يارب صلي

بسم الله الرحمن الرحيم 

يارب ... غفرانك لعبد كهل من كثر الذنوب وبلي ... ولم أطلبه إلا لضعفي وحاجتي وتذللي .. يارب .. من لي إن لم تكن أنت لي ... يارب ما سواك أبتغيه ولي ... يارب حمداً كثيراً وشكرأً على نعم قد أبديتها لي ... وفقنا الى دوام السلام على حبيبك وأن نصلي ...

الإخوان

بسم الله الرحمن الرحيم 

ده  شئ من بعض الأشياء اللى عايز اقولها للإخوان 

اعتذرولنا يا اخوان ...... قبل ما تمشوا م الميدان

مصر بتسمع للتحرير .... مش لكراسى البرلمان 

بلطجية وترامدول ..... شمّتوا فينا الفلول

يا شباب الإخوان يا ثاير .... بعتونا في حفلة يناير

قلتو الثورة بح وخلصت .... وقفلتو عليها الستاير 

ولما الحرة قدامكو اتعرت .... قلتو كلام وحش معناه 

هوا الشرع بتاعنا  خالى .... من كلمة  وامعتصماه ؟!!

الاعتذار شئ مش شديد .... شوف بسببكو في كام شهيد 

سيبوا العسكر يلبس هوّا ... وإحنا نحط الإيد في الإيد 

السمع عندى والطاعة ....  لربى مش لرئيس جماعة 

ناقص تاخدو الإذن منه ....  قبل ما يناموا الجماعة 

استخدم عقلك وفكر ...... انت مش مقطف بودان

مش كل حاجة ترددها ... انت أكيد مش بغبغان 

واللى مش عايز يتغير ... هوا اللى اختار وقرر 

قول ورايا من غير ما تفكر ....  يسقط يسقط حكم العسكر 

تدبر

بسم الله الرحمن الرحيم 

في احدى ايام شهر فبراير ... وفي احدى ساعات الصباح المبكر ألفت  تلك الأبيات ... لعلها تكون تحقيقا  لأمر الله بالتدبر في ملكوته 

الشمس طالعة بين الغيوم تسبح ربّها .... ودى غيمة سايرة تحمده زي غيمة أختها

الشمس نورها داير بين السما والأرض ... تنبه المؤمن قوم صلي الضحى والفرض 

يارب من عصاك ما عرف قدرك  ..... ولما ندم وأناب راح وادارى في سترك 

ده احنا لو اتقيناه وبدأنا نحب الغير .... سبحانه راح يرزقنا زي ما بتروح وتيجي الطير 

الحمد والإستغفار

بسم الله الرحمن الرحيم 

 

صرت أعرف الان كيف يكون الابتلاء للمؤمن بالله في كل الأحوال خيرا ... فإذا ابتليت بالضيق والحزن لذنوب ارتكبتها تجد ان الله يلهمك الاستغفار في مرحلة معينة فيكشف عنك الضر ... واذا ابتليت بالخير والفرح حمدت الله كثيرا وصرت تشعر بأنك مدين لله مقصر في عبادته فتقبل أكثر على الطاعة ... فالمؤمن في كل أمره خير فهو بين استغفارٍ بعد إدبار وحمدٍ عند فرج ...

ايام الجيش 01

بسم الله الرحمن الرحيم

هحاول اكتب بشئ من الإيجاز اللى حصل في 13 شهر عدوا عليا في الجيش

20-10-2010

بداية الموضوع ... في التاريخ ده رحت للقسم اللى انا تابع ليه وقدمت الورق ... طبعا ملوش لازمة دلوقتى اقول عن معاناة استخراج اوراق ملهاش اي لازمة من فيش وتشبيه لحد شهادات كتيرة يمكن اختصارها في البطاقة الشخصية ... لكن من امتى بلدنا كان فيها منطق ... ودي اول حاجة كان لازم اتعلمها قبل ما اخش الجيش هو انه لا منطق في الجيش ... خلصت الاوراق وخدت كارت صغير كدة مكتوب عليه التاريخ اللى هروح اكشف فيه ومختوم عليه 3 عبارات ... قص الشعر والذقن ... عدم اخذ المحمول ... والتالتة مش فاكرها

5-11-2010

ده تاريخ الكشف الطبى اليوم ده محفور في ذاكرتى ومن الايام المهمة اوي في الجيش لانه كان يوم فاصل يا ادخل يا مدخلش ...مكان الكشف في الهايكستب ( معتقل من ايام الاحتلال البريطانى ... محدش يعرف معناها والمعلومة دي جبتها من جووجل اجابات بس مفيش مصدر موثق).. 

اليوم ده كان ضبابى بشكل بشع اوي لدرجة انى فعلا كنت بخبط في ناس قدامى عشان مكنتش شايفهم .... رحت اليوم ده بدرى اوى والحمد لله كان عندى حق لان كمية الشباب اللى بتبقى هناك ممكن تملى استاد كورة ... وده في يوم واحد ... المهم رحنا للهايكستب ووصلنا على البوابة خدتنا اتوبيسات لغاية جوا نزلنا ووقفنا طابور طويل وكل شوية واحد يطلع يقلك امسكو الورقة الفلانية وطلعو الورقة الفلانية واللى معاه موبايل بكاميرا يديه للأمن ... دخلنا ولقيت في خطوط حمراء وزرقاء وصفراء وخضراء على الارض ... بصراحة كان نظام حلو يعني لو عايز تسأل على مكان الفلانى تسأل واحد تلاقيه بيقلك امشى على الخط الازرق .. هو حاجة بتخليك تحس انك فار تجارب او حمار عارف سكته من البيت للغيط ... بس نظام فعال في مكان واسع اوي

دخلنا واستنينا تحت برجولات ( برجولات يعني مظلات) ... قعدنا جنب بعض ... وطلع واحد قلنا نرتب ورقة كذا بعد ورقة كذا وورقة كذا قبل ورقة كذا .. الخ الخ ... استنينا شوية ودخلنا في قاعة كبيرة ... شغلو فيلم دعائى عن الجيش ... زي الافلام اللى بتيجي على القناة الاولى والتانية دي لما يبقى في حفلة تخرج من حفلات تخرج الظباط ... وبعدها قفلو الفيلم وجه صول قعد يجاوب على بعض الاسئلة ... كان في اسئلة مستفزة واسئلة مهمة .. المهم ان الراجل مكنش كويس في ردوده لانه متعود على الاسئلة دي بقاله مدة كبيرة ... بس لازم يعذر الناس اللى متعرفش ... المهم قعدنا مستنيين تقريبا ساعة او ساعة ونص وكل شوية واحد يخش يقول امنع الصوت ... امنع الكلام .. كأننا في مدرسة ... بعد شوية بدأنا نستعد عشان نتصور دخلنا على أوضة فيها سترة (قميص) زيتي عشان نتصور بيه اتصورنا صورة لا معنى لها كدة عشان هتتحط على الكارنيه فيما بعد ... بعدها دخلنا على الوزن والطول ميزان الكترونى والطول برضو والقراية بتتسجل على طول على الكومبيوتر ... بعدها بيطلعا حاجة اسمها "استمارة 110 جند " وحاجة اسمها " الباركود" وبعدها بنروح عشان يتكشف علينا طبيا ... مركز الكشف الطبي ... مكان واسع كبير القاعات قليل الغرف ... اول ما دخلنا.. دخلنا على غرفة كدة تقريبا 6 متر × 4 متر وجالنا داكترة مجندين وقعدو يقولو حبة امراض كدة عشان لو حد عنده حاجة من ديه ميخشش ... وطبعا بتبقى امراض نادرة ومحدش اصلا بيسمع عنها غير للمرة الاولى ... الخطوة دي اسمها التلقين الطبى ... بعدها بنروح نكشف نظر وصدر وجراحة ... في اختبار النظر مكنتش شايف حاجة لانه بيقعدنى على مسافة بعيدة اوي ... والدكتور افتكرنى بستهبل بس كتبلى عرض على استشارى عيون ... دخلت على الصدر الدكتور حط السماعة وشاف ضربات القلب وشاف الضغط بسرعة اوي .. كان بيقلب بصراحة ... وكتب 80/120 ... دخلت بعدها كشف الجراحة وهو كشف بيتم فيه التأكد انك معندكش بواسير او ان فيه تشوهات في فتحة الشرج او العضو الذكرى ... ودي بتبقى اكتر لحظة محرجة في الكشف الطبى كله والواحد بيخرج مش عايز يبص في عين اي حد ... مع ان الكل بيكشف الكشف ده بس برضو ايامها الواحد كان عنده حياء قبل ماالحياء يضيع في الجيش ... دخلنا بعدها في غرفة تغيير الملابس.. بنقلع كل هدومنا ونفضل بالبوكسر فقط ( شورت الملابس الداخلية ) طبعا محدش هيقدر يتخيل 200 واحد على الاقل لابسين كلهم ملابس داخلية وعمالين يتمشو من الأوضة دي للقاعة دي ... دخلنا على قاعة كدة استلمنا دكاترة مجندين وكانو بيحاولو بكل الطرق انهم يطلعولنا اي حاجة عشان نطلع من الجيش المهم الدكتور قاس محيط الصدر وقالى انت عندك فلات فوت والتصاق في الفخذين ( نسيت اقول انى كنت بحاول اتخن في نفسى اوي قبل الجيش عشان مخشش ) دخلت على قاعة كبيرة جدا جه عقيد دكتور ( العقيد نسر ونجمتين) راجل مستفز وكان بيبص بطريقة توحى انو زهق من كتر ما بيكشف على ناس .. عارفين كدة لما يكون واحد بيعمل شغله وهوا زهقان ... المهم الراجل قلنا اقفوا .. وقفنا .. قعد يبص على الناس وقال لكام واحد كدة يروحو يقفو هناك ... الدكتور عدى عليا وبص كدة بصة سريعة ومشى تانى ... ندهتله وقلتله حضرتك مبصتش عليا قالى وانت عندك ايه انت راخر .. قلتله لو سمحت اكشف عليا .... المهم خلانى لائق ب ... يعني على الأقل مش هبقى ظابط وده كان مكسب كبير ولكن كل حاجة ليها ميزة وعيب ... وده اللى هنكمله في الجزء التانى

وبعـــدين

بسم الله الرحمن الرحيم

-1-

وبعــــدين !!

الكلمة دي بقت تتقال كتيرقوي بيني وبينها ... هيا ملهاش ذنب .. انا عارف ده كويس .. بس برضو مش عارف ليه مش عارف انسى وأعدى الموقف ... كل مرة بياخد اسبوع اسبوعين شهر بالكتير ... انما الموضوع فعلا قرب على شهر ... حجم الضغوط مخليني مش عارف أفلتر المواقف زي ما كنت بعمل زمان ... زمان .

-2-

حلقة جديدة في نفس المسلسل ... أنا عامل زي السمكة كل الصيادين بيصطادو نفس السمك بنفس الطريقة من الاف السنين ... بس السمك مبيتعلّمش ولو سمكة هربت مبتحذرش قومها ... زميل جديد في الشغل حاسس انى هزعل منه قريب مش عارف ليه
كالعادة دائما بيخيل الي انى لقيت شخص ما أحسن مني بيفهم هزاري ويستحمل غلاستى ... مع الوقت  الشخص الأحسن منى واللى بيفهم هزارى ويستحمل غلاستى يبدأ يقول قد ايه انا لطيف او ذكي او جدع او الخ الخ الخ ... بعد فترة يبدأ الشخص الأحسن منى واللى بيفهم هزارى ويستحمل غلاستى يقولى على حاجات شخصية في حياته ويبدأ يستشيرني في أمور غاية في الخصوصية ... بعدها أبدأ انا افضفضله بحاجات وبالتالى اعتبر انه صديق صدوق وابدأ اهتم لأمره ... ثم يحصل موقف ما يكون الظاهر منه انو عادي احنا مش اخوات ولا حاجة والدنيا مصالح ... اقعد شهور أحاول افصل نفسي عاطفيا عن الشخص ده وبتعب اوي في المحاولة دي بيبقى عامل زي ما البنات بتشيل شعرها المتقطف بمشط بعد ما بتكون استحمت .... ومع الوقت يبدأ شخص أحسن منى و بيفهم هزارى ويستحمل غلاستى يتعرف عليا ...ثم ... وده اللى هيحصل في الجيش بقى ان شاء الله

-3-

الغرض من ذهاب شخص سليم ومعافى وحاصل على مؤهل عالى وتخصص نادر الى الجيش هو أحد سببين :-
1- الدولة في حالة حرب وتحتاج الى كل الكفاءات المتعلمة والتخصصات النادرة التى لديها
2- الدولة في حالة سلم ...
وبما اننا نعيش في ظل حمامة السلام وعايزين يفرضو اسرائيل صديقة بالقوة بالرغم من انها بتتجسس علينا بس وماله مصارين البطن بتتخانق ولازم نضحي عشان السلام ... كل اللى اعرفه عن السلام في مصر انه موقف بروح منه للعاشر
طيب الدولة في حالة سلم ... اذاً المفروض أدور على تخصص ميكانيكا انتاج وادخله الجيش عشان استفيد منه في المصانع وورش الانتاج واعمل خداع استراتيجي وازود عدد المهارات العسكرية اللى عندي ... لكن لا ده احنا اللى ضحكنا على اليهود احنا هندخل المهندس بتاع ميكانيكا انتاج ده الجيش ونقعده زي القلة ... نخليه يروح يجيب شاي وقهوة للظباط ... هما عارفين انه متربي وانه منضبط وملتزم .. أول دروس الإنصياع نخلي العسكري ده يتذل ...لما يتذل هتنكسر عينه وبالتالى هينفذ الأوامر ... طيب يا فندم العسكري اللى انت هتذله ده مش هيحارب يعني مش هيفرق اذا كان هينصاع للأوامر ولا لا ... كمان يا فندم عايزين ناس مؤهلات عليا في الجيش ليه ... متناقشنيش يا عسكري ... طيب هتدربوني على الاشتباك وهمسك سلاح واضرب نار ... لا يا حيوان ... طيب هركب دبابة او عربية مدرعة ... طيب هبقى في ورشة صيانة اسلحة ... هبقى في ورشة تصنيعة قذائف الهاون ... طيب عايزين في الجيش مهندسين ميكانيكا ليه؟

-4-

انا عارف انى المفروض مكرهشي حد بس فعلا وللأسف مقابلتش ستات كويسين في حياتى

-5-

انا مش واثق من نفسي ... انا تعبت

23

بسم الله الرحمن الرحيم

انهاردة كما هو مذكور 1-11-2010 ... انا مولود من 23 سنة بالتمام والكمال مفيش في دماغى حاجة اقولها ... كل الجديد بس انى مستني الجيش اهه وانتظار ليس له داعي والشغل مش عاجبني واللى بيحبني حبه ليا وحبي ليه بيكبر مع الوقت .. وفي مشاكل بين اهلها وأهلى ... ووزني لسة زايد من ساعة القعاد لمشروع التخرج .. خلص مشروع التخرج ووزني لسة منزلش :) ... انا مأجل الموضوع لما بعد الجيش عشان لو دخلت ابقى اخس جوة ببلاش بقى :)

السنة عدت في طرفة عين ... مع الوقت بيتضح لي معنى الآية (قالوا لبثنا يوماً أو بعض يوم )
بالنسبة للأنجازات اللى كنت ناوي احققها بدأت احقق هدفى في تعلم الخط واتعلمت خط النسخ لوحدي الحمد لله بس طبعاً لسة عايز كتير عشان اصقل الموهبة دي وعايز اتعلم باقى الخطوط وربنا يسهل الحال ويارب اكون حققت تقدم للأمام عن اللى كان مكتوب هنـــــــــا و هنــــــــــــا

My Endless Sine wave

بسم الله الرحمن الرحيم

كالعادة عندما أمر بمثل هذه المواقف أحاول تهدئة نفسي ... أخبرها أن المؤمن مصاب .. وأنني حتما يتم التكفير عن سيئاتى الآن .. هكذا تقول أقوال الرسول محمد صلى الله عليه وسلم وهكذا يرطن بها أئمة المنابر وخطباء التلفاز وأقلام الكتب .. عفوا أمهات الكتب ... اليست كل أم لابد أن نبرّها .. اذاً لابد ان نبرّ امهات الكتب ايضا ...

