الثورة علمتني

#الثورة_علمتني

1- الثورة فعل جذري لازم تقوم بيه معظم شرايح وفئات المجتمع، وحتى اللى مش هيشارك مشاركة فعلية وهيقعد في البيت على الأقل يكون راضي عنها ويؤيدها لضمان تحقيق أهدافها وده فايدة وضوح الأفكار ساعة الحشد.

2- الثورة بتظهر بشكل طبيعي على السطح نتيجة فشل الحلول السياسية، وده معناه كل ما كان عندك مناخ سياسي مفتوح، وكل ما الشعب تغلغل في دواير صنع القرار هتبقى عندك ثورات أقل على المدى الطويل 

3- الثورة مينفعش تبقى مجال للتصنيف لأنه وضع مؤقت مرهون بظرف مؤقت.. يعني مينفعش واحد يقول على نفسه أنا ثوري، إنك تقول على نفسك أو على شخص ما إنه ثوري فهو إنك تحصر كل صفاتك ومميزاتك وتقول على نفسك الغاضب/فلان الفلاني أو المضحك/ فلان الفلاني

4- الثورة عرفت الشخص البسيط اللى مكنش شاغل باله بالسياسة إن السياسية طايلاه طايلاه داخلة في كل مناحي الحياة وانه حتى لو بعيد عنها مش معنى كدة انها مش مهمة الموضوع بالظبط عامل زي فرض العين وفرض الكفاية والفرض والسنة .. يعني لازم تكون عارف الأساسيات وسيب ناس تانية مهتمة بيها تشتغل عليها، المواطن الغير مهتم بالسياسة عرف بالتجربة الحية ان السياسة بتأثر بشكل أساسي في الاقتصاد وفي تحرك طبقات المجتمع يعني اللى كان فوق امبارح الثورة هتخليه تحت فكل واحد لازم يوعى كويس بعد كدة لمبادئ الحزب اللى هيختاره (ده لو كان عندنا رفاهية ان حد بيخش حزب عشان مبادئ أصلاً)، وده برضو يخلي الناس المشتغلة بالسياسة يبطلوا يقولوا للناس العادية الجملة الخالدة بتاعت: "يعيب السياسة السهولة البادية فيها" 

5- الثورة بتتطلب تضحيات كبيرة وعظيمة، وكلمة تضحيات بتتقال للفعل النفعي العام نظير ضرر كلي أو جزئي واقع على القائم بالتضحية،فكر فيها كدة ان والدتك احتاجت كلية وانت اتبرعت بيها وبعد كدة قلت انا عايز فلوس او انكم تكتبوا اسمى على رخامة على أول الشارع. يعني مينفعش تكون حاطط في دماغك انك هتنزل المظاهرة دي واحتمال تتصاب أو تتقتل بالرغم ان في غوغاء لا يهمهم أمرك. ده سبب كافي أوي يخليك انت كمان متنزلش مظاهرات، التظاهر فعل ينطوي عليه التجرد لأجل الفكرة، وده اللى يخلي حقوقين اشتراكيين يدافعوا عن اسلاميين، ونشطاء لهم اتجاهات اسلامية يقفوا جنب ناس معندهمش الميول دي ويمكن كمان بيرفضوها 

6- مفيش تيار ينفع يعتمد على نفسه لوحده ويـ"طظ" باقي التيارات المواجهات هتبقى صفرية ساعتها ومش هيبقى فيه حد كسبان ده اللى حصل في البالون وماسبيرو وبورسعيد ومحمد محمود والعباسية ورابعة دايما كان العدو واضح بس المدافعين عن الحق غير واضحين،مينفعش تلمس النار بإيدك عشان تتأكد انها بتحرق.

7- الثورة نشطت جاهزية الشارع للاستعداد للمواجهات، بقى في تراكم خبرة ناتج عن كتر المواجهات دلوقتى قبل أي مظاهرة كبيرة بقى الناس بتعرف تنظم نفسها بشكل أسرع وده يربك أي نظام أمني كتيان زي نظامنا ده، يا جماعة ده احنا بنواجه نظام بيحبس بجعة مهاجرة باعتبارها جاسوسة ولما طلع الموضوع ساخر دبحوها وكلوها!! 

8- الفعل الثوري مش مؤقت مينفعش نفضل واقفين عند مواجهات يناير اعلان مارس الدستوري ومواجهات مايو وأحداث نوفمبر، احنا كدة بنحول الثورة لعيد .. وده مينفعش عشان النقطة رقم 3 بخصوص ان الثورة فعل مؤقت مش دائم، وعلى رأي البرغوتي -مع انه غلس بس برضو ساعات بيقول حاجات حلوة- الثورة بتبقى دايما مفاجأة ودايما وقتها معلوم.

9- جوة الفصايل الواحدة فيه خلافات يعني قبل الثورة مكناش نعرف التباين الكبير ده في صفوف الإسلاميين وفي الغالب كان في ناس كتير فاكرة الاشتراكيين والشيوعيين حاجة واحدة ليها اسمين مختلفين واحد حقيقي والتاني دلع وشوفنا برضو بفضل الله ملحدين بيحاولوا يفرضوا وجهة نظرهم فرض كأن الإلحاد بقى دين في حد ذاته، وديمقراطيين ودولجية وناصريين واسلاميين ما بعد حداثيين وجوة المابعد حداثيين تلاقي المسيريين والبيجوفتشيين .. يعني كل التنوع اللى ظهر على السطح ده أكيد صحي ومحدش يقول يلوم ناس معزولة عن بعض 50 سنة ان أول طريقة للتواصل ما بينهم هي الشتيمة والسخرية والضرب والبضان المتبادل.

10- دول كتير اتعلمت من التجربة مش مهم تمشي دولتك ازاي ومش مهم تسمي نظام الحكم بتاعك .. الديمقراطية أصلا مش كيان كامل كدة ونقط بنمشي عليها، لأ دي آليات حكم وكل دولة مطبقاها بطريقتها الخاصة اللى خضعت لتوافق عموم الشعب .. المهم يعني ان الإخواني والسلفي والجهادي والاشتراكي والشيوعي والماركسي والديمقراطي والليبرالي والتقدمي والمابعد حداثي والأصولي والدولجي والأمنجي وكل من يتمتع ب 46 كروموسوم أكيد متفقين على هدف ان الدولة تبقى غنية وفيها فلوس، غير كدة عادي بقى نعض في بعض ونختلف في تفاصيل يعني ناكل ونتعلم ونتعالج الأول يا ولاد الكلب بعد كدة نبقى نشوف المادة التانية والمادة أربعتلاف وخمستاشر 

11- مش كل حاجة ينفع يمشي فيها رأي الأغلبية .. في قرارات لازم يبقى عليها إجماع

دايرة

بسم الله الرحمن الرحيم 

الدايرة شكل هندسي غاية في البساطة وغاية في التعقيد ، الدايرة (القوس ) اللي مع الخط بيعملوا كل الصور والرسومات بدون أدنى استثناء ..  بص كدة حواليك لأي صورة او رسمة او أي رمز اي حاجة عنندك في ال 2d مكونة من خط أو قوس من دايرة  وحتى برامج الرسم اللي شغالة بنظام ال scaler مبتتعاملش مع القوس كأنه حتة من داير بتتاعمل معاه كأنه مضلع polygon عدد اضلاعة كبير بحيث الزاوية بين كل ضلع وضلع تبقى تكاد تقارب ال 180 درجة .

الدايرة الشكل الهندسي اللي ملوش تعريف ثابت ونهائي .. في ناس عرفته انه منحنى منتظم البعد عن المركز غير معلوم بدايته او نهايته تعريف تاني يقول هو المنحنى الذي يمر برؤوس أضلاع مضلع زواياه تؤول ل 180 درجة .. وده التعريف اللي اشتغلت عليه برامج الرسم زي ما قلت في الفقرة اللي فاتت وكلمة ( تؤول ) في الرياضة يعني lim يعني النهايات .

الدايرة من ضمن تعريفاتها هو منحنى يمر بنهايات خطين متعامدين  متساوويين . المهم ان الشكل ده ملوش أي تعريف نهائي وملزم .. حتى الفيثاغورثيين  بجلالة قدرهم موصلوش لتعريف فلسفي شافي للموضوع ده كل اللي وصلوله ان الدايرة هي تعبير عن الفراغ اللانهائي وان اي دايرة هي عبارة عن لوجوس logos لدايرة أخرى وهكذا .. وطبعا معروف ان الفيثاغورثيون مكنوش بيحبوا يعترفوا بموضوع اللانهائية وما بعدها ده وكانوا بيتزنقوا جامد في التبرير ومبيعرفوش يردوا زي مثلا لما حبوا يتذاكوا وقالوا ان النقطة هي دائرة نصف قطرها صفر ودي حاجة مستحيلة متنفعش للتبرير أصلا .

دراسة الدايرة خرج منها علم كامل اسمه حساب المثلثات وحساب المثلثات ده ما هو الا دراسة الزاويا والعلاقات  اللي بيعملها نصف قطر دائرة ما مع الأفقي والرأسي وطبعا العلم ده  أساس تطور لعلوم كتير مش بس الرياضة وفي الهندسة هي الشكل الوحيد اللي بتتم دراسة تأثيره على بقية الأشكال مش العكس يعني على سبيل المثال احنا بندرس طول ضلع مثلث مرسوم داخل دائرة ومبندرسش نفس العلاقة بين المثلث والمستطيل مثلا او بين شكل بيضاوي وخماسي مثلا

الدايرة كرمز يمثل الحماية .. زي ما المثلث يمثل القوة والخماسي يمثل الكمال ، الدايرة كانت مكون أصيل في فكر كل الحضارات وحتى التجمعات القبلية البدائية . شوف مثلا دوران المولوية الصوفية المستنبط من حركة الأجرام حوالين مركزها  وحوالين مركز الشمس والدوران اللي بدور بيحقق النشوة النفسية ودي الحركة اللي بتوضح العلاقة بين ما هو مادي وما هو محسوس يعني حراكتك المادية دي اللي بتأثر على مراكز الاتزان اللي في ودنك تخليك تشعر بالنشوة اللي بدورها بتأثر بالايجاب على الحالة النفسية . حتى وصفك للحيرة في مختلف الثقافات بيتم التعبير عنه اننا بنلف في دواير وان التوهان المتكرر بيتم تشبيهه بأشكال دائرية 

وضاقت فلما استحكمت حلقاتها ..  فرجت  وكنت أظنها لا تفرج

الدايرة زي ما قلنا بتلخص فلسفة اللانهائية وما بعدها  حيث ان محيط الدايرة يمكن تحويله لخط مستقيم ولكن الخط المستقيم عند تحويله لدايرة بتدخل في جدليات اللابداية واللانهاية وده محور الفلسفة الوجودية يعني احنا دايما بنسأل نفسنا جينا منين ؟  وهنروح فين بعد الموت ؟ وهل الموت ده مرحلة مؤقتة (برزخ) ولا نهاية لبداية جديدة وفي القرآن (وأنه هو يبدئ ويعيد ) (وأن إلى ربك المنتهى) (إن الى ربك الرجعى ) الدايرة كانت بتوجه الانظار دايما لموضوع هو الله الأول والآخر والظاهر والباطن 

شوف مثلا الورد الصوفي اللي بيقول : 

لله دولاب يدور كأنه .. فلك ولكن ما ارتقاه كوكب

نصبته فوق النار أيد قدرت .. ترويحه الأرواح ساعة ينصب

فكأنه وهو الطليق مقيد .. وكأنه وهو الحبيس مسيب

للماء فيه تصاعد وتحدر .. كالمزن تستسقي البحار وتسكب 

هامت به الأحداق لما نادمت .. منه الحميرة ساقيا لا يشرب 

  حاجة غريبة جدا تقبل العين بصريا للدايرة بالشكل ده لأن الانسان بيميل بطبعه للسميترية (التناظر) والاشكال المنتظمة  والدايرة كمنحنى بيعمل شذوذ للانتظام ده وبرغم ذلك التصميمات اللي بتعتمد على المنحنيات بتبقى أشد جذبا للعين من التصميمات الصارمة شوف السيارات والأجهزة المنزلية وتصميمات الحدائق كمثال ، والغريب ان الفراعنة مهتموش بدراسة النسب الدائرية دي ومحدش وصل العلاقة بين الخط والدائرة الى مداها زي الفنانين المسلمين ، بعدهم عن التصوير وتركيزهم في استحداث اشكال و أنماط patterns بالدايرة لوحدها حاجة تثير العجب والاعجاب .. حتى النسب بتاعة انواع الخطوط ال calligraphy يعني مستخرجة برضه من نسب دائرية .

كالعادة الكلام عن الدايرة مبينتهيش :)

Status 7

(1)
لجل النبي يا جدعان ارحمونا من تشبيه رؤساء الجمهورية بالسواقين .. ارحموا اللي خلفونا بقى ..

