Monday, December 3, 2007

انتصار الضعف

بسم الله الرحمن الرحيم

هو يمكن العنوان غريب شوية ... ولكن اللى يدقق في الاربع سنوات الاخيرة يلاقى ان الخطاب الاسلامى ( وليس الحوار ) اتسعت دائرته اضعاف مضاعفة .. وده والحمد لله خير ... ونتمنى تتسع اكبر واكبر ولكن.... نحن في ذلك كما وصفنا الرسول صلى الله عليه وسلم كثيرون ولكن كغثاء السيل.

اديكو مثال بسيط لو فرضنا عندنا مجموعة كبيرة جدا من العدائين وكلهم ليهم نفس الكفاءة تقريبا وقلنالهم اللى هيوصل للنهاية هياخد الجايزة .. ولكن الجايزة دي فوق قمة جبل عالى والوصول للجبل عن طرييق ممر وحيد ضيق
المهم كل عداء هيغتر بقوته وسرعته وهيجروا كلهم في نفس الوقت وهيزاحموا في بعض ويقعوا بعض ويحاول كل واخد يفرض سيطرته على التاني كل واحد حسب امكاناته المتفاوتة من الذكاء والقوة المهم هيوصلوا للممر الضيق ده ويكتشفوا انو يا دوبك اللى هيعدى من الممر واحد بس
المنطق الانسانى في التفكير يخلينا نفكر في 3 حلول للمشكلة دي :


1- انهم يتفقوا فيما بينهم ويختاروا واحد يجمع بين الذكاء والقوة عشان يقدر يوصل للجايزة بس كدة  هيقسموا الجايزة بينهم بالتساوي بما فيها الفرد اللى تعب وراح جاب الجايزة

2- انهم يسيروا بنفس الاندفاع الأعمى خلال الممر الضيق ويبدؤوا يتساقطوا من على الجبل ويبقى واحد فيهم او لا يبقى فيهم احد على الاطلاق


اللى شرحته في المقطع السابق ازود عليه
3- انهم يبدأو يطلعوا الجبل عن طريق التسلق وبالتالى مش هيوصل الا قليل اوي واللى هيوصل ممكن يوصل بيه درجة من التعب انو ميقدرش ينزل وهوا معاه الجايزة ويموت من التجمد فوق الجبل

وهيا دي حالة الحوار الاسلامى .... خليني اشرحلكوا قصدي ايه

حاليا معظم مشايخ ودعاة العالم الاسلامى في نظري في حالة خطاب اسلامى وليس حوار اسلامى يعني كل واحد بينال قسط من العلم يطلق عليه لقب عالم وفي منهم يستحقون هذا اللقب وعن جدارة بس هما مختفين عن الاضواء ومنهم اللى يدوبك بيتمحك في العلم الديني وشهرته ضربت كل النكت اللى بتطلع على الحكومة
يعني ... يبدا يقلك الداعية فلان .. طب بتدعى لايه يا فلان بدعي لدين الله .. جميل بتدعى مين يا فلان ... اه .. اه بدعى المسلمين اللى اصبحوا في ضلال مبين ... على عيني وراسي طب ايه رايك تعمل اللى انت عايزه بس لازم تبقى محكوم بكتاب الله وسنة رسوله غير كدة انت ممكن تتكلم زي ما انت عايز يعني انت دلوقتى عندك حرية مشروطة .. في مشاكل يا عم الشيخ؟..  يقلك لا

دارت الايام وانشغل المسلمون عما سار عليه اباءهم واجدادهم فلو فرضنا مثلا ان التدرج الديني عبارة عن هرم نلاقي قاعدة الهرم الكبيرة هي عصر الرسول وكلما صعدنا الهرم قلت مساحة الالتزام الديني لحدما وصلنا في زماننا هذا الى قمة الهرم والله اعلم اللى بعدنا هيبقوا فين .... المهم المسلمون انشغلوا  وفقدوا السمة الوحيدة اللي  ميزت الامة دي عن اي امة تانية وهي الامر بالمعروف والنهي عن المنكر  انا مش بدعي لاي مذهب ولا انا شيخ .. انا عايزك تفكر بدماغك .

بدأت الامم اللى كانت عايشة في خير الاسلام اوروبا بالتحديد انهم يحسوا بنور العلم والنظام والانسانية من الاخر يعني بدأوا يشموا ريحة حاجة اسمها حضارة المسلمون ورثوا ميراث ضخم جدا من العلم في كل مجالاته .. علم اجتماع وفلسفة وادب وعلم نفس وعلم حيوان وعلم نبات .. الخ مش هطول عليكو زي كتب القراءة بتاعت ثانوي ... المهم بس من وجهة نظرهم شافوا ان المسلمين مش مستاهلين النعمة العظيمة اللى هما فيها فخدوا على نفسهم عهد قالوا احنا يا جماعة نحاول ننهى الحضارة دي من على الارض وان معرفناش نحاول نسوأ سمعتهم وان معرفناش خالص نستغل نقطة ضعفهم دي ونخليهم دايما ضعفاء بشرط ان السياسة دي تمشي من هنا ورايح مهما اختلفت الازمان والعصور والحكومات .. ماشي؟ .. ماشي

حصل اللى حصل في الاندلس وحصل اللى حصل في الحرب العالمية الاولى وانهارت الخلافة العثمانية ( الصورية ) واتقسمت بلاد المسلمين لاول مرة ولكن مكنوش هيعرفوا يقسموا الارض قبل ما كانوا فعلا قسموا النفوس بدأوا يقسموا فكرة المصير يعني مصر تحت احتلال بريطاني وسوريا تحت احتلال فرنسي يجي الغرب عن طريق عملاء عن طريق جواسيس عن طريق اي وسيلة هدم ويبدأوا يحسسوا المصري ان عغاية امله انه يخلص من الاحتلال الانجليزي لبلده مصر وباقى الولايات الاسلامية بقى اللى يقدر يدفع عنه المستعمر يلا معاه ربنا وليس في الامكان ابدع مما كان وحسبي الله ونعم الوكيل وربنا يطرد الظلمة من ارضنا وتحصل بعض التخاذلات من بعض الحكام وبعض الخدع من المستعمرين لحد ما ترسخت فكرة ان انا مصري وانت سورى وانا سعودي وانت مغربي .. ولعبوا على مية الف حاجة مرة حاجز اللغة مرة حاجز التعصب مرة حاجز التمييز العنصرى .. حاجات كتير ولسة مستمرة ولكن للاسف المسلمين مش بيتعلموا من اللى فات وياريت مثلا بين كل مقلب ومقلب فترة بحيث الناس تنسى .. لا..   دول كل ما يطلعوا من حفرة يقعوا في بير بيفكرونى باللى ماشي في وسط مطرة ومعاه شمسية شايف الشارع حواليه مبلول والجزمة متعاصة طينة وبرضه بيقنع نفسه انو طلاما راسه متبلتش يبقى الدنيا مش بتمطر ويبدا يفرض بغباءه احيانا وبغباء من حوله احيانا اخرى ان الارض مرشوشة مية مثلا او انو وقع في طينة وهوا مش واخد باله انما بيرفض يصدق خالص ان الدنيا بتمطر من حواليه

