليفة انك تنشر الاسلام بالعلم وبالاخلاق الحميدة وبتشجيع العلماء وانت يا عالم انا هسهلك كل سبل الراحة وهديلك الفلوس اللى تطلبها بس تديني علم انفع بيه شعبي وانشر عن طريقه الدين الاسلامى
طب بذمتكم مش ده اللى يعتبر حاليا اسباب تقدم اوروبا ومش هقول امريكا
اوروبا بتصرف على البحث العلمي اضعاف اضعاف اللى بنصرفه احنا على التسليح بلا خيبة عمالين نشترى في سلاح بنحارب بيه بعضنا وهما البحث العلمى عندهم في الصناعة بس لا ده بيخش في كل حاجة من اول التعليم في الحضانة .. لحد كيفية صنع محركات تعمل على الهيدروجين ( ده مثل مش اكتر ) عشان لما مصلحتنا بالعرب الهمجيين اللي عندهم بترول وعقول تخلص نبقى عندنا مصدر طاقة ومصدر قوة نذل بيه الشعوب اللى مش عارفة قيمة نفسها .... واغلبهم فاكرين اننا منستاهلش نعيش عشان مش عارفين قيمة نفسنا .... ولكن اللى يفرق حضارتنا عن حضارتهم ان حضارتنا كانت مستقرة مفهاش امراض اجتماعية الا نسب صغيرة اوي لان مفيش مجتمع كامل لان الانسان نفسه اللى بيقود المجتمع مش كامل على عكس الحضارة دلوقتى اللى تعتبر قوة ظاهرية فقط
اصل اساس المقارنة بين شيئين في اي حاجة في الدنيا يا اما ان الحاجة بتاعتى احسن منك يا اما ان الحاجة بتاعتى عادية وانت اللى حاجتك اوحش منى
فانا من رايي ان قوة اوروبا دلوقتى مش زي قوة المسلمين في وقتها مع اختلاف بسيط انهم كانوا عايشين في ظلام وجهل تام واحنا عندنا دايما بصيص امل
حضارتنا عريقة عشان خالية من امراض المجتمع وعلاجها كان علاج جذري ... بينما حضارة اوروبا السائدة والمسيطرة قائمة على انقاض حضارة سابقة مع وجود جميع امراض المجتمع والعلاجات لهذه الامراض عبارة عن مسكنات وليست علاجات جذرية
وده لاننا كنا بنطبق العدالة عن طريق منهج الهى ولما تساهلنا في تطبيقها معرفناش نسيطر على امراض المجتمع اللى ادت الى سقوط الحضارة
بينما حضارة اوروبا تطبيق العدالة نابع من المصلحة فقط وليس الا ... فمن رايي ان الحضارة الحالية مش باهرة ولا قوية عشان اللى عملها اقوياء .. ولكن لانه لايوجد حضارة اخرى سوى حضارة ضعيفة اهلها ضعفاء
وبالتالى الحضارة الاقوى الحالية ناتجة من انها حضارة عادية ولكن الحضارة المنافسة حضارة ضعيفة

اتمنى تكون مجمل فكرتى وصلت للى بيقرى
فاضل حاجة بسيطة بس وهيا وجهة نظري في الحل المنطقى ( من وجهة نظري) عشان العدائيين يطلعوا الجبل ويجيبوا الجايزة ... ان العدائيين دول يجروا في طابور منتظم حاجة كدة زي سباق التتابع بحيث الجهد الكبير ده يتجمع على اشخاص كفاءتهم متساوية تقريبا واي فرد ينقص من السلسلة تنهدم السلسلة بكاملها فيشعر هذا الفرد ان له دور مهم في جعل الاخرين (اللى هو منهم)  في الحصول على الجائزة ... كمان الحل ده يلغى فكرة الرئيس الاوحد اللى بيمشى اوامره على باقى العدائيين من جنسه ويشاركهم الجائزة دون ادنى تعب وايضا التغلب على صعوبة ان الممر لا يعبر فيه سوى فرد واحد فقط