تصرخ في وجهى لا مبالية أنت ضعيف ولا تريد مواجهتى بمثل هذه الحقيقة .. الحقيقة الواضحة كوضوح الموت والمرض والفرح والحزن ... الحزن ذلك الوصف الذى دائما ما تتهمنى بأنى من جلبته لك .. أنت لا تتذكرني ابدأ عندما تقول لك (هي) كلمة تعجبك .. لا تتذكرني أبداً عندما تسمع كلمات الشكر والثناء... فقط تتذكرني مع هذه الكلمة ...

يستيقظ الحكيم في داخلى .. شخصية وهمية تنمو داخلي .. تغذيها الأمنيات .. أنا لست ضعيفاً ... هذه مرحلة وستمر مرور الكرام ... ما المانع من بعض لحظات الاسى احيانا .. اليست هذه اللحظات مكتوبة علينا .. مقدرةٌ علينا .. اذا لا سبيل لدفعها سوى من جَلَبَها ... اممم... أنتِ تستدرجيني لأتناقش معك حول جدلية القدر ... موتي بغيظك... لن أفتح هذا الموضوع معك ... تعرفين أنه لكل شئ اذا ما تم نقصان ومن سره زمنٌ ساءته أزمانُ ... انت تعرفين ان الحياة تتبع دالة جيب الزاوية ما تلبث ان تصل لقمة الصعود حتى تهبط وما تلبث ان تهبط حتى تصعد .. طالما تبجحتى بمثل هذه العبارة ...

ليس فيك خير ... لو أنك كما تدعي صالحٌ تقيٌ ... ماذا أفادك صلاحك وتقاك .. أنت حقاً لا شئ .. ما الذى تتمتع به دون غيرك ... ما الذي يميزك عن فلان ... جرب واذهب بعيدا لن يفتقدك أحد .. لاأقصدها بالطبع .. ولكن جرب ... جرب لمدة يوم واحد ... اجعلها اسبوعا .. صدقا لن يلتفت اليك احد ... هل قلت لي بعد ما الذي يميزك .. لا تقل آراءك وأفكارك وحب الناس لك ... الناس تركن بطبائعها إلى المرفهّين عنهم

أنت تلوميني في أشياء ليس لي يد بها ... لم أختر عائلتى أو اسمي أو اخوتي .. لم أختر ديني .. وإن وجدته الأفضل .. لم أختار حبي .. ولم أختر أهلها ولم أختر شعري ولا استطيع التحكم في شهواتي بالشكل الكافي .. لم أختر موت والدي .. لم أخترذلك أبداً...

حسناً أنت لا شئ وليس عندي ما أضيفه

الوضع الحالي

بسم الله الرحمن الرحيم

20-7-2010

الوضع دلوقتى بقى صعب ومتهيألي ده عشان سيبت التوافه تتراكم .. دلوقتى النقط اتجمعت وملت الجردل .. انا زهقت .. وزهقت من انى دايما زهقان .. وزهقان من كتر ما زهقت غيري .. مفيش حاجة على المدونة دي كتبتها تفرح ولا انا بكتب هنا بس لما بكون زهقان ؟

ليه الدنيا متناقضة دايما مفيش حاجة سالكة كدة على طول لا الناس سالكة و لا تصرفاتهم سالكة مفيش حد صريح حتى في الدين كل يوم يطلعلك واحد يقلك انت حمار وانت مش كفؤ عشان تقرى في الدين ولازم تاخد العلم من أهل العلم وكل ما يتزنقوا في حاجة يقلك هكذا فعل السلف الصالح من الأمة طيب زمان مين المجنون اللى كان يقدر يخالف الرسول في أمر ديني يعني انا لو عايش ايام الرسول ما انا كنت برضو هبقى مطيع وبسمع الكلام ومكنتش هبقى تعبان من كتر التفكير ولا كنت هخش في جدال مع حد.

الرسول توفى وكمل الصحابة من بعده بنفس النهج ودول ناس رضي الله عنهم ورضو عنه والثابت والمعروف ان كل الصحابة مبشرون بالجنة والعشرة المبشرون دول مختلفين فقط في انهم اول من بشروا بها احياء ... يبقى اكيد اكيد لازم يكون في اختلاف بين ظروفهم وظروفنا مع انهم كانو بشر عاديين جدا اه طبعا محدش يقدر يطاولهم في التقوى وتطبيق الاحكام بس برضو ده ليه مش عشان كانوا اقرب من الرسول ... ما بالك اللى بيحاولو يسمعوا كلام الرسول من غير ما يشوفوه .

اللى قصدي عليه ان مفيش حد عايز يتناقش في اي حاجة ولا دين ولا غيره ومحدش سالك وصريح دايما يحاول يقنعك برأيه هوا طيب ازاي يعني الناس كلها تمشي على رأي واحد ... محدش تقدر تاخد منه انطباع واحد ..  يعني سيرة ابو بكر الصديق انه رجل مسالم رقيق القلب دايما يبكي من خشية الله .. 
واللى يقرى سيرة عمربن الخطاب يبانلك انو قوي شديد غليظ بكلامه هو عن نفسه كدة ولكن تلاقي العجب العجاب ان في حاجة زي حروب الردة عمر القوى الشديد يقول لأبو بكر لن تقدر على قتال العرب ... وابو بكر يقله لو منعونى عقالا ... الخ .

عمر الشديد اللى كان ممكن يجلد على كلمة اتقالت مش في محلها واللى كان ماشي طول النهار ف يالمدينة بالخرزانة (الدرة) واحد قاله ده فلان وفلانة رأيتهما يتعانقان وراء النخيل ... قالو استر عليهم عشان ربنا يستر عليك .. وبعث الى واحد عرف انو بيشرب الخمر كتبله أول سورة غافر وقال اذا رأيتم اخوكم ضل فلا تعينو الشيطان عليه.

طيب فين ده دلوقتى ليه مفيش مناقشة ووسطية اي حد دلوقتى وبلا استثناء تكلمه في حاجة ان مكنش  كلامك عاجبه هيقرفك ويهاجمك ومش بس كدة هيحاول يقنعك باللى في دماغه ... يا جماعة مالم يتكلم فيه الله ورسوله بالتفصيل محدش يجبرني عليه سيبو الناس تفكر وكل واحد يتحمل نتيجة تفكيره اه في  سلوك عام للجماعة المسلمة بس ده في تطبيق الحدود والضوابط .. لو قرينا السيرة بجد وطبقنا فكر السلف الصالح هنلاقى نفسنا بنفكر في كل حاجة ونجتهد .

يعني الفتن اللى حصلت في عهد عثمان وعلي مين اللى كان جزء منها مش الصحابة .. اه سببها عبدالله بن سبأ لعنه الله بس مش كانو عارفين ان قتل المسلم خطأ وحرام ومن الكبائر... الخ بس تقاتلو ووقع منهم قتلى وجرحى طيب حد يقدر يقول عليهم انهم احدثو في الدين وابتدعوا فيه ... لأ محدش يقدر لانهم الصحابة .. والصحابة لا يمكن حد يتكلم عليهم انما الناس العاديين سب فيهم وكرههم في نفسهم زي ما انت عايز ... مش متخيل دلوقتى ان بقت مشكلة المشاكل البسي الحجاب البسي الحجاب البسي النقاب البسي الاسدال البسي البسي البسي .. يا عم قول وخلاص متقعدش تزن بقى اللى عايز حاجة يعملها وكل واحد عارف الصح من الغلط ليه الزن والاصرار ... انا مش بتكلم عن شيوخ بعينهم والله ولا دعاة بذاتهم كله بقى كدة كله بيغلط في التاني وبيقول حسبي الله ونعم الوكيل .. طيب يعني ولا شجعتو الناس على انها تقرأ ولا انتو اتفقتو فمنعتو الحيرة اللى وقعتو الناس فيها .

بجد الواحد مبقاش مستحمل وقريب هيحصلي حاجة يا همرض يا هنتحر .. اه الموضوع خطير للدرجادي ما هو خلاص مش عارف هقدر استحمل لحد امتى العمر قصير وعايز اعمل حاجات كتير ومعنديش الامكانيات ولا التشجيع ولا في ظروف تساعد ... ظروف المجتمع وظروف الاسرة وظروف الدولة ... ازاي طيب اطنش واعمل كأنى مش شايف ولا عايش ... الناس بتقدر تعمل كدة ازاي .. ليه لما ببقى محروق من حاجة الناس بتحسسني باللامبالاة والاستسلام ... لما روحت اشتكيت دكتور مدخلش غير مرة واحدة قبل الامتحان كان كل الهجوم عليا انا ومحدش وقف في صفى ولا حتى شاركنى معنويا وكل الدكاترة اللى كل يوم يكلمونا عن الحق والشرف والأمانة واننا لازم منبقاش سلبيين وبلا بلا بلا كل ده راح في الهوا وبقيت شخص غير مرغوب فيه يعني بدل ما يسألو نفسهم ايه سبب تقصير الدكتور ده كل الحجج بقت انت ليه متكلمتش من اول السنة .. ينهر ابيض يعني دلوقتى بقيت انا اللى غلطان.

ازاي مزهقش والتصريحات المستفزة بتاعت الحكومة كل يوم وهما بيتكلمو بكل ثقة ان معدلات النمو في ارتفاع دائم والجرايد تكتب على خالد سعيد شهيد البانجو .. ازاي بس دول بيقدرو يناموا بالليل او يعيشو حياتهم سعداء ازاي الدكتور اللى عندنا ده بيرفع عينه في عين الدكاترة ويقبض مرتب وهو عارف وهما عارفين انه مبيحضرش ولا بيشرح هو ازاي قابل على نفسه كدة .. اكيد هوا مريح ضميره بقناعات شخصية طيب يعني بيقنع نفسه بايه المسئولين في الحكومة بيقنعو نفسهم بايه عشان يقدرو يقولو الكلام ده .. الشيوخ اللى بتمثل على الفضائيات دي بيقنعو نفسهم بايه .

طريقة تمثيل عمرو خالد ولا مصطفى حسني ودعاة تانيين بيتكلمو بنفس الطريقة المستفزة ليه تقعد  تعمل بايدك وتشاور؟ ..  وتمثل ليه التمثيل ده ؟ .. ليه ميبقاش في بساطة ومباشرة ؟ .. ليه يا محمد يا حسان ويا حسين يا يعقوب تقعد تقول الرشوة والسرقة والزنا واكل المال وفي الاخر تقول اللهم سدد ولاة امورنا الى مافيه الخير والسداد لو انت شيخ بمعنى الكلمة وبتقول الحق قول الحق دايما ومتحصرش نفسك في كلام ودعاوى ويكأن الشيخ ده مش مواطن ولا بشر ولا عايش في مصر .. ماهو حاجتين يا اما انت مش حاسس بالام الناس يا اما بجد انت منافق وفي الحالتين ده امر عظيم اوي

ازاي مزهقش من الحجاب المزركش والمبهرج ده ازاي يا بنتى ده حجاب ازاي انتى قادرة تتحايلي على نفسك ازاي بتقولى للناس انا لابسة الحجاب نفاق ازاي تبقى لابسة حجاب مبهرج وملفوف مية لفة في بعض ولابسة زفت خرة كارينا وبرمودا والعذر دايما هوا اللبس كدة مفيش غيره في السوق اعمل ايه يعني؟.

ازاي مزهقش لما كل يوم في المترو يقلك استخدموا ابواب الصعود والنزول المخصصة عشان راحتكم وسلامتكم يعني الهيئة العامة لمترو الانفاق هتاخد على كل واحد فينا جنيه زيادة لما نلتزم ؟.. ايه المشكلة نفسي اعرف ؟.. ليه مع ان كتير جدا المحطة بتبقى فاضية وابواب الصعود بتبقى فاضية الناس برضو  راسهم والف سيف يطلعو من النزول ... جااااي ... والله عايز اجيب اطباق واقعد اكسرها عايز اطلع طاقة الغضب دي في حاجة بس طبعا مش هقدر ومفيش حاجة تتعمل

ليه مفيش حرية ليه لازم اسمع عمرو دياب عشان ابقى سميع ولازم اشجع الاهلى عشان ابقى بفهم  .. ايه النقص في رجولتى يعني لما اقول للناس انى مبشجعش نادي معين .. اه بحب الكورة جدا وبستمتع بيها وبفهم فيها بس انا مبقدرش ازعل عشان فريقي خسر ولا انفض لمحاضرة عشان الاهلى بيلعب في بطولة عالمية او انزل من بيتي قبل ماتش بساعتين عشان اقعد في قهوة كلها دخان وسجاير .. ايه العيب انى اقول لوحد اطفي السجارة عشان بتضايقني ايه العيب لما اقول انى مبحبش اسمع اغاني لانها فعلا مش اغاني ولا فيها تنمية للروح ازاي اسمع خبط ورزع وتقليد اعمى للغرب وكلام مرصوص ورا بعضه بكل غباء واستسلام .. لو فيه غياب يبقى جاي وراها عذاب .. لو فيه  مكتوب يجي وراها محبوب ايه العيب في انى مبحبش احمد مكي او اني مش شايف يعني انو سوبر بالدرجة اللى الناس مشبهاه بيها دي .. وايه المشكلة ان ده يبقى رأيي واضحك على احمد مكي ؟.. ايه التناقض في كدة انا بقول بس ان مفيش حاجة تستاهل تبقى بالضخامة دي ..

ليه فميش حملة كبيرة كدة زي التكاتف مع المنتخب الوطني  وليل نهار فلان عمل وفلان سوى ليه ميبقاش في حاجة زي كدة على تطوير التعليم ليه الناس متبقاش مهمومة بالتعليم زي الكورة كدة ليه مبيزعلوش لما يلاقو ان كل مدارس الحكومة مفهاش نشاط رياضي ولا ثقافى ولا موسيقي ما هو ده اللى عامل الفجوة الاخلاقية دي وايه اللى مبوظ المدارس والتعليم عشان مفيش رقابة ..  وايه اللى مش مخلي فيه رقابة ؟.. عشان بلدك لا تدعم الشفافية ولا تشجع الناس على الشكوى ..  ليه؟..  عشان مش محتاجين حد يقرفنا .. وليه مش عايزين حد يقرفنا ؟.. عشان نفضل احنا ماسكيين البلد ونتحكم في اللى داخل واللى خارج ازاي حزب غيرنا يمسك البلد ؟..  وازاي ناس تقعد على كراسينا ؟.. ازاي دلوقتى بنشتم حكومة عاطف عبيد وايامها الجرايد تكتب ازهى عصور النمو الاقتصادي ؟.. مشروع توشكى ليل نهار نسمع عليه كلام وبينزل في مواضيع التعبير في المدارس ودلوقتى جايين تقولو مشروع فاشل وكلف الدولة مليارات ما انتو يا مسئولين كنتو مسئولين في المشاريع دي كلها ليه متكلمتوش ساعة ما كنتو في الوظيفة جايين تتكلمو بعد ما سبتو الكراسي والمناصب ؟.. دلوقتى حسيتو ان مبقاش فيه خوف   ؟.. امال كنتو خايفين من ايه قبل كدة ؟..   كنتو خايفين تطلعو من الوزارة طيب ما انتو طلعتو منها  بالفعل اهه ايه اللى فرق بقى؟..  نفس منطق الناس اللى هاجمتنى لما اشتكيت الدكتور يابنى هتضر نفسك وتشيل مادة وتودي نفسك في داهية طيب ما كدة كدة هيجيلي يوم اخرج من الكلية ليه بتفترضو ان ربنا مش موجود وانو مسير الكون ده بلا وصب ولا نصب يعني بنفتكره بس في المصايب او نتظاهر اننا بنحمده قدام الناس لما تجيلنا حاجة حلوة.