بس برضه الحمد لله المسلمين لسة فيهم خير فيهم كل فترة وفترة يطلع علامة فاهم الدين عن تفكير واقتناع
وبالتالى بيحقق الهدف وهوا الدعوة الحقيقية لله في الارض والفوز بالجايزة اللى الشيوخ المسلمين مش عارفين يا خدوها عشان ماشيين بمنطق العدائين اللى قلنا عليه بالرغم من ان الاحتمال الاول انسب احتمال لو رضي الشيخ الكبير انو يتساوى مع باقي المشايخ في المستوى بالرغم من انو اكتر واحد تعب
وده اللى مودينا في داهية بقى كل شوية واحد يسب الرسول صلى الله عليه وسلم وشوية واحد يتريق على الاسلام
وناس مسلمين بيتريقوا على ابناء جنسهم واختلطت المعاييز واصبحنا قطع شطرنج في ايد الغرب لما الغرب قال اننا معندناش حرية كلو طلع يقلك يا عم اقلع الحجاب عشان الحرية ومتربيش دقنك عشان الحرية ومتقراش قران عشان الحرية وشيل فقه الائمة الاربعة من مدارس الازهر وحط بداله فقه ميسر عشان نقلهم اننا عندنا حرية وبنتصرف زي ما احنا عايزين .. ولما يجي ناس من الغرب يعترفوا بفضل المسلمين ويقولوا لازم التمسك بالتقاليد ولازم كل عرق وكل طائفة تحتفظ بهويتها عندها بس بقينا نقول الدين الاسلامى دين التحرر والمسلمين متحررين والبسي الحجاب يابنتى وانتى رايحة الشغل وربي دقنك يابنى ومش مهم بقى تسرق ولا تغش ولا تكذب ولا ... ولا ... وتعامل زوجتك واولادك بالضرب والاهانة وطالما انت مربي دقنك واللى مربي دقنه مسلم والاسلام دين التحرر يبقى احنا كدة ماشيين في السليم

بعدين شيوخ وحكام مشيوا بالمنطق نمرة 2 وهو اننا مش شايفين تحت رجلينا مش هقول مش باصين لقدام لا ده احنا حتى مش شايفين تحت رجلينا ومندفعين وبنهاجم بعض ونشتم بعض ويوقع ناس ناس تانية من فوق الجبل كل واحد عامل فريق وكل الفرق ليها اتباع ووكل فريق يلعب بعواطف الناس زي ماهو عايز بالدين مرة وبالاسلام اللى رجع من جديد مرة ..  ومش واخدين بالهم انهم كلهم في سباق واحد ومش واخدين بالهم برضو انهم بيقعوا من على الجبل عشان الطريق ضيق وميعديش غير واحد بس

ونيجي للتفكير رقم 3 وهوا ان كل واحد يمشي بدماغه وطالما هفوز بالجايزة مش مهم ايه يحصلى ولا مهم ايه اللى يحصل لغيري اهم حاجة اوصل للجبل واخد الجايزة ومش مهم بقى انزل من الجبل ازاي ربنا هيبقى يسهلها يا عم .. وربك رب قلوب ... وربنا بيحاسب على النية

عشان كدة الواحد ميستغربش لما زمان نلاقي عالم كيمياء حافظ القران وله مؤلفات في الرياضيات .. وله كتاب في الفقه .. ومؤرخ وكل ده متجمع في شخص واحد والشخص الواحد ده زيه كتير فكان من الطبيعي ان العلم في مختلف فروعه يغرق العالم بافكاره وحضارته
بس ساعتها كان فيه امر بالمعروف كان فيه ناس بتؤمر الخلفاء وتقله انت من واجبك يا خليفة انك تشجع العلم .. من واجبك يا خليفة انك تنشر الاسلام بالعلم وبالاخلاق الحميدة وبتشجيع العلماء وانت يا عالم انا هسهلك كل سبل الراحة وهديلك الفلوس اللى تطلبها بس تديني علم انفع بيه شعبي وانشر عن طريقه الدين الاسلامى
طب بذمتكم مش ده اللى يعتبر حاليا اسباب تقدم اوروبا ومش هقول امريكا
اوروبا بتصرف على البحث العلمي اضعاف اضعاف اللى بنصرفه احنا على التسليح بلا خيبة عمالين نشترى في سلاح بنحارب بيه بعضنا وهما البحث العلمى عندهم في الصناعة بس لا ده بيخش في كل حاجة من اول التعليم في الحضانة .. لحد كيفية صنع محركات تعمل على الهيدروجين ( ده مثل مش اكتر ) عشان لما مصلحتنا بالعرب الهمجيين اللي عندهم بترول وعقول تخلص نبقى عندنا مصدر طاقة ومصدر قوة نذل بيه الشعوب اللى مش عارفة قيمة نفسها .... واغلبهم فاكرين اننا منستاهلش نعيش عشان مش عارفين قيمة نفسنا .... ولكن اللى يفرق حضارتنا عن حضارتهم ان حضارتنا كانت مستقرة مفهاش امراض اجتماعية الا نسب صغيرة اوي لان مفيش مجتمع كامل لان الانسان نفسه اللى بيقود المجتمع مش كامل على عكس الحضارة دلوقتى اللى تعتبر قوة ظاهرية فقط
اصل اساس المقارنة بين شيئين في اي حاجة في الدنيا يا اما ان الحاجة بتاعتى احسن منك يا اما ان الحاجة بتاعتى عادية وانت اللى حاجتك اوحش منى
فانا من رايي ان قوة اوروبا دلوقتى مش زي قوة المسلمين في وقتها مع اختلاف بسيط انهم كانوا عايشين في ظلام وجهل تام واحنا عندنا دايما بصيص امل
حضارتنا عريقة عشان خالية من امراض المجتمع وعلاجها كان علاج جذري ... بينما حضارة اوروبا السائدة والمسيطرة قائمة على انقاض حضارة سابقة مع وجود جميع امراض المجتمع والعلاجات لهذه الامراض عبارة عن مسكنات وليست علاجات جذرية
وده لاننا كنا بنطبق العدالة عن طريق منهج الهى ولما تساهلنا في تطبيقها معرفناش نسيطر على امراض المجتمع اللى ادت الى سقوط الحضارة
بينما حضارة اوروبا تطبيق العدالة نابع من المصلحة فقط وليس الا ... فمن رايي ان الحضارة الحالية مش باهرة ولا قوية عشان اللى عملها اقوياء .. ولكن لانه لايوجد حضارة اخرى سوى حضارة ضعيفة اهلها ضعفاء
وبالتالى الحضارة الاقوى الحالية ناتجة من انها حضارة عادية ولكن الحضارة المنافسة حضارة ضعيفة