الحمد لله الذى جعلنى مفوها ورزقنى لسانا يسبح بحمده ويقر بوحدانيته
والحمدلله الذى بعث رسولا من امتى وبنفس لسانى دعانى الى عبادة الله
والحمد لله الذى انزل معجزة من السماء قراءنا عربيا مبينا متحديا جميع الخلائق ان يأتوا بمثله
والحمد لله على نعمة العقل الذي يميز بين الصواب والخطا
والحمد لله على نعمة الضمير الذي يؤنب النفس على الذنوب
والحمد لله على نعمة القلب الذي يرق بعد التجبر والتيه
والحمد لله على كل نعم الله التى لا تحصى كما لا يحصى ثناءا عليه

سلام

ولسة ... منشف دماغك

بسم الله الرحمن الرحيم

حديث قدسي


قال تعالى :( أنى والأنس والجن في نبأ عظيم أخلق ويعبد غيري، أرزق ويشكر سوايا، خيري إلى العباد نازل ،وشرهم إلي صاعد، أتودد إليهم برحمتي وأنا الغنى عنهم، ويتبغضون إلي بالمعاصي وهم أفقر ما يكونون إلي، أهل ذكرى أهل مجالستي، فمن أراد أن يجالسني فليذكرني، أهل طاعتي أهل محبتي ،أهل معصيتي لا أقنطهم من رحمتي، إن تابواإلي فأنا حبيبهم وإن أبوا فأنا طبيبهم أبتليهم بالمصائب لأطهرهم من المعايب، الحسنة عندي بعشر أمثالها وأزيد ، والسيئة عندي بمثلها واعفوا، و عزتي وجلالي لو استغفروني منها لغفرتها لهم من أتانى منهم تائبا تلقيته من بعيد ومن أعرض عني ناديته من قريب أقول لة أين تذهب ألك رب سواي ألك رب سواي). الحمد لله على نعمة الضمير

امبارح كان عمرى 20 ... بجد

بسم الله الرحمن الرحيم

منذ ما يقرب من العشرين عاما وقف ابي ينتظر صراخ المولود السعيد .... وخلال هذه الفترة فكر ابي فيما سيسميني ... خصوصا بعد ان ابدت حماته اللى هيا ام امى اللى هيا جدتى :) انها تسميني عبدالرحمن
لكن شاء الخالق ان يلهمه باية ( قال انى عبدالله اتانى الكتاب وجعلنى نبيا )
فسموني عبدالله كان هذا فجر يوم 1 نوفمبر عام 1987

الحمد لله والشكر لله انى اتميت من عمرى 20 سنة... معنى ذلك ان ربنا شاء ان يمج عمرى عندما كتبت الاجال في شعبان.. وياريت
لكن السنة دي عرفت يوم ميلادى من شخص عزيز عليا اوي .. عشان كدة السنة دي فرقت اوي معايا


اللى بيسعدنى اكتر ان الاستاذ اسامة القفاش بجلالة قدره علق عندى لاول مرة في مدونتى دي .. بعد ما انقطع عن التعليق بعد ما نقلت المدونة وظننت انى فقدته :)

Ossama said...

كل سنة وانت طيب يا باشمهندس
النهارده 1 نوفمبر عيد ميلاد سعادتك كما في بيانات حضرتك في نهاوند

والاستاذ عصفور المدينة برضو .. صاحب واجب وبعتلى تهنئة على الفيس بوك .. شكرا يا استاذى :)

مهما كان معملتش حفلة عيد ميلاد ولا الكلام ده بس برضو ان حد يعبرك في مناسبة زي دي .. بتفرق

مع البنى ادم

المهم يارب السنة دي تبقى معاصي اقل طاعات اكتر ... وتكون سلمة في عمارة ا ل تفوق باذن الله :)