الدول الاوربية كل يوم حقوق الانسان والحرية ..  طيب ازاي بقى بتطاردوا المحجبات والمنتقبات كل يوم في بلادكو ومضيقين عليهم ... لو انتو ناس ملايكة كدة ليه ساكتين على اسرائيل واللى بتعملو في البشر اللى هناك وليه شايفين ان البغاء والدعارة حرية بس النقاب مش حرية ؟..  تلك اذا قسمة ضيزى

كفاية شيزوفرينيا وتناقض بقى ابوس ايدكو انا مبقتش استحمل وبجد الانتحار لمن هو في حالتى مش حرام انا مش متوافق مع العيشة بالشكل ده وحاولت اكتر من مرة اكون عادي زي اللى بينصحوني مبعرفش مش عشان انا صالح او تقي انا فيا كل الخصال السيئة اللى موجودة في اي حد ولكن فعلا مبقدرش والله حاولت ومبقدرش كمان انا مأنكرتش ان الكون ده ليه خالق ليس له شريك في ادارة ملكه كيف يشاء وانه لا يخضع لقوانينه وانا عرفت ده عن طريق رسل مؤيدين بمعجزات انا لو انتحرت مش هيبقى كفر ولا اعتراض على قدر الله ولا ضعف في الابتلاء  ولا هروب بس فعلا انا حاسس انى مش متفق مع العيشة بالشكل ده .. هو الشاب الاوروبي خريج الهندسة اللى عندو 23 سنة زيي كدة عايش زيي .. لا طبعا
اكيد عمل علاقات جنسية لما شبع وشغال دلوقتى في شركة محترمة وشغال في مجال تخصصه ميبقاش مهندس ميكانيكا ويشتغل في صيدلية بعد الضهر ومحدش هناك بيطالبو يبقى كدة عشان اكل العيش وطاطي ومشي امورك عشان تعرف تعيش ... ودي تبقى عيشة ؟..

على النقيض مواطن حالته مزرية مشحون جنسيا من سن 16 سنة يعني بقالو 9 سنين مش عارف يعمل ايه في نفسه جعان بقالى 9 سنين وبيصوم وبيغض البصر ومبيحور مع بنات ولما فكر يمشي بما يرضى الله ويخش الابواب من بيتها الموضوع ازداد سوء ... لما حب يعمل مشروع التخرج اللى نفسه  فيه محدش شجعه ولا عرف اصلا يطبقه بالشكل المطلوب هوا قرب من المطلوب بس ده مش المطلوب يتعمل... دايما كلمة مشي نفسك وخلص امورك بتتقال في اي حاجة .. الدكتور شايف انو من حقه انو يهاجمني ويشتمني ويقلل من معنوياتى وثقتى في نفسي ولكن لما المشروع يخلص واثبتله العكس ولا كأن اي حاجة حصلت .. ولا كلف نفسه يعتذر ولا يشجع الطالب الحمار اللى كان شايف انو ميقدرش يعلمل المشروع ده .. وزمايله اللى في المشروع اللى شايفين ان مفيش فرق جوهري بين الروبوت وعلبة الحلاوة .. اي حاجة وخلاص طلاما في الاخر هنجيب امتياز هتفرق ايه .. وتريقة الاهل والاقارب انت عملت ايه ؟..  روبوت ؟.. يا عم اتلهي وانت شايل مادة كدة شايل مادة وعايز تعمل روبوت ... ازاي متجيبش امتياز في دفعة 60 طالب مش عارف تتفوق عليهم ازاي ... انت فاكر عشان خطبت يبقى كبرت بقى؟..  وبقيت راجل انت مين عشان تقول رأيك في حاجة .. لازم تبقى تقليدي تبقى عادي ... ازاي عامل شيخ ومش مربي دقنك ؟.. يا عم انا مش شيخ ولا درست ما درسه الشيوخ هو عشان مش بسمع تامر ومش برفع الياقة في التي شيرت ومش بروح جيم ومبشربش سجاير ولا شيشة ولا جربت البانجو ولا الحشيش ولا الخمرة ولا رحت على الكورنيش قعدت مع بنت حسست عليها يبقى كدة انا كائن فضائي ؟..  عشان بقرى الجرنان وكام كتاب يبقى خلاص بقيت شاذ عنكم ؟.. لذلك مش حرام الانتحار للى زي .. مش حرام 

اه هناك من هم اكثر ابتلاء مني وانا عارف كويس ومدرك حجم النعم اللى ربنا مديهالي وانا لما انتحر مش هبقى برفضها.

انا كل مطالبي واحدة تكون فاهمانى اقضي معاها عمري تحبني وتخاف عليا مش عايز اخد 50 الف جنيه في الشهر انا عايز اعيش حياة كريمة مش عايز اكل كل يوم شيكولاتة جلاكسي يعني .. بس ليه بتربطو التعب والقرف في الحياة بان ده الصح وده الطريق الى الجنة ؟.. اكيد اكيد اكيد ربنا مش جايبنا الدنيا عشان يتعبنا اكيد مش مخليني مصري وعربي ومسلم وذكر ومهندس واسمي عبدالله بالصدفة ..هو ليه حكمة في كدة ازاي .. انا مش حر نفسي انا مقدرش اتحرك خطوة دلوقتى برة الاطار لازم ادور على شغل اي شغل يجيب فلوس لان ده المنتظر امال هتجوز ازاي ؟.. وليه لازم اتجوز ؟.. عشان مينفعش اقول لوحدة بحبك من غير جواز .. حرام حرام حرام .. مينفعش نخرج نتفسح نضحك نهزر نجري .. حرام حرام حرام .. يعني ايه بتحب ؟.. انت عيل خيخة ولا ايه؟..  حب ايه يابني بكرة تكبر وتعرف ان كل الكلام ده كان هبل لازم عشان تمارس الجنس تدفع 100 الف جنيه عشان تمارس الجنس لازم الجهاز بالنص ولازم الشبكة تكون عدد معين من الجرامات ولا زم المؤخر يبقى 50 الف 100 الف والحق عشان المؤخر هيغلى .. الفرح في مصر في اكبر فندق .. ولازم يبقى فيه اوبن بوفيه  عشان الناس تاكل ويعرفو الافراح بتتعمل ازاي .. انا لازم البس بدلة سودة والعروسة لازم تلبس ابيض لازم نشغل اغاني وارقص سلو قدام الناس ولازم العروسة تلف وترمي الورد .. ليه؟..   متسألش هو كدة  .. مين اللى عمل طب النظام ده؟..  انت مالك انت عايز تبقى غير الناس انت مجنون يلا .. انت ليه مفترض انك صح واحنا اللى غلط ؟.. انت صغير احنا عارفين مصلحتك ... لازم تروح لخطيبتك عشان هما جولنا.. لازم تاخد حاجة وانت رايح.. لازم تلبس كويس.. ايه اللى انت لابسه ده .. لازم تحط بارافان.. لازم تلبس ساعة ايه الموبايل اللى انت شايله ده يا معفن ..انت مش عايش في الدنيا ولا ايه؟..    يا عم مش ده بيقول ألو برضو؟..    طيب يا جدو ماشي يا عم الحكيم؟

رفعت الجلسة ... الانتحار مش حرام للى زيي .. اخيرا لقيت هدف ... الحمدلله لقيت هدف .. ايه احسن واسرع طريقة للانتحار تكون سريعة وغير مؤلمة ومتخليش شكلي وحش وانا ميت .. لازم يبقى شكلك حلو وانت ميت ؟.. اه لازم .. انت عاجبك خالد سعيد ؟.. اهو ركب دماغه ومات مشوه اهه .. عايز تبقى كدة ؟.. هه ؟؟

لمهندس جّي لمهندس جّي .. يا مصر لمهندس جيّ

بسم الله الرحمن الرحيم

خلصت كلية الحمد لله ... شاب مقبل على اتمام ال23 خلال بضعة شهور ومفيش حاجة اتغيرت خلال 5 سنين فاتوا ، متهيألي صرت أقوى من برة وأضعف كتير من جوة لسة ساذج زي ما انا مش عارف اسيطر على مجريات الأمور

غيرت فيا ايه الهندسة ؟ ... كتير

متهيألي رأيي مش هيبقى محايد لأني مقتنع مسبقا ان الوسط والمهنة بيغيروا الإنسان لصالحها .. يعني شوف كدة كل الأطباء ليهم نمط عام وكذلك ميكانيكية السيارات وبياعين الكشري ودكاترة الاسنان ... كلهم ليهم نمط عام من التفكير ومن التجارب تحس ان اصحاب المهنة الواحدة بتربطهم علاقة نوعا ما طبعا في اختلافات لكن عشان اقرب كلامى حتى بصمات الأصابع اللى بتختلف بين التوائم ومنذ بدئ الخليقة لحد دلقوتى متكررتش ولكن ليها نمط برضو... لما تبقى مهندس هتبدأ تتسائل ليه بنقول للفرد يا بني آدم بالرغم من ان الكلمة لنداء الجمع لا والاغرب ان في ناس بتقول يا بني آدمة :)

المهم .. الهندسة من اول يوم بتعتمد في تعليمها على حاجتين
1- تحاول تخليك ملم بكل فروع العلوم التطبيقية قدر الإمكان
2- بتعلمك ان اي حاجة في الحياة ما هي الا مشكلة والمهندسين ما هم الا حلالين مشاكل بطريقة علمية

اللي يفاجئك في اول الأمر ان في قديم الزمان مكنش في حاجة بمعنى المهندس زي دلوقتى يعني مع الوقت ومع توسع افاق المعرفة المهندس عمال يتخصص اكتر واكتر زمان كان العلماء يبانو موسوعيين أكتر وده لان مساحة الاكتشافات كانت ضيقة فعشان الواحد يرضى شغفه وفضوله كان لازم يطرق ابواب العلوم الاخرى

الحاجة التانية ان العلوم الهندسية في الاصل لم تكتشف على ايدي مهندسين يعني بعكس الطب مثلا او الفيزياء او الزراعة او علم الحيوان الخ الخ لازم في اي فرع من العلوم دي يكون المكتشف الاول بيكون ابن هذا العلم وبيكون كمان عالم على درجة كبيرة من العلم انما الهندسة لا مش كدة الهندسة زي ما قلت في الاول بتحاول تخضع العلم للظروف التطبيقية واللى متعرفش تطبقه نظرية بتعمل فيه العكس بتقعد تحاول تحط التجارب العملية في صيغة نظرية ومنها بيستنتج قانون نظري يعني مثلا الفرد العادي يستعجب من ان اللى اكتشف الخرسانة المسلحة هوا واحد جنايني كان بيحاول يلاقى حل عشان يعمي قصيص الزرع من اختراق الجذور له وتكسيره انما المهندس مبيندهش هوا بيتقبل الواقع مهما كان وبيحاول يطور فيه ويحاول يحط باترن او منظومة نظرية عشان اللى بعده يمشي عليها .

انا مقتنع بدرجة كبيرة ان اساس العلوم هوا ربنا لاننا في الواقع كبشر محدش فينا يملك القدرة المطلقة على الابتكار او خلينا نقول الابداع سيبك من الكلام المتداول الابداع في حد ذاته هوا خلق شئ بدون مثال سابق
ولذلك ربنا جل وعلا اظهر لنا اسمه (البديع ) لان ربنا سبحانه وتعالى خلق كل شئ ظاهر لنا بدون مثال سابق وفوق كل ده الله يمتلك القدرة المطلقة مثال دايما كان بيتقال ليا لما كنت في اعدادي مدرسة اننا عارفين ان المية اكسجين وهيدروجين بس مبنقدرش نعملها عمليا مبنقدرش نعمل خلية حيوية بالرغم من اننا عارفين دلوقتى مكوناتها الكاملة ... مع الوقت ومع الفتوحات الربانية اللى بيخرجها في وقت معلوم الانسان بينسى وفي لحظات جهل بيتصور انو هوا اللى اكتشف وهوا اللى ابتكر خلينا نمسك مثلا 5 اختراعات شهيرة ومنقدرش نستغنى عنها : الكهرباء - الالكترونيات - الانترنت - ماكينات التصنيع - السيارات
دي اكتر علوم المعرفة اللى بنتصور ان عالمنا الحديث قايم بشكل كامل عليها وبنتصور لقصر نظرنا ان عالمنا دلوقتى ا كتر تطورا من العصور السابقة لكن حاول تصدق ان برضو العصور السابقة كان عندهم من الفتوحات الربناية لعلماء العصور دي انهم يعيشوا حياة سهلة ورغيدة يعني مش عاشن دلوقتى بتسافر في وقت اقل يبقى زمان كانوا بيعانوا لما بيسافروا في شهر .. ده غلط لانك بيتقيس عالمهم بمسطرتك انت .

الكهرباء ببساطة فيض من الشحنات بينطلق بين نقتطين اذا توافر فرق جهد مناسب لانتقال الشحنات دي بين النقطتين دول ... بدايات اكتشاف الكهرباء كان من البرق لحد هنا واربط اي حاجة هتيجي بعد كدة هترجع للبرق وده يتفرد بخلقه الله وحده لا شريك له ... بعض البشر بحثوا بصدق عن الموضوع ده فربنا فتح عليهم على مراحل متتابعة وبدأت التطورات لحد ما وصلنا للى احنا فيه وده اللى عايز أكد عليه الاكتشاف اساسا بيجي من الله مباشرة عن طريق العبد وما هو الا سبب او نافذة لامرار قدرة الله ممكن تيجي من الملاحظة الشديدة او العمل الدؤوب او الصدف ... يعني تفكير نيوتن في سقوط التفاحة مش ذكاء منه ولا حاجة هوا فعلا ممكن نقول كان حيران وبيتساءل عن طريقة تحرك الكون ده وليه القمر ده متعلق كدة وليه النجم ده رايح هناك ده تدبر في الكون وربنا الهمه وبدأ يحلل ويستنتج بالرغم انه على حد علمي مات كافر وكان عارف ان لازم يكون في اله يسير أمر الكون ده ولكن متبعش دين ربنا السائد المؤكد بالرسول والكتاب السماوي واللى اكيد وصل لمسامعه المهم ان ربنا فتح على نيوتن وتواصلت الكتشافات والاستنتاجات ولحد دلوقتى ماشيين على قوانين الحركة اللى تنسب اليه .. ممكن يكون تخليد اسمه في الدنيا كدة هوا ده اجره عند ربنا ولايظلم ربك احدا

