Follow by Email

Friday, February 15, 2008

اااااه يا عيني ... مذكرات قرصان

بسم الله الرحمن الرحيم

من فترة عيني اليمين طلع فيها كلكيعة كدة في الجفن وطبعا بصفتى كسول جدا ومهمل اوي في صحتى ( وده غلط طبعا ) الى ان استفحل الامر والكلكيعة دي زادت واحمرت اوي وشكلها بقى مخيف قلت مبدهاش بقى نروح للدكتور وخلاص واكيد هيكتبلى مرهم تراميسين ومضاد حيوي وخلاص
اخويا اسلام دكتور اسنان امتياز بيقضى الامتياز بتاعه في مركز الاسنان اللى في مستشفى الرمد اللى عندنا في بنها
ومش عارف ايه لازمة انهم يعملوا عيادات اسنان في مستشفى رمد .... المهم رحت معاه الصبح ودخلنا على دكتور طيب اوي كدة قالى وريني عينك وريتله الكلكيعة المهم خدنى على غفلة واتكى عليها جامد ... جسمي ارتد مرة واحدة كدة وكنت متغاظ منه اوي انو عمل كدة وحسيت انو مش بيفهم ... لكن طلع ان كدة بيشتغل صح وقعدت اقول اليه اللى ودانى مستشفى حكومى بس كنت رحت عيادة وخلاص

وطبعا بقى راسم في دماغى ان المستشفى قذرة والممرضات مهملات والعيادة هتبقى زحمة
انما شفت عكس ده تماما الممرضات لابسين لبس نضيف والعيادات نضيفة جدا والادوات محطوطة في افران التعقيم وكله تمام التمام اللى كنت متوقعه وحصل ان الدنيا كانت زحمة وده شئ طبيعة نظرا لان الكشف بجنيه
تخيلوا الجنيه اللى بيشترى جرنان او يشترى 4 طعميات او يشترى شقتين فول او 20 لبانة تشكلتس او كيسين شيبس مش بتاع احمد السقا لا الكيس اللى بيبقى فيه خمسة او ست شبسيات دول مش عارف بيعدوهم ازاي

المهم اول ما دخلت العيادة اكتشفت مدى تعلق الدكاترة باخويا كل واحدة من دول صباح الخير يا دكتور اسلام ... اخوك ده ؟ ..... وتتنرفز بقى لما السؤال يبقى متكرر برغم الشبه الواضح والفظيع بينا يعني ... معتقدش يعني اخويا هيكون جايب معاه واحد صاحبه يقزقزوا لب في المستشفى ... انا اساسا بتخنق من ان الكلمة تتقال مية مرة في ربع ساعة مثلا لما اخويا الكبير محمود كان بيتجوز كان هوا مرمى في الكوشة وانا بقى استحمل تقل وغلاسة وفظاعة كلمة الف مبروك ... انا مالى انا اسلم على 200 او 300 واحد بيقولولى الف مبروك وعقبالك ما يقولوهالو هوا وخلاص

المهم دكتورة غلسة بقى شابة برضو متهيالى انها امتياز برضو او لسة متعينة جديد ومحجبة حجاب مشخلع ومن كمية المكياج اللى هيا حاطاها انا متهيالى انها صحيت من الساعة 6 الصبح عشان تلحق تعمل المكياج ... والله الناس دي بتتعب ... قلت مكياج مكياج اهو تدب المشرط في عيني وخلاص ونخلص من الفيلم الهندي ده ... شوية قالتلى نام على السرير قلتلها ده عيني ايه لازمته النوم على السرير؟؟ .. . المهم قصرت معاها في الكلام لانها كانت رغاية اوي قامت قايدة الاباجورة في عينى ... مش عارف عاملينها يعمو بيها العيانين ولا ايه ولا الغرض منها انهم يزغللوا بيها عين الناس عشان ميشوفوش العك اللى بيتعك في عينه ...