سلام

يــــا الله

بسم الله الرحمن الرحيم

وحدي في ظلمة ليلي ... في وحشة دربي ... همي يثقلنى ... ذنبي يؤلمنى

وحدي أدعوك وأرجو ... من ذنبي أشكو ... مالى سواك ... أنا في حماك

فارحم عبداً ناجاك ... يا الله ... يا الله

أنت الرجا منك الهدى ... يا الله ... يا الله

رباه هداك ما زلت أسير.... وعلى العصيان ما عدت قدير

فأنر دروبي ... واغفرذنوبي ... فأنا الفقير

قد عاد القلب في الدرب يسير ... فرحا ً مشتاقاً لله يطير ... ورجاه رضاك يوم لقاك ... أنت القدير

فارحم عبداً ناجاك ... يا الله ... يا الله

أنت الرجا منك الهدى .. يا الله

يا الله

من اغنية "مناجاة" لسامى يوسف

Baba Ali

بسم الله الرحمن الرحيم

ايوة زي ما قريتو العنوان كدة بالظبط بابا علي مش علي بابا

ده يا جماعة احد اشهر الدعاة في الغرب وخاصة امريكا الايام دي .... هوا بيحكي عن نفسه بيقول انو اسلم وهوا عندو 28 سنة .. واعتنقه عن اقتناع تام ... تخيلوا 28 سنة كاملة وبعدها ربنا اذن له بالهداية
"علي" وده اسمه الحقيقي بيتكلم عن الدين الاسلامى مش الحلال والحرام .. لا بيتكلم عن المعاملات اللى المفروض المسلم يتعامل بيها .. وبيدلل دايما ان ده من اصل الدين مش من براه
" على " عامل اسلسلة افلام على اليوتيوب اسمها
والمشروع بتاعه اسمه The Remainder

وده لينك لليى عايز يشوف افلامه كاملة Ummah Film

ودي مقدمة مبسطة بالعنجليزي يابووووي

Ummah Films is a Muslim film company that strives to provide Halaal (Islamically permissible) entertainment to Muslims and non-Muslims alike. We are not affiliated with any particular movement, sect, group, etc. We absolutely condemn in the strongest terms terrorism and any extremism done in the name of Islam and we refuse to associate ourselves with those who practice and condone such behavior and thoughts.

المهم هوا زي ما قلت قبل كدة بيتكلم عن تعاملات الدين الاسلامى بوجه عام بس في اطار كوميدي اوي .. وهوا بصراحة كوميدي جدا ... للى عايز يشوف عينة ممكن يشوف الفيديو اللى في البوست اللى فات
سمعت والله اعلم انهم اذاعوا فيديوهات لـ "علي " على الـ ام بي سي وعلى الرسالة بس عمرى ما شفتها بعيني... اهم بيقولوا

عشان مطولش .... دي مدونته هنـــــا
وده مــــنتدى معمول عشان التعارف بين اطراف العالم الاسلامى .. وبرضه الاعلان عن اجدد الفديوهات اللى هيا 100 % مجانية ولا تهدف للربح.... انا مسجل في المنتدى ده على فكرة
:D

تقدروا تقولوا كدة انى بقيت مقتنع جدا بفكرة التدوين المرئي واتمنى حد في مصر يبدأ يطبقه

اللهم اعز الاسلام والمسلمين ... ولا تجعلنا ممن هم في كثرتهم كغثاء السيل ... يا سميع يا عليم

يا جماعة ...رمضان مخلصش ولا حاجة

بسم الله الرحمن الرحيم

والله مش عارف ابدأ منين ... بس بجد بجد رمضان ده احلى حاجة قضيتها في حياتى ....
مع ان ده اول رمضان يعدي عليا ومعرفش ماما مخبية الزبيب والقراصية فين الا انو برضو حلو
وكان حلو لاننا اول مرة نفطر خمسة بحضور مرات اخويا من ساعة ما بابا توفى ( ربنا يرحمه ويفتح عليه من ابواب الجنة )
كمان اول مرة اعرف ان فيه اكلة اسمها كانيلونى ... مش عارف انا ازاي اكل اكلة معرفش اسمها ... بس اهى اتاكلت وربنا سهلها والحمد لله :)