مش كل واحد عايز يضرب مثل يقوم ضارب مثل السواق اصل الموضوع سهل يعني واي حد يقدر يجود في الموضوع ده

EX: 

1- حسني كان واخد العربية ومبيوردش ايجار وكان بيتحامى في بلطجية الكارتة .. بس الركاب راحوا الموقف ومرضيوش يركبوا وضربوا بلطجية الكارتة وفضلوا مستنيين السواق

2- مرسي كان معاه رخصة بس مبيعرفش يسوق

3- السيسي جه وضرب مرسي وقال للناس انا معيش رخصة بس بعرف اسوق ... بس مش هسمح لحد يسألني هوديكوا فين عشان ده امن قومي

4- صباحي عايز يسوق باي طريقة ومعندوش مانع حتى انه يقعد على حجر اي سواق ويحرك الدركسيون والسواق الحقيقي يدوس البنزين والدبرياش وينقل

5- النوريين هما الشريط اللي شغال في الكاسيت السواق مشغله عشان يجيب البركة والركاب قرفانة من الصوت العالي

6- الاخوان عايزين يخلوا الكنبة أربعات وبما ان الناس معترضة يقواوا العربية دي كانت بتاعتنا اصلا واحنا زينا زيكوا عايزين نروح

7- الديموقراطيين قاعدين على القهوة اللي في الموقف ومش عاجبهم ان العربية غير مطابقة لانبعاثات ال CO2 اللي بتسبب الاحتباس الحراري

8- الاعلاميين هما اليفط الكبيرة الغالية اللي متنورة بكشافات اللي في الشوارع والركاب بتتفرج عليها من الشباك وهما مزنوقين في العربية

9- القضاء هي اليفط اللي في الشارع بتاعت ممنوع الوقوف وممنوع الرجوع للخلف وومنوع الدخول واربط الحزام وسلامتك تهمنا .. مالية الشوارع ومحدش بيفكر يبصلها اصلا


#بسيطة_اهه
-------------------------------
(2)
ولئن لم ينته الحمدينيون عن التعالي على المقاطعين لينالهم ما نال سابقيهم من تكرار سنة الله في الشامتين بأن يكون جزاءهم من جنس عملهم .. يعرف ذلك الاخوان والحازمون والإبريليون والديموقراطيون والأفاكون المستنيرون .. افيقوا وإلا أورثتم ذلة من كان قبلكم الذين ظنوا انهم وحدهم على حق ..

------------------------------
(3)
أما عن أتباع حزب النور ومن شايعهم ... فإنهم أفرق للصف وأكثر على تكدير الصفو من جماعة الإخوان .. لا ترى في وجههم للعلم سمتا .. ولا تلمس في حديثهم صدقا.

وهم تارة ينادون بغلبة المصلحة العامة للأمة على مصلحتها الخاصة ويفردون لك في ذلك الصفحات ويقيمون على شرفها ما عظم من الجموع و المؤتمرات .. يتبعون كل ناعق .. ويحالفون كل كاذب وفاسق .. والإمام عندهم من كان له بطش وشدة .. وهم في ذلك يدعون أنهم وحدهم غرباء أهل هذا الزمان المنافحون عن منهج السلف .. رضوا الوقوع في الفتنة وتولوا كبرها بالتبرير والتنظير .. فدعموا القاتل، وجرموا القتيل. ووقعوا فيما أخذوه قبلا على معارضيهم .. من خطر تغليب هوى النفس على الحق .

فكفى بي من البلوى أن عشت لأرى قوما ضالين مُضلين .. يشترون بكلمات الله ثمنا قليلا .. يدعمون حكم المغتصب السفاح بدعوى أنه محافظ على الصلاة مقيم لها .. ولئن سألتهم وإن كان في الصلاة مرائيا؟ .. قالوا لك لا يعلم ما في القلوب غير ربها .. وبالصلاة يستقيم الأمر أو يفسد ... فما كان خروجكم إذا على رجل يؤم الناس بنفسه في صلاة القيام في رمضان .. أم أنها عميت القلوب التى في الصدور ؟

( إن الذين فرقوا دينهم وكانوا شيعا لست منهم في شئ إنما أمرهم إلى الله ثم ينبئهم بما كانو يفعلون )

(إن الذين فرقوا دينهم وكانوا شيعا كل حزب بما لديهم فرحون )

--------------------------------
(4)

وهو ازاي الناس مضايقة من محن السيسي وهبله اللا نهائي وفي نفس الوقت نازلين شير في اخباره ؟ .

يعني انا متفهم جدا انى مينفعش أنفصل عن الواقع بطريقة تبين إنى أعلى من مجريات الأمور ، بس برضو مش قادر ابلع انى الاقي بوست اهبل لتصريحات هبلة للسيسي او لجماعته أقوم مشيره واقعد اتريق عليه .. يعني فعلا الموضوع يثير الغثيان والله.. فرقنا ايه احنا عن الاخوان اللي كانوا بيشيروا بوستات (على اساس انها دعوية ) - زي كاريكاتيرات أحمد سامي مثلا - يتريقوا فيها على ممارسات خاطئة وهما كانوا بينشروا الحاجات دي بين الناس من غير ما يعرفوا.

أنا عارف ان في مجموعة من الناس اللي بتشير البوستات دي بتشيرها بدعوى تفكيك الخطاب وطرح بديل نقدي مضاد .. بس هل فعلا كلام السيسي وجماعته محتاج تفكيك بالشكل ده ؟ .. اللى اعرفه ان كتر الشير للبوستات دي وكل واحد يبين قد ايه انه قرفان ومبضون دي حاجة لا تفيد بأي شكل من الاشكال غير ان الواحد يفضل دايما تحت ضغط عصبي ونفسي مستمر .. ومعسكر السيسي وأرامل مبارك بيعتبروا انهم على الطريق الصح لما يلاقونا واخدين الأمور على محمل الجد كدة ومخنوقين ومتبرمين .. بيعتبروا ان استفزازنا ده انتصار ليهم بشكل او بآخر .

حتى موضوع تحوير الاسماء بالشكل الطفولي ده بيفكرني ببوست لشريف نحيب كان برضو علق على كدة لما قال ان الموضوع ده عامل زي العيال بتوع ابتدائي لما كان حد فيهم يقول للتاني قول مصاصة .. ولما التاني يقول .. الأولاني يقله أمك رقاصة !!

انا مبقولش ان تفكيك الخطاب ده مش مهم .. بالعكس هو مفيد جدا بس لما يبقى في محله .. مش اي خبر تافه او اهبل نتعامل معاه انه جد ونحاول ننظر فيه ونحمل الموضوع ما لا يحتمل .. خلاص عرفنا ان السيسي بيتموحن وبيتسهةم وبيمثل .. حلو انقلوا بقى على اللي بعده .. استقيموا يرحمكم الله

----------------
(5)

~ حوار مع صديقي المؤيد لحمدين ~

بص يا صديقي احنا الاتنين راكبين في مركب واحدة مخطوفة .. حلو

انا حاطط ايدي على خدي عمال اتفرج عليك وانت عمال تسيأ السفينة ومشمر البنطلون .. ومش معترض على كدة والله .. ولا بتريق عليك حتى والله .. كدة كدة احنا مخطوفين سوا .. وكلنا حاليا رايخين في داهية وعايشين ايام سودا .. بس الايجابية ليها صور تانية كتير غير انى امرمط نفسي عند اللي خاطفني

وانت عرقان وحالتك بالبلا وعمال تسيأ بهمة ونشاط وعمال تبصلي اقوم اشتغل معاك ... بس انا وانت عارفين انها مش المركب بتاعتنا ... بس انت عشان شخص ايجابي وبتاع بتبرر وتقول كدة كدة المركب دي بتاعتنا لازم نحافظ عليها وفي يوم من الايام هترجعلنا من اللي خطفوها .. اشطة .. كويس جدا .. ده محور الاختلاف دلوقتي بين معسكر اللي ضد السيسي وضد الاخوان .. اللي طول عمره داير يلف يدور على ركنة.

مؤيدين التصويت لحمدين صباحي بينظّروا على النقط الرئيسية التالية :

1- كدة كدة الانقلاب أمر واقع والعالم كله بيتعامل معاه على اساس انه امر واقع .. فبلاش نحور على بعض بقى ونقول ان المقاطعة هتبين للعالم انه انقلاب لان العالم معندوش مشكلة في كدة

- طيب الانقلاب امر واقع .. والتزوير برضه امر واقع .. ما ده تحديدا اللي مكنش بيخلينا نروح ننتخب ايام مبارك .. لأن الموضوع عبثي جدا وبلا جدوى حقيقية .. ومهما اعلن عن ان في مراقبة دولية كرتونية .. احنا عارفين ان المراقبة الدولية مبتغطيش الحد الادنى من اللجان على مستوى الجمهورية .. والموضوع اصلا سبوبة للمراقبين اكتر من انه مراقبة فعلية للانتخابات .. وفي الاخر هيقولوا الكلمة المعتادة .. " لقد رصدنا انتهاكات .. ولكن سعيدون بتقدم المسار الديموقراطي في دول الشرق الاوسط" ودي الحقيقة هما شايفينا كائنات لا نستحق ان نشاركهم نفس الهواء اصلا .. ما بالك اننا عايزين نعمل انتخابات

2- اعصر على نفسك لمون وانتخب اللي يحافظ على مسار الثورة وبتاع واشمعنى عصرنا على نفسنا لمون مع مرسي " الخاين - ده رأيي - " ومش عايزين نعصره على حمدين "الخاين برضو " ؟ ..

- موضوع مرسي كان مختلف .. مرسي مكنش في الحسبان اصلا .. احنا لقيناه في وشنا .. زائد ان كان في منافسة حقيقية ساعتها بين شفيق كمرشح الفلول وابو الفتوح كمرش وسطي اثبتت بالتجربة ان ميوعة الخطاب مبتأكلش عيش وسريعة الانهيار شعبيا وحمدين صباحي اللى خد اصوات لمجرد ان ناس مش عايزة لا فلول ولا واخوان سابقين ..

3- لازم نثبت لدولة العسكر /الدولة القديمة ان فيه ملايين لا بأس بها ضد فكرهم وكيان شبابي ثوري لازم يتعمله حساب

- والله بجد ؟ .. احنا كدة هنثبت اننا كتلة حرجة بقى وبتاع .. ده احنا مش عارفين نلم نفسنا نكسر قانون التظاهر ... ده احنا ايام الحظر كنا حاطين ايدنا على خدنا زي الولايا ومصبرين نفسنا بالتريقة والقلش .. المشكلة الحقيقية ان التيار الشبابي الثورى مش عايز يدرك انه عنده مشكلة .. بينكر عدم قدرته على الحشد وان في خلافات كبيرة جدا في افكاره ورؤيته للأمور لسة لحد دلوقتى الشباب متفقوش على افكار رئيسية لها اولوية وافكار فرعية لا نملك ترف الاختلاف عليها في الوقت الحالي .

زي ما الاخوان بيعلقوا اي حاجة على انهم خبرة 80 سنة .. احنا بندعي اننا اصحاب الحق الحصري للثورة وان الاخوان باعونا في محمد محمود .. ماشي هما باعونا وخلصنا .. مش هنقعد نعيط بقى كتير يعني .. الموضوع دلوقتى اشبه بالسؤال متى الثورة ؟ .. والاجابة ماذا اعددت لها ؟ ... حمدين رجل بلا مبادئ واهم نقطة في تفكيك جدوى أهمية دعم حمدين اللي قاله ناس كتير وهو ان حمدين شخصيا مش واخد الموضوع جد .. حمدين - لو كان شخص مخلص بقى ومناضل حقيقي - كان هيبقى عنده كروت كتير جدا يقدر يستخدمها ضد السيسي التافه ده اللي بيدي مثل للمصالحة انه يصالح ولاد $#$/@! زي شوبير ومرتضى

فعلا ملوش لازمة ادعم واحد بيقول انا بحترم السيسي .. وبحترم احكام القضاء ومش عارف ايه ... ملوش لازمة ادعم واحد عنده تصور مشوه عن فكر الناصرية اللي هو اصلا مشوه عن فكر التيووية المشوه عن الستالينية .. بؤس لا نهائي والله .. انا فعلا لو دعمت حمدين واقنعت قرايبي واصحابي وزمايلي في الشغل من ارباب حزب الكنبة بانتخابه فأنا كدة بشم كلة بمحض ارادتي وعن سبق اصرار وترصد .. كفاية بقى .. لازم نتعلم ان لكل مقام مقال .. ومش دايما المشاركة بتكون ايجابية .. ساعات الانتظار .. واختيار المعارك بيكون اهم اسباب النصر

*احتياطي بقى مرسي خان الله فينا وهو اللي في وشي مش المرشد ولا الشاطر والسيسي مجرم حرب .. وابو الفتوح والبرادعي بالنسبالي زي السايح الاجنبي و كلهم عليهم من الله ما يستحقون ربنا ينتقم منهم .. *

-------------------------------
(6)


الخيانة : انى احط موارد الدولة في جيبي ومسمحش لحد يشوف موازنتي بحجة الامن القومي

الخيانة : انى اجيب معدات غالية للقطاع الهندسي على اساس انها معدات عسكرية عشان ميتمش مراقبتها وبالتالي اعمل بيزنس من فلوس الدولة

الخيانة : اسند مشاريع للقوات المسلحة اعتمادا على انى عندي معدات حديثة اللي انا اصلا جايبها نصب ... والمشاريع دي مبعملهاش ببلاش برضو ده انا بكسب فيها

الخيانة : استخدم " الفرد المقاتل " كعامل في الارض او حارس عجول في مزارع " القوات المسلحة " دون مقابل مادي يتناسب مع المجهود المبذول .. ولا يتم طبعا مراقبة الارباح لان اسعار الطماطم والفلفل والكانتلوب من اشد تفاصيل الامن القومي سرية

الخيانة : استغلال اراضي الدولة الممولة من الشعب بدون مقابل .. استخدام موارد الدولة بدون سؤال .. تجنيد الشباب بالاجبار ليعملوا في مشاريع القوات المسلحة بالسخرة .. ولا يحق لأي كان ان يسأل عن الأرباح لأنها أمن قومي

