Follow by Email

Tuesday, July 22, 2008

الحمد لله

بسم الله الرحمن الرحيم

22-7-2008 

الحمد لله عديت ... ولكن بمسمارين في الحيط

وقدر الله وما شاء فعل

براحتى

بسم الله الرحمن الرحيم

بلا مقدمات :

  • هلبس اللى انا عايزه واللى ترتاحله نفسي
  • هضحك براحتى بصوت عالى
  • هعلى صوتى وانا بقرى قران
  • هسرح شعرى زي ما انا عايز لايقة مش لايقة ده شعري وانا حر فيه
  • دقنى طويلة قصيرة لما يجيلي مزاج هحلقها انا بزهق من كتر الحلاقة ودقنى ما شاء الله تاني يوم بتكون مخضرة فمستحيل هعرض نفسي لعملية الدباغة دي كل يومين
  • لحد ما موت هسمع للحصرى ومش هلاقى حد ينافسه في قراءة القران ولو بعد ميت سنة وده قرار نهائى عاجبك الشيخ عبدالباسط اسمعله عاجبك مشارى ولا الغامدي اسمعلهم انا مالى بيك
  • هقول لسواق الميكروباص يوطى التسجيل سواء قران او الاغاني الغريبة اللي بيسمعوها دي يا يشغله بصوت هوا بس اللى يسمعه يا يريحنا ويقفله
  • هكمل كتاب على بيجوفيتش ورواية مائة عام من العزلة والاربع كتب بتوع الغزالى هقراهم تاني و ومش هشيل تفسير ابن كثير من جنب السرير ولا فقه السنة بتاع سيد سابق براحتى أوضتى وانا حر فيها
  • مش لابس كرافتة على البدلة تاني والساعة هلبسها في ايدي اليمين وايه المشكلة لما اكل اللحمة بشوكة عشان اعرف اقطعها وايه المشكلة لما اكل محشي البتنجان بشوكة لازم اوسخ إيدي وألغوص يعني عشان اعجب حضرتك لا هاكل بشوكة ولو مش موجود علىالترابيزة هقوم اجيب حتى لو كنت برة بيتي ... وملكش دعوة لو مسكت الشوكة باليمين ... ليك حاجة عندى ؟
  • هسأل على الفيلم قبل ما أخشه ومش دافع اكتر من 15 جنيه في التذكرة كفاية انى بضيع وقتى وفلوسي على الاقل احاول اوفر في حاجة منهم ... ومن الاخر مش داخل الا لما نكون ولاد بس
  • مش هقوم من على الكرسي بتاعى في القطر لمجرد انها بنت ... وبتستهبل كمان ... انا حاجز تذكرة منيش راكب سفلقة زيها
  • ايه مشكلتك لما اقلك الف شكر بدل ميرسي اهم حاجة ان الفكرة وصلت مش كدة ؟
  • ايه ياعني لما يكون دايما الراديو شغال على القران الكريم اه زمان كنت بسمع نجوم اف ام ومبقتش اسمعها عشان مبقتش تجيب اغاني حلوة وكنت بسمع nile FM ومبقتش تجيب اغاني حلوة هيا راخرة منيش شيخ عشان بسمع اذاعة القران الكريم واللى انا فيه ده مش فترة وهتعدي
  • هتفرج على الجزيرة الوثائقثية و OTV
  • هضلم الاوضة بين المغرب والعشا لما بيجيبوا قراءة الدورى
  • هلبس جلابية وانا رايح اصلى
  • هقوم اصلى في المسجد لو عندى ضيوف او لو انا كنت عند ضيوف ومش عسلم على قرايبي البنات بالايد طلاما بخش واقول سلامو عليكو وصوتى مسموع خلاص ملوش علاقة بقى باني بتكسف انا مش شايف من الفطرة ان واحد يمسك ايد واحدة غريبة ... خلاص محدش يفتح الموضوع ده تاني بقى
  • هسمع سيد درويش ورباعيات جاهين اللى بصوت سيد مكاوي ولينا شامميان ووسط البلد ورانيا شعلان وسعاد ماسي وموسيقى عمر تابيلاك ومبسمعش لعمر خيرت .. ووالله عارف ان مشهور ... وهسمع حبة الموسيقى التركي اللى على الجهاز .. واغانى منير اللى انا منقيها مش ذنبي ان ذوقى جاي على الاغاني اللى مفهاش غزل ملو علاقة انى مش زفت رومانسي ... ايه تعريف الرومانسية اصلا ... وايمان البحر درويش وابتهالات طه الفشنى وخصوصا بتاع يا ايها المختار وابتهالات نصر الدين طوبار وخوصوا يا مالك الاقدار ويا من رضيت لنا دين الهدى دينا ... وابتهلات محمد عمران خصوصا ترقرق همستى نغما وفي الليل ياربى وفي الاسحار وكل الابتهالات اللى بسمعها دايما ومهياش على بالى دلوقتى
  • كل مرة هقومك لما تشرب جنبي سجاير
  • هاكل رقاق باللبن والقرص اللى بجيبها من عم ابراهيم وانا راجع من الفجر واحط عليها الجبنة الرومى واسيبها في الفرن تسيح
  • عملت الرخصة الحمد لله وبرضو مش هخرج بالعربية
  • مش هقول لأى ظابط يا باشا حتى الواد انس صاحبي
  • البنت اللى انت لسة باصص عليها دلوقتى حلوة بس مش مزة والله الفرق كبير بس الى هناك دي مزة  فهمت الفرق بقى ؟
  • هما خمسة اللى بسمعلهم قران : الحصرى والمنشاوي والبنا والشيخ رفعت الصبح والشيخ مصطفى اسماعيل
  • التقدير حاجة واللى في دماغى حاجة تانية ... ليه طيب اللى جايبين تقديرات بيجوا يسألونى واشرحلهم طلاما انا وحش كدة ... وهل ده اصلا مقياس ؟ والدنيا مش موجب وسالب ومش ابيض واسود وبرضو مش يا طالب يا معيد
  • عادي يعني لما البس الحزام من غير لما يكون فيه لجنة او واقف في اشارة
  • هلبس الجلابية ومش لابس طاقية
  • الشيخ في نظرى هو اللى دخل الازهر من اول ابتدائى لحد ما اتخرج من الكلية ولازم يبقى قسم فقه مقارن
  • مكفرتش لما قلت ان محمد حسان حلو بس مبحبوش هوا بالعافية يا بنى
  • مش هعمل فرح ب 20 الف في دار الدفاع ولا ب 40 الف في ماريوت الزمالك ولا ب 60 الف كونراد ومراتى مش هترقص قدام الناس ومش هتحط مكياج فاقع وعموما مش هجيب حاجة غالية بدافع الترف هجيب حاجة غالية بدافع ان الحاجة الغالية دي هتعيش وبرضو مش هعمل فرح في مسجد الفرح يعني فرح بس من غير معصية ... ومفيش حاجة اسمها فرح اسلامى يعني اللى بيعمل فرح مش اسلامى مبيبقاش مسلم وليه تسموه اسلامى ما تسموه فرح حلال احسن

سلام