يارب صلي

بسم الله الرحمن الرحيم 

يارب ... غفرانك لعبد كهل من كثر الذنوب وبلي ... ولم أطلبه إلا لضعفي وحاجتي وتذللي .. يارب .. من لي إن لم تكن أنت لي ... يارب ما سواك أبتغيه ولي ... يارب حمداً كثيراً وشكرأً على نعم قد أبديتها لي ... وفقنا الى دوام السلام على حبيبك وأن نصلي ...

الإخوان

بسم الله الرحمن الرحيم 

ده  شئ من بعض الأشياء اللى عايز اقولها للإخوان 

اعتذرولنا يا اخوان ...... قبل ما تمشوا م الميدان

مصر بتسمع للتحرير .... مش لكراسى البرلمان 

بلطجية وترامدول ..... شمّتوا فينا الفلول

يا شباب الإخوان يا ثاير .... بعتونا في حفلة يناير

قلتو الثورة بح وخلصت .... وقفلتو عليها الستاير 

ولما الحرة قدامكو اتعرت .... قلتو كلام وحش معناه 

هوا الشرع بتاعنا  خالى .... من كلمة  وامعتصماه ؟!!

الاعتذار شئ مش شديد .... شوف بسببكو في كام شهيد 

سيبوا العسكر يلبس هوّا ... وإحنا نحط الإيد في الإيد 

السمع عندى والطاعة ....  لربى مش لرئيس جماعة 

ناقص تاخدو الإذن منه ....  قبل ما يناموا الجماعة 

استخدم عقلك وفكر ...... انت مش مقطف بودان

مش كل حاجة ترددها ... انت أكيد مش بغبغان 

واللى مش عايز يتغير ... هوا اللى اختار وقرر 

قول ورايا من غير ما تفكر ....  يسقط يسقط حكم العسكر 

تدبر

بسم الله الرحمن الرحيم 

في احدى ايام شهر فبراير ... وفي احدى ساعات الصباح المبكر ألفت  تلك الأبيات ... لعلها تكون تحقيقا  لأمر الله بالتدبر في ملكوته 

الشمس طالعة بين الغيوم تسبح ربّها .... ودى غيمة سايرة تحمده زي غيمة أختها

الشمس نورها داير بين السما والأرض ... تنبه المؤمن قوم صلي الضحى والفرض 

يارب من عصاك ما عرف قدرك  ..... ولما ندم وأناب راح وادارى في سترك 

ده احنا لو اتقيناه وبدأنا نحب الغير .... سبحانه راح يرزقنا زي ما بتروح وتيجي الطير

الحمد والإستغفار

صرت أعرف الان كيف يكون الابتلاء للمؤمن بالله في كل الأحوال خيرا ... فإذا ابتليت بالضيق والحزن لذنوب ارتكبتها تجد ان الله يلهمك الاستغفار في مرحلة معينة فيكشف عنك الضر ... واذا ابتليت بالخير والفرح حمدت الله كثيرا وصرت تشعر بأنك مدين لله مقصر في عبادته فتقبل أكثر على الطاعة ... فالمؤمن في كل أمره خير فهو بين استغفارٍ بعد إدبار وحمدٍ عند فرج ...