الخيانة : ان يصل راتب قائد الفرقة ما يقارب المائة ضعف (بدون مبالغة ) من راتب المجند

انتخابات رئاسة الجمهورية 2014

بسم الله الرحمن الرحيم 

الموضوع كان محتدم بين المقاطعة ولا التصويت لحمدين من باب  عصر اللمون زي أيام مرسي .. وده كان رأيي بترجيح كفة المقاطعة مع احترامي الكامل للى هيصوت لحمدين :

-----------------

-1-

1- الموضوع أصلا لا يخضع للمنطق، ولا يُعمل في العقل الحيرة، وليس له علاقة بسلبية أو بإيجاب

2- النتيجة كدة كدة  ملعوب فيها ، كل الناس متفقة على ده ، يعني ممكن اصلا الاصوات بنزاهة تبقى 40% لحمدين مثلا ويخلوها 49 % عشان يقولوا المنافسة محتدمة وبتاع ... كل الغرض من الانتخابات دي انهم يرجّعوا ثقة المواطن في الصندوق نفس فكر الاخوان ابن ال*** برضو بس الاخوان كانوا متطمنين لقواعدهم الانتخابية وسهولة حشد المتعاطفين مع خطابهم العاطفي/الطائفي ، عادي في الاخر دي برجماتية هما بينتهجوها زي برجماتية المهمشين والكادحين والفقراء كدة بتوع حبيايبنا الحمر، الفلول/الجيش/الدولة القديمة /الشفاشق متطمنين لتسويد البطاقات والبطاقات الدوارة وطرد المناديب من اللجان وتبديل الصناديق وزود عليهم لجنة عليا لا يتم الطعن على قراراتها

3- المقاطعة اختيار من ضمن الاختيارات لا يجب انكاره انا متفق معاك ان المقاطعة هي " لا فعل " سياسي ، بس هو عاد في سياسة اصلا بعد 3 يوليو حضرتك ؟
السياسة هترجع تاني لما يتعمل ثورة تاني غير كدة خلاص الجيش ركب وحبس معارضيه من كل الاتجاهات واستعاد سيطرته على التحركات المضادة ليه ورجعله تاني ميزة الانذار المبكر وقوة الردع بفضل المواطنين الشرفاء وأرامل مبارك

4- عايزك تتخيل لو مكنش حمدين نزل الانتخابات والسيسي كان نجح بالتزكية .. مش كان على الاقل عندنا فرصة للضغط عليه زي مبارك 2010 ، سيبك من المجتمع الدولي اللي مصر بالنسبة له قناة سويس وجوار لإسرائيل وان شالله نولع بعد كدة ، بس نزول حمدين ببساطة شرعن الإنقلاب تاريخيا كمان

5- انا مقاطع وعمري ما نظرت للمقاطعة ولا هاجمت اللي هينتخبوا حمدين ، ده صوتك ومحدش ليه القدرة انه يصادر حقك ده - ده المفروض يعني في الظروف الطبيعية - فانت متصادرش برضو حق المقاطع في انه يعمل اللي هو شايفه الصح من وجهة نظره ، بلاش بس خطابات الاستعلاء الاخلاقي والسياسي وكلام من نوعية احنا لوحدنا الايجابيين واللي مش معانا يبقى سلبي ، الإخوان عملوها قبل كدة واديك شفت النتيجة بعينك ، وعموما في مصر مفيش حد يقدر يتنبأ بالوضع السياسي لشهرين قدام

----------------------
-2-

المنافسة محتدمة وبتاع مين هيعرفنا الصح فين ؟

دلوقتى في محامي مندوب لحمدين اتقبض عليه ، ايه اللي يمنع ان المناديب تنطرد ساعة الفرز زي ايام مبارك ، وخصوصا ان دلوقتى محدش هيفتح بقه .. الناس بتتحبس عشان بلالين يا عم الحاج .. والمشاهير اتحبسوا ومفيش حد اتحرك .. ايه اللي هيخوفهم انهم يزوروا ؟ انا بكره حمدين فشخ زي ما كنت كاره الاخوان فشخ .. بس كنت مستعد اعصر لمون تاني وتالت لو كان في اي نسبة ضمان ان الانتخابات مش هتتزور .. دلوقتى شروط التزوير كلها متوفرة .. ودستور 2014 ليس منا ببعيد ... وفي الاخر انا مقاطع بس بحترم الناس اللي هتصوت لحمدين والله وياما قلت كدة

انا عايز اوضح انى مش ضد اللي هيصوتوا لحمدين بل بالعكس بحترمهم والله انا بس عارف نفسي وعارف حرقة دمي اللي هحس بيها لما كدة كدة للسيسي هينجح .. بس يعني الظروف الحالية زي العربية فيها 4سرعات للأمام وسرعة واحدة للخلف ووضع ال N ... أنا بقى مموّر لحد ما يبان حاجة

شمس العشية

بسم الله الرحمن الرحيم 

من فترة كبيرة جدا وانا عايز اتكلم عن الموشح ده .. بس مكنش بيجي وقت للأسف .. كمان مكنتش أعرف مين اللى بيغني أصلا.. ولقيت تضارب كبير جدا وصعوبة بالغة انى اعرف الكلمات دي لمين أصلا .. بس الموشح ده فضلت أسمعه بلا إنقطاع ومعرفش ايه سبب تعلقي بيه كدة . 

الموشح ده مشهور جدا واتغنى بأكثر من لهجة وأكثر من فرقة .. بس اللحن العام للموشح متغيرش كتير اوي باختلاف المغنيين .. والنسخة اللي انا مختارها هي لفرقة ألمانية تأسست عام 1985 الفرقة اسمها ALAndaluz Project (مشروع الأندلس)

وده بيفسر نطق الحروف المتكسرة أحيانا اللى بنسمعها في الموشح 

الأغنية دي من ألبوم Deus et Diabolus (الله والشيطان) وطلع انهم بيغنوا أغنية حلوة تانية كنت عارفها بس مكنتش لسة اعرف ان دول اللي بيغنوها 

الأغنية مليئة بالرموز الصوفية (زي الكأس - المدام اللى هو الخمر.. إلخ  ) والأفكار الجميلة عن الحب والعشق والتأمل في الكون  وقد ايه الانسان المحب روحه بتعلو و بيبقى أفضل حالا في مواجهة الحياة..

 ولحد دلوقتي  أنا  معرفش على سبيل التأكيد  مين اللى مألف القصيدة دي  .. عموما  الموشح من التراث المغربي الاندلسي .. ولحد دلوقتى برضو  معرفش  الفروق الفنية  بين التوشيح الأندلسي والتوشيح الغرناطي  وتوشيح أهل فاس .. بس ده  من صنوف الفن القريبة جدا  لقلبي .. اسيبكم تستمتعوا  بقى  

شمس العشي قد غربت  واستغربت ..  عيني من الفرقة

على الشفق قد سطّرت حين غيبت.. ترثي على الفرقاء

حتى الطيور قد غردت واترنمت ..  زاد العشيق شوقاً

جاوبتها بالإشتهار..   قف نعتبر لله ..  عليك مهلاً

قال المليح زين الصغار فز بالنظر صب المدام واملأ

يا شمس العشية أمهل لا تغيبي بالله رفقا

هيجتي ما بيا حتى زدتني في القلب شوقا

ترفق عليّ إني في المليح قد زدت عشقا

في الوادي المذهب 

و وجه المليح مثل الثريا

و الساقي المؤدب

يسقي في الأواني البندقية

صففوا القطع وزيدوا واغنموا هذي العشية

كلنا كأسه في يده نغتنم ساعة هنية

والمليح قلبي يريده ينشرح بين يديا

و القاطع بيني و بينوا

و العيدان تصنع تواشي

قربوا حِبي إليّ و اعطفوا عطف الحواشي

أنا كلي ملكٌ لكم   ... ساداتي أنتم لمن ؟

أنا عبدٌ اشتريتموه رخيصا بلا ثمن

-------------------------------
معلومات  من اليوتيوب  ..

Chamsse Lachia  شمس العشية

Album : Deus et Diabolus

Sigrid Hausen (vocals, flute)

Mara Aranda, Iman Kandoussi (vocals)

Efrén López (hurdy-gurdy, saz)

Ernst Schwindl (hurdy-gurdy)

Michael Popp (saz)

Diego López, Sascha Gotowtschikow (percussion)

Status 6

بسم الله الرحمن الرحيم 

ما يجعل قصة يوسف أحسن القصص على الإطلاق أمران .. أولهما : انها بدأت بمقدمة تقرر ذلك .. يعني من مِن الرواة من يمتلك الشجاعة الكافية ليقول ان قصتى هي أحسن القصص ؟ .. هكذا بلا مواربة أو مجاز .. خصوصا وأن أحداث القصة معروفة متواترة على مر الأجيال يحكيها السلف لخلفه كيف يمكن لأحد ان يصنع قصة عظيمة في ظروف مماثلة . وحده الله يمتلك تلك القدرة على التحدي

وثانيهما : انها تترك للقارئ حريته في تخيل الأحداث و إصدار الاحكام دون تأثير من الراوى في ذلك - بخلاف القصص القرآنى الآخر- فالله عز وجل لم يصدر أحكاماً على أبطال القصة .. فقط يذرك وما تعتقد فيهم لتبني وجهة نظرك ومنطقك الخاص بنفسك .

تبدأ القصة بالبطل "يوسف" يروي مناماً غريباً قد رآه البارحة لأبيه .. تتخيل الآن أنهم في الصباح في اليوم التالي للمنام ومن الجلي أن المنام قد ارق صاحبه فلم يتأخر في سرد احداثه .. و يتضح ان علاقة يوسف بابيه من القوة بحيث يجلسان مع بعضهما لفترات طويلة دونا عن بقية اخوته .. ونتيجة لمتانة هذه العلاقة يصارح يوسف ابيه بمنامه دون خوف ان يهزأ به او تسفه رؤيته ... فقط أجاب الأب بكلمات مقتضبات .. تعي جيدا انه يعرف التفسير ولكنه لا يخبر به ولده أملا منه الا تتحق الرؤية .. فقط ينصحه بأن لا يخبر اخوته بهذه الرؤيا .. ويخبرنا الله/الراوي ان جلسات تفسير الاحلام تلك ما هي الا تأهيل ليوسف واستزادة له في الحكمة والخبرة وتمهيد للنبوة التى اعطيت لأجداده إبراهيم واسحاق من قبل .. وبعد هذا الاستطراد بعيدا عن سياق القصة يعيد الله القارئ الى السياق مرة أخرى معلنا ان قصة يوسف واخوته تلك فيها ايات للسائلين .. كل هذه المقدمات تمهد لك أحداث القصة الغريبة.

لم يخبرنا الله صراحة ان اخوة يوسف لديهم احقاد غير مبررة تجاه اخيهم ولم يطلق عليهم حكما مطلقا .. فقط أخبرك انهم مستاءين من جلسات يوسف الطويلة مع ابيهم دونا عنهم لم يخبرنا الله ان يوسف كان يفيض بالحكمة في تلك السن او انه كان أجملهم مثلا ... فقط قالوا ان يوسف احب الى ابينا منا وهو امر ليس بالهين عندهم .. ولكنه من الأهمية بمكان حتى يقترح احدهم ان ينهي هذا الجدل وأن يطرحوا يوسف ارضا .. يصمت الجميع فهم يريدون النيل من يوسف ولكن ليس لهذه الدرجة من العنف .. فيخرج احدهم بفكرة القاءه في البئر ويتضح من قوله " ان كنتم فاعلين " انهم مترددون قد اعياهم التفكير واحتال الامر عسيرا عليهم .. لم يقل الله مثلا انهم كانوا قوما كاذبين او مجرمين ، ولكنه يتركك تكمل سياق الحكاية لتستنبط وحدك - وبكل طمأنينة - انهم كذلك .. سيدعك الله تغرق في الأحداث .. ستتخيلهم في مجلسهم يتآمرون مستنكرا فعالهم متعاطفا مع صاحب فكرة القائه في البئر حيث انها - برغم قسوتها - تبقى اقل عنفا من سابقتها ..المشهد التالي مطنقطة تحول في مسار الاحداث .. حجة واهية تلقى على ابيهم .. تحس حينها ان يعقوب قد اغمض عينه أسفا أن رؤية ابنه تتحق أمامه ولا يستطيع فعل شئ .. هو يعرف ان يوسف ليس ذلك الصبي الذي يحب اللعب فولده الذي تستشكل عليه امر رؤيا رءاها لا يناسبه اللعب في البراري ولا سيما مع اخوته الذين لا يعنيهم باي حال من الاحوال امر اخيهم .. تتعجب من كذبهم وتتعجب من رد يعقوب .. يا رجل كيف توافق تاركا ولدك مواجها مصيره الذي تعلم؟ .. حتى ضربه لمثال الذئب ذلك لم يكن مناسبا لمن أعمى الحقد بصيرتهم أراد ان يستثير فيهم احساس امانة الراعي الذي يخشى على نعاجه الثمينة من الذئاب .. ويجيبون غير مدركين مقصد ابيهم فيعتبون عليه انه يشك في حسن ادارتهم للأمور .. وحينها يختلج في صدر يوسف ان اليوم لن يكون يوما عاديا .. هو يرى اخوته يتشاورون بينهم منهمكين في امر جلل .. لكن شئ ما يطمئنه انه يوما سيعرف ما يضمرون له بل سينبئهم به .. حتما سيخبرهم بذلك يوما ما .. لكن ليس الان .. يأتى المشهد التالي بحجتهم الواهية المفضوحة في اكل الذئب ليوسف ... تجد نفسك تصرخ في وجه يعقوب : ( يا رجل كيف انطلت عليك حجتهم مكتفيا بقولك فصبر جميل .. يا رجل افعل شيئا !!) يتألم يعقوب ويطرق رأسه تجاه الارض في صمت .. لا يسمع حرفا مما يقولون .. يشعر بالأسى من تحقق الرؤيا وأنه ليس من قضاء الله مفر .. تشعر به يحدث نفسه احقا تخلصتم من فلذة كبدي بكل هذه البساطة ؟ .. أحقا تنتظرون منى ان اصدق كذبكم .. انتم حتى لم تبذلوا جهدا في حبك القصة .. استخدمتم المثال الذي ضربت لكم كيلا اشك فيكم .. ليتنى لم أضرب لكم مثل الذئب .. ليتنى احتفظت بيوسف ومنعته من الذهاب معكم .. ولكن هل كان ذلك ليمنع قضاء الله ؟ حسنا أكذبوا الكذبة تلوا الاخرى اكشفوا عن زيفكم وحقدكم وسذاجتكم بالدماء التى صبغتم بها قميص يوسف .. انه لذئب كريم ذلك الذي يأكل ابنى ويترك قميصه لتحضروه لي .. أمام صمت أبيهم الطويل ينتهي كلام الإخوة بقولهم وما أنت بمؤمن لنا ولو كنا صادقين تشعر بعدها انه اعتزلهم بعد هذه اللحظة الى الابد .. ينتبه عقلك فجأة متساءلا .. ترى ما حال يوسف الان ؟ لا يجيبك الله بسرعة فقط يتركك تتخيل مجموعة مسافرين انهكهم العطش وقد تشبثوا بالأمل ان يجدوا ماءا في البئر الذي بدأ يظهر في الأفق .. يستحثون سير دوابهم تجاه البئر ينزلون دلوهم ليروا يوسف .. ويعود بطل القصة الرئيس الذي يدير دفة الأحداث .. تصاب ببعض خيبة الأمل من تصرفهم .. فبحق الله كيف تجدون صبيا في بئر في الصحراء فتقررون بيعه .. الم يكن حري بأحدكم ان يتخذه ولدا له وربما تعرف الى فتاة جميلة ما في قبيلتكم وتزوجها وتتخذ قصة يوسف منحى اخر ؟ ولكنك تتابع القراءة متشوقا ..