طز في حمادة عزو اللى جه خرف على اخر عمره ... وطز في اللى فاكرة نفسها بتدافع عن حقوق المغتصبات وهيا اكبر واحدة بتدعو للاغتصاب ... وطز في اللى فاكرين نفسهم ظراف وبيعملوا مسسلسلات سيت كوم امريكي بطريقة بشعة ومليانة تجاوزات سواء كلامية او بصرية وطز في اللى شايفين ان رمضان سجن وليلة الوقفة تلاقيهم بيحششوا
وطز في اللى كانت لابسة الحجاب في رمضان وقلعتوا واللى كانت شايلة المكياج وحطته واللى كانت لابسة لبس محتشم وقلعته لما رمضان خلص .... بجد هوا الناس فاهمة رمضان انو ايه.

طز في اللى بيسرق .. وطز في اللى بيغش وطز في اللى بيبص على الستات في السوق وهما قد ولادوا اصلا
طز بجد في كل ده .. انا فرحان اوي ان رمضان عدى عليا بالشكل ده ... انا جالى فترة من بعد ما كنت في اولى اعدادى لحد السنة دي وفقدت الامل ان رمضان يبقى كويس .. ولكن الحمد لله رمضان رجع احلى واحلى .. واحلى

بصراحة لما كنت بسمع اللى بيقولوا دوق طعم القران كنت بقول هوا القران بينداق يا جدعان ... بصراحة اه ... وطعمه ملهوش وصف من كتر حلاوته ... يعني لو صليت على اساس انك في رمضان وكل الناس بتصلى فانت لازم تصلى ...غير لما تصلى في رمضان وتتخيل ان انت واقف قدام اللى خلقك وبتسمع كلامه ليك

متخيلين انا اقصد ايه .. مش هقعد ادي امثلة الموضوع ابسط من كدة بكتيييير اوي

الموضوع وما فيه ان ربنا خلق الانسان وعارف الانسان ده هيقصر وهيعصي ويفسد في الارض ... ربنا عمل شهر كامل للى عايز يتوب ويرجع ... عارفين ربنا اسمه الكريم ليه ؟ مش عشان بيدينا رزق او عشان بيحفظنا من مهلكات كتير

لا ربنا كريم عشان بيديك فرصة ترجعله بعد ما سبته .. ربنا كريم عشان بيقلك اعبدنى الشهر ده صح وانا هديك اضعاف اللى بتعمله في غيره ... ربنا كريم .... عشان هو كريم ... ومحدش عنده كرم ربنا .. ومينفعش يبقى حد عنده كرم ربنا

جربتوا مرة يا ترى تقعدوا تقروا في سورة لمدة ساعة كاملة سورة بسيطة ممكن تبقى سورة الاخلاص ممكن تبقى حتى سورة الكوثر .... جربت مرة تقف على ايه وتقول ليه ربنا قال كدة ومقلش كدة ... جربت مرة وانت بتقرى تقول يااااااااااه بقى ربنا يقصد كدة وميقصدش كدة

جربت تقعد في المسجد او في بيتك من غير ماتشغل حاجة ومن غير ما تكون نايم ومن غير ما تكون بتتفرج على التلفزيون ... مجرد انك عمال تفكر في ربنا ....