اتمنى تكون مجمل فكرتى وصلت للى بيقرى
فاضل حاجة بسيطة بس وهيا وجهة نظري في الحل المنطقى ( من وجهة نظري) عشان العدائيين يطلعوا الجبل ويجيبوا الجايزة ... ان العدائيين دول يجروا في طابور منتظم حاجة كدة زي سباق التتابع بحيث الجهد الكبير ده يتجمع على اشخاص كفاءتهم متساوية تقريبا واي فرد ينقص من السلسلة تنهدم السلسلة بكاملها فيشعر هذا الفرد ان له دور مهم في جعل الاخرين (اللى هو منهم)  في الحصول على الجائزة ... كمان الحل ده يلغى فكرة الرئيس الاوحد اللى بيمشى اوامره على باقى العدائيين من جنسه ويشاركهم الجائزة دون ادنى تعب وايضا التغلب على صعوبة ان الممر لا يعبر فيه سوى فرد واحد فقط

الحمد لله الذى جعلنى مفوها ورزقنى لسانا يسبح بحمده ويقر بوحدانيته
والحمدلله الذى بعث رسولا من امتى وبنفس لسانى دعانى الى عبادة الله
والحمد لله الذى انزل معجزة من السماء قراءنا عربيا مبينا متحديا جميع الخلائق ان يأتوا بمثله
والحمد لله على نعمة العقل الذي يميز بين الصواب والخطا
والحمد لله على نعمة الضمير الذي يؤنب النفس على الذنوب
والحمد لله على نعمة القلب الذي يرق بعد التجبر والتيه
والحمد لله على كل نعم الله التى لا تحصى كما لا يحصى ثناءا عليه

سلام

Sunday, November 18, 2007

ولسة ... منشف دماغك

بسم الله الرحمن الرحيم

حديث قدسي


قال تعالى :( أنى والأنس والجن في نبأ عظيم أخلق ويعبد غيري، أرزق ويشكر سوايا، خيري إلى العباد نازل ،وشرهم إلي صاعد، أتودد إليهم برحمتي وأنا الغنى عنهم، ويتبغضون إلي بالمعاصي وهم أفقر ما يكونون إلي، أهل ذكرى أهل مجالستي، فمن أراد أن يجالسني فليذكرني، أهل طاعتي أهل محبتي ،أهل معصيتي لا أقنطهم من رحمتي، إن تابواإلي فأنا حبيبهم وإن أبوا فأنا طبيبهم أبتليهم بالمصائب لأطهرهم من المعايب، الحسنة عندي بعشر أمثالها وأزيد ، والسيئة عندي بمثلها واعفوا، و عزتي وجلالي لو استغفروني منها لغفرتها لهم من أتانى منهم تائبا تلقيته من بعيد ومن أعرض عني ناديته من قريب أقول لة أين تذهب ألك رب سواي ألك رب سواي). الحمد لله على نعمة الضمير

Friday, November 2, 2007

امبارح كان عمرى 20 ... بجد

بسم الله الرحمن الرحيم


منذ ما يقرب من العشرين عاما وقف ابي ينتظر صراخ المولود السعيد .... وخلال هذه الفترة فكر ابي فيما سيسميني ... خصوصا بعد ان ابدت حماته اللى هيا ام امى اللى هيا جدتى :) انها تسميني عبدالرحمن
لكن شاء الخالق ان يلهمه باية ( قال انى عبدالله اتانى الكتاب وجعلنى نبيا )
فسموني عبدالله كان هذا فجر يوم 1 نوفمبر عام 1987

الحمد لله والشكر لله انى اتميت من عمرى 20 سنة... معنى ذلك ان ربنا شاء ان يمج عمرى عندما كتبت الاجال في شعبان.. وياريت
لكن السنة دي عرفت يوم ميلادى من شخص عزيز عليا اوي .. عشان كدة السنة دي فرقت اوي معايا


اللى بيسعدنى اكتر ان الاستاذ اسامة القفاش بجلالة قدره علق عندى لاول مرة في مدونتى دي .. بعد ما انقطع عن التعليق بعد ما نقلت المدونة وظننت انى فقدته :)

Ossama said...

كل سنة وانت طيب يا باشمهندس
النهارده 1 نوفمبر عيد ميلاد سعادتك كما في بيانات حضرتك في نهاوند


والاستاذ عصفور المدينة برضو .. صاحب واجب وبعتلى تهنئة على الفيس بوك .. شكرا يا استاذى :)

مهما كان معملتش حفلة عيد ميلاد ولا الكلام ده بس برضو ان حد يعبرك في مناسبة زي دي .. بتفرق
مع البنى ادم
المهم يارب السنة دي تبقى معاصي اقل طاعات اكتر ... وتكون سلمة في عمارة ا ل تفوق باذن الله :)

سلام

Wednesday, October 24, 2007

يــــا الله

بسم الله الرحمن الرحيم

وحدي في ظلمة ليلي ... في وحشة دربي ... همي يثقلنى ... ذنبي يؤلمنى

وحدي أدعوك وأرجو ... من ذنبي أشكو ... مالى سواك ... أنا في حماك

فارحم عبداً ناجاك ... يا الله ... يا الله

أنت الرجا منك الهدى ... يا الله ... يا الله

رباه هداك ما زلت أسير.... وعلى العصيان ما عدت قدير

فأنر دروبي ... واغفرذنوبي ... فأنا الفقير

قد عاد القلب في الدرب يسير ... فرحا ً مشتاقاً لله يطير ... ورجاه رضاك يوم لقاك ... أنت القدير