بيدهيات منسية

بسم الله الرحمن الرحيم 

مقدمة لابد منها :

الشعب مجموعة أفراد لهم توجهات عقدية (إيمانية) واقتصادية وفئوية وموروثات ثقافية مختلفة؛ ولكن بيتم التوافق فيما بينهم لتكوين مجتمع قوي متعدد الخبرات والثقافات .. والأفراد دي تعيش على أرض ذات حدود معلنة ولها مصادر وثروات طبيعية ما بتضمن استمرار بقاء المجتمع ده .. وطبعا لابد من حمايتها وفرض سيادتها عليها عشان ببساطة كل الناس عايزة تزيد في ثرواتها وتوسع نفوذها وتخضع غيرها ليها عشان تكبر (( وده بيبقى المفروض السبب الأساسي لنشوء الحروب بس طبعا مع الوقت بيظهر اسباب تانية انى عايز افرض سلطتي على الغير او الخوف من الغير ده انه يهدم معتقداتى زي ما بيحصل في الحروب الدينية مثلا )) .. المهم في الاخر بنسمي الحدود دي وطن .. وبنسمي الشعب ده أمة.

الجيش والشرطة هم مجموعة فئوية من الشعب أعطيت حق الاستخدام الحصري للسلاح .. وأي فئة "مسلحة" أخرى غير الفئتين دول بيعتبروا تهديد لأمن المجتمع لأنهم بيعتبروا قوة مؤثرة ممكن استغلالها لتغيير نمط ما من الأنماط اللى المجتمع ده بيرتضيها لنفسه وتوافق عليها ..

-------------

الجيش : مؤسسة وطنية تتكون أفرادها من الشعب - يعني مش مرتزقة - والشعب بيسمحله أنه يمتلك أسلحة ثقيلة و متقدمة غرضها في الأساس حماية الحدود وصد الهجمات الخارجية قبل اختراقها لحدود السيادة القومية .. ولذلك تقتطع أموال باهظة من الدخل القومي لضمان تنفيذ الجزئية دي ...يعني لو الحاجة ليهم مش ضرورية دلوقتى نقدر نحول الفلوس دي لرفع مستوى الرعاية الصحية مثلا وزيادة الحد الادنى للأجور .. ببساطة أكتر انت بتاخد فلوس قليلة ومش عارف تعيش حياة كريمة بشكل كويس عشان 4 أو 5 الاف جنيه من اللى كانوا المفروض يخشولك بيروحوا للجيش يستخدمها في انه يشتري سلاح او يصرفها في أي وجه يكفل للجيش ده انه يبقى متقدم وحديث .. يعني انت حضرتك مش بتدفع فلوس عشان تعمل دار مناسبات في مدينة نصر وأكيد لو عارف ان الجداريات اللى بتشوفها على السور من برة دي هتكلفك كتير مكنتش عملتها .. وطبعا حضرتك هيبقى نفسك تقعد في فنادق كبيرة وتصيف فيها براحتك في الصيف بس بتتخلى عن ده طواعية عشان نفسية الظابط اللى بيحميك تبقى دايما مظبوطة هو وأسرته .

 إيه المطلوب ؟ 

1- إن الجيش مش ضروري يشغلك بالسخرة عشان يحقق مكاسب لنفسه انت داخل في الاساس عشان تزيد عدد أفراد الجيش ده مش عشان تزرع وتربي مواشي وتمنها يروح لناس معينة في الجيش .. لو الجيش عايز يعمل مشاريع يأجر عمالة تقوم بالشغل ده ... او يبقى مدخلك الجيش للغرض ده بس قصاد مقابل مادي ملائم الشعب اللى انت منه هو الوحيد اللى اولى بالفلوس دي مش فئة معينة منهم 

2- انك تراقب الفلوس اللى داخلة للجيش اللى انت مفروض تخشلك انت في الاساس، وتراقب برضو طريقة صرف الفلوس من قبل الجيش هل هي بتصرف في مسارها الصحيح ؟ ولا بتروح هدايا للرجالة الكبار في الاعياد والمناسبات ؟ الأرض اللى في الصحرا دي لو رحت خدت حتة منها وبنيت بيت لازم تدفع تمنها عشان يبقى ليك حق شرعي في استخدامها .. انما الجيش بياخد الأراضي دي لحسابه ببلاش بدعوى انها منشئات عسكرية وبيتم بيعها فيما بعد للتربح. ومفيش حاجة اسمها دي معلومات سرية وأمن قومي .. خش على موقع وزارة الدفاع الألمانية أو الأرجنتينية حتى هتلاقى تفاصيل لنوعية تسليح الجيش وحجم المعدات والأفراد .. السرية بتبقى لتفاصيل التحركات والمنوارات والتدريبات مش أسرقك واقلك أمن قومي.

3- انك تضمن تطبيق معايير حقوق الإنسان - البديهية جدا برضو بالمناسبة - عشان تبقى رادع لإساءة استخدام السلطة في تحقيق الانضباط اللى بيخلي الجيش ده متماسك ومتطور وحديث يعني لما تخش الجيش مفيش حد يبهدلك وينتهك كرامتك عشان هو سلطة اعلى وانت ملكش حق الاعتراض عليه . 

4- ان الجيش ده يكون معروف انه ملك للشعب مش جيش متأجر تحت ايد السطة العلية يحركه زي ما هو عايز مينفعش الجيش الوطني يبقى جيش ملاكي 

تلخيص : يعني زي ما نكون 100 واحد كدة ونقرر نوقف اتنين تلاتة بسلاح عند مداخل الحي اللى ساكنين فيه .. ده لا يعني بأي شكل من الأشكال إن اللى بيأمنونا دول أحسن مننا ولا اي حاجة دول ناس انتخبوا مننا وارتضوا ذلك طوعا واتقدمت ليهم تعويضات كتيرة لتسهيل مهمتهم 

-------------------

المخابرات : جهة تهتم بتوفير المعلومات وبيتقدم لها التسهيلات اللازمة لتوفير المعلومات دي .. مش شرط تكون المعلومات عن الأعداء لا حتى اتفه معلومة ممكن تكون مهمة جدا للاقتصاد أو التعليم او اي حاجة تانية مش بس مهمة عسكريا .. وطبعا الحصول على المعلومات وتبادلها بيتطلب يكون فيه شئ من السرية ده شئ مفهوم .. بس مش ضروري خالص يكون جهاز المخابرات بيعتمد على أفراد عسكريين ومش ضروري يكون المبنى بتاعهم ليه سور 5 متر يعني أو يتقال عليهم جهة سيادية .. وطبعا ده شغلهم اللي بتتقدملهم تسهيلا عشان يقوموا بيه بكفاءة .. يعني مش منحة او مكرمة مثلا انهم عرفوا يوقعوا جاسوس مثلا .. امال شغلتهم ايه طيب ؟ يعني اكيد لو دكتور جبسلك ايدك وقعد يقول لازم تشكرني عشان عملتلك دة فانت هتقله اشكرك على ايه ما ده شغلك اللى دفعتلك فيه فلوس 

-----------------

الشرطة: فئة شعبية برضو اخترناهم مننا عشان يكافحوا الجريمة مش هيقضوا عليها خالص أكيد ولكن يخلوها تحصل بتردد قليل أوي وبمستويات غير ملحوظة للمواطن العادي

بيتم تسليح الشرطة بأسلحة أقل تنوعا من الجيش ولازم يحصل أفرادها على تأهيل نفسي وثقافي معين يسمح لهم بالتعامل مع الجمهور دون اساءة استخدام السلطة .. ببساطة حقك انك كمواطن عادي غير مهدد لأمن المجتمع انك تتعامل زي الزبون اللى دايما على حق .. يعني يتقالك انت يا فندم وحضرتك ويا باشا مش العكس .. وطبعا الهيبة بتتحقق بتطبيق القانون بشكل عادل ومحايد من غيير تمييز ده اللى بيخلي حفيد الملكة في انجلترا ميقولش للظابط هاك انت متعرفش أنا مين يا ابن ال*** .. ومبيخليش السيطرة على المجرم انى اضربه وانتهك عرضه واعذبه 

وعشان يعرفوا يعملوا ده لازم يبقى في أجهزة تحقيق وبحث جنائي محترفة معاها أدوات تمكنها من التوصل للحقائق وبسرعة وعرضها على الرأي العام كمان .. يعني الموضوع بيبقى زي جهاز رقابي لمنع الانتهاكات .. مؤسسة بتقرر تفجر قضية قدام القضاء لتنفيذ القانون .. يعني ممكن اكون ضارب عيل صغير ولما يكبر ويبقى ظابط يجي يقبض عليا من غير تحقيق ولا ادلة .. او واحد يعاكس اختى فأروح بقوة واقتحم بيته واضربه واقول ده اغتصبها .. طيب فين الدليل؟ .. ومين اللى يقدمه للقضاء ؟ .. فرد النيابة ده ممثل للحكومة .. حائط دفاع أولي عشان محدش يعتدي عليكويستغل سلطته من بقية المؤسسات .. ولازم الفرد بتاع المؤسسة دي يبقى مدرك للمبادئ اللى الوطن ده قام عليها واللى الشعب ده اختارها .. عموما الناس وانا منهم عندنا رؤية ضبابية عن وظيفة النيابة .. عدم وضوح الجدوى من النيابة لا يتناسب اطلاقا مع كم النفوذ والدخل المادي والصلاحيات والتمييز اللى متمتعين بيه في البلد ده 

-----------------

القضاء : مؤسسة تقوم بفض المنازعات بطريقة قانونية وسريعة والقانون ده بيبقى متراجع عليه من الشعب -ده الدور التشريعي للمجلس - وبتضمن محاكمة المتهمين بشكل عادل وبتضمن حق المتهم ده انه يدافع عن نفسه .. ولذلك مينفعش القضاء يبقى مسيس وزيه زي كل الفئات اللى فاتت دي مينفعش تخش انتخابات معينة لأنها تجمعات وجدت لغرض معين يعني احنا أساسا كشعب قاصدين ان المؤسسات اللى فوق دي تبقى على الحياد 

----------------

طيب في حالة ان الجيش / الشرطة اللى معاهم سلاح قرروا بشكل مفاجئ انهم ينحازوا لفئة ما معينة من الشعب ناس مثلا ادتلهم فلوس أو بتضمن لهم صلاحيات محدد نعمل ايه ؟ 

والله مش حاجة صعبة ان الشباب ينظموا ورش عمل نتدرب فيها على التظاهر وتحركات الشوارع .. يعني ابتكار طرق للمقاومة من غير ما يبقى فيها سلاح .. منعا لتكون ميليشيات أخرى فيما بعد ... يعني مثلا تكتيكات الكر والفر اللى تجبر قوات الشرطة/الجيش انها تخش شوارع ضيقة تكتيكات تحد من تفوق الشرطة/الجيش باستخدام أسلحة طويلة المدى .. يعني الاحتكاك القريب بيدي الاعداد أوبشن كبير وهو التفوق العددي .. بديهيا كدة عمر الشرطة/الجيش ما هتبقى أكتر من المتظاهرين لأننا زي ما قلنا هي فئة من الشعب في الاساس .. الشرطة/الجيش بتتفوق بامتلاكها السلاح .. والسلاح بيفقد تأثيره تماما في المدى القصير .. أنا شخصيا مش ثورجي ومبعرفش اتحرك في مظاهرات .. مش جبان ولا أبرر قعودي في البيت بس لو نزلت مظاهرة هبقى عبء على اللى معايا بسبب انعدام التدريب بس انا كشخص سليم البنية لازم اكون جوة عدد كبير كافي لفشخ قوات الشرطة/الجيش ..