الالكترونيات باختصار دراسة تصرف الالكترونات المحيطة بنواة الذرة باختلاف المواد وباختلاف النشاط الكهربائي اللى المواد دي معرضة ليها ... مع كتر التجارب و (( اللعب)) بدأ الانسان يكتشف خواص مذهلة للنواة واللاكترونات ويتحكم فيها وبالتوازي كان في تطور في العلوم التانية .. زي الرياضة والكهرباء وطرق التصنيع وده الغريب في الموضوع واللى يثبتلك ان التطور في الاساس جاي من عند ربنا ايه اللى يخلي العلم يتطور بطريقة تخدم بقية فروع العلوم التانية ؟ اكيد ربنا لاشك حبة حبة ظهرت دواير الترانزستور وهي ببساطة دوائر بسيطة بتختصر دواير تانية اكبر وده اللى بيأدي لصغر حجم الاجهزة كلما تطورت اللى اخترع التلفون كان واثق انو اكتشف مالم يأتي به اخرون والناس كانو مندهشين لهذا العجيب اللى بيقدر ينقل الصوت من مكان لمكان .. زي ما احنا مبهورين دلوقتى بالموبايلات ازاي صغيرة في حجم الكف ويمكن اصغر وبتبعت اشارات للفضاء وتروح للطرف التاني في ثاوني معدودة لا والحمد لله ان ربنا عامل لينا مستوى ادراك معين العقل مكنش هيتحمل يشوف كمية المسجات والرنات والاخبار المحزنة والاخبار المفروحة والافالام والصور والكليبات اللى بتنتقل كل ثانية في الفضاء تخيل ان عنينا بتشوف الجراثيم والميكروبات والذرات والالكترونات فعلا مستحيل هنعرف نعيش

طبعا مينفعش نهمل اختراع زي الانترنت بس ده معتمد في الاساس على الاكترونيات ومدى التطور اللى حصل للانترنت نسينا انه في الاساس معتمد على الالكترونيات والالكترونيات معتمدة على السليكون والسليكون خلق ربنا لا شريك له في صنعه

مكائن التصنيع في الاساس بتعتمد على ميكانيزمات الحركة وكمان كان لازم يبقى في تقدم في علم الماتيريال عشان نقدر نستخدم ماتيريال لهيا خواص عالية وبسعر رخيص مشكلة الماتريال الدائمة في الوفرة ومدى اتاحيتها مصر عندها رمل كتير روح الصحرا وحمل عربيات من هناك بس معندناش فحم مثلا وهكذا كل دولة عندها ماتريال وعايزة ماتريال ومن هنا بتبدأ المصالح او الصراعات على الثروات البترول ما أصبحش ليه قيمة الا لما اولا اخترعت محركات تعمل بمشتقات البترول ده وفي نفس الوقت على التوازي كانت بتتطور طرق الكشف عن البترول ومش بس كدة كان في ابحاث بتتم عشان كيفية الاستفادة من مخلفات البترول اللى دلوقتى زيوت وشحوم ليها نفس اهمية الوقود نفسه .... اللى مش وقته يتقال هنا بس عايزين نعرف ان الساعة فيها ميكانيزمات معقدة جدا انا بنبهر ازاي الساعة الصيني اللى بتجيبها ب20 جنيه دي فيها كمية الميكانيزمات العبقرية دي ببلاش كدة لعب الاطفال اللى بخمسة جنيه دي فها افكار رائعة هيا مش جديدة بس بتستغرب ايه اللى يجبرهم يحطوا الافكار دي في لعبة متكلفة في بلدها 50 قرش عشان تتباعلك ب 5 جنيه عشان المصنع ورغم ده كله المثنع كسبان والمورد كسابن والمستورد كسبان وبياع الجملة كسبان وبياع القطاعى كسبان والمستهلك برضو بيحس انو كسبان عشان جاب لعبة مبهرة بالسعر ده ... (( منظومة ))

السيارات .. متخيلين ان كل اللى في العربية ده معمول في الاساس عشان يحرك ميكانيزم بسيط اوي اوي الا وهو العجلة ... العجلة في حد ذاتها ميكانيزم لانها بتحول الحركة الدائرية لحركة خطية كل الافلام دي عشان نحرك العجلة والعجلة تدينا انتقال خطي .. المدهش ان العربية مليانة تناقضات ( قريبة الشبه بالبنى ادم اللى هوا خلق ربناى لا شريك له فيه ) حاجة بسيطة الاحتكاك اللى بنحاول بكل جهدنا ميحصلش بين اجزاء المحرك وبنقعد نحط زيت ونخلي اسطح اجزاء المحرك في اقصى درجات النعومة الممكنة بنبقى محتاجين كل الاحتكاك الممكن في الفرامل عشان نوقف العربية تناقض مش كدة !!

المبهر في الانسان مش في كمية الخلايا الهائلة ولا في المصانع الكيميائية اللى متوزعة على طول جسم الانسان ولا في ميكانيزمات الحركة (المعقدة) اللى في الانسان كل ده بلا نقاش مدهش لكن اللى يخليك تفتح بقك ويجيلك قشعريرة في اسفل ضهرك ان كل الاعجاز ده بادئ من نطفة نطفة يخرجها الرجل دون ادنى وعي لتلتقى ببويضة مقدرة مسبقا والانسان في لحطة التكاثر مبيبقاش مفكر في الحاجت دي خالص ربنا بهيأله الموضوع وكأنه ممتع ولكن للأسف بعض البشر بيصرفو النعمة دي في الحرام واحيانا بغرض العبث بس دي ضريبة الغيب لو قيسنا مدى تعاسة البشر لو انهم عارفين كل حاجة بتحصل بتعاستهم وهما حاسين بالجهل وانهم مش عارفين كل اللى بيحصل مش هنلاقى وجه للمقارنة اصلا ... سبحان الله بجد والحمد لله فعلا ولا اله الا الله فعلا ولا شريك له فعلا

المهم الهندسة حلوة اوي D: ... بس وحشة اوي

بدون عنوان

عن أنس رضي الله عنه قال : قال رسول الله صلى الله عليه وسلم : « لا يتمنين أحدكم الموت لضر أصابه ، فإن كان لا بد فاعلا فليقل : اللهم أحيني ما كانت الحياة خيرا لي وتوفني إذا كانت الوفاة خيرا لي » متفق عليه .

معلومة

أول معصية للمخلوقات كانت بسبب سوء اختيار للماتريال ... عشان كدة ربنا لعن الماتريال وخلاها صعبة

لُدِغْت

بسم الله الرحمن الرحيم

مِنَ المَعْرُوفِ أَنَّهُ لا يُلْدَغ المُؤْمِنُ مِنْ جُحْرٍ مِرَّتَيْن ...

فَكَيْفَ بِمَنْ لُدِغَ أَكْثَرَ مِن مَرَّة .. هَلْ أَصْبًحتُ ضَعِيْفَ الإيمَانِ .. سَامَحَكِ الله ...

دماغ الشباب

بسم الله الرحمن الرحيم

بخلاف حازم إمام .. راسي مليانة حاجات كتير ...

1- المشروع وسنينه وقرفه وبلادة عياله وطموحي اللى شكله مش هيتحقق زي ما كنت بحلم .. او يمكن ده نتيجة انى حلمت حلم غير منضبط وكأنه المفروض نفلتر احلامنا بفلاتر الواقعية .. طيب كدة يبقى ليه نسميها احلام من اصله وايه فايدة الاحلام اصلا ان كانت هتخضع في يوممن الايام لمعايير الواقعية ... عندما فكر الانسان في الطيران كان مجرد حلم مش بقول كدة عشان دلوقتى بقى في طيران وسهل جدا وتكنولوجية الطيران تقدمت ولكن نفسي كنت اعيش في عصر الاخوان رايت اايام ما كان في ناس اكيد بتشرب القهوة الصبح وبيقول لصاحبه طيران ايه ابن المهبولة ده
2- علاقى بإسلام ... مكنتش متخيل ان ده ممكن يحصل يوم من الايام ولكن الحياة جبلت على التغيير... كان ولا زال مصدر فخر كبير ليا

3- اللى حصل لمحمود لا اتمناه لأحد ابدا

4- تثبت أمي يوما بعد يوم انها ب 50000 راجل ولها قدرة تحمل فائقة عارف ان كل واحد شايف ان امه نموذج مثالى بس امى كائن بشري لن يتكرر ... طبعا في عيوب ولكن في نظري امى نجحت في تربيتنا رغم الصعوبات اللى في حياتها

5- لم اكتفي بمرافقة ابي

6-لم استطيع تغييرمستقبل العالم ورضيت بضآلتى ... عندما حاولت تغيير مستقبلى إنصدمت

7- سئمت كونى ساذجا ... دائما لا احسب تصرفاتى ... اتعامل بتلقائية بحتة ولا ادري لم يظن الناس انى ذكي ويعقدون عليّ الامال .. ليتهم يعلمون انها فطرة بحتة

الثالوث المفزع

بسم الله الرحمن الرحيم

ما هو الثالوث المفزع بالرغم من انكار الجميع لمدى فزاعته ؟

الحب ... الجنس ... الزواج

ايه هو الحب ... فعلا محدش قدر يديله تعريف دقيق لأن الحب ده في الاصل مشاعر وكل واحد بيوصف مشاعره بالطريقة اللى بيستخدم بيها المشاعر دي

مش عارف ليه في محيطنا الشرقى وعالمنا الرجولى بنظهر ملا نبطن في الموضوع ده ... دايما اللى بيحب ده يكون رمز للضعف او الغباء او قلة الحيلة ... دايما نحاول نظهر اننا مبنحبش حد ... محدش بينده لمراته او خطيبته ويقول يا حبيتبي قدام الناس لو بنته ماشي انما مراته .. لا عيب !!
يعني لو المسألة مرتبطة بالعرض والشرف مثلا لكان اولى انك متقولش لبنتك يا حبيبتي قدام الناس .. بس مش عارف احنا اتربينا على كدة ليه ... ليه لما نكلم حد قدام الناس نكلمه بلهجة رسمية نوعا ما نحاول حتى منجبش اسمها قدام الناس ولو جبناه نجيبه بطريقة عابرة او نقول الاسم وصوتنا محشور
كيف وصلنا من سيرة الرسول ان الرسول كان يداعب عائشة ويقول لها يا عائش .. ولا احنا نقتدي بالرسول في اللحية وتقصير الجلباب ولا نقتدي به في الحب الواضح اللي كان بيظهره لعائشة وقدام الناس كمان

الحب لا أعرف له تفاضيل او تعريف ... هو اشارة تأتى فجأة وتوقر في القلب لا تملك ابدا ان تصدها او تثبطها ... الشعور بالحب كشعورك بالغضب او الامتنان لا تملك ان ترد هما لحظة وقوعهما " والمفترض " الا يسخر منك احدهم لانك "سيس" وتشعربالغضب او بالامتنان .. بالطبع تستطيع ان تقى نفسك البرد ولكن لن تستطيع ابدا ان تقي نفسك الحب

انا افسر الحب "الحقيقي" على انه رحمة من رحمات الله التى وزعها بين عباده ... من رحمة الله ان يجعل نفسا تحبك وتشتاق اليك وتصفو ناحيتك ... عندما تحب فأنت لا تملك الا انت تحب ... انه شئ فطري .. شئ لا تعرف كيف تقوم به .. او فلنقل ان الحب من بديهيات الحياة البشرية ... تخيل انى سألتك كيف تبلع طعامك ... ستنظر لي بنظرة ساخرة وتستنكر سؤاالى من الاساس .. وان قلت لك كيف تحب من المفترض ان تنظر الى نفس النظرة ... ولكننا نتوهم اننا عالمون ببواطن الأمور ونلخص الحب في ابيات شعر او هدايا او او او

الحب هوا تواصل روحانى بين اثنين لا يريا في بعضهما عيوبا بدون اتفاق مسبق هي تحبه هكذا بسمنته وشعره المجعد وملابسه الرثة .. هو يحبها بشعرها الخشن ولونها الاسمر الملفوح وجلبابها الفضفاض وعيالها المتعلقين بطرف جلبابها .. تسألهم يعترضون واحيانا يسبون تلك الصدف التى جمعتهم ولكن اسألهم وانظر في عيونهم هذه المرة هل تستطيع ان تستغنى عنه / عنها ؟ احصل على اجابتك من العنين لا من الاذنين وستعرف ما اقصد

الحب له وسائل شتى مرئية وسمعية ووجدانية كأي نشاط تفاعلى انساني ينتقل عبر قنوات الانسان الظاهرة وهي الحواس الخمس... والباطنة وهي طاقته الروحية ... لن يستطيع اي احد ان يفسر لك لماذا يحبها ولن تفسر لك لماذا تحبه
قد يقول لك احبها لرشاقتها وبياض لونها او لوسع عينيها قد يقول لك احب ضحكتها احب طريقة قولها لكلمة معينة .. اذا قال لك ذلك فقل له ان هناك من هي اكثر منها بياضا وظرفا ورشاقة وجمالا ... احصل على الاجابة من ما تراه لامن ما تسمعه

تدعي انها لا تحبه وتظهر للناس بشتى الطرق انها اكتفت منه وانها لا تطيق حتى سيرته ... ولكن اخبرها انه صدمته سيارة وهو يعبر الطريق .. واحصل على اجابتك مما تراه لا ما تسمعه

الحب لا يفسر ... لا تحاول تفسير الحب .. لم ولن يفسراحدهم الحب

-----------------------------

الجنس تلك الكلمة التى يقشعر لها الابدان بمجرد كتابتها او سماعها حتى اصبح الحديث عنها او مجرد وصف لأي طرف من اطراف هذه العملية يعد ضربا من ضروب المستحيل ... لا بد ان يناقش الجنس في مجتمعنا في قاعات مغلقة او كتب مصنفة او افلام للكبار فقط ... الجنس هو التعبير الجسدي لما سبق الا وهو الحب ... الحب الذى لم نجد له تفسيرا كذلك الجنس ... لابد ان نفرق بين كلمة جنس وبين الممارسة الجنسية ... لابد ان نفصل بين الممارسة الميكانيكية للجنس وبين الجنس كتعبير جسدي للعاطفة

لماذا نقيم الدنيا ونقعدها اذا طرحت فكرة تعليم التلاميذ الثقافة الجنسية في المدارس ... اننا بتكتمنا عن هذا الموضوع نظهر اننا نكره الجنس او انه غير مهم في حياتنا .. قل لى اذا لم انتشرت تلك الكمية الرهيبة من القنوات والكليبات والافلام والروايات الجنسية ... لماذا تعتمد اغلب الاعلانات على التوجه الجنسي لايصال الرسالة ... لاننا لم نكتشف الجانب الجنسي من حياتنا لذلك نفسح المجال لأي معلومة قادمة بخصوص هذا الموضوع ... لو أن التحدث عن الجنس عيبا لما اورده الله في كتابه العزيز عندما قال (( فأتو حرثكم أنى شئتم )) ... لماذا اورد الله تعالى تفاصيل قصة سيدنا يوسف عليه السلا م امرأة العزيز بذلك التفصيل ذو الدلالة .. ألم يكن حريا ان يقول الله انها اغوته فامتنع ... ولكن الله فصل الموضوع ومهد له لحكمة لا يعلمها الا الله ومن فتح عليه الله بتفسير هذه الايات ... لمذا اذن قال لنا الله انها غلقت الابواب وقالت هيت لك ...