فارحم عبداً ناجاك ... يا الله ... يا الله

أنت الرجا منك الهدى .. يا الله

يا الله

من اغنية "مناجاة" لسامى يوسف

Friday, October 19, 2007

Baba Ali

بسم الله الرحمن الرحيم






ايوة زي ما قريتو العنوان كدة بالظبط بابا علي مش علي بابا

ده يا جماعة احد اشهر الدعاة في الغرب وخاصة امريكا الايام دي .... هوا بيحكي عن نفسه بيقول انو اسلم وهوا عندو 28 سنة .. واعتنقه عن اقتناع تام ... تخيلوا 28 سنة كاملة وبعدها ربنا اذن له بالهداية
"علي" وده اسمه الحقيقي بيتكلم عن الدين الاسلامى مش الحلال والحرام .. لا بيتكلم عن المعاملات اللى المفروض المسلم يتعامل بيها .. وبيدلل دايما ان ده من اصل الدين مش من براه
" على " عامل اسلسلة افلام على اليوتيوب اسمها
والمشروع بتاعه اسمه The Remainder

وده لينك لليى عايز يشوف افلامه كاملة
Ummah Film

ودي مقدمة مبسطة بالعنجليزي يابووووي
Ummah Films is a Muslim film company that strives to provide Halaal (Islamically permissible) entertainment to Muslims and non-Muslims alike. We are not affiliated with any particular movement, sect, group, etc. We absolutely condemn in the strongest terms terrorism and any extremism done in the name of Islam and we refuse to associate ourselves with those who practice and condone such behavior and thoughts.

المهم هوا زي ما قلت قبل كدة بيتكلم عن تعاملات الدين الاسلامى بوجه عام بس في اطار كوميدي اوي .. وهوا بصراحة كوميدي جدا ... للى عايز يشوف عينة ممكن يشوف الفيديو اللى في البوست اللى فات
سمعت والله اعلم انهم اذاعوا فيديوهات لـ "علي " على الـ ام بي سي وعلى الرسالة بس عمرى ما شفتها بعيني... اهم بيقولوا

عشان مطولش .... دي مدونته هنـــــا
وده مــــنتدى معمول عشان التعارف بين اطراف العالم الاسلامى .. وبرضه الاعلان عن اجدد الفديوهات اللى هيا 100 % مجانية ولا تهدف للربح.... انا مسجل في المنتدى ده على فكرة
:D

تقدروا تقولوا كدة انى بقيت مقتنع جدا بفكرة التدوين المرئي واتمنى حد في مصر يبدأ يطبقه

اللهم اعز الاسلام والمسلمين ... ولا تجعلنا ممن هم في كثرتهم كغثاء السيل ... يا سميع يا عليم

Friday, October 12, 2007

يا جماعة ...رمضان مخلصش ولا حاجة

بسم الله الرحمن الرحيم


والله مش عارف ابدأ منين ... بس بجد بجد رمضان ده احلى حاجة قضيتها في حياتى ....
مع ان ده اول رمضان يعدي عليا ومعرفش ماما مخبية الزبيب والقراصية فين الا انو برضو حلو
وكان حلو لاننا اول مرة نفطر خمسة بحضور مرات اخويا من ساعة ما بابا توفى ( ربنا يرحمه ويفتح عليه من ابواب الجنة )
كمان اول مرة اعرف ان فيه اكلة اسمها كانيلونى ... مش عارف انا ازاي اكل اكلة معرفش اسمها ... بس اهى اتاكلت وربنا سهلها والحمد لله :)


طز في حمادة عزو اللى جه خرف على اخر عمره ... وطز في اللى فاكرة نفسها بتدافع عن حقوق المغتصبات وهيا اكبر واحدة بتدعو للاغتصاب ... وطز في اللى فاكرين نفسهم ظراف وبيعملوا مسسلسلات سيت كوم امريكي بطريقة بشعة ومليانة تجاوزات سواء كلامية او بصرية وطز في اللى شايفين ان رمضان سجن وليلة الوقفة تلاقيهم بيحششوا
وطز في اللى كانت لابسة الحجاب في رمضان وقلعتوا واللى كانت شايلة المكياج وحطته واللى كانت لابسة لبس محتشم وقلعته لما رمضان خلص .... بجد هوا الناس فاهمة رمضان انو ايه.

طز في اللى بيسرق .. وطز في اللى بيغش وطز في اللى بيبص على الستات في السوق وهما قد ولادوا اصلا
طز بجد في كل ده .. انا فرحان اوي ان رمضان عدى عليا بالشكل ده ... انا جالى فترة من بعد ما كنت في اولى اعدادى لحد السنة دي وفقدت الامل ان رمضان يبقى كويس .. ولكن الحمد لله رمضان رجع احلى واحلى .. واحلى

بصراحة لما كنت بسمع اللى بيقولوا دوق طعم القران كنت بقول هوا القران بينداق يا جدعان ... بصراحة اه ... وطعمه ملهوش وصف من كتر حلاوته ... يعني لو صليت على اساس انك في رمضان وكل الناس بتصلى فانت لازم تصلى ...غير لما تصلى في رمضان وتتخيل ان انت واقف قدام اللى خلقك وبتسمع كلامه ليك

متخيلين انا اقصد ايه .. مش هقعد ادي امثلة الموضوع ابسط من كدة بكتيييير اوي

الموضوع وما فيه ان ربنا خلق الانسان وعارف الانسان ده هيقصر وهيعصي ويفسد في الارض ... ربنا عمل شهر كامل للى عايز يتوب ويرجع ... عارفين ربنا اسمه الكريم ليه ؟ مش عشان بيدينا رزق او عشان بيحفظنا من مهلكات كتير

لا ربنا كريم عشان بيديك فرصة ترجعله بعد ما سبته .. ربنا كريم عشان بيقلك اعبدنى الشهر ده صح وانا هديك اضعاف اللى بتعمله في غيره ... ربنا كريم .... عشان هو كريم ... ومحدش عنده كرم ربنا .. ومينفعش يبقى حد عنده كرم ربنا

جربتوا مرة يا ترى تقعدوا تقروا في سورة لمدة ساعة كاملة سورة بسيطة ممكن تبقى سورة الاخلاص ممكن تبقى حتى سورة الكوثر .... جربت مرة تقف على ايه وتقول ليه ربنا قال كدة ومقلش كدة ... جربت مرة وانت بتقرى تقول يااااااااااه بقى ربنا يقصد كدة وميقصدش كدة

جربت تقعد في المسجد او في بيتك من غير ماتشغل حاجة ومن غير ما تكون نايم ومن غير ما تكون بتتفرج على التلفزيون ... مجرد انك عمال تفكر في ربنا ....