انا شايف اننا ناخد التدريبات دي بشكل جدي والله تبقى ورش كدة لتعليم المقاومة الغير مسلحة .. يعني على سبيل المثال نبتكر طريقة اننا نرمي حبل مثلا او حاجة نشد بيها ظابط من اللى واقفين دايما ورا صفوف العساكر .. العساكر بترتبك تماما عند اختفاء الظابط ده او نقدر نقول بمعنى اصح ان سبب خوفها الرئيسي بيزول وبيبقى خوفها بس من انتقام الحشود اللى قدامها .. ولذلك لازم نعرف ان في عساكر متعاطفة معاك بس برضو هي مش عايزة تتحبس ولا تفقد دفعة ولا تتحبس في سجن عسكري .. العسكري بيبقى شايف ان كدة كدة كلنا مجبرين على ده فاشطة اللى يعرف يعيش من غير ما يأذي التاني خلاص .. انما أرباب ال 50 % بيبقوا مقتنعين ان العنف هو الحل وان تفوقهم المسلح ده مبرر لإبادة العدو اللى هو الشعب اللى جايبله اصلا السلاح وبيدفعلوا مرتبه وجايبله تمن النضارة الشمس .. يعني الموضوع اشبه بالتعبان اللى بياكل ديله .. المهم ان لازم ندرس موضوع ورش المقاومة القوية الغير المسلحة ده 

Status 5

بسم الله الرحمن الرحيم 

الواحد بيتولد  بيبقى كأنه في كهف فوق جبل عالي   مش شايف نور ولا عارف حاجة حواليه   ... لازم  حد يأكله ويشربه  بعدها  يبدأ يتحسس طريقه  للخروج من الكهف  ولما  يخرج  يبدأ  بصعوبة  ينزل  وينزل ... وبيبذل مجهود  كبير عشان " يتدنى "  كل  ده عايز  ينزل للسفح  الواسع والفاضي والمستوى  واللي مفهوش  اي  حاجة تجذبه  ...  بعدها  يفاجئ  ان في  قطيع  خيول  برية  سوداء جاية من وراه  وبتجري  بسرعة  مهولة .. 

-في واحد  بينام  على الارض وبياخد وضع الجنين عشان  يحمي نفسه .. بيرجع تاني  لاول حاجة اتعلمها  في الكهف .. ده بقى في  اغلب الاحتمالات   هيتفرم ومممن  نسبة بسيطة جدا  تؤول للصفر انه يصادف  انه يجي  بين رجلين الحصان وميدهسوش  .. هو  حسب الريسك بالافراط في السكون وان السكون دايما اكثر امانا وبعد ما بينجو  هيفكر  بسرعة انه يرجع للكهف تاني وكفاية بهدلة  بقى لحد  كدة 

- وواحد  بيفضل  يجري  ويجري  لانه واثق في  صحته  ولياقته  البدنية  .. بس هو ركز في جسمه ومفكرش  خالص ان الخيل أسرع منه  وكدة كدة   هتجيبه وتفرمه  برجليها .. وطبعا الشخص ده كدة كدة  هيتفرم  ومفيش اي  احتمال  انه  ينجو  خالص  لانه اعتمد على الحركة اللي لابد لها في الاخر من سكون ... ده غبي ومتعمد للغباء  ولازم يموت مفروم .. عشان الكون كله مصيره في النهاية الى سكون وهو اغتر بصحته  واستخدم لياقته  غلط 

- وواحد  تالت فضل  يجري جامد جدا  بس  وسطن  نفسه  بين  حصانين وفضل محافظ على سرعة ثابتة (السرعة الثابتة يعنى سكون التسارع يعني العجلة بصفر )  ولما جه  الحصان جنبه  ركب عليه   من غير سرج  ومسك  في  شعر الحصان بايده وسنانه عشان ميقعش  ومع الوقت الحصان  تعب  وسكن  وهو فضل  سليم على ضهر الحصان ... وبعد كدة روض الحصان  وبقى الراجل الاولاني اللي في الكهف (ده لو عرف  يطلع تاني الجبل اصلا ) بيبص له بحسد  ويقول لنفسه  مهما كان برضو انا فوق وانت  تحت  ... واللي تحت  يرد عليه يقله عمرك ما هتحس بمتعة ركوب الحصان  ... عشان مفيش حصان بيجري في الكهف  يا عبيط

أما يمة شفت حلم

بسم الله الرحمن الرحيم 

مؤخرا  بقى  عندي مشكلة كبيرة  جدا  وهي إني بقيت أفتكر الأحلام اللى بحلمها ..  والمشكلة الأكبر .. ان الأحلام دي بتفضل مسيطرة عليا  كذا يوم ورا بعض  بشئ مستفز  وزي ما تكون بتقلي  احكيها  لحد او اكتبها بالعافية .. وعشان مدونتى  متزعلش  قلت أحكيلها هي الأول .. 

بداية الحلم اني كنت داخل على حارة سد في وشي وكان في واحد بيجري  بسرعة شديدة  أوي في اتجاهي هو كان مبرق  اوي  وعمال  يزعق قعدت أسأل نفسي هو مش شايفني ولا ايه المجنون ده .. كل  شوية يقرب وانا أعند واقول مش هتحرك من قدامه .. بعدها  خفت لا يخبط فيا  فرميت  نفسي  بسرعة على جنب الطريق  في  ركنة  كدة جنب  سور عالي .. وفجأة حصل انفجار  رهيب أوي .. انفجار حسسني ان الارض كلها بتقع بيا .. قمت من الهزة دي مش عارف اسند طولي وكان في  زنة كبيرة أوي في ودني .. لقيت  جزء كبير من السور العالى أوي ده واقع   وناس  جوة عمالة  تجري يمين وشمال والدخان  والتراب مغطيين كل حاجة .. لسبب ما جالي هاجس  كدة انى لازم اخش  جوة واجري مع الناس دي بس  فضلت واقف محتار كدة مش عايز اخش  وفينفس الوقت حاسس ان جوة هيكون أحسن .. شوية لقيت ولد صغير ميجيش 4 سنين قصير كدة ولابس جلابية  بيضا وطاقية بيشدني  من كمي .. بصتله  لقيت  بنت قده برضه  لابسة فستان من اللى بيبقى ملزوق في ضهره جناحات فراشة ده .. الولد قالى " تعا معي "  عرفت انه سوري  .. واستغربت اوي اننا  في  سوريا  ايه اللى جابني سوريا  طيب ؟ ..  شوية لقينا  نفسنا ماشيين في  أرض موحولة أوي وعليها  كتل  غريبة كدة  .. الولد  بيمشيني عليها  عشان منمشيش في الوحل .. التفت  يمين وشمال  ملقتش  اخت الولد ده .. سألته عن اخته مردش عليا  .. ورجعت تاني افكر في الحاجات اللى ماشيين عليها دي .. شوية وقفناواحد بشنب كدة لابس اللبس الميري الاخضر المموه الغامق بتاع جيش  بشار ومكنش معاه سلاح .. ومكنش لابس خوذة ولا درع  ولا معاه سلاح .. مما اداني ايحاء ان ده ظابط مش عسكري وقفنا وقالنا : (( انتو شو جنسيتكن .. وانت وين رايح )) قلتله أنا مصري ولسة  هتكلم بالنيابة عن الولد لقيت الظابط ده مسك الواد ورماه  لفوق كدة  عشان يقع في عربية كبيرة  زي بتاعت المناجم دي  مليانة كلها عيال صغيرة من سنه كدة .. استغليت انشغال الظابط ده وعملت عبيط كدة ورجعت  زي ما بيحصل في افلام الكرتون لقيت  ان الوحل ده كان عبارة عن تماسيح  كبيرة  اوي وبدأت تتحرك لما حست انى هرجع .. والصخور دي كانت رؤوس سمك قرش كبيرة مقطوعة وعمالة تتلوى كدة كل ما اتحرك في اتجاهها .. معرفتش اعمل ايه جه اتنين مسكوني من ايدي  ورجعوني تاني للمكان اللى كان فيه الانفجار  اتاري المكان ده كان سجن كبير والزنازين بقت موجودة في الشارع  قعدو يدوروا على زنزانة فاضية لحد ما  حطوني في زنزانة بتطل من ورا على الشارع ومن  قدام على حوش السجن وناس كتير عمال تجري في الحوش ده ولا كأنهم مهتمين انه في سجن ولا كأنهم عارفين ان في انفجار كبير  حصل .. دخلت الزنانة ورموني على الدور التحتاني بتاع السرير مددت على السرير وفضلت مبحلق في السقف .. لحد ما جه صوت من بعيد كدة كأنه واحد لابس بدلة وتحتها  بلوفر  صوف  تحس انه  دكتور جامعة مثلا او موظف بدرجة وكيل وزارة او حاجة زي كدة .. قالي يابني احمد ربنا انت جيت  هنا انت متعرفش الناس بتحسدنا على الزنزانة دي قد ايه 

يوم اخر سئ

6-1-2014

إنهاردة  مريت بيوم اخر سئ من الايام اياها اللي صدرى فيها بيبقى ضيق اوي لدرجة ان ضلوعي بتعلم في قلبى وبتحرقه وبتسيب فيه  علامة زي اللحمة اللي بتتشوى على الجريل .. انهاردة  حسيت  بغليان  دمي  وتبخره .. شميت من تاني ريحة الشياط اللي مبقتش اشم غيرها  مؤخرا .. مش ممكن  يكون حد طمع في البؤس اللي في العالم كدة وقرر يحتفظ بيه  كله  لنفسه زيي كدة .. لكن في الغالب انا مع الوقت  بتحول  لانسان مازوخي بيهوى تعذيب واهانة الاخرين له .. معلش دي ظروفي الخاصة .. والاحسن ان الواحد يبقى عارف عيوبه  حتى لو فشل  في اصلاحها احسن ما يعيش في خدعة الرجل الخارق اللي يقدر على كل حاجة ... كفاية .. بجد كفاية

V For Vendetta

عزيزي الكاتب ديفيد لويد : 

تحية  طيبة وبعد 

أعلم يقينا  أنك لن ترى تلك الكلمات الناتجة عن طرقات أصابع شاب هاوِ على لوحة أزرار حاسب  شخصي  ضحى بالكثير ليمتلكه .. أنا حتى لا أعلم إن كنت تجيد قراءة العربية .. وهو في  واقع الأمر ليس جهلا مني أكثر ما هو إفتقاد للكفاءة اللازمة للكتابة بالإنجليزية .. فقط - ومع علمي بإستحالة قراءتك لكلماتى تلك - أريد أن أنقل لك شعور بعض من يشبهوني في الفكر .. لا أدري ما عددهم بالخارج .. ولكن أنا مؤمن بأنهم على قلتهم مؤثرون 

عزيزي  السيد دايفيد لويد / شاهد المخرج  قصتك وأعجب بها  .. وتطلب  الأمر جهدا  عظيما منه ومن طاقم التصوير وأخص بالشكر  صانع القناع الأيقوني .. الذي أخطأ  للأسف الشديد  أحد رؤساء صحافتنا المتهالكة في طريقة نطقه .. لا يهم فصحف الحزب الحاكم لا تخطئ.. حقا لا يهم .. فالأسماء في الانجليزية الكافرة التى ستقتلع جذور هويتنا  ليس لها قواعد .. فقط  أريد أن أشكرك على حبكتك للأحداث المتلاحقة  والوصول إلى صميم الفكرة دون ما تشتيت .. فقط دعني  أهنئ أيضا المنتج الذي جازف بصناعة فيلم ساحق لمعاييز السينما الرأسمالية .. بالطبع  ان نجاح فيلم يحمل عنوان " في للإنتقام " ولا يتضمن مشاهد  جنسية تغرى زوار العرض الأول في بلادي بحث الاخرين على وجوب مشاهدته هو أمر  يستحق الإعجاب والتقدير .. 