اذن المناقشة في الجنس ليست عيبا او حراما ولا يصح ان تلحق بتلك الهالة من التكتم والسرية .. لمذا لا يأخذ الاطفال بعض المعلومات الاساسية عن الحياة الجنسية وعن اعضائهم الجنسية منذ مراحل عمرية معينة وبالتدريج وفق اساليب وطرق التربية المختلفة ... اليس عيبا الا يعرف شاب تخطى ال18 من العمر ان المرأة لها جهاز جنسي مختلف كثيرا عنه ... بل ان بعضهم لا يعرف الاقليل القيل عن جهاز المرأة التناسلى وفق ما عثر عليه من افلام اباحية التي تضر كثيرا اكثر مما تنفع ... الا ينبغى توعية الشباب من الجنسين بمدى تناسق ومناسبة اعضائهم الجنسية للاخر .. لماذا اذن يغض الاباء الطرف عن ممارسات الابناء السرية .. هل هذا حقا ما نريده .. ان نسمح لابنائنا بالعيش في عالم مواز لعالمهم الواقعى .. هل نريد ان نصيبهم بانفصام مبكر للشخصية ... فلا نعتب اذا على الشعب الذي يسب حاكمه في السراديب ويهتف بإسمه في الاروقة ... الن ينطوي على تلك المعرفة احترام الجنسين للاخر .. او بالاحرى لجسد الاخر .. بدلا من ان اصبح اغلب تفكير الشباب ان جسد المرأة هو ستر لابد من هتكه وواد لابد من شقه بكل قوة وخشونة وإلا تكون رجلا ناقصا ... الا تعتبر البنت نفسها مغلوبة على امرها وان عاجلا او اجلا سيأتى من يقسمها لنصفين وعليها ان تحتسب تلك المعاناة عند الله وتتحسر لماذا لم يخلقها الله رجلا حتلا لتتعرض لهذا الهوان المنتظر ؟؟!
كل تشبيهاتنا وكلامنا وامثالنا العشبية المتعلقة بالجنس تحض الرجل على ان يستمد رجولته من عنفه وتحض المرأة ان تستمد انوثتها من ضعفها ... الرجل والمرأة انسان ... انسان انقسم لنصفين فأصبح نصف خشن واخر ناعم نصف شديد ونصف رقيق ... لن يستقيم عالم برجال دون نساء ولا نساء دون رجال .. خلق الله ادم ونفخ فيه من روحه وخلق حواء من ادم ... ليدلنا ان وجود احدهما ملازم ومكمل لوجود الاخر .... وبقدر متساوي

--------------
الزواج اتفاق بين اثنين على ان يعيشوا حياة متكاملة ... وثيقة هذا الاتفاق شروطها وبنودها الحب وخاتمها وامضائها الجنس
زواج بلا حب هو زواج بلا قواعد ... زواج بلا جنس هو شيك بلا مبلغ
الزواج الناجح شراكة متساوية بين الرجل والمرأة الاول يعرض قدراته على انجاح العلاقة لانه هو الممول لهذه الشراكة
المرأ تعرض قدراتها وتؤكد على حسن استغلال هذه الموارد الرجل يعرف جيد ان لم يخلق لتربية الاولاد او العناية ببيت والا لما اختص الله المرأة بالحمل والولادة واختص الرجل بخصائص تساعده على جلب الموارد المختلفة لتستغلها المرأة

الزواج الناجح .. هوا القائم على شرطين اساسيين ... مودة ورحمة ... وأليس الحب والجنس هما هذه المودة وتلك الرحمة ...

22

بسم الله الرحمن الرحيم

كل سنة كنت بنسى يوم ميلادي ... مكنش في داعى انى افتكره اصلا ولا كان حد بيفكرنى بيه والموضوع لا يمثل لي اي اهمية فعلا اه وانا صغير ماما كانت بتعمل عيد ميلاد وتورتة وبتاع ومش عارف ايه ولكن ده وانا صغير بقى لما كبرت 1/11 مبقاش ليه اي تأثير

امبارح بقى افتكرت يوم ميلادي قبل ما يجي مش عشان صحيت لنفسي فجأة بس عشان انا كنت عارف ان هناك من سيذكرنى به وفعلا جت الساعة 12 من هنا 12 ودقيقة كانت مبعوتة رسالة جميلة اوي ... رسالة صادقة وطالعة من قلب اللى باعتها
ودي مشكلة كبيرة لانى مش عارف اعمل ايه عشان ارد على المسج دي ربنا يخليلي اللى بحبهم ويفضلوا يحبونى على طول
------------------------------
السنة دي هيبقى فيها اكتر ضغط عصبي ممكن اكون جربته في اي سنة قبلها
يعني اخر سنة بقى وفيها تحول مفاجئ لتحول المسئولية .. الواحد كان كل مرحلة بيزيد احتماله بالمسئولية ولكن كان كله بيتم في اطار الدراسة يعني نقطة التحول بتاعت ثانوي مثلا كان كل الضغط مرتكز على انك المسئول عن مستقبلك وبتاع بس في الاخر انتقلت من طالب ثانوي لطالب جامعة دلوقتى لما اخلص ( ان شاء الله ) هبقى انتقلت من طالب جامعة لراجل عنده 23 سنة يحمل لقب مهندس ودي بروبلم تانية لانى كدة لازم اروح اتقدم بس طبعا في مشكلة تانية مترتبة على انى مهندس الا وهي انى لازم ادور على شغل الاول عشان لما اروح اتقدم ابقى على الاقل معايا مصروف خاص ليا بس الشغل مش بالساهل اول حاجة لازم اقدم ضريبة الدم لبلدى واخش جيشها العقيم اللى تحس انهم بيدخلوك الجيش عشان تدفع تمن جنسيتك المصرية .... ما علينا

بديهيا لازم الواحد يركز على الدراسة في اخر سنة دي بس المشكلة ان اللود بيبقى كبير اوي في اخر سنة دي الدكاترة مبترحمش وانت اي حاجة مبتفهمهاش بتحس بالعجز لانك المفروض دي اخر سنة ليك وبعدها تخرج لسوق العمل ذاك المصير المجهول فمينفعش يبقى في حاجة الواحد مش عارفها .... في كورسات كتير لازم الواحد ياخدها كمان ده غير حمل المشروع الرهييييييب اللى على الواحد انا قايم نايم بفكر في المشروع ده خصوصا انى داخل مشروع مجهول وبدور فيه من A to Z وفي ناس في المشروع مش متحمسة ومش بتتحرك بالشكل المطلوب وناس تانية محمسانى والله وبتشتغل بجد ضغط رهيب اوي حكاية المشروع دي المفرضو يعملوا سنة كاملة للمشروع ده وتكون فاضية او يخلونا نعمله على سنتين تالتة ورابعة ... كل يوم مطلوب شيتات وبرزنتيشنات وتقارير الخ الخ والمفروض في حاجات عايز ازاكرها خارج دراستى يعني حاجات قديمة عايز ازاكرها ... ما علينا تاني

... وفيما يختص بسوق العمل الواحد بقى يقعد يسمع عن الحقد الطبقى والازلى بين العمال والمهندسين والنصب والسرقة اللى بتحصل للمهندسين من اصحاب العمل خصوصا المهندسين حديثي التخرج بيستغلوا ظروفو انو عايز يشتغل ومتحمس وبتاع فيقطموا وسطه في المرتب ويدولو فتافيت وهوا يستحق اكتر من كدة كمان الواحد برضو بيبقى باصص للمهندسين اللى شغالين ب8 و 10 الاف جنيه في الشهر واصلا الناس في البلد باصة ان المهندس ده بياخد على قلبه قد كدة وصاحب العمل مستنى المهندس يحل له كل مشاكله او منتظر انو يحل كل المشاكل باقل عدد من المهندسين وبكدة ممكن يتحط عليا ليل نهار لانى شغال شغل اتنين
كمان الواحد يبدأ يدور على شغل ازاي (دي الفكرة) يعني جرايد وبتاع ولا انزل اقعد الف على المصانع والشركات كمان انا لحد دلوقتى مش عارف اشتغل في ايه ومش عارف انا اصلا حلو في ايه عشان اشتغل فيه او انا وحش في ايه عشان مشتغلش فيه طيب ايه خطتى بعد 10 سنين عايز ابقى ايه كمان 10 سنين

طيب لو دخلت الجيش ودخلت ظابط اعمل ايه اتجوز خلال فترة الجيش طيب انا ازاي هقبل وضعى لما اشوف اصحابي اشتغلوا وانا قاعد محلك سر في الجيش ... طيب ازاي اتجوز اصلا وانا في الجيش انا اول سنة جواز دي عايزها اجازة اصلا

طيب بالنسبالى الدنيا مش مزاكرة وشغل وبس ... في جزء منها عشان انمى عقلى بالقراية الثقافة وجزء احافظ بيه على جسمي بالتمارين وجزءاحافظ فيه على روحي بالقران والمتابعة مع الشيخ بتاعى وجزء مختص بممارسة الهوايات حاجة تخنق
اجيب منين وقت اقرى فيه ووقت اروح فيه الجيم ووقت امارس هواية الخط العربي ووقت اتفرج في على التلفزيون ووقت احفظ فيه قران واتابع مع شيخي ... والمواصلات بتضيع وقت كبير اوي من يومي ممكن تضيعلي 4 ساعات و6ساعات نوم كدة اتبقى 14ساعة ساعة للصلوات الخمس اتبقى 13 محاضرات والذى منه يبقى اتبقى 6ساعات المفروض مش هاكل ولا هخش الحمام هل 6 ساعات كفاية انى اوزعهم على الثقافة الورياضة والقران والخط اللى مش عارف اتعلمه لحد دلوقتى

بس انا واثق في ربنا ودايما ربنا كان بيسهل الحال وكان بيرضيني في الاخر وانا مش هاجى دلوقتى وافقد الثقة فيه ده والعياذ بالله كفر وسوء ادب مع الخالق ... ربنا بس يسهل لى الحال وييسر السنة دي عليا ياااارب

عارف موضوع غير مناسب لواحد بيعلن عن يوم ميلاده بس بنفس عن نفسي شوية

سلام

سيداتى آنستى

بسم الله الرحمن الرحيم 

تجربة غير ممتعة دائما .... لماذا نشعر ان السيدات متفقات في الطباع ولا يوجد هذا التنوع الكبير الموجود في طباع الرجال .... لماذا كل المشاكل سببها دائما المرأة ... فعلا chercher la femme

يسرق الرجل ويختلس لان زوجته لا يعجبها الحال
... يتزوج الرجل من اخرى املا في الاستقرار الذى لم يجده عند الأولى فلا تغفر له الأولى ولا تجامله الأخرىأ يضا .. إنما عندما يتعرض للخيانة يقتل الرجل الذى خانه ويتردد كثيرا عند قتل من خانته وصفحات الحوادث خير دليل

حقا كائنات معقدة التركيب ...  وليذهب المنطق والتفكير المتسلسل الى الجحيم ... السيدات كائنات معقدة اذا كان رسول الله صلى الله عليه وسلم بكل مشاغله واعباء دعوته وقع في مشاكل من نسائه امهات المؤمنين خير البشر مع خير نساء الارض فكيف بنا نحن

:( :( بالتأكيد لم يكن هذا الغرض من خلق حواء لآدم ... وبالتأكيد عدم خلق المرأة مع ادم مباشرة له ايضا حكمة ... وبالقطع هناك معنى كبير لخلق ادم من طين وخلق حواء من ادم

ظننت انى لن اذوق من هذا الكأس ...كم كنت غبيا ... كل النساء سواء وكل الرجال سواء .. نعم التعميم يفيد احيانا

حبة تفكير

بسم الله الرحمن الرحيم

عادة لما باجي بحل مشاكلى بلخصها الاول بعدين بحطها في مجموعات تبعا للاولوية وساعات المشاكل اللى في الاولوية بتبقى لناس عزاز عليا وبهتم بهمهم وممكن مشكلة تحصل لحد عزيز عليا تفضل شاغلة تفكيرى كذا يوم وبحاول اشوفلها حل وده بيعمل عليا لوود جامد اوي

الفترة الاخيرة حاسس ان اللود ده زاد اوي وبقيت ضعيف شوية وحساس تجاه المشاكل واقل موقف يأثر فيا ... المهم :

1- علاقتى الروحية

انا من ضمن الناس اللى بتؤمن بالروح وبهالة الطاقة يعني مؤمن ان مش كل حاجة تنفع تتفسر علميا وان الادراك العقلى والتفسير المنطقى البحت عمره ما هيأدي دايما لنتايج اكيدة ... انا من انصار الاستنتاج المنطقى والتدليل الموضوعى ولكن مش في كل حاجة لان في حاجات كتير العقل بيعجز فيها ومبيقدرش يستوعبها .... انا ماشي في حاجات كتير بالاحساس وفي اغلب الاحيان احساسي بيصدق معايا ... ولكن حسيت ان هالتى ضعفت شوية او خلينا نقول انى بقيت اشك في استخدامها فزي ماتقولو كدة زعلت منى انا مش قادر افسر اوي بس ده اقرب حاجة للى عايز اقوله

2-علاقتى الاجتماعية

فجأة وبدون مقدمات بدأت ألاحظ إن الناس بتتغير فجأة وبقيت اكتشف حاجات مكنتش شايفها قبل كدة يمكن كمان عشان كنت واثق من نفسي اوي فلما حصلتلى انتكاسات يمكن سابت صدمة ويمكن ده سبب القرف اللى انا فيه ده دلوقتى ... كنت بقول اي حاجة لاي حد ... باخد على الناس بسرعة ... واهم عيب كنت بتوقع ان الناس تعاملنى زي معاملتى ليهم ... وده عمره ما هيحصل ... انا مقسم معارفى ل 3 اقسام مجموعة A و B و C مجموعة ال A هم خاصة الخاصة ودول مستعد (( حرفيا )) انى اقدم روحي عشانهم وعادي جدا لو جيت على نفسي عشان خاطرهم وازعل لو زعلوا مني وافرح لو قالولى انهم بيحبونى ...
على مر سنين عمرى كان فيه تقريبا 3 او 4 في دائرة ال A دي بس كلهم نزلوا للقوايم اللى تحتها عشان ظروف ما وتقريبا متبقاش غير 1 بس هوا اللى باقى ... والله اعلم هيحصل ايه فيا لو الشخص ده سبب لى صدمة ... نقدر نسمي مجمعة ال A دي اختصارا ل ANTEEM او الأخلاء .. النوع ده المفروض يستحمل غلاستى وتقلباتى المزاجية المستمرة والمفروض انى ازعل منهم وميزعلوش منى ... اه هوا انا كدة .... ومن وجهة نظري البحتة النوع ده اللي كان موجود بين الرسول صلى الله عليه وسلم وبين سيدنا ابو بكر .. عشان كدة اعتقد ان القايمة دي المفروض متزدش عن 2 اصحاب على الاكثر

المجموعة B هما الناس اللى كانوا يوم من الايام في المجموعة A او ناس عرفتهم بعد كدة وبقدرهم اوي واحبهم ولكن لسة مش قادر اديهم الثقة انهم يبقوا في المجموعة A وهما في نفس الوقت الناس اللى في المجموعة دي ناس حصلت منهم حاجات خلتنى اقتنع مش هيا دي نوع الصحوبية اللى عايزها واللى لازم تبقى بيني وبينهم بس الناس دول لسة فيهم خير ومينفعش اخسرهم واضحى عشانهم برضو ولكن المفروض مزعلش بقى لما ميعاملونيش بالمثل وال B اختصارا ل BUDDY دول اصحاب يعني لهم عليا حق النصيحة والمفروض يستحملوا غلاستى شوية ... وانا برضو المفروض مزعلش منهم اول ما يحصل حاجة وده اللي مش عارف اتحكم في انفعالاتى فيه ولكن بتدرب على كدة

المجموعة C اختصارا ل Companion ودول جملة المعارف اللى انا عارفهم وميستاهلوش انى اضحى عشانهم ولا حتى اخاف عليهم

المجاميع اللى فاتت دي تنتقل من اكثر استقرارا الى اقل استقرارا كلما اتجهنا هبوطا بالحرف يعني المجموعة A اكثر استقرارا من B وهكذا يعني انا فين وفين على ما احط واحد في A او اشيل منها واحد ... انما المجموعة C مثلا تشمل اي حد انا شفته وعرفت اسمه عشان كدة فيها تقلبات كتيرة اوي وكل مجموعة تعتبر فلتر للمجموعة اللى قبلها
-------------------