جربت احساس ان جسمك يقشعر وانك تلافى نفسك بتنتفض لما تسمع اية زي ( لواحة للبشر * عليها تسعة عشر*) اية زي (
انا جعلنا في اعناقهم اغلالا فهي الى الاذقان فهم مقمحون) يعني بجد اسمع حاجة زي كدة ازاي ومرتعش ... ولما اسمع اية زي ( هل جزاء الإحسان إلا الإحسان) ليه جسمى ميرتحش وليه محسش ان ربنا ان شاء الله محضرلى الخير ...كل الخير

والله اول سنة ابقى زعلان ان رمضان هيخلص بجد ... مش عايزه يخلص ... مع ان ربنا له حكمة انو يجعل رمضان شهر واحد بس ... لا اكثر ولا اقل ... سبحان الله العزيز الحكيم

انا البوست ده اساسا كنت عايز اتكلم فيه على ايات غيرت منى اوي بس مش عارف بصراحة اقول ايه ولا ايه
اتكلم عن سورة طه ولا الرحمان ولا الانبياء ولايوسف ولا الكهف والواقعة ولا الزخرف ولا هود ولا الحشر ولا مريم ولا ايه ولا ايه ... ياااااااااارب متخليش شعوري بيك في رمضان يتغير بعد رمضان
يا مقلب القلوب ثبت قلبي على دينك ... اللهم قوني على طاعتك .. اللهم لا غيرك يستعان به على طاعتك .. اللهم انا ان تركناك هلكنا فلا تتركنا نتركك انك انت الحليم الكريم .... اللهم كره الينا المعاصي والفسوق والفجور .. اللهم حبب الينا طاعتك ... واقسم لنا من رحمتك .. اللهم لا تتركنا عرايا فمن لم تستره فهو عريان لا ساتر له .. اللهم انك انت الواحد الفرد الصمد ... ان لم افهم هذه الحقيقة منك على لسان حبيبك المصفى فسأفهمها من تعاقب الليل والنهار ورزق الاسماك في اعماق البحار .... ربنا ظلمنا انفسنا لاننا ضعاف امام المعاصي ولكن من يغفر لنا سوى العالم بامرنا .... اللهم خضع لك الكون كله ما علمنا منه ومالم نعلم ... ولم يخضع ابليس فجعلته رجيما وحاول الانسان الا يخضع لك فجعلته اية وعبرة لمن يعتبر ..... اللهم لاتزغ قلوبنا بعد اذ هديتنا انك انت الوهاب ... يارب ان في قلبي لحلاوة ما وجدتها قبل الان فلا تزلها من قلبي حتى تقبضنى اليك يا ارحم الراحمين .. اللهم اجعل عملى خالصا لك ... لا اريد ان ينقص عملى رياءا ولا يمعة ... انك علام الغيوب ... اللهم اغفرلى ما ظلمت به نفسي وارحمنى رحمة اكون بعدها عبدا خالصا لك سائرا على نهج لا يضل من انتهجه
اللهم عبدا ناجاك... ولما امرته دعاك وانت علام الغيبوب غفار الذنوب .. ساتر العيوب.. مقلب القلوب .. مفرج الكروب
اللهم افرغ علينا صبرا وثبت اقدامنا وانصرنا على القوم الكافرين ..ز اللهم احشرنى مع من احب ... احشرني مع حبيبي ... احشرني مع حبيبي يارب ... وامنن علي بشربة من كفه لا اظمأ بعدها ابدا
يارب عايز اقابل الرسول في الجنة يارب ... نفسي اقابله وميكونش زعلان منى ... نفسي محسسوش انو تعب على الفاضي ...انو اتأذى بسببي على لافاضي ... يابر نفسي ابقى في الجنة مع الحصرى والشعراوي وكل الدعاة والصالحين ... يارب هل ممكن اقعد مع عمر بن الخطاب في يوم من الايام ..؟ واسلم على ابو بكر واقرى قران في الحنة مع عثمان واتناقش في الحديث مع علي ؟

انا شكلى اتكلمت كتير ... بس مش عارف اجيب كل اللى جواي ... على العموم اعتبروا ان فيه واحد اولد اسمه عبدالله

كل سنة وانتو طيبين

تحــــــديث

شوفوا الفيديو ده مش صعب انكو تفهموه لان انا شخصيا فهمتو لوحدي ... وهتكلم عن صاحب الفيديو ده البوست الجاي ان شاء الله


Thursday, September 6, 2007

Monday, September 3, 2007

Goals

بسم الله الرحمن الرحيم





بيقلك دايما حط اهدافك قدام عنيك عشان تحاول تحققها

اهداف قريبة المدى :
1- انى اخــــــس
2- انى اختم القران في رمضــــان ان شا ء الله
3- انى اصوم صيام صح مش مجرد امتناع عن اكل وشرب
4- انى اطلع رخصة سواقة :)
5- انى ابطل داء التريقة اللى فيا ده .. هو قل شوية بس انا عايز ابطله خالص عشان السخرية دي وحشة حتى لو على سبيل الهزار
6- اشترى كومبيوتر جديد ونضيف عشان البرامج اللى عندى بقت احدث من جهازى .. جهازى بيهنج على اتفه الاسباب :@

اهداف متوسطة المدى :
1 - انى ابقى كويس اوي في مجال دراستى وابقى مهندس كويس اوي مش عشان الشغل على الاقل انا هفرح اوي لما ابقى مهندس فاهم في تخصصي

2- انى اتعلم خط ... رحت سألت في معهد الخط عندنا في بنها قالوا لازم ادرس اربع سنين كاملة وطبعا ده مستحيل مع دراستى العادية او على الاقل هياخد وقت طويل ... جربت اعمل نفسي بنفسي بس كسلت.