عزيزي السيد دايفيد لويد / أنا أؤمن مثلك ببعض الأفكار الجوهرية .. مثل أن لا شئ يحدث عبثا  أو من قبيل الصدفة .. تراثي الإسلامي  نبههني لهذا الأمر بأن الله لا يخلق هملا ولا عبثا وقد خاطبني الله في قرآنه قائلا (أفحسبتم أنما خلقناكم عبثا وأنكم إلينا لا ترجعون) ولكن للأسف انشغل الشيخ الفلاني بالتركيز ان هذه الحقيقة موجودة منذ 1400 عام ولم يركز جهده   في إيصال تلك الفكرة لعقولنا البسيطة التى تئن من سوء التعليم  ونضب الثقافة الحرة ..  وهذا أيضا ليس  صدفة .. ليس  صدفة في بلادي  أن يتدهور مسار التعليم . أو أن يكون المثقفين في بلدي مطية  كل  حاكم ..  حقا لو أدركت وضعنا لأحزنك كثيرا  رؤية الأصلع سلماوي متحدثا باسمهم .. ولكن كل شئ في بلادي مقنّع كبطل روايتك .. الدين والثقافة والفن والرياضة والتاريخ .. وحده  الكذب من يمتلك شجاعة الظهور في بلادي 

عزيزي السيد لويد /  أنا مؤمن مثلك أن ما حدث ليس مصادفة  فقط تتابع  سقوط قطع الدومينو هو ما جعلنا نصل الى ما نحن فيه الان .. كانت أول قطعة دومينو  سقطت  حينما  شعر السجين صاحب النظارات الشمسية  أنه محصن ضد سنن الكون .. توهم أنه لن يمرض  في ظل وجود منتجعات ألمانيا الصحية .. وخضروات مطبخه الأورجانيك .. مطبخه مهم جدا لدرجة عمل فيلم خاص - ولتعذرني بوصفه كفيلم فلا ينبغى ان يشترك هذا النتاج البشري وما صارت إليه روايتك في نفس الإسم -بعنوان طباخ الريس .. توهم أنه لن ينتهي إرث عائلته وقد حضر الأمر لتوريثه إلى ابنه الأخرق .. وسقطت القطعة تلو الأخرى  حتى تحولت كلماته من أن الكفن لا جيوب له .. إلى  نصحه لأحد أفراد حزبه بأن يكبر  مخه  .. 

عزيزي السيد دايفيد لويد / مثلما كان بطلك أداة تدمير  تحولت الى اداة تغيير .. بالضبط أصبح إنترنت نظيف له مثل هذا الدور في بلادنا .. لولا  نية  نظيف  اثبات جداراته أمام أسياده  وأنه من رجالات الدولة المتنفذين لما  تسربت المقاطع والصور وانتشرت الفضائح وتغير الوعي .. كان  مواطنو بلادي يعرفون بانتهاكات الشرطة ولكنهم كانوا لا يجدون دليلا على ذلك .. فعلوا مثل بني إسرائل  ولم يذبحوا البقرة ولكنهم سألوا حجم الانتهاكات ومن الذي ينتهك . وهل هم مجرمون يستحقون القسوة في العثقوبة أم لا  ..  أداة الالهاء  والتخريب وغرف الدرشة ومواقع تجارة الأجساد العارية ومنتديات الطبخ  والسيارات ومنابر السفسطة الإسلامية .. أصبحت وبالا على القائمين عليها  .. صرنا  نعرف  حقيقة مؤشرات النمو الكاذبة .. صرنا نعرف أننا  لم نعد أم الدنيا ولا حتى زوجة أبيها .. صرنا نعرف أننا  نسقط إلى قاع الأمم  بسرعة البرق ..  استخففت  بشباب التدوين .. وحق لك أن تستخف  .. فمن لم يستطع شد النبال ما استطاع تصويب الأسهمِ .. تسربت فيديوهات رجال داخليتك الذين يساومون في بيع الأحراز  معطين بذلك أفضل الأمثلة عن طريقة تدوير المخدرات في بلادنا .. فالمخدرات لدينا  لا تفنى ولا تستحدث من العدم 

عزيزي السيد ديفيد لويد /  كان لابد من خطأ قتل خالد سعيد  أن يمحى بكارثة كبرى  تعيد الى الأذهان فكرة أن الدولة منها نشأ المواطنون وإليها  حتما يعودون .. تم تفجير كنيسة في الإسكندرية  واتهام مواطن سلفي في تفجيرها  .. فمات هو الاخر جراء التعذيب .. وتوالى  سقوط قطع الدومينو  بلا مصادفة او  سبق ترتيب .. فقط  كانت الأحداث بحاجة إلى  العدد الكافي للقيام بالتغيير .. وقف العدد الكافي في ميدان التحرير .. وكانوا  سينصرفون لولا توالي سقوط الشهداء وسقوط قطع الدومينو  .. وصل الأمر  ذروته شاهد الملايين سيارت تدهس بلا تردد ورصاصات  تخترق الرؤوس فسقطت في أذهانهم ستائر الخوف وتوجهوا بلا  مصادفة وبلا سابق ترتيب إلى نفس الميدان لاستكمال ما بدأه غيرهم .. قتل - صمود - مؤازرة تشتت للأفكار بعد خطاب عاطفي - صمود اخر ثم ثبات على المبدأ .. وليس أفضل منك من يفهم  أهمية الثبات على المبدأ 

عزيزي السيد لويد / لسنا مستعدين بعد لقبول الاخر أو نقتنع أن الحل لنجاح الأمم الكبرى هو دولة الأقليات .. هكذا نجحت الأمة الإسلامية .. باحتضانها للأقليات ليس بتعيين للخليفة  .. ابن سينا الذي يتغنى بمجده وعظيم اسهامه  خطباء المنابر  .. كان أقرب الى الزرادشتية وكان له أفكاره الخاصة عن المادة والروح .. هم فقط أهملوا كل ذلك وذكروا له نبوغه في الطب .. وهكذا  صار ديدننا  ننسى ما فعله محتكري الوطنية مسببو النكسة لنتشبث بحبال محتكري الدينا الذائبة .. وفي هذا وذاك لم نعِ أن السبب الاساسي اذالك هو فقد الثقة في الوجوه التى ننظر لها بالمرآة كل صباح .. كان انتصارنا في يناير كالحلم .. حلم سرعان ما نفضناه عن مخيلاتنا  كعادتنا في التعوذ بالله حين  يبلغ ضحكنا مداه .. فقط  تسرق ابتسامتنا  سريعا  ونقول اللهم اجعله خير .. 

عزيزي السيد لويد .. ما شعورك وأنت قطعة من الدومينو ؟  فقط اسأل حارقي سيارات الشرطة 

إلا إبليس

بسم الله الرحمن الرحيم 

1- خلق الله ادم لحكمة لا يعلمها الا هو سبحانه .. وأسس بهذا جنسا جديدا غير الملائكة دائمي التسبيح .. والشياطين المزودون بخصائص لصنع العجائب والخوارق بأمر من الله سبحانه .. هذا الجنس البشري الجديد -في وجهة نظر الجنسين السابقين عليه- لم يكن ذو قدرة مكتسبة خارقة .. فهو مخلوق ضعيف من طين ليس له القدرة على الاتيان بالخوارق ولم يكن له ملكة التسبيح المستدام .. فاستفهامهم لسبب خلقة هذا الكائن استفهام اخباري/تقرير بمعنى اخر استفهام معتبر أرقى من استفهام الشياطين الاستنكاري المتكبر

2- كانت الميزة الموسمة للانسان في نظري هي الفضول للمعرفة والتوق لهتك الغيبيات .. فكان استدراج ابليس للأكل من الشجرة استغلالا لفضول ادم لشهوة البطن والفضول القاتل في معرفة كيفية استمرار الحياة عند امتلاك ما لا يبلى ... والنسيان الذي زود الله به الانسان لتجاوز الم المعصية ولتحقيق الغفران .. استخدمه الانسان اسوأ استخدام في التعامل مع اوامر الله .. فعندها غلبت الشهوة و الفضول ميزة النسيان فكان ادق وصف للحالة الناشئة هي الاستزلال (فاستزلهما الشيطان مما كانا فيه)

3- استمر الانسان المتناقض بصفات الشهوة و الفضول والنسيان حياته في المكان الجديد يتناسل ويمارس انشطة الزراعة والصيد والرعي ويؤرقه كل لحظة غيب لا يهتك وستر لا يخدش وفضول لا يملأ كأسه الى اخرها ابدا و استمر على هذا النهج يتدرج في البحث عن اجابات لأسئلته حتى يصطدم ببقع سوداء في رأسه لا يدرك لها تفسيرا وكان اشد ما يؤرقه من هو الله ؟ من هو خالقي ؟

4- انقسم بعد ذلك سلوكه الادراكي الى شطرين رئيسيين كيف اعرف الله أأتقرب اليه وأعرفه بالحب أم أهجره على أن يظهر لي حكمته وان لم يفعل فلا أمر علي ولا نهي ... وصار الحال اما ان اتقرب اليك كيلا أعاديك .. او أعاديك لأني لم اعرف كيف أتقرب اليك ؟ لم يحسم الانسان امره كما حسمت الملائكة امرها .. والشياطين أيضا ولذلك جعل الله للانسان مالم يجعل للشياطين .. التوبة

5- طريق المعرفة بالحب يلزم سالكه الحرص على تتبع صفات المحبوب وان قلت او انعدم ظهور تلك الصفات لهذا السالك .. فالحب يحتم عليك الاستزادة من المعرفة كما يستزيد صاحب الخمر للإبقاء على النشوة الحاصلة ومن هنا درج أهل الله الخلصاء على المداومة على الذكر في كل شأنهم فكان غرضهم منه دوام الاستزادة . وأما ما تعاقب عليه المتأخرين بتشبيه الذكر بحالات السكر فقد كان أداة تقريب وتشبيه يناسب حال الغافلين وقت ذاك .. حتى يراجع الغافل نفسه وكم من عبد غافل استعمله الله ولم يستبدله !!

6- واستزادوا على ذلك المقاربة بين حال العبد وربه وحال المحبوب المحتجب .. فالسالك طريقا لمعرفة الله بالحب يلاقي في هذا الطريق شتى انواع العذابات واقوى وقعات الفتن .. فكم من محب قتله الشك في سبب امتناع محبوبه عنه ... ظنا من الأول انه ما عاد للأخير لازما .. وتشتد الفتنة بطول فترة احتجاب المحبوب عن الحبيب ... فكانت هذه الحال ملازمة للعربي المفارق لأهله وموطنه وأحبائه. يخلو بنفسه في الطريق مسافرا ويستشعر في لحظات ارادها الله انه ليس وحيدا .. تمس قريحته قباست النور فيشعر أعذب الشعر وأحسنه ... فتنبه أهل الله لذلك وكأنهم قالوا بغير اتفاق اتفنى الأرواح حبا بين البشر وتصير عزيزة على خالقها ؟ .. فاستعاضوا الشكوى عن فراق المحبوبة بفراق الله وبعدهم عن طريق الوصول اليه فكان الله محبوبا محتجبا لايرى هيئة ولكن يرى كيفما شاء وأراد المحب .. وصار الدار البلد الحرام بلد يحبها الله ورسوله وشاء الله ان يكون له فيها مسجدا ورمزا .. واستعانوا بذلك بالبحث عن معان افصح الله عنها في القران الكريم (لسان الله الى البشر ) وعرفوا قدر من أوصل هذا القران اليهم وعرفوا فضل صحابته واهل بيته ونقابتهم وتسيدهم على باقي الخلق بما خصهم الله به دونا عن سائر البشر .. فطفقوا يطرقون ابواب المعرفة بابا بابا .. كل يجتهد بحثا عن طريق للوصول الى الله ... ونفعهم ما انتشر من شعر الغزل وقت ذاك لكي يتقوا بطش من خالفهم الرأي وأضمر لهم المكيدة وهؤلاء هم من تشيع لإبليس وكانوا بر قسمه ... وهم في كل وقت وحين حتى قيام الساعة وعن هذه الحالأنشد أحدهم يقول :


متى يا كرام الحي عيني تراكم ... وأسمع من تلك الديار نداكم


سقاني الغرام كأسا من الحب صافيا .. يا ليته لما سقاني سقاكم


أمر على الأبواب من غير حاجة .. لعلى أراكم أو أرى من يراكم 



---------
عبدالله مرتضى
الجمعة 27 -12- 2013

حكاية الأمير - المغنى خانة

بسم الله الرحمن الرحيم 

---------

الواحد اللي كان صحيح و انكسر .. جوايا في العتمة
في النور قسمني .. اتنين ... 

واحد عبد ربه وواحد كفر

قلبي طفح دمه ولا يؤتجر .. من هذه الشغلة إتشققوا الكفين ...

ولا نابني غير الود ويا البشر

الضفدع اللي كان أمير و اتنكر
منك بلا قبلة ..
بلا ضمة النهدين ..
مرسوم على جبينه سنين السفر

الأسمراني ساب بلاده وهجر
وراح على كندا ..
عيني يا ليلي يا ليل .. 

ده راح على كندا ..

عيني يا ليلي يا ليل ..