ايام الجيش

بسم الله الرحمن الرحيم

هحاول اكتب بشئ من الإيجاز اللى حصل في 13 شهر عدوا عليا في الجيش

20-10-2010
بداية الموضوع ... في التاريخ ده رحت للقسم اللى انا تابع ليه وقدمت الورق ... طبعا ملوش لازمة دلوقتى اقول عن معاناة استخراج اوراق ملهاش اي لازمة من فيش وتشبيه لحد شهادات كتيرة يمكن اختصارها في البطاقة الشخصية ... لكن من امتى بلدنا كان فيها منطق ... ودي اول حاجة كان لازم اتعلمها قبل ما اخش الجيش هو انه لا منطق في الجيش ... خلصت الاوراق وخدت كارت صغير كدة مكتوب عليه التاريخ اللى هروح اكشف فيه ومختوم عليه 3 عبارات ... قص الشعر والذقن ... عدم اخذ المحمول ... والتالتة مش فاكرها
5-11-2010
ده تاريخ الكشف الطبى اليوم ده محفور في ذاكرتى ومن الايام المهمة اوي في الجيش لانه كان يوم فاصل يا ادخل يا مدخلش ...مكان الكشف في الهايكستب ( معتقل من ايام الاحتلال البريطانى ... محدش يعرف معناها والمعلومة دي جبتها من جووجل اجابات بس مفيش مصدر موثق)
اليوم ده كان ضبابى بشكل بشع اوي لدرجة انى فعلا كنت بخبط في ناس قدامى عشان مكنتش شايفهم .... رحت اليوم ده بدرى اوى والحمد لله كان عندى حق لان كمية الشباب اللى بتبقى هناك ممكن تملى استاد كورة ... وده في يوم واحد ... المهم رحنا للهايكستب ووصلنا على البوابة خدتنا اتوبيسات لغاية جوا نزلنا ووقفنا طابور طويل وكل شوية واحد يطلع يقلك امسكو الورقة الفلانية وطلعو الورقة الفلانية واللى معاه موبايل بكاميرا يديه للأمن ... دخلنا ولقيت في خطوط حمراء وزرقاء وصفراء وخضراء على الارض ... بصراحة كان نظام حلو يعني لو عايز تسأل على مكان الفلانى تسأل واحد تلاقيه بيقلك امشى على الخط الازرق هوا حاجة بتخليك تحس انك فار تجارب او حمار عارف سكته من البيت للغيط ... بس نظام فعال في مكان واسع اوي
دخلنا واستنينا تحت برجولات ( برجولات يعني مظلات) ... قعدنا جنب بعض ... وطلع واحد قلنا نرتب ورقة كذا بعد ورقة كذا وورقة كذا قبل ورقة كذا .. الخ الخ ... استنينا شوية ودخلنا في قاعة كبيرة ... شغلو فيلم دعائى عن الجيش ... زي الافلام اللى بتيجي على القناة الاولى والتانية دي لما يبقى في حفلة تخرج من حفلات تخرج الظباط ... وبعدها قفلو الفيلم وجه صول قعد يجاوب على بعض الاسئلة ... كان في اسئلة مستفزة واسئلة مهمة المهم ان الراجل مكنش كويس في ردوده لانه متعود على الاسئلة دي بقاله مدة كبيرة ... بس لازم يعذر الناس اللى متعرفش ... المهم قعدنا مستنيين تقريبا ساعة او ساعة ونص وكل شوية واحد يخش يقول امنع الصوت ... امنع الكلام .. كأننا في مدرسة ... بعد شوية بدأنا نستعد عشان نتصور دخلنا على أوضة فيها سترة (قميص) زيتي عشان نتصور بيه اتصورنا صورة لا معنى لها كدة عشان هتتحط على الكارنيه فيما بعد ... بعدها دخلنا على الوزن والطول ميزان الكترونى والطول برضو والقراية بتتسجل على طول على الكومبيوتر ... بعدها بيطلعا حاجة اسمها "استمارة 110 جند " وحاجة اسمها " الباركود" وبعدها بنروح عشان يتكشف علينا طبيا ... مركز الكشف الطبي ... مكان واسع كبير القاعات قليل الغرف ... اول ما دخلنا.. دخلنا على غرفة كدة تقريبا 6 متر × 4 متر وجالنا داكترة مجندين وقعدو يقولو حبة امراض كدة عشان لو حد عنده حاجة من ديه ميخشش ... وطبعا بتبقى امراض نادرة ومحدش اصلا بيسمع عنها غير للمرة الاولى ... الخطوة دي اسمها التلقين الطبى ... بعدها بنروح نكشف نظر وصدر وجراحة ... في اختبار النظر مكنتش شايف حاجة لانه بيقعدنى على مسافة بعيدة اوي ... والدكتور افتكرنى بستهبل بس كتبلى عرض على استشارى عيون ... دخلت على الصدر الدكتور حط السماعة وشاف ضربات القلب وشاف الضغط بسرعة اوي كدة كان بيقلب بصراحة ... وكتب 80/120 ... دخلت بعدها كشف الجراحة وهو كشف بيتم فيه التأكد انك معندكش بواسير او ان فيه تشوهات في فتحة الشرج او العضو الذكرى ... ودي بتبقى اكتر لحظة محرجة في الكشف الطبى كله والواحد بيخرج مش عايز يبص في عين اي حد ... مع ان الكل بيكشف الكشف ده بس برضو ايامها الواحد كان عنده حياء قبل ماالحياء يضيع في الجيش ... دخلنا بعدها في غرفة تغيير الملابس.. بنقلع كل هدومنا ونفضل بالبوكسر فقط ( شورت الملابس الداخلية ) طبعا محدش هيقدر يتخيل 200 واحد على الاقل لابسن كلهم ملابس داخلية وعمالين يتمشو من الأوضة دي للقاعة دي ... دخلنا على قاعة كدة استلمنا دكاترة مجندين وكانو بيحاولو بكل الطرق انهم يطلعولنا اي حاجة عشان نطلع من الجيش المهم الدكتور قاس محيط الصدر وقالى انت عندك فلات فوت والتصاق في الفخذين ( نسيت اقول انى كنت بحاول اتخن في نفسى اوي قبل الجيش عشان مخشش ) دخلت على قاعة كبيرة جدا جه عقيد دكتور ( العقيد نسر ونجمتين) راجل مستفز وكان بيبص بطريقة توحى انو زهق من كتر ما بيكشف على ناس .. عارفين كدة لما يكون واحد بيعمل شغله وهوا زهقان ... المهم الراجل قلنا اقفوا .. وقفنا .. قعد يبص على الناس وقال لكام واحد كدة يروحو يقفو هناك ... الدكتور عدى عليا وبص كدة بصة سريعة ومشى تانى ... ندهتله وقلتله حضرتك مبصتش عليا قالى وانت عندك ايه انت راخر .. قلتله لو سمحت اكشف عليا .... المهم خلانى لائق ب ... يعني على الأقل مش هبقى ظابط وده كان مكسب كبير ولكن كل حاجة ليها ميزة وعيب ... وده اللى هنكمله في الجزء التانى