3- انى اتعلم فرنساوي مع انها صعبة بس بحبها اوي بس عيبها انها مش منتشرة في مصر يعني ممكن انساها بعد ما اتعلمها لان اللغة حلها الوحيد الممارسة قولولى بقى هتكلم فرنساوي مع مين بس ده ميمنعش انى احطها في لستة الاهداف

اهداف بعـــيدة المدى :
1- اؤسس شركة او مصنع كبير واخرج منتج مصرى عالى الجودة
2- اتجوز
3- اسافر فرنسا للعلم والسياحة
4- اروح اقعد مدة طويلة في المدينة عايز اروح افضل قاعد ليل نهار في الروضة ... من غير مبالغة المدينة مشفتش زيها اي مدينة على الاطلاق في راحة النفس والهدوء يعني لو ينفع اقضى عمرى كله فيها واندفن فيها اروح حتى لو مقعدتش في المسجد النبوي برضه هتحس انك مرتاح نفسيا اوي
5-هدف مهم اوي مش هقوله دلوقتى


وفى ناس قالو كلام كويس عن تحقيق الاهداف وان يكون عندك هدف في حياتك

Aman without a goal is like a ship without a rudder.
الراجل من غير هدف زي السفينة من غير دفة
If we could first know where we are, and whither we are tending, we could better judge what to do and how to do it.
لو احنا قدرنا نحدد فين مكانا وقدرنا نحدد احنا ناويين على ايه هنقدر بشكل افضل نحكم على الاشياء اللى هنعملها وازاى نقدر نعملها
When you determined what you want, you have made the most important decision of your life. You have to know what you want in order to attain it.
عندما تقرر ان تفعل شيئا فانت قد اتخذت اهم قرار في حياتك . يجب عليك انت تعرف ماذا تريد في سبيل ان تسعى لتحقيقه
In life, the first thing you must do is decide what you really want. Weigh the costs and the results. Are the results worthy of the costs? Then make up your mind completely and go after your goal with all your might.
في الحياة ، اول حاجة لازم تعملها انك تقرر اللى انت محتاجه فعلا . بعديها وازن بين تكالف تحقيق هدفك وبين النتايج لما تحققه ونشوف هل النتايج هدفى لما احققه هتستحق تكاليفه او التضحيات اللى هقوم بيها ولا لا ؟ وبعدها ركز في انك تحقق هدفك وامشي وراه بكل ما اوتيت من قوة





Wednesday, August 29, 2007

ســـــــــــلة الفحم

بسم الله الرحمن الرحيم
الرسالة دي جاتلى على الميل ... وانا عادة مش بنقل حاجة الا لما تكون عجبتنى لانى انا بنفسي لمست الموضوع ده

اقروا بعينكو اليمين :)
قصة سلة الفحم
كان هناك رجل يعيش في مزرعة بإحدى الجبال، مع حفيده الصغير، وكان الجد يصحو كل يوم في الصباح الباكر ليجلس على مائدة المطبخ ليقرأ القرآن ، وكان حفيده يتمنى ان يصبح مثله في كل شيء، لذا فقد كان حريصا على أن يقلده في كل حركة يفعلها …وذات يوم سأل الحفيد جده



"يا جدي،إنني أحاول أن أقرأ القرآن مثلما تفعل، ولكنني كلما حاولت أن أقرأه أجد انني لا أفهم كثيراً منه ، وإذا فهمت منه شيئاً فإنني أنسى ما فهمته بمجرد أن أغلق المصحف !!!! "

فما فائدة قراءة القرآن إذن ؟!!!!!

كان الجد يضع بعض الفحم في المدفأة ، فتلفت بهدوء وترك ما بيده، ثم قال : خُذ سلة الفحم الخالية هذه ، واذهب بها إلى النهر ، ثم ائتِني بها ملئية بالماء!!!!

ففعل الولد كما طلب منه جده، ولكنه فوجىء بالماء كله يتسرب من السلة قبل أن يصل إلى البيت، فابتسم الجد قائلاً له : " ينبغي عليك أن تُسرع إلى البيت في المرة القادمة يا بُني " !!!

فعاود الحفيد الكرَّة،وحاول أن يجري إلى البيت ... ولكن الماء تسرب أيضاً في هذه المرة!!!

فغضب الولد وقال لجده،إنه من المستحيل أن آتيك بسلة من الماء ، والآن سأذهب وأحضر الدلو لكي أملؤه لك ماءً.
فقال الجد: " لا ، أنا لم أطلب منك دلواً من الماء، أنا طلبت سلة من الماء...يبدو أنك لم تبذل جهدا ًكافياً يا ولدي " !!!

ثم خرج الجد مع حفيده ليُشرف بنفسه على تنفيذ عملية ملء السلة بالماء !!!!

كان الحفيد موقناً بأنها عملية مستحيلة؛ ولكنه أراد أن يُري جده بالتجربة العملية ،فملأ السلة ماء ،ثم جرى بأقصى سرعة إلى جده ليريه ، وهو يلهث قائلا ً

: " أرأيت؟ لا فائدة !!"

فنظر الجد إليه قائلا ً: " أتظن أنه لا فائدة مما فعلت؟!!"....

"تعال وانظر إلى السلة " ،

فنظر الولد إلى السلة ، وأدرك –للمرة الأولى أنها أصبحت مختلفة !!!!


لقد تحولت السلة المتسخة بسبب الفحم إلى سلة نظيفة تماما ً من الخارج والداخل !!!!

فلما رأى الجد الولد مندهشاً ، قال له : " هذا بالضبط ما يحدث عندما تقرأ القرآن الكريم .... قد لا تفهم بعضه، وقد تنسى ما فهمت أو حفظت من آياته ..... ولكنك حين تقرؤه سوف تتغير للأفضل من الداخل والخارج ، تماما ًمثل هذه السلة !!!!


ولعلك تستفيد ايضاً من هذه القصة : أننا لن نتعلم شيئاً إن لم نمارسه ونطبِّقه في حياتنا ....فإذا أردتَ أن تتذكر ما فهمتَ وحفظتَ من القرآن ، فعليك أن تطبقه في حياتك

Saturday, August 25, 2007

اول الضحايا

بسم الله الرحمن الرحيم 

24-8-2007
تم بحمد لله تعالى زواج اخى محمود محمد مرتضى - بكالوريوس علوم - على مدام محمود محمد مرتضى :) بكالوريوس طب بيطري

Wednesday, August 15, 2007

ماي فرست ... سلطانية

بسم الله الرحمن الرحيم





الاخت رفــــقة
بارك الله فيها بعتتلى تاج على يد محضر وقالى حتما ولابد انى اجاوب عليه
وطبعا منقدرش نرفضلها طلب

بس قبل ما أبدا انا من هذا المزنق اطلب بل اصر بل انى الح اننا نسمى التاج ده السلطانية :)

اسم مدونتك؟

خُرم إبْرَة


لماذا اخترته ..وماهي نيتك من وراء اختياره؟
اخترته عشان احسن حاجة في السوق ... بس فيه صيني ارخص بس بيبوظ بسرعة :) ونيتي خير ان شاء الله
ما تقروا البروفايل اللى على الليمين وانت داخل ده وهتلاقوا كل حاجة بتسألوا عنها ولو في حاجة وقفت قصادكوا شوفها في سلاح التلميذ :)

هل فكرت في إغلاق مدونتك؟ والسبب؟
هوا انا لحقت افتحا لما هفكر اقفلها :@:@ ايه العالم دي