المهم ريحة المكياج كانت وحشة اوي قصدي ان كل مكياج كان ليه ريحة فكلو عمل ميكس وانتج ريحة مقززة اوي وانا اساسا بتضايق من ريحة اي حاكة كيماوية وضوافرها كانت طويلة ... اوي والله قعدت اتخيل ان ضوافرها هتخش تخرم عيني كنت مضايق اوي وقلت يارب خلصنى من الضيق ده .. ومكملتش الجملة ولقيت الدكتور الطيب الاولانى ده دخل مسكت فيه قلتله اعملى عيني انت والنبي بلاش هيا ... معرفش انا قلت الكلمة ازاي بس الدكتورة التانية اتكسفت كدة وراحت قعدت على المكتب ... قالى متقلقش اصلا محدش بيعمل حاجة وانا موجود

المهم الدكتور قعد يرغي معايا شوية وانت في كلية ايه وبتاع وقعد يشكرلى في قسم ميكانيكا وبتاع .. اتاريه بيستخرف عقلى وعمال يقطع في عيني اول ما المشرط غرز في جفنى جالى نفس الشعور اللى بيجلك لما تاخد حقنة الم سريع وحاد وقصير ... شوية الاقى الراجل عمال يزود ويروح يمين وشمال .. كان نفسي اشوف بيعمل ايه ده الكلكيعة صغيرة اوي المهم عمو الجزار خلص ولزقلى قطنة بيضة كدة على عيني ... ومن هنا اصبحت قرصانا يشار اليه بالبنان :) واسلام اخويا قعد يضحك اوي على شكلى .... وجت الدكتورة اياها تقلى وسع اما امسكهالك ... بصتلها بقرف ( مش احتقار بس انا الحمد لله عندى ايدين سليمتين الحمد لله ) بعيني الوحيدة ومشيت واخويا يقلها معلش اصله مبيحبش الدكاترة عشان يتدارك الموقف ... ومشينا وانا ماسك عيني

المهم روحنا بقى للصيدلية اديتها الورقة بتاعت الكشف عشان الدكتور كتب فيها العلاج ادتني مرهم وشريط كبسول كدة وقطرة ومضاد حيوي كيس مليان ادورية وانا من هبلى وسذاجتى بقلها: الحساب كام يا دكتورة :)) ... ضحكت قوى وقالتلى لا ده العلاج مجانا على الكشف يا باشمهندس ..... نسيت اقلكو ابقو اكتبوا مهندس قبل اسمكوا في الكشف لزوم الفشخرة يعني :))
خدت الدوا ودعيت لوزارة الصحة ودعيت للدكتورة اياها ربنا يهديها وتخف شوية ...

بس بجد انا رحت مستشفى حكومي وراسم في دماغى اللى بنشوفه في الافلام واللى بنسمعه من الناس مكنتش اتخيل انها تبقى بالنضافة دي والاكتر من ده كله الكشف بجنيه يا جدعان ينهر ابيض والعلاج بالمجان كمان ...
بس يا ترى من يسمع ومين يشوف ... يمكن النضافة والنظام اللى شفته حالة فردية بس لازلت معجب باللى حصل

يعني مش كل حاجة في بلدنا وحشة ... اخويا بيقلى فيه حاجات زي دي تانية كتر خصوصا ان هوا نفسه بيقلى ان الخلع بجنيه والحشو مش عارف ب 5 جنيه باين
واسمع ان فيه رحلات ومصايف رخيصة برضو كدة ... ده كفاية اشتراك المترو ال 3 شهور اللى ب25 جنيه

الغرض من ده كله ان الناس الفترة الاخيرة بقت تركز اوي على الحاجات الوحشة من غير ما تتكلم عن الحاجات الحلوة ... ده حتى لو شاف زبالة مرمية في الشارع يقلك اه يا حكومة @#$@$%# مش بتشيلي الزبالة ليه

الله ادم عليناالصحة والعافية والعقل والدين واجعل امراضنا تكفيرا لذنوبنا ... آمين

سلام

13 comments:

رفقة عمر said...

اولا الف سلامه عليك
شفاك الله وعفاك اللهم امين يارب العالمين
بجد ضحكتنى قوى عبدالله ربنا يخليك
طيب وانت لسه قرصان ولا خلاص الحمد لله
الحمد لله انك بخير
وابقى طمنا

A.SAMIR said...

سيبك انت من الكلام دة؟
الدكتورة كانت حلوة؟
يا رااااجل
حد يقول لدكتورة بلاش انتي وعايز الراجل هو اللي يعمل لك العملية
معقول كدة؟
بس رب ضارة نافعة
اعتقد ان انت كدة بقيت قرصان بجد
تحيااااتي

allah-slave said...