ع اللي حكم أرضه فَضَل وفَجَر

Status 4

بسم الله الرحمن الرحيم 

عزيزي مستخدم الفيسبوك الجديد ... أهلا بك  في هذه التجربة الممتعة التى نعدك ألا تنساها ... بعد انتهاءك من مشاهدة أكونتات المزز  وال**اميط  أوما وعدوك به من حلم الشقط المزعوم .. ربما بعدما أصبت بخيبة الأمل هذه ستحتاج لمن يربت على كتفك بلايك او شير .. اعلم ياعزيزى أن ذهابك للحلاقة في يوم الإثنين أسهل كثيرا من تحقيق هذه الأمنية ... ولكنك  ستدهش من رؤيتك بعض الأشخاص يزيد عدد تابعيهم عن ال 4000  شخص ... وصفحات تحتوي على عدد تابعين أكثر من توكيلات حازم صلاح أبو إسماعيل .. ومنهم من يتحرك العداد مرتين او ثلاثة في لحظة متابعتك له ... واعلم انها قطعا قصة كفاح ولم تأت على المرتاح ..  و لكن مساهمة منا برفع الوعي العربي نقدم إليك هذه النصائح " العشرة "  السهلة والمجربة من أفضل خبراء شبكات التواصل الإجتماعي  : 

1- ضع صورة بروفايل مبهمة وبلا معنى تجبر التابعين النقر عليها  لمشاهدتها بحجم أوضح 

2- احرص على عدم تغيير هذه الصورة الا بعد عام على الأقل ... وحذار من تغييرها بفانوس رمضان .. او لاعب كرة  مشهور .. او صورة سوداء تنعي ضحايا حادث او مظاهرة ما .. أو حتى اي صورة توضح هوايات او اهتماماتك الشخصية  .. الفكرة هي عدم ابداء التأثر بالأوضاع  اليومية ... وهذا يعطى انطباعا جيدا انك فوق الأحداث وأنها في الواقع لاتعنيك  لأن العالم كله سيذهب الى الجحيم في نهاية المطاف 

3- يمكننا البدء الان بسب الصحابة والسخرية من الانبياء عموما وأكثر قليلا من السخرية من أخبار نبي الإسلام على حساب الأديان الأخرى .. لا يوجد أهانة لأحد على الإطلاق .. فالأديان تمثل نفسها ولا تمثل معتنقيها   .. وأيضا تذكر  لأننا دولة محبوسة  بين جدران الجهل والتخلف وسيقان قصب السكر بعد قطع الزعازيع 

4- لاتنسى أننا شعب متدين بطبعه  وأنك مدفوع   بوازع نفسي داخلي لتكسير الأصنام التى في عقول الناس  هذا لا يعني الحادا بأي حال من الأحوال ولكنها حرية أنت حاربت كثيرا من أجل إكتسابها خلف  أزرار الكيبورد 

5- هاجم كل الأفكار السياسية بلا إستثناء  احرص على أن  يعرف الجميع أنك لا تنتمى لأي تيار بعينه ولا تريد من أحد أن ينتمي كذلك لأي تيار 

6-ضع قاعدة ما للتعليق لكل التابعين وأخبرهم  أنه لا تهاون في عمل حذف لمن يخترق هذه القاعدة .. طبعا المزز استثناؤ من هذه القاعدة لأنهم مصدر جذب لبروفايلك .. واحرص عند رؤيتك لمثل هذا السلوك  ان تكون شتائمك جديدة ومبتكرة وان نفذت الأفكار فاستعن  في ذلك بترجمة شتائم من أفلام أجنبية ... على أية حال فتابعوك ليسوا  في مستوى ثقافي كاف ليكتشفوا ذلك 

7- اسخر بشدة من كل من يحاورك على الإنبوكس ..  أفضح هذه المحادثات .. وانسخها وأنشرها للعلن وبين بعد ذلك بأن حظك  السئ يوقعك  دائما مع  مثيري  الشفقة 

8- تكلم دائما عن أشياء لا تهم أحد باستخدام مصطلحات معقدة و مفاهيم  سامية  وأحرص على ان تكون ترجمتها الى العربية معقدة  كذلك .. مثلا تكلم عن عنصرية الشعب المصري تجاه الأفارقة وصف من يفعل ذلك بأنه  من " الفلاحين"  واشتم كل من ينبهك بأنك بدورك أصبحت عنصريا .. وأضف مثل هذه التنبيهات للقاعدة الصارمة للتعليق كما في البند رقم 6 

9- تحدث كثيرا وبأريحية عن  الجنس .. هو في الغالب  مصدر جميع المشاكل في مصر .. لاننا مواطنون مكبوتون سواء كنا عازبين او متزوجين .. تحدث بعبارات صريحة ومباشرة حتى وإن كنت لا تجروء على التحدث بها في الواقع .. لا تخجل أبدا من التصريح  بأن الزنا هو لفظ اساء تفسيره تجار الدين و اصحاب الذقون  لتلبية رغباتهم في الزواج  بأكثر من واحدة واللاتي يكن غالبا من الأطفال .. وتحدث بصراحة أنك لا تجد غضاضة أن تمارس أختك الحب مع من تختار هي ... أنت لست وصيا عليها بأية حال .. كما أن لأختك شخصيتها المستقلة  الغير قابلة لممارسة أي سلطوية ذكورية  .. واستعن ببعض مقولات الفيمينست  والمدافعين عن حقوق المرأة  في هذا الشأن 

10- متاخدش الكلام كوبي وبيست شيره أحسنلك ..  عشان لو عملت سيرش ولقيتك عامله كوبي ... هتزعل مني زعل جامد ... زي ما إلهام زعلت من عبدالله بدر

يا خالقي

بسم الله الرحمن الرحيم  

يا حليماً على المسئ .. وستيراً للفعل الدنئ ..يا ذا الجمال من للقمئ ؟ ..  صدري يضيق بذنبه .. وذنبي  يغشاه عفوك ..  وعصياني جهلا لقدرك .. فمن ذا يجرؤ على العصيان وقد علم عزتك وجلال إكرامك ..  يا من لم يكن قبلك قبل .. ولن يكن بَعْدُك بَعْد .. "هِدني" إليك يا صمد .. ما خاب من عليك اعتمد .. يا واصلاً  متى الوصال ؟ .. 

وعزتك ما رجوت التيه .. عشطت فمتى تسقينيه ؟ ..  يا ساقي العطشى لا تحرمنيه 

لك يا سيدتي

بسم الله الرحمن الرحيم  

9 نوفمبر 2013 (بعد أطول مشوار على مصر الإسكندرية الصحراوي)

بصي انا عارف انك يوما ما  وبصدفة  بحتة  هتقري الكلام ده .. لما ده يحصل  اعرفي انك اللى  طلبتي ده .. وزي ما قلتلك  أكتر من مرة  انتى الكسبانة في كل الأحوال .. لو سمحتِ متكرهينيش .. انا عندي  أسباب كتيرة جدا - وأهم - من اللى انتى بتكرهيني عشانها .. وفري  طاقة الكره دي  لحاجة  تستاهل .. حقيقي يعني ..  انا كنت واضح وصادق في  كل  حاجة قلتها .. والغلط بس إني  ورطتك  معايا  وربطتك  في نفس الهلب .. بس  ياريت  تفتكريلي  انى مضحكتش  عليكي ..  وده  أكيد اللى  هيحصل .

 في  يوم  ما  هتبقى واقفة على البوتاجاز  بتقلبي في حلة الرز  بلبن .. وهتفتكري تحديدا  البوست ده .. هتضحكي  بسخرية  ..  بس  هتعرفي  انى  كان عندي  حق  .. وان  دي  من الحاجات الصح القليلة اللى عملتها  في  حياتى  .. ساعتها هتفوقي من الذكريات دي لما  ابنك  هيشد  جلابية البيت  اللى انتى  لابساها  ويقلك  : " ماما أنا  عايز رز بلبن ثخن " 

أنا  زي ما أنا  .. ساعات بتفلسف وساعات ببقى تافه .. ساعات سوداوي وعدمي  زي مثقفي التكعيبة  وساعات مقبل على الحياة زي العرسان الجداد .. ساعات اقوى من الغوريلا .. وساعات أضعف من الفراشة.. بس في كل الأحوال دي  مبدعيش  ولا بكدب .. 

كل اللى حصل  اننا  عرفنا  بعض في  ظروف  غير مناسبة  تماما ... غلطي الأكبر اني   مكنش  ينفع  اطلعك على كل التفاصيل بتاعت التجربة اللى فاتت بس  للأسف  الحمل كان تقيل اوي وتراكم الذكريات خلاها  تتخمر وتتعتق   .. وغلطتك  انك سبتيني  أحكي  وأحكي وأحكي .. بالظبط زي  اللى حبت واحد فاقد الذاكرة ..  المشكلة  انى  ذاكرتي مرجعتليش  .. 

مكنش  ينفع  ابني حياة  كاملة  في الدنيا والاخرة  على انقاض .. مينفعش تعوضي  في  معادلة بناتج معادلة  تانية   وانتى مش عارفة الاولانية اتحلت  ازاي ..واتحلت  صح ولا غلط .. انا  اكتر واحد  عارف  خطورة انى  اغامر بتكوين  اسرة وانا مش مقتنع 100% اني بحب مراتي .. كل  سيستم ليه  كفاءة  .. ومفيش  سيستم كفاءته بتقرب لل 95% مهما كان مثالي .. بس الحب مش سيستم .. اللى يعرف  يعرّف الحب يبقى محبش .. السؤال من نوعية " حبيت فيا ايه ؟ .. او حبتني  ليه ؟ " ملوش  اجابة  .. ومينفعش  يبقى ليه  اجابة 

انا مش ملاك ولا عايز ابقى .. بس  بحاول على الاقل مبقاش  شيطان  .. انا عارف  ان النسيان  صعب .. وانتى عارفة انى اكتر واحد  عارف .. بس  على الاقل  حالك  افضل من ناس  كتير والمعنى في بطن الشاعر .. كل اللى عملتيه  صح من الاول  للاخر  باستثناء بس  الغلط اللى قلته في الأول .. عموما  اغفري يتغفرلك ..  وسامحي تتسامحي .. تعقيداتي  اكيد هيجيلها  يوم وتتحل .. لما أنا  اسامحها  السماح ده محتاج قوة جبارة .. مش متوفرة دلوقتى للأسف .. عشان كدة الوقت هيطول اكتر .. هل فيه  تغيير ؟ مظنش .. بس  هل انا زي ما بدأت  ؟ .. أكيد  لأ .. المشكلة في النسيان انه  بيهرب  لما تحتاجه وبيرجع  لما  متكونش عايزه .. وهي عارفة وانا عارف .. في  حاجات  محكيتهاش ليكي ولا ليها وهتموت معايا لما أموت ..

 بس عموما  اكيد  التجربة  دي  فادتك بشكل ما  ..  وانا استفدت برضو  اكيد .. انا  خدت قراري .. بس  ربنا  خلّاف الظنون .. واللى هيحصلي  مكتوب ومفيش منه مفر 

Status 3

بسم الله الرحمن الرحيم

والله  موقفي  مفهوش  حاجة  غريبة .. ببساطة  زي ما بلوم  مرسي  على  غباءه  وخرفنته  وانه  جاب السيسي  ومحمد  ابراهيم  ... برضه  بلوم  السيسي 

بلوم اللي شايل  المسئولية ...  العدل  ان مرسي يتحاكم  انه  خان  ثقة الشعب  واستغفله  وقالك  رجال من ذهب  وفي القلب من ثورة  يناير واصحاب العبور الثالث  ... اهم  عبروا  على  قفاك اهه  يا  مرسي ..  ومحدش يقلي اصله كان  طيب  ووبتاع ..  ده ادى الجيش صلاحيات  مكنش يحلم بيها 

والسيسي  يتحاكم  عشان  خان الشعب وخلى جيشنا جيش  ملاكي ..   في عز ما كان  يقدر  يركز  وينتهزها  فرصة  انه  يقوى  الجيش  ده  لو كان  عايز  .. يتحاكم محاكمة عسكرية هه .. زي الناس المدنيين  اللى اتحاكمت عسكريا  واعدمت .. الخيانة العسكرية عقوبتها الإعدام

---------

الناس مش عارفة ان سر عظمة #الجيش الفترة السابقة على ثورة يناير انه كان  مستخبي ورا اسوار عالية مكتوب عليها ممنوع  الاقتراب اوالتصوير .. وكانت النافذة الوحيدة للاطلاع على الجيش حاجتين : 

1- العروض العسكرية المبهرة 

2- التحاق الأفراد بالخدمة الإجبارية  باختلاف مستوى  تعليمهم  

المؤهلات العليا الأكثر ثقافة نسبيا  كانت دائما ما تؤثر الصمت حيال ما تراه  من فساد وضعف  استعدادات الجيش  ..  كان الجيش دائما ما  يوجه  تفكيرهم  تجاه " المدة " وانها فرصة لتجربة شظف العيش .. شظف العيش الذي لم يجربوه سوى ثلاثة او اربع سنوات على اقصى تقدير داخل  الكليات العسكرية  ... ثم يخرجون عليهم متاجرين بمعاناتهم او ما يظنونها انها معناة وليست مقتضيات الوظيفة 

وفئة المؤهلات المتوسطة والدنيا لا يشغل بالهم بأي حال من الأحوال التحدث عن الأمر برمته .. من ناحية يوفر التجنيد فرصة لمعظمهم الهروب لواقع  فظيع من واقع أفظع ... هم لا يكثرون الشكوى  لطالما كان هذا ديدنهم على كل حال  .. فالشكوى لغير الله  مذلة .. او انها ربما كانت سببا  لإجتذاب سخرية المجتمع المريض الذين يعيشون بين جوانبه

-------------

تحذير  بشأن  المحتوى  (ألفاظ قبيحة استخدمت للضرورة)

وظائف خالية 

يعلن جيش أحد الدول الكبرى في المنطقة عن حاجته الى : 

1- عسكري مرضعة  كود fs 1

2- طيار هليوكوبتر خبرة في تفادي الليزر الأخضر والتخميس مع  المواطنين على الشاطئ  كود hp1

3- عسكري ( كومبوووطر) يجيد كتابة الكلمات الاتية على برنامج الوورد (تسلم االأيادي - خير أجناد الأرض - تنقطع ادينا - احنا نعرف ربنا )  مع ضرورة وجود السيسي وعلم مصر في الصورة 

(ملاحظة : السيسي لازم يكون لابس نضارة شمس 

ملاحظة 2 : محدش يقدر يشوف عين السيسي لانه هيتحول لحجر )   كود  cs 

4- طيار حربي خبرة في رسم الدباديب والقلوب في الجو  كود ff1

5- عقيد  خول برخصة خبرة في التعريص وإذاعة البيانات العسكرية  كود  cg 1 

على من يجد في نفسه  القدرات المناسبة سرعة التوجه لمبنى الشئون  المعنوية

-------------------

تحذير  بشأن  المحتوى  (ألفاظ قبيحة استخدمت للضرورة)

عزيزي  المواطن الحر النزيه اللى مسرح شعره على طول : 

~~ همسة عتاب   ~~ 

ازاي مضايق ان الاخوان احتكروا الدين ؟

ومش مضايق ان العسكر محتكرين الوطنية ؟

ازاي كنت بتتريق عليهم وتقول خرفان المرشد ؟

ومفتحتش بقك على اللي فاشخين صور البروفايلات سيسي 

كنت هاري الفيسبوك تشييرات ولكى الله يا مسر على كام شيخ سلفي بيأفوروا على مرسي ..