صورتك في المدونة ورمزيتها؟
والله لسة ملقتش صورة كويسة تعبر عنى بس لما الاقى هتكون اول واحد عارف

لماذا دخلت عالم التدوين من الاساس ؟

دخلته عشان لقيت الباب موارب خبطت محدش رد :)
لا بجد التدوين احسن فرصة عشان تتكلم وتقول اللى في نفسك من غير ما حد يقاطعك او يحجر على حريتك يعني انا في الاول كنت بكتب مواضيع في السات بتاع كليتنا بس العيال كانت بتخاف وكانت بتمسح مواضيعي فكنت بزعل اوي وده اهم سبب انى انتقل للتدوين
غير كدة صديقي مـــــــوشو
حط رجلى على الطريق

جمله قيلت لك فى وصف مدونتك؟

والله مكدبش عليكو يعتبر مفيش حاجة لسة اتقالت :( بس بكرة الناس تيجي وتشارك
بصراحة رفقة هيا اللى بتعلق عندى دايما وكلامها بيريحني اوي لانها زي اختى الكبيرة

التعليقات بالنسبه لك ,اهميتها؟

مهمة جدا بالنسبالى .. لانها بتبين مدى نفع الموضوع للقارئ وبالذات في المواضيع اللى بتحتاج مناقشة بهتم جدا ان حد يعلق عندى في المواضيع اللى زي دي

احلى بوست كتبته ...ضع اللينك , ثم اذكر لماذا؟
بصراحة انا عندى مواضيع مترمية على النت هنا وهناك يعني في سايت كليتنا وفي مدونتى القديمة
بس معتقدش بصراحة ان في حاجة كتبتها تستاهل
ممكن اكتر موضوع كويس موضوع اسمه هنرش مية في مدونى القديمة


أفضل بوست قرأته؟ وضع لينكه؟

السؤال د ه من ساعة ما التاج اتعمل ومحدش جاوب عليه كله بيجاوب نفس الاجابة
بجد معظم المدونين عندهم بوستات رائعه وبيكتبوا كتابات جميله قوى بس انا دايما افضل البوستات اللى بتعبر عن روح صاحبها وخارجه من قلبه واشعر فيها بصدقه
انا واخد الرد كوبي باست من رفقة ... معلش يارفقة
:)


أفضل مدونة قرأتها؟
برضو مصر على نوع الاسئلة ده ؟

حد قل أدبه فى التعليق إيه رد فعلك؟
محدش يقدر طبعا يقل ادبه عندى رد فعلى همسح الرد

أسوأ مدونة؟
فيه مدونات وحشة كتير يعني الىل شايفين انو من الحرية انهم يأبحوا او يخوضوا في الاعراض او يتكلموا عن الجنس دي عندى تتصنف على انها مدونات سيئة زي مثلا مدونة منال وعلاء ... او مدونة اسمها امرأة مثلية .. وكتير اوي من اللى مش عارفين يستغلو حرية المدونات او بيستغلوها استغلال خاطئ

أسوأ بوست أسوأ مدون؟
انت فاكر انى هرد

هيحصل ايه لإيميلك لما تموت ؟؟

اكيد طبعا هيتقسم على الورثة ايه الاسئلة دي والنبي

اديت الباسوورد لحد قبل كده؟
يعني ايه باسوورد ؟

كانت إيه طبيعة علاقتك بيه؟

يبقى ابن عمة خالة اختى من الام

اسمك؟
وانا ايش عرفنى ... اااااه قصدك اسمى انا :)
اسمى : عبدالله محمد مرتضى محمد يوسف اللبودي
والحمد لله اللبودى ده بحثت عنه في جوجل طلع انو كان عالم جليل اوي ايام الخلافة العباسية
فالحمد لله انى من نسل علماء حتى لو كان تشابه اسماء :)

المشهور بيه وسط اصحابك ؟
امممم
كتير اوي
عبدالله وعبوود وعبده وبيدو وبودى وبو !! وبوبا وكتير اوي مش فاكر دلوقتى
اصل عبدالله اسم خفيف بيتدلع باسامى دلع كتير

شخصيتك نوعها ايه ؟
مصري صنع بلدها
انا اطالب بحبس اللى عمل التاج ده اصل الاسئلة مش ولابد يعني
يعني ايه نوعها ايه .. دكر يعني ولا نتاية ؟
ما توضوحوا اسئلتكوا
متنرفزوناش بقى

السفر بالنسبالك ؟
قرف - عرق - بهدلة - احتاك بطبقى السواقين الغير آدمية في اغلب الاحيان .. مش كل السواقين طبعا
يعني ملقتلوش فايدة من السبع فوايد اللى بيقولوا عليها

المود بتاعك ؟
بحب الضحك اوي اوي واحب اللى بيحب الضحك سواء راجل او ست يعني انت ممكن تاخد الل انت عايزه منى لو بسطني وخلتنى اضحك
بس معلومة بسيطة انا مبدحكش الناس الا لما بكون في اقصى درجات الحزن والاكتئاب شايفين الغرابة ؟
ايه ده شايفينها بجد .. ههههههههه

الاكلة المفضلة ؟
مش هعرف ارد عشان الرد هيطول
بس على العموم باكل كل حاجة والحمد لله
ماعدا السبانخ والخبيزة والكوسة
مبحبش اكوسة في اي طريقى ليها سواء مطبوخة او محشي
وحاجات تانية كتير بحبها
بس اهم غذاء عندى هوا الفاكهة
يعني اديني فاكهة ولا تأكلنيش مش هقول حاجة
الفاكهة بجمييييييييع انواعها

الصفات اللي أخدتها من بابا؟
اممم
تقدروا تقولوا طيبتو ... بابا كان طيب اوي ولحد دلوقتى الناس بتترحم عليه وتقعد تدعيله لان الناس حبته لافعاله
وخدت من بابا الفضول ... بابا كان بيحب يجمع ملعومات عن اي حاجة وكل حاجة
يعني كان بيفهم في الزراعة جدا وكان بيفهم في الفن والموسيقى ومتبحر في القران الكريم والحديث الشريف ... وحاجات كتير اوي نفسي ابيقى زيه في الحكاية دي

وخدت منه خفة الدم والشبة بينا كبير اوي في الملامح والتصرفات
الحمد لله على كل شئ ..
ربنا يغفرله ويرحمه ويسكنه فسيح جناته ويحشره مع المصطفى صلى الله عليه وسلم
ويجعلنى الولد الصالح الذى يدعو له
بجد ببقى محتاجه اوى معايا في اغلب الاوقات
بس الحمد لله اكيد حكمة ربنا ابعد من قصر نظرنا في الحياة