البعد والقرب

بسم الله الرحمن الرحيم

فجأة ادركت ان كل الأغاني لم تكن بالضرورة محض تأليف ... فلابد ان يكون الشاعر قد مر ولو بتجربة سطحية لما نوى التحدث عنه ... خصوصا تلك المواضيع المتعلقة بصعوبة حال العاشق وما يلاقيه من الحرمان ... اتكلم هنا عن العشق المباح ... اتكلم عمن يريد انشاء علاقة ما في الحلال ... ولكن المال وبعض المظاهر الاجتماعية عائق قوي ... فجأةً رحت أبحث في مخيلتي عن تلك الأغنية التى كان يقر فيها المؤلف بصعوبة حال العاشق في البعد والقرب فلا في البعد راحة لفراق المحبوبة ... ولا في القرب راحة لان القرب يزيد النارالشوق اشتعالاً ... من الطبيعي لأي علاقة حب شرعية ان تنتهي بالزواج ومن المفترض ان يثور الشريكان لرفض حالة السكون والبرود التى يكسو بها الأهل ارائهم ... من أمثال ... وانتم مستعجلين على ايه ؟ بحق الله لم وافقتم من الأساس؟ ولم فشختم افواهكم بضحكات مصاحبة بتبريكات متمنية سرعة الزواج في القريب العاجل ؟ لا أقوى على العيش بذلك الاسلوب الذى كنا نشاهده في الأفلام لطفل فقير يقف أمام محل للحلويات
لا أريد ان اسرق الحلويات .. ولن استطيع سرقتها
ولا أريد ان أظل مكبوتا وأفقد الأمل وعندما يقدم لي صاحب المحل قطعة الحلوى أكون قد زهدت فيها

لله الأمر من قبل ومن بعد

النصيب

بسم الله الرحمن الرحيم

نصيبي أن ألتحق بالقوات المسلحة في مثل هذا التوقيت ... نصيبي الا أواكب ما يحصل في التحرير .... في الجيش انت لم تعد مهندس .. ليس لك كرامة .. تقبل الإهانات والسباب من بديهيات الأمور ومن طبيعة الحياة العسكرية ... من البديهيات ان تكون جائعا متعبا رائحتك عفنة من قلة الاستحمام ورغم ذلك ارفع رأسك يا جندي بكل فخر انت في القوات المسلحة ... نصيبي الا أشارك في ثورة شعبية حقيقية ربما لن تتكر ابدأ في حياتى ... كل ذلك نصيبي ... ويفعل الله ما يشاء ... المفترض الان ان اعتقد نية جديدة حتى لا تضيع سنة من عمري سدى ... من هو مثلي لا يدري متى سيرجع من الخدمة ... لا يدري متى سيتزوج ... متى سيعمل ويحقق ذاته ... انت تشعر انك انفصلت عن طبيعتك ... انت الان تنظر الى الناس العاديين وتطلق عليهم لاإراديا لفظ مدنيين ... يبقى فقط ان انظر لمن هو اصعب ظروفا مني ... احدهم التحق بالقوات المسلحة برتبة ضابط احتياط سيبقى في هذا العناء لمدة 3 سنوات ... احدهم سيظل جندي لمدة سنتين .. واخر ستكون مدته سنة ونصف ... الحمد لله على كل شئ ... ربما يكون نصيبي الشهادة ... حينها أكون قد كسبت كل شئ .. ولم أخسر شيئا

وبعـــدين

بسم الله الرحمن الرحيم

الكلمة دي بقت تتقال كتيرقوي بيني وبينها ... هيا ملهاش ذنب .. انا عارف ده كويس .. بس برضو مش عارف ليه مش عارف انسى وأعدى الموقف ... كل مرة بياخد اسبوع اسبوعين شهر بالكتير ... انما الموضوع فعلا قرب على شهر ... حجم الضغوط مخليني مش عارف أفلتر المواقف زي ما كنت بعمل زمان ... زمان .