الحمد لله

بسم الله الرحمن الرحيم

الحمد لله : انى انسان .... مش متخيل نفسي زارفة او اسد او فرس النهر او حتى شجرة اوصخرة في جبل من الاخر ده اكيد احسن حاجة ربنا مقدرها ليا ... كمان مين اللى يتخيل ان كل الشعر والجلد والهرمونات والعنين والافلام دي كلها بادئة من حيوان منوي وبويضة حاجة يعني مينفعش غير تقول سبحان الله وفي الاخر يقلك اللى خلق الكون قوى الطبيعة .. او مصادفة !!!!
الحمد لله : انى انسان عاقل ... ما هو لو مجنون اه كانت هتسقط عنى التكاليف الشرعية والاعراف الاجتماعية وخلافه ومش عارف ساعتها كنت هبقى عارف الفرق بين العقل والجنون ولا لا ... يعني ايه اللى يمنع ان المجنون يفتكر نفسه ان هوا اللى عاقل؟ ... ضريبة الجنون انى مبختبرش متع الحياة ... وضريبة العقل انى مكلف بالتمتع في حدود... يعني مفيش حرية كاملة ابدا ... ولذلك الطغيان في اي حد من حدود المتعة هو تعريف مبسط للجنون .. ولا ايه ؟

الحمد لله : انى انسان وعاقل ومسلم ... كبداية الحمد لله انى اتولدت لأبوين مسلمين فطلعت مسلم ودي نعمة لوحدها من ربنا تفوق كل النعم على الاقل كدة هبدأ من الصفر عشان اخش الجنة او خلينا نقول لو عشتها صح فرصى في دخول الجنة افضل من ذاك الذى يسب الله او الذى يدعى ان الهه ذو ثلاث حالات او الذى يدعى ان الهه جمرة من نار او ريح هواء او شجرة في غابة او ذالك التمثال النائم او صور معلقة في مكان ما يشعل تحتها اعداد لا نهائية من اعواد البخور .... على الله الواحد بس يعمل بدينه ... اكيد ده احسن من انى ابدأ من تحت الصفر او دماغى تتملى بترهات كثيرة عن اولئك المسلمون الكفرة الذين لا يحبهم جيسوس كمان محدش كان عارف ربنا كان هيهديني ولا هموت كافر الفكرة دي بتخليني اقشعر اصلا
الحمد لله : انى انسان عاقل مسلم عربي : يعني انا حاسس انى مميز شوية انى انسان عربي يعني على الاقل لغتى مميزة مش اي حد يقدر يتكلمها ...ممكن اتكلم براحتى قدام الاجانب :) ... ممكن اتعلم اي لغة تانية بسهولة لان كل مخارج الحروف اللى في اللغات التانية عندى وانا زايد عليهم بحرف الضاد ... كمان لو كنت انسان عاقل ميلم اجنبي مكنتش هستمتع بالقران زي ما انا بعمل دلوقتى ده ناهيك عن الشعر والادب العربي اللى محدش يقدر يستمتع بيهم الا واحد بيتكلم اللغة دي من صغره
الحمد لله : انى انسان عاقل مسلم عربي مصري : انا مش متخيل نفسي اردنى بصراحة ومش هضحك عليك واقلك كان نفسي ابقى يمني ... اه لو كنت لبنانى مكنتش هقول لا ... اللبنانيين عموما ناس نضاف من برة ومن جوة ويطغى عليهم حب الثقافة سواء مقروءة مسموعة مرئية ... غير كدة معتقدش انى كنت هفضل اكون غير مصري يعني انا بنتمى لدولة ليها شعبية طاغية في محيطها الاقليمي ولغتها وثقافتها غزت كل البلاد اللى حواليها .... تمتلك تاريخ طويل ومؤثر في فترة من فترات التاريخ مصر كان لازم تخش كتب التاريخ ... ارجوك متخلينيش اقول ان مصر ذكرت 14 مرة في القران والكلام ده ... ولكن فعلا مكنش ربنا خصها بالرسلات دي كلها من فراغ يعني يعني من اول ادم لحد سيدنا عيسى ومصر ليها دور في كل الرسالات ومع كل الرسل فده شئ برضه يخليك تفكر اشمعنى مصر يعني

كمان اللى يعيش في مصر يقدر يعيش في اي حتة تانية عندنا قدرة جميلة على التكيف ... ومرينا بظروف كل الشعوب يعني جربنا نعيش في دولة متقدمة وجربنا نعيش كدولة نامية جربنا يكون عندنا عمالة من برة البلد في فترة من الفترات جربنا نكون في عداوة مع اليهود جربنا نخش 4 حروب او طول عمرنا بنحارب يعني من الاخر فدي حاجة متعديش بالساهل كدة ... كفاية انك بتلاقى مفردات وطريقة تعامل مش بتلاقيها في اي دولة تانية ... كفاية انك لما تقول نكتة تتفهم ... كفاية ان دمك خفيف بالفطرة يا اخى
الحمد لله : انى انسان عاقل مسلم عربي مصري ذكر ... ايوة دكر ما هو حتى مجرد فكرة انى كان ممكن اكون بنت دي تصيبني بالقشعريرة وابوس ايدك خلى تقبل الاخر وحرية المرأة في كيس وابعده عنى انا يا عم مليش فيه ومثتنع ان الراجل زايد سيكا عن الست تقلى قد ايه اقلك هوا كدة وخلاص انا مش معقد ولا بتهم الستات عموما او بوصفهم بالتخلف وقلة الذكاء والكلام العبيط ده ولكن فعلا في شئ ما يدعونى انى اقول ان الراجل عموما في شئ زيادة عن الست يعني مثلا ليه الرسل كلهم رجال ؟؟ يعني القيام بأعباء الرسالة كان منحصر فقط في الرجال ودي من الاشياء النادرة اللى الستات مدخلتش فيها ... مثلا مش متخيل جسمي يبقى فيه نتوءات وظروف غريبة ومش متخيل نفس امشي بعيل في بطنى انام بيه ازاي اصلا هوا الواحد يقدر يشيل كيس طماطم ويبره على بطنه ويمشي وينام بيه 5 شهور ( على اساس البطن بتبدأ تتنفخ بعد الشهر الرابع :D ) كمان مش متخيل حاجات كتير كان ممكن تبقى فيا من اللى البنات بيعملوها ومش متخيل حاجات مقدرش اعملها وانا راجل كدة
الحمد لله : انى انسان عاقل مسلم عربي مصري ذكر مهندس :D .... بجد الكلية دي فتحتلى حاجات كتير اوي في الدنيا وخلتنى قادر على وزن الامور بطريقة افضل كفاية ان المهندس تعريف بالنسبالى انو حلال مشاكل ولكن بيحلها بطريقة علمية ... كمان تقدر تفتى في اي حاجة ومحدش يقلك لا ما انت مهندس بقى :D


كفاية كدة عشان تعبت

سلام

وماذا ايضا ؟

بسم الله الرحمن الرحيم

نعيش املا للحصول على :-

بطيخ بلا بذر - سمك بلا شوك - دراسة بلا امتحانات - انترنت سريع بلا انقطاع- سيارة لا تحتاج الذهاب للمكانيكي - زوجة جميلة ورشيقة ومرحة ومتدينة ومزة ان لزم الامر - مرتب كبيرجدا - فيلا في الساحل او شرم - جسد مفتول العضلات - ملابس من توكيلات معروفة - جهاز بلاي استين 3 - شاشة ال سي دي - صيف بلا حر - شتاء بلا برد -اولاد اذكياء - بل نتمنى ان نكون نحن الاذكياء دائما -

وبعدين ؟

16-5-2009

And I Still haven't found what I'm looking for

also today is the day

صنع في مصر

بسم الله الرحمن الرحيم

الحمد لله الذى بنعمته تتم الصالحات

مجموعة شركات عبدالله مرتضى ( ش م م ) تقدم اول منتج مصري مصنع محليا بالكامل وبايدي مصرية 100%

بداية المشروع 12-3-2009

نهاية المشروع 22-4-2009

الاثار الجانبية : شحططة في المواصلات - بلاهة مؤقتة في الدماغ - وجميع اعراض قلة النوم

الاستفادة القصوى : جيد جدا

تكاليف المشروع : 2 جنيه وربع ( جميع المصروفات مستثناة من اجرة المواصلات والاكل والذى منه )




جمميع الحقوق محفوظة ( يجب الاستئذان قبل الحصول على الصورة )

حدث في مثل هذ ا اليوم

بسم الله الرحمن الرحيم

يوما ما كنت تعبان جدا ومضغوط جدا ولكن الحمد لله كل شئ ليه اخر

نفسي دلوقتى اقعد في اوضتى الساعة 2 ونص كدة قبل العصر بشوية والسرير مترتب والاوضة مترتبة وميبقاش فيه ولا كتاب على ترابيزة المزاكرة والملاية تبقى مشدودة والبس شورت وفانلة كت وامدد على الملاية الباردة واشيش الشيش واشغل الحصرى واناااااااااام

مين بقى ؟

بسم الله الرحمن الرحيم

هوا حاجة كانت شغلانى وانا صغير ومبقتش افكر فيها لما كبرت لان مستوى تفكيري بيؤول الى الصفر كلما كبرت مش عارف ليه

المهم كنت بفكر زمان مين اللى بينشر فكرة ما ويخليها تعمل قلق للناس .... يعني مثلا مين اللى نشر فكرة الموضة او بدع البنطلونات الجينز او اقنع مثلا المصريين زمان انهم يغيروا الجلاليب والقفطان  ويلبسوا بدل وطرابيش ؟.. اصلي مش متقبل فكرة الغزو الفكرى وان العثمانيين اجبرونا ومش عارف ايه يعني لو مكنش عندنا قابلية او مكناش مستعدين نلبس مكناش لبسنا طيب ما اوروبا بيلبسوا شورتات في الشوارع ويمشوا مقلدناهمش في دي ليه يعني.. الانجليز احتلونا ومتكلمناش انجليزي .. متهيألى الانجليز خافو لا يتعلموا عربي وينسوا الانجليزي بتاعهم فرجعوا ؟!

مثلا ايه اللى خلى دلوقتى فريق الاهلى والزمالك والاسماعيلي اهم فرق في الكورة رغم ان مع بدء الدوري كان فرق زي الترسانة والسكة الحديد هما كانو ابطال الدوري وليهم قاعدة شعبية كبيرة جدا..

ازاي مثلا واحد قدر يسوق فكرة الهمبرجر مثلا ودخل في عقول الناس انك لو مكلتش همبرجر تبقى غريب على هذا العالم

ازاي البنات مشيت ورا موضة الكارينا مثلا من غير عقل وازاي الاهل تقبلوها عادي كدة اختى او مراتى تخرج في الشارع لحمها باين عادي كدة ... يعني هل فكرتهم في الكساء هو تغيير الوض الاصلي بوضع اخر من صنع الانسان يعني لو اللحم ده باين وابيض تبقى واحدة مش محترمة لو لبست نفس اللبسده بس لون لحمها بقى ازرق او اخضر او لون الجلد ... يبقى عادي وبيفصلوا بغرابة عن معنى الرداء الحقيقي ... يعني فلنفرض لو بنت مشيت في مصر عاملة Body painting انا متوقع ان ناس كتير مش هتاخد بالها ودي حاجة حاصلة في اوروبا كتير اوي ان واحدة تمشي في الشارع عريانة تماما بس داهنة جسمها ... طيب برة ومخابيل والحرية عندهم حق يراد به باطل
مش عارف بقى مجتمعنا ده عامل كدة ليه ؟

كمان موضوع الاسدال ده هوا جايلنا منين ... من ايران ولا من السعودية ولا منين ... كالعادة مجتمعنا خرج "الأداة " عن "الوظيفة" الاساسية ... عندى يقين أكيد ان الستات بيلبسو الاسدال ده كسل ... لان الاسدال ممكن البس تحته اي حاجة واضرب الاسدال واجري في الشارع حتى الاسدال ملوش طرحة ليه حاجة غريبة كدة تقريبا اسمها تلبيسة
يعني تصبح البنت او الست ماشية متكيسة حتة واحدة زي البطاريق والاسدال في حد ذاته ابعد ما يكون عن الحشمة وبيدي شعور بالكسل لما تشوفه ... وبعض الناس بيعتبروا الاسدال ده من مصادر الاغراء ... تخيلوا !!
وده يخليني اقول " وما الاسدال الا شراب كبير " ارزع الاسدال وانزل اجري في الشارع ... ودخلنا بقى في النقاب اللى مش هتعرضله في كلامه لأنه هيبقى هذر لا طائل منه ؟

اللى قصدي عليه ايه اللى مخلى لبسنا عشوائي كدة نقاب واسدال واخمار وحجاب كل واحدة من دول مختزلة الحجاب في اللبس بس واللى مش محجبة لابسة لبس وحش برضو مفهوش ذوق يا إما أوفر اوي وبيبقوا للأسف لابسين لبس اهرات وهما مش عارفين او عارفين ويقلك عادي ده الموضة ... والله انا معنديش اعتراض على اي لبس او اي حاجة اللى عايز يعمل حاجة يعملها بس يا جماعة ميبقاش في هذا القدر من العشوائية في اللبس .. شوف كدة اي بلد بتعتبر الحجاب الزي الاساسي للمرأة مش هتلاقى العشوائية دي كلها زي اللى عندنا دي ( السعودية - ايران - سوريا )

كل لبسهم يدور في فلك واحد مش كارينا على حجاب على جيبة على كوتشي
افضل حجاب من وجهة نظري الحجاب بتاع سوريا ده حاجة زي الفل والله مش عارف لية مش نازل موضة عندنا .. اشمعنى ده بقى ؟
هل ده يدخل تحت طائلة الكسل .. البنات بتكسل تدور على لبس ؟

وليه تم اقرار ان الجلابية هوا الزي الاسلامى الرسمي يعني بص انت كدة لاتنين مربين دقنهم وبيقروا قران وقالولك حاجة ... هتقتنع باللى لابس جلابية ولا باللى لابس بنطلون ... ولو واحد من غير دقن خالص كلمك هتسمعلو اصلا ؟

غالبا كدة انا قصدي ايه اللى بيحدد انماط التفكير ؟ وايه اللى بيخليها تأثر في الناس كدة

ليه الغرب مقتنع تمام الاقتناع ان المسلمين ارهابيين بالرغم من انهم شايفين نماذج كتير كويسة اوي وكل الغرب بيشهد لمحممد صلى الله عليه وسلم بانه عظيم ورسول الخ الخ اشمعنى دي اللى مبيفكروش فيها ولا بيدورو على الحقيقة؟

يعني انا بتخيل ناس قاعدة في مكتب على تربيزة اجتماعات وبيخططو لأنماط التفكير اللى هيمشوا الناس عليها
تخيل مجموعة من الناس تمشي أعداد مهولة من الناس وراها .. مش بتكلم على ثقافة القطيع بتكلم عن ازاي واحد يبتكر نمط ويبدأ يخلى الناس تقتنع بيه

مين اللى بيحرك الناس كدة .. ؟

فوبيا التسوق

بسم الله الرحمن الرحيم

انا بكره السوق جدا وبكره اليوم اللى هنزل اشتري في حاجة السوق هوا اسم لكل تجمع تجارى سواء ول او محلات عادية او سوق خضار وفاكهة اوي اي حاجة من الحاجات دي ... وعرفت دلوقتى قيمة الدعاء ده ( من دخل السوق فقال لا إله إلا الله وحده لا شريك له له الملك وله الحمد يحيي ويميت وهو حي لا يموت بيده الخير وهو على كل شيء قدير كتب الله له ألف ألف حسنة ومحا عنه ألف ألف سيئة ورفع له ألف ألف درجة)

انا بكره السوق جدا وبكره الناس اللى تفضل تمشي بالراحة وتتفرج بحس الناس عندها حالة تناحة عامة ومبحبش الف ساعتين عشان ادور على لبس ... انا ببقى عايز اجيب اي حاجة وخلاص ... انا مش عارف سيكولوجيا الشعور ده بيجي من ايه ولكنه موجود
يعني لو فرضنا انى مصاب برهاب اجتماعى هنقول ماشي انما انا ببقى مضايق من مجرد وجودي في السوق وحالتىالمزاجية بتبقى سيئة للغاية وببقى مكشر ومش طايق حد يكلمنى حاجة كدة زي الاحباط والسعور اللى بيجي قبل ما الواحد ينام ده ببقى متكدر اوي

على الجانب الاخر الستات عموما بيحبوا التسوق وميتعدين يقعدوا اليوم كله يبصوا ويتفرجوا ويقلبوا ودي برضه ظاهرة نفسية انا مش عارف تفسيرها ( هيا ليها تفسير بس لية مقرتش عنه )

كفاكم الله شر الاسواق
سلام

Hmmm....