جربت احساس ان جسمك يقشعر وانك تلافى نفسك بتنتفض لما تسمع اية زي ( لواحة للبشر * عليها تسعة عشر*) اية زي ( انا جعلنا في اعناقهم اغلالا فهي الى الاذقان فهم مقمحون) يعني بجد اسمع حاجة زي كدة ازاي ومرتعش ... ولما اسمع اية زي ( هل جزاء الإحسان إلا الإحسان) ليه جسمى ميرتحش وليه محسش ان ربنا ان شاء الله محضرلى الخير ...كل الخير

والله اول سنة ابقى زعلان ان رمضان هيخلص بجد ... مش عايزه يخلص ... مع ان ربنا له حكمة انو يجعل رمضان شهر واحد بس ... لا اكثر ولا اقل ... سبحان الله العزيز الحكيم

انا البوست ده اساسا كنت عايز اتكلم فيه على ايات غيرت منى اوي بس مش عارف بصراحة اقول ايه ولا ايه
اتكلم عن سورة طه ولا الرحمان ولا الانبياء ولايوسف ولا الكهف والواقعة ولا الزخرف ولا هود ولا الحشر ولا مريم ولا ايه ولا ايه ... ياااااااااارب متخليش شعوري بيك في رمضان يتغير بعد رمضان
يا مقلب القلوب ثبت قلبي على دينك ... اللهم قوني على طاعتك .. اللهم لا غيرك يستعان به على طاعتك .. اللهم انا ان تركناك هلكنا فلا تتركنا نتركك انك انت الحليم الكريم .... اللهم كره الينا المعاصي والفسوق والفجور .. اللهم حبب الينا طاعتك ... واقسم لنا من رحمتك .. اللهم لا تتركنا عرايا فمن لم تستره فهو عريان لا ساتر له .. اللهم انك انت الواحد الفرد الصمد ... ان لم افهم هذه الحقيقة منك على لسان حبيبك المصفى فسأفهمها من تعاقب الليل والنهار ورزق الاسماك في اعماق البحار .... ربنا ظلمنا انفسنا لاننا ضعاف امام المعاصي ولكن من يغفر لنا سوى العالم بامرنا .... اللهم خضع لك الكون كله ما علمنا منه ومالم نعلم ... ولم يخضع ابليس فجعلته رجيما وحاول الانسان الا يخضع لك فجعلته اية وعبرة لمن يعتبر ..... اللهم لاتزغ قلوبنا بعد اذ هديتنا انك انت الوهاب ... يارب ان في قلبي لحلاوة ما وجدتها قبل الان فلا تزلها من قلبي حتى تقبضنى اليك يا ارحم الراحمين .. اللهم اجعل عملى خالصا لك ... لا اريد ان ينقص عملى رياءا ولا يمعة ... انك علام الغيوب ... اللهم اغفرلى ما ظلمت به نفسي وارحمنى رحمة اكون بعدها عبدا خالصا لك سائرا على نهج لا يضل من انتهجه
اللهم عبدا ناجاك... ولما امرته دعاك وانت علام الغيبوب غفار الذنوب .. ساتر العيوب.. مقلب القلوب .. مفرج الكروب
اللهم افرغ علينا صبرا وثبت اقدامنا وانصرنا على القوم الكافرين ..ز اللهم احشرنى مع من احب ... احشرني مع حبيبي ... احشرني مع حبيبي يارب ... وامنن علي بشربة من كفه لا اظمأ بعدها ابدا
يارب عايز اقابل الرسول في الجنة يارب ... نفسي اقابله وميكونش زعلان منى ... نفسي محسسوش انو تعب على الفاضي ...انو اتأذى بسببي على لافاضي ... يابر نفسي ابقى في الجنة مع الحصرى والشعراوي وكل الدعاة والصالحين ... يارب هل ممكن اقعد مع عمر بن الخطاب في يوم من الايام ..؟ واسلم على ابو بكر واقرى قران في الحنة مع عثمان واتناقش في الحديث مع علي ؟

انا شكلى اتكلمت كتير ... بس مش عارف اجيب كل اللى جواي ... على العموم اعتبروا ان فيه واحد اولد اسمه عبدالله

كل سنة وانتو طيبين

تحــــــديث

شوفوا الفيديو ده مش صعب انكو تفهموه لان انا شخصيا فهمتو لوحدي ... وهتكلم عن صاحب الفيديو ده البوست الجاي ان شاء الله

كلــــمتين وبــــــس !