-----------------

حلقة جديدة في نفس المسلسل ... أنا عامل زي السمكة كل الصيادين بيصطادو نفس السمك بنفس الطريقة من الاف السنين ... بس السمك مبيتعلّمش ولو سمكة هربت مبتحذرش قومها ... زميل جديد في الشغل حاسس انى هزعل منه قريب مش عارف ليه
كالعادة دائما بيخيل الي انى لقيت شخص ما أحسن مني بيفهم هزاري ويستحمل غلاستى ... مع الوقت الشخص الأحسن منى واللى بيفقهم هزارى ويستحمل غلاستى يبدأ يقول قد ايه انا لطيف او ذكي او جدع او الخ الخ الخ ... بعد فترة يبدأ الشخص الأحسن منى واللى بيفقهم هزارى ويستحمل غلاستى يقولى على حاجات شخصية في حياته ويبدأ يستشيرني في أمور غاية في الخصوصية ... بعدها أبدأ انا افضفضله بحاجات وبالتالى اعتبر انه صديق صدوق وابدأ اهتم لأمره ... ثم يحصل موقف ما يكون الظاهر منه انو عادي احنا مش اخوات ولا حاجة والدنيا مصالح ... اقعد شهور أحاول افصل نفسي عاطفيا عن الشخص ده وبتعب اوي في المحاولة دي بيبقى عامل زي ما البنات بتشيل شعرها المتقطف بمشط بعد ما بتكون استحمت .... ومع الوقت يبدأ شخص أحسن منى و بيفقهم هزارى ويستحمل غلاستى يتعرف عليا ...ثم ... وده اللى هيحصل في الجيش بقى ان شاء الله
--------------
الغرض من ذهاب شخص سليم ومعافى وحاصل على مؤهل عالى وتخصص نادر الى الجيش هو أحد سببين :-
1- الدولة في حالة حرب وتحتاج الى كل الكفاءات المتعلمة والتخصصات النادرة التى لديها
2- الدولة في حالة سلم ...
وبما اننا نعيش في ظل حمامة السلام وعايزين يفرضو اسرائيل صديقة بالقوة بالرغم من انها بتتجسس علينا بس وماله مصارين البطن بتتخانق ولازم نضحي عشان السلام ... كل اللى اعرفه عن السلام في مصر انه موقف بروح منه للعاشر
طيب الدولة في حالة سلم ... اذاً المفروض أدور على تخصص ميكانيكا انتاج وادخله الجيش عشان استفيد منه في المصانع وورش الانتاج واعمل خداع استراتيجي وازود عدد المهارات العسكرية اللى عندي ... لكن لا ده احنا اللى ضحكنا على اليهود احنا هندخل المهندس بتاع ميكانيكا انتاج ده الجيش ونقعده زي القلة ... نخليه يروح يجيب شاي وقهوة للظباط ... هما عارفين انه متربي وانه منضبط وملتزم .. أول دروس الإنصياع نخلي العسكري ده يتذل ...لما يتذل هتنكسر عينه وبالتالى هينفذ الأوامر ... طيب يا فندم العسكري اللى انت هتذله ده مش هيحارب يعني مش هيفرق اذا كان هينصاع للأوامر ولا لا ... كمان يا فندم عايزين ناس مؤهلات عليا في الجيش ليه ... متناقشنيش يا عسكري ... طيب هتدربوني على الاشتباك وهمسك سلاح واضرب نار ... لا يا حيوان ... طيب هركب دبابة او عربية مدرعة ... طيب هبقى في ورشة صيانة اسلحة ... هبقى في ورشة تصنيعة قذائف الهاون ... طيب عايزين في الجيش مهندسين ميكانيكا ليه؟
---------------
انا عارف انى المفروض مكرهشي حد بس فعلا وللأسف مقابلتش ستات كويسين في حياتى
----------------
انا مش واثق من نفسي ... انا تعبت