الصفات التي أخدتها من ماما ؟
الطيبة
العند
الحنية
خفة الدم برضو :)

اكتر ست حاجات بكرهها؟
البنت اللى لابسة حجاب مشغلع الولد اللى مسقط بنلطون وبيتمايع وعايز يبقى روش ومش مديني علامة واحدة تبين انو راجل الشيخ اللى بينافق الناس وهوا مبيعاملش الناس زي ما بينصحهم اللى بيحقق الاية :( اتأمرون الناس بالبر وتنسون انفسكم وانتم تتلون الكتاب افلا تعقلون ) . صدق الله العظيم

اكتر ست حاجات بحبها؟
الكتاكيت الصفرا الصغيرة :)
او اي حاجة صغيرة لسة مولودة :)
بحب منظر الشروق لما اشعة الشمس تبقى بتحاول تخترق السحاب ومش عارفة
وبحب منظر الغروب بلونه البرتقالى المحمر ده
بحب لما اضحك حد جامد بحس انى ساهمت في اسعاد انسان
بحب لما اصالح اتنين ببعض
بحب لما احل مسألة صعبة اوي وبفرح لما اخلص رسمة بعد مجهود 4 او خمس ساعات
بحب حاجات كتير اوي مش هقدر اختصرها

طبعا مدخلتش ربنا والرسول والوالدين والاخوات والاصحاب لان ده حب مفروغ منه

الشغل بالنسبة لك ؟
والله انا مستنى بفارغ الصبر اخلص كلية عشان انزل للحياة العملية
متقلقوش انا مش شايف الحياة وردى ولا حاجة انا عارف انو هتطلع عينى على بال ما حياتى تستقر بس بردو مش شايف ان في شئ صعب للي ناوي يتعب


الانترنت بالنسبة لك؟
من غير مبالغة حياتى كلها مش عشان التدوين بس لا لانو بجد ده الاختراع اللى جيلنا هيفتحر بيه على الاجيال اللى بعدها يعني موسوعة متكاملة في اي حاجة .. صدق اللى قال انها حياة افتراضية
كل شئ نفسك فيه بتلاقيه يعني معرفة بلاحدود

وفي النهاية ابعت سلامى لجدو وتيتة في الجيزة وعمو اشرف في بنها وعمو خالد في السويس وخالو اسامة في الدقهلية وخالو عصام ومحمود وادهم ويوسف وكل اللى بيتابعوا مدونة خرم ابرة :)
بهزر طبعا

اللى هيلبسوا السلطانية بعدي


عبدالله -مفيش فايدة

موشو- اللى محدش يحوشو

عالمها السحرى

محمد حبيب

Wednesday, August 1, 2007

هيييييييه

بسم الله الرحمن الرحيم





الحمد لله عديت السنة دي بتقدير جيد الحمد والشكر والفضل لله

بس الاحسن من كدة انى عرفت النتيجة من شخص عزيز عليا اوي
غير كدة المكالمات مكنتش بتبطل
وكنت كل مرة بتظاهر انى مش عارف النتيجة عشان محرجش اللى بيكلمنى
الحمد لله مع انى كنت عايز اجيب ج ج او م في الرسم بس الحمد لله جيد مش وحشة بدرو
الحمد لله


( رب اوزعنى ان اشكر نعمتك ) . صدق الله العظيم


Friday, July 20, 2007

إمـــــــــام الدعاة

بسم الله الرحمن الرحيم

بصراحة مش عارف ابدأ منين ... حاسس ان الموضوع اكبر مني اوي

بس زي النهاردة كدة من 10 او 15 سنة كنا بنتجمع حوالين التلفزيون بعد الصلاة عشان نتفرج على برنامج الشعراوي

لحد دلوقتى موسيقى التتر بترن في ودني

كان بسيط لابعد حد حتى لو مش بتحب النوع ده من البرامج هتحب تسمع ليه كشخص ... كأنسان

مش هقدر بقى اقول ولد الشيخ الفلانى في مدينة كذا سنة كذا وتجرع العلم منذ نعومة اظفاره والكلام ده

بس الشعراوي كان بيتعامل مع القران ببساطة شديدة بيتعامل مع القران اكنه حكاية بتتحكي وكان بيعجبنى اوي توضيحه لمعانى القران بكل بساطة كانه واحد قاعد معاك في اتوبيس او حتى واقف جنبك في طابور عيش

سمعت من ناس اثق فيهم انهم استضافوا ابن الشيخ الشعراوي في برنامج
فوهو بيحكي عن والده الشيخ الشعراوي رحمه الله قال ان لما الشيخ الشعرواى كان في سكرات الموت قال " ياااه
انت جايلى بنفسك .. انا مستاهلش مجيتك دي

وقبل ما يتوفاه الله قال ( اشهد ان لا اله الا الله وانك رسول الله ) طبعا اكيد فاهمين معناه ايه اللى هوا قاله ده

بس اللى مش لاقيله فايدة ان حسن يوسف يعمل مسلسل عن الشعراوي يعني محبذتهاش اوي الفكرة دي
ولا حتى دخل قلبي تمثيله ده... كل اللى عجبني في المسلسل اغنية التتر بتاعة محمد فؤاد

صحيح من المفارقات اللى في حياة الشعراوى انو اتجوز وهوا في المرحلة الابتدائية كعادة ابناء الريف الوقت ده .... وخلف 5 ابناء 3اولاد وبنتين
سافر السعودية ورجع مصر لما عبدالناصر اتخانق مع الملك سعود وقتها
ومسك مكتب شيخ الازهر وبعديها تدرج في الوظائف لحد ما مسك وزارة الاوقاف المصرية واستقال لسبب ما انا اجهله

مش عارف مش قادر اقول كل اللى جوايا عن الراجل العظيم ده
يارب اكرمنا بشيخ جليل زيه كدة يااااااارب
عارف ان التدوينة مش قد كدة
بس اهو الواحد بيحاول
وحضرتنى الاية دي دلوقتى

قال الله تعالى : ( مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلا ) . صدق الله العظيم


تحديث





Wednesday, July 18, 2007

ربنا يجعلها مدونة السعد 18-7-2007

بسم الله الرحمن الرحيم

ايها الاخوة الاعزاء

ازف اليكم خبرا قد يجدها البعض محزنا وقد يجده البعض مفرحا

اننا ومن هذا المزنق ازف لكم خبر انشاء مدونتى الجديدة على البلوج سبوت لما سمعت عنه من تقدم وراحة في التعامل

نزولا على رغبة القراء

ربنا يجعلها قدم السعد