بسم الله الرحمن الرحيم

كلامى مش جاي بعد الهنا بسنة ولاحاجة انا بس بحب استنى على المواضيع المهمة ومبحبش اقول رايي فيها بسرعة لانه في بعدها حاجات بتظهر بتأثر على راي الواحد

ومش عارف قريت موضوع يقلك حماس لن تنزهزم لان الله حليفنا والشيطان حليف اسرائيل ... لو كانت المواضيع بتتقاس كدة مكنش المسلمين انهزموا في احد .... عارف يعني ايه احد يعني الرسول والصحابة وناس اطلع الله عليهم فقال اعملوا ما شئتم فقد غفرت لكم ... ليه بقى انهزموا في احد ؟؟

الضعف ديني في المقام الاول سياسي واجتماعى في المقام الثاني
الاية واضحة وصريحة ( ان تنصروا الله ينصركم ) مفيش توضيح اكتر من كدة ... دلوقتى قلى لو اعلنوا الجهاد هتروح تجاهد ؟ ... طيب انت جاهدت نفسك ونزلت صليت الفجر؟ صحيت السعة 3 بالليل وصليت قيام ليل ؟ ولا قلت ده الدنيا بتبقى رصاص في الفجر يا جدع.... يعني انت مش مش مستحمل رصاص السقعة هتستحمل رصاص الحرب؟؟
اول صلاة اتفرضت على المسلمين كانت قيام الليل خلى بالك قيام الليل كان فرض يعني الراجل كان يرجع منفوخ من المعركة بالليل ويصلى ... لحد ما نزلت اية التخفيف في اخر سورة المزمل

البنات الامامير بتوعنا هتجاهدوا ... ولا فاكرين الجهاد على الرجالة وبس ( عارفين ام عمارة ) بلاش نقربها اكتر للمشاهدين ( عارفين واحدة اسمها نسيبة بنت كعب ) دوروا في جوجل كدة طيب ...... طيب لو قلنا ان الجهاد يا ماما على الرجالة بس مستعدية تتخلى عن جوزك وخطيبك .. والواد ميدو يا ترى هتقوليلوا يروح يحارب ولا هتقوليلوا مجتش عليك انت يا ميدو اللى هتحارب اقعد جنبي عشان تبعتلى رسايل على ميلودي !! .... طيب لما ميدو يحارب هتقلعى البودي كارينا اللى بلون الجلد والحجاب المشخلع وتلبسي عليه بودي كارينا اسود برضه وطرحة اسبانش سودة ؟ ( بالمناسبة عرفت من وقت قريب ان في بنات بتحلق حواجبها وترسمها من اول وجديد بس مش عارف هوا فيه اسطمبة حواجب وكدة ولا ده مجهود شخصي ) طيب الامهات مستعدة تضحى باولادها فعلا وتوديهم يجاهدو .... اذا كان لما بتودو فلوس لغزة ونقول جاهدوا باموالكم بتودوا عشرة جنيه وعشرين جنيه بلاش يا عم بتودي 1000 جنيه مع انك بتبقى قادر ولكن العيال بقى عايزين يتعشوا بسطرمة ... اجيب منين قبل ما تقول بالروح بالدم فكر كدة في الكام كلمة دي ... يبقى متعيبوش على الحكام انهم متخاذلين هما الحكام دول يعني مش من الشعب ؟
لحد دلوقتى فلوس الدول العربية مليار ونص ... لإعمار غزة ... طيب هل ده اقصى ما يمكن ان العرب ( مجتمعين ) يطلعوه ؟؟

بالنسبة للمظاهرات والهتافات لا جديد فيها بتاتا موجودة بقالها حوالي 9 او عشر سنين من ايام الانتفاضة الاولى بصراحة انا عمرى ما تأثرت ولا اتكدرت زي ما اتأثرت بيوم محمد الدرة .... محمد الدرة كوم وكل الاطفال والبشاعات اللى بتحصل دي كوم تاني ... ربنا يرحم الجميع ولكن اللى احنا متصورين انه ابشع ما حصل وان نهاية العالم جت وان القيامة هتقوم المسلمين كانوا بيقولوه برضو ايام المغول ... المغول كانوا بيدخلوا كل مدينة بيدبحاو كل اللى فيها حتى لو استسلموا ويحرقوا كل حاجة ويبقروا بطون الحوامل يعني اطفال اجنة مش اطفال رضع وكان ساعتها في انقسام عربي واسلامى برضو بالعكس ده ساعتها كان فيه خلافة يعني مكنش فيه ده مصري وده سورى وده قطري

بلاش ايام الدولة الايوبية الصليبين وصلوا لدرجة انهم دخلو المسجد الاقصى وعملوه زريبة للخنازير في اكتر من كدة عار .... طيب ايام 67 الىل اسرائيل بتعايرنا بيها الجنود المصريين كانوا متفحمين بالنابالم على طول طريق السويس
اللى عايز اقوله ان لو الناس مخدوش خطوة ايجابية مفيش حاجة هتتغير .... كمان يومين بالظبط الاخبار هتتحول عن غزة وهتروح للمواصلات والعيش والازمة الاقتصادية العالمية ... والشيوخ يرجعوا يتكلموا على ان محدش يفتى على الفضائيات الا باذن من الازهر ... الخ الخ ربنا مش كل شوية بيحكم علينا ناس اضعف مننا عشان نفوق ...طيب محدش بيتعلم ليه ؟ .... ولكن فلنحذر من غضب الله حتى لا يستبدل قوما غيرنا ثم لا يكونوا امثالنا

زى ما قلت الشعارات متغيرتش بقينا نشيل كلمة شارون ونحط باراك ونشيل باراك ونحط اولمرت نشيل لبنان ونحط غزة

سؤال بسيط ليه مكنش فيه نفس درجة التعاطف مع العراق زي التعاطف اللى كان موجود مع غزة ده ؟
مع ان الظروف تقريبا واحدة .... العراق اتحاصر لمدة 10 سنين اقتصاديا وحصل حظر على المجال الجوى العراقى والشعب جاع وحصلت مشكلة ان امريكا زرعت نفايات نووية في العراق ومحدش اتكلم واعلنوا الحرب على العراق بالرغم من انه مفيش اسلحة دمار شامل والعراق حصل فيها مجازر ومآسي في نظري اكتر مما حصل في غزة واضربت بفسفور ابيض واكتر من فسفور ابيض كمان وحصل عندهم ابو غريب ... الخ الخ ولكن العرب خصوصا والعالم عموما مخرجوش يقولوا بالروح بالدم نفديك يا عراق ولم يوقولوا يا بوش صبرك صبرك الزرقاوي يحفر قبرك ... الخ من الاسطمبات المعروفة

الجديد دلوقتى ان مصر بقت تتشتم وحسنى بيتشتم والعلم المصري بقى يتحرق ده حتى احنا لو كفرة مبيتعملش معانا كدة .... والغريييييب جدا انى مشفتش ولا مظاهرة اتحرق فيها العلم الامريكي كالعادة ... ولا الناس مبقاش معاها فلوس تشترى علمين ؟ رغم ان امريكا المرة دي كانت اكتر مرةعلى الاطلاق صريحة فيها واعلنت دعمها الكامل والشامل علنا لاسرائيل ولكن احنا خلاص اتعودنا فدورنا على علم تاني يتحرق غير علم امريكا بجانب علم اسرائيل طبعا ... ومصر كانت جدي الفداء

كمان ايه اللى كل شوية مصر روحى حاربي .... فين الباقى طيب فلنفرض جيشنا 10 مليون واحنا كتير والبنى ادم في مصر عليه تخفيض ... ماشي ... 10 مليون دول اللى هيحرروا غزة والسودان والصومال والعراق وبالمرة افغانستان وكشمير طيب لوحاربنا هل انا ضامن الجبهة الليبية او الجبهة السودانية او الجبهة السورية ؟؟؟

سوريا الجولان بتاعها محتل من 67 محاربتش من ساعتها لحد دلوقتى ليه؟؟ ولا حتى بنسمع انو بيحصل مناوشات ليه ؟ مصر اللى بيتريقوا عليها اتسحلت في 5 حروب بسبب فلسطين ومشفناش قطر عملت حاجة يعني .... كل معلوماتنا عن قطر انها دولة تقع شرق السعودية عاصمتها الدوحة ... دلوقتى بقى ليها امير وشيخة
ايران اللى بتهلل كل شوية تطلع تجرب صاروخ عابر للمش عارف ايه محاربتش ليه ؟؟؟...
حزب الله اللى بيلبسوا اسود ويرفعوا اديهم ويقولوا كلام غير مفهوم مبعتوش صاروخين على غزة ليه ... والغريب محدش لام حزب الله انو سكت هوا بس مصر اللى لازم تنسحل في اي حاجة وخلاص انا متأكد لو كان عبدالناصر عايش كان هيسخن ويعلن حرب ونخسر فيها زي 67 عشان هنبقى لوحدنا وننسحل برضو ومحدش يقف جنبنا

طيب احنا مش جبنا يا عم احنا حاربنا 5 مرات احنا قدها وقدود وهنجاهد قولولى هنحارب ازاي وقطر فيها قاعدتين عسكريتين امريكيتين ولا الكويت اللى الطيارات كانت بتطلع منها تضرب العراق وترجع الكويت تاني ... طيب ليبيا ؟ واليمن يا ترى ؟... بلاش بقى وسع وسع لقطر يا جدع والامير المفدى اللى ظهر فجأة مش عارف راح فين ووزير خارجيتهم لما راح تركيا يحاول يتزعم المفاوضات قالوله هات حد كبير نكلمه ..وطبعا مننساش السدية الاولى الشيخة موزة ... ازاي شخة وفي نفس الوقت موزة ؟؟ .. في وزير خارجية يتكلم في حوار صحفى يقول انا كلمت عباس وعباس قالى هكلمك كمان نص ساعة وكلمني بعدها بساعة ونص وقالى مش عارف ايه ... ده ناقص يقلنا انه شحنله كارت بعشرة ايه يا جماعة في ايه .....

بالنسبة لموقف مصر السياسي فهو ازبل موقف اتعمل من مصر على الاطلاق حتى الان الحضور الدبلوماسي لينا كان غاية في الانحطاط من اول وزير خارجية بيلقى تصريح صحفى وهوا حاطط ايده في جيبه ده حتى كان ناقص يقول مياو الىل هيقربلنا هنخربشه ... لأخرة متحدث رسمي بيشتم علنا حسن نصر الله لمجرد ان مصر على خلاف مع حزب الله فين بقى الدبلوماسية واحنا بنشتم الناس كدة ... يا عم حسن نصرا الله ابن ستين في سبعين برضو مينشتمش ... ايه بقى فايدة البروتوكلات والشكليات

كمان انا مش عارف مصر ليه سايبة تحالفات مهمة اوي كدة زي تركيا وسوريا البلدين دول ضمان كبير جدا للامن القومى ودولتين قويتين وبينا وبينهم علاقات تاريخية مش عارف منفضينلهم كدة ليه كل اللى بينا وبينها علاقات اقتصادية وخلاص .... كمان ايه بقى موقف ايران اللى احنا واخدينه هل كل ده عشان احنا متحالفين مع السعودية والسعودية بتكره ايران عشان هما سنة وايران شيعة ؟ .... انا معرفش ليه متحفظ على ايران ومش عايز يبقى بينا علاقات مفتوحة بين مصر وايران ولكن مش للدرجة دي يعني لو مش هنصاحبهم على الاقل منعاديهمش
انا مع مصر في انها مراحتش القمة اللى في الدوحة لان يا اما القمة كانت تتعمل على طول يا اما متتعملش خالص كمان هما لما علموا القمة عملوا بيها ايه يعني ... يافرحتى وبالنسبة للناس اللى انتقدوا وجود ايران في القمة انا مش شايف فيها مشكلة ايه يعني ما طول عمر القمة العربية بيحضر فيها وفود دول اجنبية قبل كادة كانت بتحضر روسيا وبريطانيا واسبانيا ومحدش كان بيتكلم وايه المشكلة لما تحضر ايران يعني ؟؟
كمان الرئيس القائد حسنى مبارك كان لازم يتشنى لما اسرائيل تروح تنفضله وتتخلى عنه وتروح تتفق مع امريكا على اتفاقية دفاع مشترك .... طيب ما من الاول ... كمان لاحظت غياب جمال مبارك في الموضوع هوا لسة صغير ولا بيتدرب على حاجات تانية .... طيب هوا مش المفروض يقف مع الحاج حسنى عشان يشرب الصنعة ؟ ( على فكرة حسنى حج مرتين :D )

الجزيرة قناة اثبتت انها غير حيادية بالمرة اذا ذكرت فيها مصر متلاقيش صوت واحد بيشكر فيها وان جه واحد للرد او الدفاع تلاقى المذيعين متحيزين مسبقا لفكرة ما في رؤوسهم طب فين بقى الرأى والرأى الاخر الجزيرة ميزتها انها حققت انتشار واسع وهيا بتراهن على الاوبشن ده ... بتشتغل بنظام عمرو دياب وتامر حسنى نظام هعمل اللى هعمله وبرضو هتتفرجوا عليا يا ولاد ال..... لان انا الجزيرة انا كنج القنوات الاخبارية العربية بيفكرونى باحمد السقا لما قال البلد دي مفهاش جزيرة انا الجزيرة حاجة مقرفة بجد لما ليل نهار مصر مصر مصر مصر ولا كأن في دولة فيها فساد غيرنا ولا احنا ريحتنا بقت فايحة اوي كدة ( يمكن عشان المية بتنقطع كتير في مصر ؟؟؟ )

على الجانب الفانزويلي اللى وصل لدرجة ان بعض الناس عايزين يعملوا لفنزويلا مقعد في جامعة الدول العربية والله اكتشفت اننا عالم طيبين ..طيب بجد احنا طيبين لو مكنشا طيبين مكنتش اسرائيل بهدلتنا كدة بقى عشان شافيز طرد السفير نعمله مقعد في جامعة الدول العربية ؟ اه نحييه ونشكره على موقفه المتضامن ولكن مش كدة التضامن مش كدة يا جدعان ... كمان هوا شافيز عمل كدة حيا فينا ولا كرها في الامريكان ؟؟ ومعانا اجابة ونقول الو

طيب لو اعلنا الجهاد تامر حسنى هيحارب ؟ ولا هيتضامن مع الحرب باغنية وطبعا احنا عارفين ان الفن بيأدي رسالة !!

الفكرة ان اللى يقرى الكلام واللى كاتب الكلام ده يفضل فايق على طول مش زعل على فلسطين حبتين واتعصب حبتين وبعدها الدنيا تنسيه لانى لما كلمت ناس في الكلية على الموضوع قالى يا عم وانا مال امي اياكش غزة تولع ...طيب تبرعات طيب ... ياعم هوا انا لاقى اكل عشان اتبرع ...ده محدش يلومه طبعا لانو لو ضامن لما يديني فلوس يلاقى حق علبة المرلبورو الاحمر مكنش تردد لحظة انو يديني تبرعات لغزة ... وبنت لما سئلت ( مبني للمجهول ) على التبرعات قالت : في حاجات اهم من الشكليات دي ...