23

بسم الله الرحمن الرحيم

انهاردة كما هو مذكور 1-11-2010 ... انا مولود من 23 سنة بالتمام والكمال مفيش في دماغى حاجة اقولها ... كل الجديد بس انى مستني الجيش اهه وانتظار ليس له داعي والشغل مش عاجبني واللى بيحبني حبه ليا وحبي ليه بيكبر مع الوقت .. وفي مشاكل بين اهلها وأهلى ... ووزني لسة زايد من ساعة القعاد لمشروع التخرج .. خلص مشروع التخرج ووزني لسة منزلش :) ... انا مأجل الموضوع لما بعد الجيش عشان لو دخلت ابقى اخس جوة ببلاش بقى :)

السنة عدت في طرفة عين ... مع الوقت بيتضح لي معنى الآية (قالوا لبثنا يوماً أو بعض يوم )
بالنسبة للأنجازات اللى كنت ناوي احققها بدأت احقق هدفى في تعلم الخط واتعلمت خط النسخ لوحدي الحمد لله بس طبعاً لسة عايز كتير عشان اصقل الموهبة دي وعايز اتعلم باقى الخطوط وربنا يسهل الحال ويارب اكون حققت تقدم للأمام عن اللى كان مكتوب هنـــــــــا و هنــــــــــــا

My Endless Sine wave

بسم الله الرحمن الرحيم

كالعادة عندما أمر بمثل هذه المواقف أحاول تهدئة نفسي ... أخبرها أن المؤمن مصاب .. وأنني حتما يتم التكفير عن سيئاتى الآن .. هكذا تقول أقوال الرسول محمد صلى الله عليه وسلم وهكذا يرطن بها أئمة المنابر وخطباء التلفاز وأقلام الكتب .. عفوا أمهات الكتب ... اليست كل أم لابد أن نبرّها .. اذاً لابد ان نبرّ امهات الكتب ايضا ...

تصرخ في وجهى لا مبالية أنت ضعيف ولا تريد مواجهتى بمثل هذه الحقيقة .. الحقيقة الواضحة كوضوح الموت والمرض والفرح والحزن ... الحزن ذلك الوصف الذى دائما ما تتهمنى بأنى من جلبته لك .. أنت لا تتذكرني ابدأ عندما تقول لك (هي) كلمة تعجبك .. لا تتذكرني أبداً عندما تسمع كلمات الشكر والثناء... فقط تتذكرني مع هذه الكلمة ...

يستيقظ الحكيم في داخلى .. شخصية وهمية تنمو داخلي .. تغذيها الأمنيات .. أنا لست ضعيفاً ... هذه مرحلة وستمر مرور الكرام ... ما المانع من بعض لحظات الاسى احيانا .. اليست هذه اللحظات مكتوبة علينا .. مقدرةٌ علينا .. اذا لا سبيل لدفعها سوى من جَلَبَها ... اممم... أنتِ تستدرجيني لأتناقش معك حول جدلية القدر ... موتي بغيظك... لن أفتح هذا الموضوع معك ... تعرفين أنه لكل شئ اذا ما تم نقصان ومن سره زمنٌ ساءته أزمانُ ... انت تعرفين ان الحياة تتبع دالة جيب الزاوية ما تلبث ان تصل لقمة الصعود حتى تهبط وما تلبث ان تهبط حتى تصعد .. طالما تبجحتى بمثل هذه العبارة ...

ليس فيك خير ... لو أنك كما تدعي صالحٌ تقيٌ ... ماذا أفادك صلاحك وتقاك .. أنت حقاً لا شئ .. ما الذى تتمتع به دون غيرك ... ما الذي يميزك عن فلان ... جرب واذهب بعيدا لن يفتقدك أحد .. لاأقصدها بالطبع .. ولكن جرب ... جرب لمدة يوم واحد ... اجعلها اسبوعا .. صدقا لن يلتفت اليك احد ... هل قلت لي بعد ما الذي يميزك .. لا تقل آراءك وأفكارك وحب الناس لك ... الناس تركن بطبائعها إلى المرفهّين عنهم

أنت تلوميني في أشياء ليس لي يد بها ... لم أختر عائلتى أو اسمي أو اخوتي .. لم أختر ديني .. وإن وجدته الأفضل .. لم أختار حبي .. ولم أختر أهلها ولم أختر شعري ولا استطيع التحكم في شهواتي بالشكل الكافي .. لم أختر موت والدي .. لم أخترذلك أبداً...

حسناً أنت لا شئ وليس عندي ما أضيفه