Follow by Email

Monday, September 3, 2007

Goals

بسم الله الرحمن الرحيم





بيقلك دايما حط اهدافك قدام عنيك عشان تحاول تحققها

اهداف قريبة المدى :
1- انى اخــــــس
2- انى اختم القران في رمضــــان ان شا ء الله
3- انى اصوم صيام صح مش مجرد امتناع عن اكل وشرب
4- انى اطلع رخصة سواقة :)
5- انى ابطل داء التريقة اللى فيا ده .. هو قل شوية بس انا عايز ابطله خالص عشان السخرية دي وحشة حتى لو على سبيل الهزار
6- اشترى كومبيوتر جديد ونضيف عشان البرامج اللى عندى بقت احدث من جهازى .. جهازى بيهنج على اتفه الاسباب :@

اهداف متوسطة المدى :
1 - انى ابقى كويس اوي في مجال دراستى وابقى مهندس كويس اوي مش عشان الشغل على الاقل انا هفرح اوي لما ابقى مهندس فاهم في تخصصي

2- انى اتعلم خط ... رحت سألت في معهد الخط عندنا في بنها قالوا لازم ادرس اربع سنين كاملة وطبعا ده مستحيل مع دراستى العادية او على الاقل هياخد وقت طويل ... جربت اعمل نفسي بنفسي بس كسلت.

3- انى اتعلم فرنساوي مع انها صعبة بس بحبها اوي بس عيبها انها مش منتشرة في مصر يعني ممكن انساها بعد ما اتعلمها لان اللغة حلها الوحيد الممارسة قولولى بقى هتكلم فرنساوي مع مين بس ده ميمنعش انى احطها في لستة الاهداف

اهداف بعـــيدة المدى :
1- اؤسس شركة او مصنع كبير واخرج منتج مصرى عالى الجودة
2- اتجوز
3- اسافر فرنسا للعلم والسياحة
4- اروح اقعد مدة طويلة في المدينة عايز اروح افضل قاعد ليل نهار في الروضة ... من غير مبالغة المدينة مشفتش زيها اي مدينة على الاطلاق في راحة النفس والهدوء يعني لو ينفع اقضى عمرى كله فيها واندفن فيها اروح حتى لو مقعدتش في المسجد النبوي برضه هتحس انك مرتاح نفسيا اوي
5-هدف مهم اوي مش هقوله دلوقتى


وفى ناس قالو كلام كويس عن تحقيق الاهداف وان يكون عندك هدف في حياتك

Aman without a goal is like a ship without a rudder.
الراجل من غير هدف زي السفينة من غير دفة
If we could first know where we are, and whither we are tending, we could better judge what to do and how to do it.
لو احنا قدرنا نحدد فين مكانا وقدرنا نحدد احنا ناويين على ايه هنقدر بشكل افضل نحكم على الاشياء اللى هنعملها وازاى نقدر نعملها
When you determined what you want, you have made the most important decision of your life. You have to know what you want in order to attain it.
عندما تقرر ان تفعل شيئا فانت قد اتخذت اهم قرار في حياتك . يجب عليك انت تعرف ماذا تريد في سبيل ان تسعى لتحقيقه
In life, the first thing you must do is decide what you really want. Weigh the costs and the results. Are the results worthy of the costs? Then make up your mind completely and go after your goal with all your might.
في الحياة ، اول حاجة لازم تعملها انك تقرر اللى انت محتاجه فعلا . بعديها وازن بين تكالف تحقيق هدفك وبين النتايج لما تحققه ونشوف هل النتايج هدفى لما احققه هتستحق تكاليفه او التضحيات اللى هقوم بيها ولا لا ؟ وبعدها ركز في انك تحقق هدفك وامشي وراه بكل ما اوتيت من قوة





7 comments:

رفقة عمر said...

انى اخس
افهم من كدة انك مليان
ربنا يقدرك ان شاء الله
اهدافك جميله قوى وبسيطه ربنا يحققها ليك يارب
ونسمع عنك كل خير اللهم امين
بس نفسى اعرف الهدف اللى مش عايز تقوله دة
كل سنه وانت طيب رمضان كريم

allah-slave said...

بمناسبة شهر رمضان بقى يا رفقة
عايزين نعمل نظام مقايضة يعني ادعيلي وادعيلك

ماشي؟

BinO said...

كلام جميل خاصة في الأهداف البعيدة المدي
:)
منتج مصري عالي الجودة
تعرف أنه مفيش حاجة تقريباً دلوقتي بتشتهر بها مصر
مفيش شئ يبرع فيه المصريين دلوقتي غير قنوات الأغاني والأفلام لموأخذة
:)
رينا ييسر لك وتحقق كل أهدافك
أمين

allah-slave said...

شكرا لتشريفك يا بينو انا كنت هفرش الارض رمل بس عربية الرمل اتأخرت
احط عربية الرمل فين دلوقتى بقى
تفتكر احطه في التلاجة
:)

ftataljanna said...

عبد الله

ازيك يا باشمهندس

اول حاجة اشمعنا ابعد عن المهندسييييييييييين؟


اما بقى عن اهدافك فهى حلوة ومنها اهداف مشتركة زى الفرنساوى ورخصة السواقة

ربنا يعينك يارب

اه عبد الله بالنسبة للخسسان

بجد بجد نصيحة من اخت بلاش الريجيم اللى من غير رياضة لو رياضة من غير ريجيم هاتخس بس ريجيم من غير رياضة وحش

وما تستعجلش لان الخسسان مش بالسرعة بس بالنتيجة علشا الخسسان السريع ليه اضرار منها الترهلات والزوائد الجلدية وحاجات كده مالهاش لازمة

ربنا معاك

allah-slave said...

فتاة الجنة

ربنا يسهل ان شاء الله وانا اساسا مش بتبع ريجيم عشان اخس
الرياضة ثم الرياضة لان اللى كان بيدربنى زمان كان بيوقولنا كل زي ما انت عايز بس احرق اللى انت بتاكله ده

وعقابل ما تعملى الرخصة وتتعلمى فرنصاوي :)

رفقة عمر said...

ايه الاستغلال دة مافيش حاجه بتتعمل لوجه الله ابدا
ربنا يكرمك عبدالله وتحقق كل اهدافك اللهم امين يارب العالمين