ويجعله تامر
سلام

google chrome

 بسم الله الرحمن الرحيم

 

من فترة كنت  سامع ان جوجل  عملت   browser  جديد  انا مجرتبوش ولا فكرت اجربه  لانى  كنت من اشد المخلصين  ل mozilla  ولكن   كالعادة الفضول خلانى انزله واجربه  .....  كنت متوقع  انه يحصل مشاكل في اللغة  والفونت وكدة ولكن البرنامج   لحد دلوقتى  مبهرني   خفيف جداجدا  كنت فاكر ان اخف  حاجة  هوا الموزيلا   ولكن ده خفيف اوي اوي بدرجة لا توصف  بالمقارنة  مع  ال7 IE  و Mozilla  و Chrome   فتحت التلات  لينك  واحد فيهم  هما التلاتة وكانت النتيجة المتوقعة ان  كروم  فتح قبل  موزيلا  بصورة اسرع  نسبيا  وموزيلا فتح قبل الاكسبلورر  بفترة 

من اول ما عرفت  النت من وانا في 3 اعدادي ايام ما كان النت بكروت   مش عارف ليه  كنت كاره الاكسبلورر وكنت كل ما اجرب  براوزر تانى  اللى هوا  غالبا   اوبرا  او موزيلا   كنت  بشيله تانى يوم  لان  محدش كان بيعرف يستخدمه  مع انهم مكنوش بيقعدوا على النت  زيي او مكانوش بيقعدوا اصلا عليه 

 بعد فترة  وفي اخر اولى  ثانوي قررت اخد القرار الجرئ وانى استيدل موزيللا ب ال IE والى الابد  وفعلا الموزيلا   جميل جدا  خوصا  ال plugins اللى فيه   بس بصراحة كل ده كوم وال chrome  وخفته كوم تاني  كمان الصفحة  بتبقى  واسعة اوي  بحس ان صفحة النت بتبقى  مالية الشاشة بصراحة 

على العموم  ال chrome  ساب عندى انطباع جميل  اوي  بس  لازلت  مخلتوش ال default browser

كيف كان شعورهم ؟؟

بسم الله الرحمن الرحيم

وانا بقرى القران بقف كتير قدام الايات اللى نزلت في مواقف معينة ... يعني كان شعور الصحابة ايه لما نزل فيهم قران يتلى الى يوم القيامة ؟؟؟
مثلا كان شعور سيدنا عمر ايه لما نزلت بسببه اية ((واتخذوا من مقام ابراهيم مصلى ) او لما انزلت اية الحجاب او لما قال للرسول مياخدش اسرى من بدر(( ما كان لنبي ان يكون له اسرى حتى يثخن في الارض ))... ولكن برضو كان شعوره ايه هو وسيدنا ابو بكر لما نزلت فيهم اية (( يا ايها الذين امنوا لا ترفعوا اصواتكم فوق صوت النبي ولا تجهروا له بالقول كجهر بعضكم لبعض ان تحبط اعمالكم وانتم لا تشعرون )) سورة الحجرات

كان ايه شعور عائشة رضى الله عنها لما نزلت 14 اية من سورة النور لتبرئتها ... قصدي ما كان ممكن سيدنا جبريل ينزل بوحى لرسول الله والمؤمنين برضو كانوا هيصدقوه .... انما ليه قران ؟؟

كان ايه شعور سيدنا موسى لما ربنا كلمه ؟؟؟ ... ينهر ابيض ربنا بعظمته دي يكلم عبد من عباده !!!


طب حاجة بشرية خالص اهه حتى رسول الله لم يسلم من غيرة النساء ... سورة التحريم فيها معاتبات للرسول وزوجاته وبالاخص عائشة وحفصة رضي الله عنهن اجمعين عشان حرم على نفسه شيئا احله الله له .... الحكاية ان الرسول صلى الله عليه وسلم قعد عند زينب بنت جحش وشرب عندها عسل فالسيدة عائشة وحفصة اتفقوا ان لما النبي يخش عند واحدة منهم يقولوله اننا شامين منك ريحة وحشة والرسول كان بيحب يعتني بنفسه ومكنش بيحب يبقى منه ريحة وحشة فحرم على نفسه العسل ... عارفين زي ما نزهق ونقول والله ما انا واكل ....

(( يا ايها النبي لم تحرم ما احل الله لك تبتغي مرضات ازواجك والله غفور رحيم ))
طيب الاية دي جامدة اوي
(( ان تتوبا الى الله فقد صغت قلوبكما وان تظاهرا عليه فان الله هو مولاه وجبريل وصالح المؤمنين والملائكة بعد ذلك ظهير* عشى ربه ان طلقكن ان يبدله ازواجا خيرا منكن .... الخ الاية)) عتاب شديد جدا

طيب طلحة ابن عبيد الله لما دافع عن الرسول في احد ونزلت فيه الاية دي ((مِنَ المُؤْمنين رِجَالٌ صَدَقُوا مَا عَاهَدوا اللّه عَليه فمنْهُم مَنْ قَضَى نَحْبَه ، ومِنْهُم مَنْ يَنْتَظِر ، ومَا بَدّلوا تَبْدِيلا)) طب كان شعوره ايه بقى لما نزلت فيه الاية دي


الكلام في الباب ده يطول وانا كان في دماغى حاجات كتير اوي عايز اقولها بس نسيتها ...

سلام

shift ; s

بسم الله الرحمن الرحيم

اوحش حاجة يبقى عندك كلام كتير اوي اوي اوي في صدرك ومش عارف تطلعه لانه ببساطة مينفعش يطلع برة صدرك ... طب لو الكلام كتير وصدرك مبقاش فيه مكان ازاي افرغ الكلام ده ؟؟؟

يعني ده حتى مينفعش اروح في صحرا وافضل ابعبع .....

يارب

اليوم الأخير

بسم الله الرحمن الرحيم

لا اعتقد ان يكون مختلفا عن اي يوم اخر .... ربما سأكون ذاهبا للمسجد او عائدا منه ربما سأكون جالسا مع رفاقى على مؤخرة سيارة في شارع عام ... ربما اكون متزوجا حينها وبين احضان زوجتى ... ربما في صلاتى ... ربما في عمرتى او حجتى ... ربما يكون وأحد أولادى يلعب معلقا بكتفى ... او ان احدهم متأبطا رقبتى
لا اعتقد ان يكون يوما مختلفا عن اي يوم اخر ... ربما اكون في القطار ... ربما اكون في ميكروباص او حافلة ... ربما اكون متجولا في احد المولات ... ربما اكون في غرفة تغيير ملابس في احد المحلات ... ربما اكون في احد المطاعم ... ربما اكون في غرفة عميد الكلية ... ربما اكون واقفا امام لجنة مناقشة مشروع التخرج
لا اعتقد ان يكون مختلفا عن اي يوم اخر ... ربما يكون في بيتى ... ربما يكون في كليتى ... ربما يكون في مستشفى ...ربما يكون في المسجد .... ربما يكون تحت ركام احد البنايات ... اوحتى ملتحما بحديد احد السيارات ... ربما يكون في جنازة احدهم ... او في زفاف اخر

لا اعتقد ان يكون مختلفا عن اي يوم اخر ... ربما سيكون بجوارى امي .... احد اخوتى او كلاهما ... ربما سيكون برفقتى زوجتى او احد ابنائي او ربما جميعهم ... وربما ايضا اكون وحدى

لا اعتقد ان يكون يوما مختلفا عن اي يوم اخر .. ليلة هذا اليوم سأفكر في صباحه ... سأفكر في كيفية التصرف مع مديري في العمل ... سأفكر في كيفية الخروج من مأزق سببته لنفسي ... سأفكر في كيفية تدبير اموال الشهر الجديد ...
مهتم لانى صرخت بوجه احدهم ولم اعتذر ... مهتم لان احدهم صرخ بوجهى وايضا لم يعتذر ... ربما اكون مشغولا في هذه الليلة واحاول المام اكبر قدر ممكن من منهج مادة ما .... ربما اكون جالسا عن احد الحرفيين منتظرا انهاء اصلاح سيارتى ... وما يمنع ان يكون هذا اليوم يوم شراء الاجهزة الكهربائية لزفافى .... وانا متأكد تمام التأكيد انى سأكون وقتها غاية في التململ ... ومنذ متى وانا اسعد بتجوالى في الاسواق ؟

لا اعتقد ان يكون يوما مختلفا عن اي يوم اخر... سآكل حتى تمتلئ بطنى ... واحس باضطراب السوائل في معدتى ... ربما سأكون متململا من الطعام ... متمنيا بعض قطع الكباب بدل هذه المعلبات المقرفة .... ربما سأكون راضيا عن بساطة الطعام ... او ربما ساخطا عليه ... او ربما اكون صائما
لا اعتقد ان يكون يوما مختلفا عن اي يوم اخر ... ماشيا افكرفي احدى المسائل... اعبر الشارع غير عابئ بصوت النفير المرتفع القادم نحوي ... افكر في معنى كلمة ما طرأت على فكرى ... اردد آية سمعتها للشيخ رفعت او الحصرى او المنشاوي او البهتيمي او البنا او نعينع اوالزامل او زاهر او اسماعيل اوللقزابري او غيرهم ... ربما ابتهالا لعمران او النقشبندى او لطوبار او للحملى او للحسيني او للهلباوي او لغيرهم ... او ربما اغني لاحدهم الليلة الكبيرة او ابريق الشاي او غيرهم
لا اعتقد ان يكون يوما مختلفا عن اي يوم اخر ... ولكن اكيد انه لن يكون هنا يوما بعده
لا اعتقد ان يكون يوما مختلفا عن اي يوم اخر .... من المؤكد انى لن اعرفه بالتحديد
لا اعتقد ان يكون يوما مختلفا عن اي يوم اخر ... حتما عندما تكون اخر دقيقة فيه سأتمنى ان يكون لي يوم اخر لاعبد الله كما لم اعبده من قبل .. هل ستكون حسرتى ؟.. رغبة في ازدياد ام رغبة في الاستغفار ... ام رغبة في توبة

لا اعتقد ان يكون يوما مختلفا عن اي يوم اخر ... هكذا اعتقد ركاب عبارة السلام ومن قبلهم ضحايا الياوران... ومن بعدهم ضحايا الدويقة ... وما يتخلل هذه الاحداث من غرق وموت وحريق

كيف ستكون هذه الدقيقة .. هل سأكون متوجعا من الم ... هل سأكون باكيا ... هل سأكون متوسلا
هل سأكون ممدا على سرير ... ام جالسا على كرسي مريح ... هل سأكون مكورا ... هل سأكون عالقا في حادث

هل سيبيكيني احدهم ... هل سأشير اليهم " ان كفوا عن البكاء " ... هل سيقف ابنائي الصغار لا يدرون ماذا يحل بوالدهم
هل ستهز زوجتى صدري مخبرة اياي انى قد تأخرت على العمل ... هل ستتفاجأ او سيرزقها الله السكينة ... هل ستفتح على امي باب غرفتى وتزيل عن الغطاء ضاجرة بنومى الكثير الذى تجاوز الخمسة عشرة ساعة .


اللهم انى اسالك رضاك والجنة واعوذ منك من سخط والنار ... من ذا الذى يحيا .. وانت عليه ساخط ... ومن ذا يفوز وانت منه غضبان ... ارجوك يارب ادخلنيها ... ولا تدخلنيها ... اللهم قربنى منها يارب ... اللهم ابعدني عنها يارب .... اللهم لا رضى بعد رضاك ولا هدى بعد هداك ... اسألك صراطك المستقيم .... اللهم اغفر له وارحمه واهده واجبره وعافه واعف عنه واكرم نزله ووسع مدخله واغسله بالماء والثلج والبرد ونقه من الذنوب والخطايا كما ينقى الثوب الابيض من الدنس وابدله دارا خيرا من داره ونزلا خيرا من نزله وزوجا خيرا من زوجه وولدا خيرا من ولده ودارا خيرا من داره وجارا خير من جاره اللهم هون عليه ذلك اليوم ... اللهم ارزقه شربة هنيئة من يد حبيبك لا يظمأ بعدها ابدا ... اللهم افسح له فيه مد بصره ... اللهم اجعلنى ممن يعملون له بعد الممات ... اللهم وهب لى من يعمل لى بعد الممات ... اللهم صحبة مع الرسول اللهم صحبة مع الرسول اللهم صحبة مع الرسول ... اللهم هون علي سكراته .. وارفع عنى اهواله ... اللهم اسألك قبل الموت شهادة ... اللهم لا تعذبني بما جهلت به عليك ... اللهم انى اشكو اليك بما تعلم ... يا بارئي يا فاطرى ... يا من حلمت عن جهلى ... اسألك حسن الخاتمة ... اللهم لم افعله عالما بعزتك .. بل جاهلا لجبروتك يا عزيز يا جبار
اسألك حسن الخاتمة ... اسألك حسن الخاتمة ... اسألك حسن الخاتمة

اخرتها ايه ؟

بسم الله الرحمن الرحيم

مش عارف انا الحاجات اللى حصلت اليومين اللى فاتوا دول مش مؤشر حلو خالص ... حريق مجلس الشعب ... اختطاف سفينة مصرية ... انهيار المقطم .. وفاة ابو غزالة ...

استشرى الفساد في مصر بطريقة بشعة جدا وعادة الوضع ده مش هيستمر يا الناس ترجع عن اللى بتعملو ويتقوا ربنا يا اما ربنا هيورينا كيف يكون انتقامه ... اصل السكوت عن الحق عمره ما بيدوم ... العبارة والحريق والمقطم قضاء وقدر اه .. لو العبّارة فيها وسائل انقاذ والمجلس فيه انظمة اطفاء والمقطم معموله ركائز خرسانية وربنا رايد كان برضه الكوارث دي هتحصل .. ولكن احنا معملناش ليه ؟

عمرما بتحصل في مصر  كارثة الا ويكون فيه تقصير ... يعني الكارثة اللى محدش يقدريتكلم عليها وتكون ابتلاء من الله حاجة زي زلزال 1992 كدة ..  مكنش عندنا وقتها " ولازلنا " اجهزة تنبؤ بالكوارث فلما حصل الزلزال والدنيا اتكركبت محدش فتح بقه لان ده قضاء الله وقدره ملناش احنا دخل فيه .

انما اللى بيحصل دلوقتى ده مؤشر لمصايب اكبر جاية ... والله اعلم

قوموا الى صلاتكم يرحمكم الله !!

بسم الله الرحمن الرحيم

اما بعد :

إنكم لم تخلقوا عبثاً ولن تتركوا سدى ، وإن لكم معاداً ينزل الله فيه للفصل بين عباده ، فقد خاب وخسر من خرج من رحمة الله التي وسعت كل شيء وحرم جنة عرضها السموات والأرض .ألا ترون أنكم في أسلاب الهالكين ، وسيرثها بعدكم الباقون ، كذلك حتى ترد إلى خير الوارثين ، وفي كل يوم تشيعون غادياً ورائحاً إلى الله ، قد قضى نحبه ، وانقضى أجله ، فتودعونه وتدعونه في صدع من الأرض غير موسد ولا ممهد ، قد خلع الأسباب ، وفارق الأحباب ، وسكن التراب ، وواجه الحساب ، غنياً عما خلف ، فقيراً إلى ما أسلف ، فاتقوا الله عباد الله قبل نزول الموت وانقضاء مواقيته ، وأني لأقول لكم هذه المقالة وما أعلم عند أحد من الذنوب أكثر مما أعلم عندي ، ولكن أستغفر الله وأتوب إليه

عمر بن عبد العزيز

هما الناس دول كانوا بيجيبوا الكلام ده منين ... اكيد من القران مش كدة ؟