رفقة عمر

شكرا على السؤال الحمد لله بخير
بس بجد تجربة مفيدة اوي
دعواتك
-----------------

a.samir
الدكتورة كانت زي ما وصفتها بالظبط وانا بحب اسيب القارئ يتخيل بقى :)

انت لو شفت ضوافرها الطويلة اللى داهناها مونيكير تقول دي مش جاية تشتغل ولا عايزة تشتغل اساسا
يلا الحمد لله على النعمة
دعواتك

ا بـن عــمــر said...

ألف سلامة
عندك حق مكياج ايه ده
ليتنا نلتزم بتعاليم ديننا
أظن دى أول مرة أدخل على مدونتك

خبيب said...

شفاك الله وعافاك

ومستنيين رجوعك من جزيرة القراصنة بالسلامة

--

فعلا مش كل حاجة وحشة

ومش صح إننا نقعد ننتقد كل حاجة

ومش صح إننا نقعد طول الوقت نوصف في المشكلة اللي كل الناس عارفاها

مفروض نتكلم في الحلول اللي محدش حاول يفكر فيها أصلا !

وبرضه مش مطلوب إننا نرضى بنص حقنا أو ربعه

فيه منشآت معمولة ومصروف عليها مبالغ طائلة عشان تقدم خدمة جيدة

ده حقنا

لو قدمت (تلاتة أربع) خدمة جيدة

أهو برضه اسمه خدمة جيدة ! بس مخدناش حقنا كله

--

أحيانا الدكاترة بيتكبروا على المريض

وأحيانا المرضى بيغلسوا على الدكتور

لعبة توم آند جيري

بس عموما ، كلمة للدكتورة : الحجاب مش بس إني أغطي شعري

وخنقتي الراجل بالريحة :)

allah-slave said...

ابن عمر

الله يسلمك من كل سوء يارب

ويارب يارب متكونش اخر مرة تيجي فيها
لحسن مبحبش اقعد فيس المدونة لوحدى :)

--------
خبيب

الحمد لله اتماثل للشفاء بفضل الله

كلامك صح ومتفق معاك فيه بس الظلم هو نكران الحق
وان كانت دي تجربة فردية ولكن لا تزال موجودة
ولا ازال كتفق معاك في حتة ان ده مش كل حقنا
بس اذا مقدرتش اخد حقي كامل مش معنى كدة انى مخدش جزء منه
واحاول اخد الباقي
اهم حاجة مسيبش حقى

اتمنى متبقاش زيارتك الاخيرة

nonoymm said...

اول زيارة لمدونتك الرائعة بس بيتهيالي اني دخلت هنا قبل كدة من غير ما اعلق
واوعدك اني هحط رابط المدونة عندي
والف مليون سلامة على عين حضرتك الظاهر انه كان كيس دهني
خلي بالك بعد كدة الا العين يا باشمهندس وربنا ينورهالك بالخير يارب
فعلا موضوع الكشف بجنيه دة عندي وحدة صحية بيعملوا فيها كدة في العاشر وفي شبرا وللحق فيهم دكاترة ولاد حلال كتير فعلا بس سمعت ان الدوا بتاعهم المادة الفعالة فيه قليلة والله اعلم
بس اللي حضرتك قلت عليه دة فعلا موجود ولسة الدنيا بخير
وعندك حق جدا ان لازم يبقى فيه توازن وزي ما بنكتب عن السلبيات لازم نكتب عن اي ايجابيات نلاقيها حتى ولو قليلة
دمت بخير وصحتك بالدنيا

عاشقه الفردوس said...

السلام عليكم ياقرصان
شافاك الله وعافاك
الحمد لله جت سليمه
علي فكره انا معاك ان مش كل المستشفيات الحكوميه زباله
اصلا الحكوميه زي الخاصه
يعني اقصد لو الادويه والحاجات الطبيه هي اللي ناقصه يبقي ده عيب الحكومه في المستشفيات الحكوميه
اما الباقي ده بقي
فبيرجع لضمير الدكتور واحترامه للبني اددم اللي بيعالجو

اللهم بارك لك في صحتك

كويس اوي انك قلت للدكتورة لا
ماهياش ناقصه اختلاط
وبعدين المفروض دكتوره مش حاجه تانيه

ربنا يهدي

allah-slave said...

nonoymm

شكرا على مرورك وكلامك الجميل
وشكرا انك وصفتى المدونة انها رائعة
وشكرا انك حطيتى اللنك بتاعى في مدونتك

تحياتى

----------------
عاشقة الفردوس

شكرا على رأيك ودعوتك
تحياتى

go3d said...