الطمـــــــــع وحـــــش

Goals

بسم الله الرحمن الرحيم

بيقلك دايما حط اهدافك قدام عنيك عشان تحاول تحققها

اهداف قريبة المدى :
1- انى اخــــــس
2- انى اختم القران في رمضــــان ان شا ء الله
3- انى اصوم صيام صح مش مجرد امتناع عن اكل وشرب
4- انى اطلع رخصة سواقة :)
5- انى ابطل داء التريقة اللى فيا ده .. هو قل شوية بس انا عايز ابطله خالص عشان السخرية دي وحشة حتى لو على سبيل الهزار
6- اشترى كومبيوتر جديد ونضيف عشان البرامج اللى عندى بقت احدث من جهازى .. جهازى بيهنج على اتفه الاسباب :@

اهداف متوسطة المدى :
1 - انى ابقى كويس اوي في مجال دراستى وابقى مهندس كويس اوي مش عشان الشغل على الاقل انا هفرح اوي لما ابقى مهندس فاهم في تخصصي

2- انى اتعلم خط ... رحت سألت في معهد الخط عندنا في بنها قالوا لازم ادرس اربع سنين كاملة وطبعا ده مستحيل مع دراستى العادية او على الاقل هياخد وقت طويل ... جربت اعمل نفسي بنفسي بس كسلت.

3- انى اتعلم فرنساوي مع انها صعبة بس بحبها اوي بس عيبها انها مش منتشرة في مصر يعني ممكن انساها بعد ما اتعلمها لان اللغة حلها الوحيد الممارسة قولولى بقى هتكلم فرنساوي مع مين بس ده ميمنعش انى احطها في لستة الاهداف

اهداف بعـــيدة المدى :
1- اؤسس شركة او مصنع كبير واخرج منتج مصرى عالى الجودة
2- اتجوز
3- اسافر فرنسا للعلم والسياحة
4- اروح اقعد مدة طويلة في المدينة عايز اروح افضل قاعد ليل نهار في الروضة ... من غير مبالغة المدينة مشفتش زيها اي مدينة على الاطلاق في راحة النفس والهدوء يعني لو ينفع اقضى عمرى كله فيها واندفن فيها اروح حتى لو مقعدتش في المسجد النبوي برضه هتحس انك مرتاح نفسيا اوي
5-هدف مهم اوي مش هقوله دلوقتى


وفى ناس قالو كلام كويس عن تحقيق الاهداف وان يكون عندك هدف في حياتك

Aman without a goal is like a ship without a rudder.

الراجل من غير هدف زي السفينة من غير دفة

If we could first know where we are, and whither we are tending, we could better judge what to do and how to do it.

لو احنا قدرنا نحدد فين مكانا وقدرنا نحدد احنا ناويين على ايه هنقدر بشكل افضل نحكم على الاشياء اللى هنعملها وازاى نقدر نعملها

When you determined what you want, you have made the most important decision of your life. You have to know what you want in order to attain it.

عندما تقرر ان تفعل شيئا فانت قد اتخذت اهم قرار في حياتك . يجب عليك انت تعرف ماذا تريد في سبيل ان تسعى لتحقيقه

In life, the first thing you must do is decide what you really want. Weigh the costs and the results. Are the results worthy of the costs? Then make up your mind completely and go after your goal with all your might.