ومفتحتش بقك بكلمة  على اللى عاملة ريكلام مع السيسي في الجرايد ولا  اللطيف اللي بشنب غفير اللي بيقول زوجتك نفسي 

مرسي كان طرطور المرشد 

انما جدو حولان  اقنعك انه سيد قراره  صح ؟ 

هشام  قنديل بيتأتأ وكان قارفنا ومبيعرفش يشتغل 

انما الببلاوي رجل الساعة  وكل ساعة .. ماسبيرو اختفي 30 يونيو اظهر 

ايه اخبارك  طيب مع فخري عبدالنور  اللي بينور في اي حتة ... في منصب سياحة شغال تجارة شغال صناعة شغال  استثمار شغال ..  غريبة يعني معينوهوش وزير أوقاف ليه 

طيب وزير العدل الزومبي اللى بيخافو يحطوه في الشمس لا يشقق  ده ايه ظروفو ؟ 

طيب وزير الداخلية اللى كان بيعرص للاخوان مش الأولى كان يتشال في ثورة تصحيح المسار .. ولا انت واخد  شهادة تعريص ؟ 

الكهربا مقطعتش عندك  ... ولا انت متفاجئ زي وزير الكهربا ان الشعب بيرشد  الاستهلاك 

البنزين استوردوه في زمن قياسي واتوفر فجأة ؟ ... طيب الناس مبقتش مزنوقة في البنزين  زي الاول ؟ 

ايه اخبار سد  اثيوبيا طيب وتسلم الايادي مضربوهوش ليه بالصواريخ ؟

امريكا  عدو ...  ولا حبيب ؟

الخلاصة روح قطع شهادة التعريص  بتاعتك  .. يا اما هتقطعها غصب عنك  لما النكسة تحصل .. والاحسن من ده وده تسكت خالص

------------

ليه لازم نحب الجيش ونقف معاه ؟ 

1- جيش وطني محترف عالى الجهوزية  يحوي جميع فئات الشعب  بلا استثناء 

2-يعرف مهامه جيدا في حماية الحدود الخارجية ولم يسبق أن تعدت أي جهة على حدودنا الشرقية مع حليفنا الصهيوني 

3- لا ينخرط في اي عمل سياسي كنتيجة طبيعية للبند رقم 2 

4- يمتلك أحدث المعدات ويدرب أفراده عليها بشمل دوري

5- يتميز دونا عن كل جيوش العالم بالمساواة وشعاره " ابن الوزير زي ابن الغفير " وكل أفراده جنودا وصف وضباط يأكلون في مكان واحد ثلاث مرات في اليوم من نفس الأكل والكل يلتزم بتلزي الميري .. فالقانون مطبق بشكل عادل ويطال  الجميع 

6- يرفع دائما من الروح المعنوية لأفراده ويهتم دائما بإستمرارية التدريبات .. مما يحافظ على لياقة أفراده .. 

7- يكافح الوساطة والمحسوبية ويدق عنق  الفساد ويقتلع جذوره  إن وجدت أصلا 

8- الأفراد  على مختلف رتبهم يكتفون بالقليل من المال لأنهم في الأساس يخدمون الوطن كضريبة للدم  ولا ينتظرون من الدولة شيئا  فجيشنا ليس جيش مرتزقة كبقية الجيوش 

9- يقوم الجيش بالعديد من المشاريع  الخاصة على أكمل وجه ويعيد  كافة الأرباح كاملة للدولة التى تراقب ميزانيته بشفافية ودون قيود 

10 - تسلم الأيادي  تسلم  يا جيش بلادي

----------

يا عبدالناصر .. انت اللي بوظت المجتمع ... انت اللى همشت  قيمة الفرد  قصاد  قيمة الدولة ..وهمشت قيمة الدولة قصاد قيمة الوحدة العربية ... فشخت مصر في حربين وتدريب إسرائيلي للطيران ... الناس فاكرالك صور  بتسلم فيها  على فلاحين  وكأن ده حاجة  خارقة ونزول من مستواك  لمستواهم ..  انت قمعت كل المعارضين قصاد انك لوحدك تفضل في الحكم وللأبد  .. وبيقولوا وطني وبتحب مصر 

وزعت مصر على حبايبك  .. وعسكرت الدولة ... وفشخت نجيب .. ويوم القيامة ربنا هيفصل بينك وبينه ... كنت عارف  كل  حاجة عن  عبدالحكيم عامر و صلاح سالم .. وبقية الخمورجية المعرصين .. بس عرصت عليهم وقصاد كدة فشخت الناس في السجون .. عملت من الإخوان أبطال من لاشئ .. وبيقولوا وطني وبيحب مصر 

نكسة 67 هتفضل متعلقة في رقبتك انت الى يوم الدين 

 وزعت الأرض على الفلاحين .. وأخدت العاطل في الباطل من اﻹقطاعيين .. فالفلاحين باعوا اغلب الارض لانهم مش تعبانين فيها ..  والباقي اللى زرع فتت الناتج القومي من المحاصيل  ... بدل ما كان  في كميات كبيرة من محاصيل استراتيجية محددة الأنواع .. بقى في كميات قليلة غير استراتيجية  متعددة الأنواع .. وبيقولوا وطني وبتحب مصر 

ازاي الناس بتقول كان رافع راسنا وعاملنا هيبة .. بس كنا بنخاف ومكنش حد يقدر يفتح بقه بحاجة ساعتها .. اواي  يا جيل معرص ازاي

----------

1- الواحد  واقع في مشكلة انسانية ... انا  مش عايز الاخوان يتهرسوا من الداخلية والبلاك بلوك عشان انا كارههم ... ما هم لما كانوا بيكرهونا في محمد محمود  وطلع احمد المغير ابو  بزاز يتريق علينا  كنا مضايقين من ان كل حاجة ضدنا حتى الناس ... دلوقتى كل الناس والبشرية ضدهم  يبقى شوية بقى  والحال  ينقلب علينا  بقى وداين تدان  ... انا نفسي من كل الليلة دي ان الداخلية تبطل  بلطجة بقى واستكبار وتشوف  شغلها  بس للاسف ده  مش هيحصل غير ان طرف  يسحق الطرف التاني ويقضي عليه  تماما ويطلع ناس نضيفة تعمل جهاز  شرطة نضيف ... او الداخلية تقضي على المتظاهرين  تماما  وتعيش بقى مع شوية الفلول  والمنتفعين اللى هيتبقوا 

2- نفسي اسطورة الجيش البطل اللى عند  الناس دي تختفي زي ما اختفت اسطورة ان الداخلية هي راعية الأمن ومن غيرها  هنضيع ... بدليل وقت الحاجة  بتتكوت لجان  شعبية للحماية ... وفي المجمل محصلش حاجة طول سنتين ونص لما لداخلية اتقمصت ولبست الطرحة وقعدت في البيت تندب  حظها .. الجيش مؤسسة سلطوية ربحية فاسدة .. يتم في كافة انتهاكات حقوق الانسان ابتداء بالعنف اللفظي غير المبرر مرورا بمنهجيات السخرة وانتهاءا بالعنف الجسدي الذي يصل  في بعض الأحيان للموت في السجون  العسكرية 

3-تشيع اسطورة ان الجيس ملك الشعب ..  وهذا كذب بواح .. الجيش كجماعة من الافراد  ينتفعون  من الحقوق الدستورية المعيبة ... فجميع اراضى الدولة تحت امرة الجيش ةيتم تخصيص مساحات واسعة لبناء مشاريع  ربحية بحتة يعود  نفعها على الجيش نفسه ... اي ان ما اغتصبه الجيش من حق الشعب لا يعاد اليه  ... والحجة الجاهزة دائما الحفاظ على الأمن القومي المهدد أصلا 

4- الأساس  المنطقي والبديهي لفكرة المؤسسات أن الشعب يكلف مجموعة من أفراده  للقيام بمهمات واضحة وضرورية وعند الفشل في القيام بهذه المهام يتم الاستبدال او التحديث بغرض زيادة الكفاءة ... ويتم التضحية بجزء لا بأس به من مخرجات الشعب الاقتصادية لدعم هذه المجموعة اذ يتطلب من مثل هذه النشاطات والاعمال تكاليف مادية باهظة ... فعند اكتفاء الطرف المعني بالمهمة بأخذ هذه المخرجات .. يشعر بقية الشعب صاحب السلطة الحقيقية بأنه يبذل أموالا في غير موضوعها وكانت ستقوم برفع كفاءة حياته  هو ان احتفظ بها لنفسه 

5-في حال رفض الفئة المعينة من قبل الشعب القيام بالمهمة المنوطة بها .. بل واستعداء هذه الجهة بصفتها المالك الوحيد لحق استخدام العنف تصبح هذه  الفءة في هذه الجالة فئة متمردة يجب الاطاحة بها استجابة للحاجة الفطرية للنجاة والدفاع عن للنفس 

يتبع ...
-------------------


التعريف العلمي للدهلكة : 

الشقيري بعد ما راح سويسرا واتفسح بقى وظاط وقضى له يومين حلوين " وانبهر " بحسن معاملة البقر هناك .. مش عيب انه ينبهر بنظام " إدارة اقتصادي  " كويس  .. لكن لما   رجع بقى السعودية عشان يقول في الاخر ان ربنا سمى اكبر  سورة في القرآن  باسم  البقرة ... فهي  دي بقى الدهلكة على أصولها ... طيب ما النخلة كلها فوايد ... ربنا معملش سورة النخلة ليه  يا شقيري


-------------


1-اتعلم حاجات مش حاببها .. ومتسألش عن اللى مش عارفه ... المهم تذاكر (تحفظ) وتجيب مجموع

2- من رقم 1 ... خش كلية كبيرة عشان "اتفشخر بيك قدام الناس" وتبقى اثبات انى عرفت اصرف عليك واربيك واسيطر على حياتك .. زيك زي كلب السيرك المدرب 

3-  خش الجيش الاجباري عشان ميتقبضش عليك ... عشان من غيره مش هتعرف تشتغل او تسافر وكدة كدة لما تخش الجيش هتحس انك عبئ عليه وعلى الحياة عموما 

3- من رقم 2 و 3 .. اشتغل شغلانة مبتحبهاش  كدة كدة  مش هتلاقي شغل ... وهتشتغل غصب عن عينك .. وهتتحول تدريجيا لكلب للجنيه .. والكلب مش شتيمة ... انت هتبقى صديق الجنيه الوفي وهو اللى هيتحكم فيك .. والحاجات اللي بتشتريها  و بتملكها مع الوقت هي اللى هتملكك وتأثر على قراراتك 

5- بعد ما تجمع ثروة معينة من الشغلانة اللى مبتحبهاش.. اصرفها  على واحدة مبتحبهاش  وهي بالتبعية مبتحبكش ... المهم تبقى متجوز وخلاص .. وطبعا هتعمل فستان مبيتلبسش وفرح مبيفرّحش واكل مبيشبعش ومتنساش تشغّل في الفرح اغاني مبتتسمعش 

6-خلف عيال مبتحبهمش من الست اللى مبتحبهاش .. دول كدة بقوا ممتلكات ليك .. تقدر تتصرف فيهم زي  ما انت عايز .. دول عبيدك .. كفاية انك اكلتهم  ووفرتلهم مأوى .. والناس هتشجعك على كدة اصلا

7- ودي ولادك للمدرسة اللى مبتعلمش ... واجبرهم يتعلموا حاجات مش حابينها .. عشان  تتفشخر بيهم قدام الناس .. لو عيل فيهم ابدى اهتمامه بحاجة تانية .. اقهره فورا واكسر نفسه .. اوعى تدي ابنك فرصة يقول رأيه في حياته ... افتكر دايما ان ابنك ده ملك ليك .. وحياته  ملكك انت مش ملكه .. وده معناه انك هتختارله أنثى عشان التناسل وبقاء النوع .. والأهم متبقاش قصرت رقبتك قدام الناس 

8- كدة بقى تموت وانت مستريح ... كدة انت أديت رسالتك في الحياة على أكمل وجه ... قرب من ربنا بقى لأنك كدة فجأة انتبهت انك ممكن تموت عشان خلاص بقيت ما بين الستين والسبعين ... ومتنساس تؤمر ولادك يدعولك بعد ما تموت وتخليهم يتصدقوا على روحك الطاهرة 


#بؤس
  #إنسانية
  #كلام_لا_بيودي_ولا_بيجيب
 #مصر
 #مصري 
#بكرة_احلى 
#ابقى_قابلني

----------------

اللى منجح الجيش  ان محدش شايف العك  بتاعه .. بالظبط زي الناس اللى بتستمتع بسندوتشات الكبدة بتاعة العربيات

-------------

كابتن كابتن لو إيدك قد وشك هتدخل الجنة #بدايات_الإخوان

--------------

الورد للستات عامل زي الجمبري للرجالة #حكم_ونصائح

-----------------