ياعم الانذار ياعم عدينا ياشقيق ومحدش هيعرف يكلمك
ماشى يابيه اللى على على

مهندسه ان شاء الله said...

اولا الف سلامه عليك
ثانيا انت بتتكلم على المستشفى دا
انا بنصحك تروح مستشفى تأمين وشوف اللى بيحصل
دا مرة قدام عينى كتبوا لطفله عمره يوم او يومين علاج اللى المفروض يخدهيبقى اكتر من 3 اعوام وكانت اضرار خطيرة لاصغر من السن دا اتزكر انه القلب او الكبد حاجه زى كدا
ودرجه الاهمال فيها فظيعه
مممكن حضرتك علشان اخواك دكتور قاموا بالواجب معاك وكشف
اما اللى بيحصل ان الدكتور مش بيكشف ولا يحط ايده على المريض كله سماعى وممكن نعمل اقتراح دكتورك اون لين معاك فى بيتك
احنا مش قولنا ان مفيش حاجات حلوة فى بلدنا لا بالعكس فى حااجات كتير واكترهم الناس الطيبه والخير اللى فى بلدنا
بس اكتر لوحش فدا بيغطى على الحلو وبيخليه اوحش ما يكون
اسفه انى طولت مع انها الزيارة الاولى ليا
للمدونه بمحط الصدفه
وانا بتعجبنى مواضيع اوى اوى وكنت متابعه نشاطك على موقع الكليه بس مكنتش برد بس كلامك استفذنى اوى واسفه جدا

allah-slave said...

go3d
متشنكرين ياريس على الدعم المعنوي
كمان متنساش انى مسنود من ادامز بلاك :p



----------------------
ان شاء الله مهندسة

انا مش عارف بالظبط وجه اعتراضك على ايه

انا مقلتش في كلامى انى موافق على الفساد
- مقلتش في كلامى ان كل مستشفيات مصر حلوة
- لم انكر ميزة ان اخويا كان معايا .. ولكن مكنتش هتفرق كتير لو مكنش معايا .. لانى كنت رايح بدرى ولو كنت مشيتها قانوني كنت برضه هخش الاول لانى جاي من بدرى جدا
- حكاية ان الدكتور بيشتغل سماعي ده بترججع لذمة الدكتور
- انا رحت برضه مستشفى تأمين صحي جنبنا عشان اعمل عملية في صباعي .... الدكتور عملها على اكمل وجه .. ولكن استنيت كتير اوي في الدور
- بالنسبة للعلاج عيب علاج الحكومة ان المادة الفعالة فيه قليلة عشان يرهصو الدوا بس هما بيتغلبوا على العملية دي انو ممكن يديكي دوا لمدة طويلة
- حالة الطفلاة اللى ادوها دوا اكبر من سنها .... كأنك بتتكلمى ان الدكتور معصوم من الخطأ او ان الكلام ده مكنش ممكن يحصل في عيادة تانية
- من حقى وواجب عليا انى اتكلم عن الكويس حتى ولو كان بنسبة
0.0001 % ولا ايه ؟ يا باشمهندسة


شكرا على مرورك وياريت تزورينا تاني

مهندسه ان شاء الله said...

اسفه لو كان ردى زعلك
بس للاسف كل الحالات اللى كانت قدامى فى المستشفيات العامه تدل على الاهمال وعدم الاهتمام من قبل الدكاترة والممرضات والامثله عندى كتير وحصلت قدام عينا مش سمعتها من حد
انا بالعكس نفسى البلد تنظف وتطور ونبقى احسن عمر ما حد هيكره دا
وياريت فعلا تبقى فى مستشفيات عامه بالكفاءة اللى بتقول عليها
وان شاء الله مش هتكون اخر زيارة لانى بيعجبنى اسلوبك وافكار مواضيعك جدا