في الحياة ، اول حاجة لازم تعملها انك تقرر اللى انت محتاجه فعلا . بعديها وازن بين تكالف تحقيق هدفك وبين النتايج لما تحققه ونشوف هل النتايج هدفى لما احققه هتستحق تكاليفه او التضحيات اللى هقوم بيها ولا لا ؟ وبعدها ركز في انك تحقق هدفك وامشي وراه بكل ما اوتيت من قوة

ســـــــــــلة الفحم

بسم الله الرحمن الرحيم
الرسالة دي جاتلى على الميل ... وانا عادة مش بنقل حاجة الا لما تكون عجبتنى لانى انا بنفسي لمست الموضوع ده

اقروا بعينكو اليمين :)
قصة سلة الفحم

كان هناك رجل يعيش في مزرعة بإحدى الجبال، مع حفيده الصغير، وكان الجد يصحو كل يوم في الصباح الباكر ليجلس على مائدة المطبخ ليقرأ القرآن ، وكان حفيده يتمنى ان يصبح مثله في كل شيء، لذا فقد كان حريصا على أن يقلده في كل حركة يفعلها …وذات يوم سأل الحفيد جده



"يا جدي،إنني أحاول أن أقرأ القرآن مثلما تفعل، ولكنني كلما حاولت أن أقرأه أجد انني لا أفهم كثيراً منه ، وإذا فهمت منه شيئاً فإنني أنسى ما فهمته بمجرد أن أغلق المصحف !!!! "

فما فائدة قراءة القرآن إذن ؟!!!!!

كان الجد يضع بعض الفحم في المدفأة ، فتلفت بهدوء وترك ما بيده، ثم قال : خُذ سلة الفحم الخالية هذه ، واذهب بها إلى النهر ، ثم ائتِني بها ملئية بالماء!!!!

ففعل الولد كما طلب منه جده، ولكنه فوجىء بالماء كله يتسرب من السلة قبل أن يصل إلى البيت، فابتسم الجد قائلاً له : " ينبغي عليك أن تُسرع إلى البيت في المرة القادمة يا بُني " !!!

فعاود الحفيد الكرَّة،وحاول أن يجري إلى البيت ... ولكن الماء تسرب أيضاً في هذه المرة!!!

فغضب الولد وقال لجده،إنه من المستحيل أن آتيك بسلة من الماء ، والآن سأذهب وأحضر الدلو لكي أملؤه لك ماءً.
فقال الجد: " لا ، أنا لم أطلب منك دلواً من الماء، أنا طلبت سلة من الماء...يبدو أنك لم تبذل جهدا ًكافياً يا ولدي " !!!

ثم خرج الجد مع حفيده ليُشرف بنفسه على تنفيذ عملية ملء السلة بالماء !!!!

كان الحفيد موقناً بأنها عملية مستحيلة؛ ولكنه أراد أن يُري جده بالتجربة العملية ،فملأ السلة ماء ،ثم جرى بأقصى سرعة إلى جده ليريه ، وهو يلهث قائلا ً

: " أرأيت؟ لا فائدة !!"

فنظر الجد إليه قائلا ً: " أتظن أنه لا فائدة مما فعلت؟!!"....

"تعال وانظر إلى السلة " ،

فنظر الولد إلى السلة ، وأدرك –للمرة الأولى أنها أصبحت مختلفة !!!!


لقد تحولت السلة المتسخة بسبب الفحم إلى سلة نظيفة تماما ً من الخارج والداخل !!!!

فلما رأى الجد الولد مندهشاً ، قال له : " هذا بالضبط ما يحدث عندما تقرأ القرآن الكريم .... قد لا تفهم بعضه، وقد تنسى ما فهمت أو حفظت من آياته ..... ولكنك حين تقرؤه سوف تتغير للأفضل من الداخل والخارج ، تماما ًمثل هذه السلة !!!!


ولعلك تستفيد ايضاً من هذه القصة : أننا لن نتعلم شيئاً إن لم نمارسه ونطبِّقه في حياتنا ....فإذا أردتَ أن تتذكر ما فهمتَ وحفظتَ من القرآن ، فعليك أن تطبقه في حياتك

اول الضحايا

بسم الله الرحمن الرحيم 

24-8-2007
تم بحمد لله تعالى زواج اخى محمود محمد مرتضى - بكالوريوس علوم - على مدام محمود محمد مرتضى :) بكالوريوس طب بيطري