كلام الناس ... بيقدم وبيأخر

بسم الله الرحمن الرحيم

لست مطالباً عزيزي القارئ بأن تقرأ هذا الموضوع بشمولية شديدة ... هذا ليس موضوعا مسبق التجهيز لذا لا تقرءه وانت مسبق الاقتناع سواء بصحته او عدمه ... كما ان هذه المقدمة ليست للتأثير عليك او محاولة منى لجذبك الى صفى الفكري ... انها فقط تأملات او لنقل انها بديهيات فخذ ما يتفق منها مع سلوكياتك واعتقادك ودع الغريب منها عنك لصاحبها فهو اولى بها . اصر على ان تفهم ان الغرض من هذه التدوينة شخصي بحت وان لم تستفد من هذا الكلام فلا عدوان على وليس لك الحق في ابداء اي اعتراض لانه سبق وان حذرت .

منذ فترة وجيزة وقعت في خطأ جسيم جدا وهو انى في احدى المرات بعد مناقشة حادة مع احدهم استسلمت للضعف الفكرى في النقاش على غير عادتي ... فوجدتنى وللمرة الاولى في حياتى اطلب منه ان يسكت ويغير الموضوع واعلنت انهزامى له على غير عادتى من التشبث بمحاولة فهم الاخر ... وما آلمنى حقا انى قمت بهذا الفعل خوفا من يغير كلامه شيئا في نفسي ... وكان هذا من اغرب ما حدثت به نفسي عندما انزويت بها افكر في اسباب هذه الانتكاسة الرهيبة التى امر بها ... فوجدت ان لاشئ يبعث على الخوف او الرهبة وان تصرفى كان نتيجة طبيعية لانى وقعت في مصيدة كنت دوما احذر نفسي من الوقوع فيها وهيا التشبث برأى من الاراء على عمى وجهل بالاراء الاخرى وان كانت خاطئة

بستغرب جدا البنى ادم اللى يكون هدفه الاول والاخير انو يحاول يخليك تعترف بانه على صواب وانك ( ان لم يكن باقى الناس برضه ) غلط في غلط والنوع ده من الناس يمكن هزمه بسهولة بمجرد انك تبينله انه صاحب الرأي الفريد واننا دراويش في تكيته والنوع ده لا يرجى منه اي خير ولا تستفيد ابدا بنقاشك معاه .

ونوع تاني يحكم على الناس بمجرد الرؤية والمظهر فاللى لابس جلابية بالنسباله شيخ واللى يصلي في المسجد بالنسباله علامة عصره واللى حافظ القران ولو سور قليلة فده في الجنة وش.... وطبعا منيش محتاج اقول انه بيفتكر ان اللى مبيصليش ده كافر ... وفيه فيرجن معدل من الناس دي يؤمن تمام الايمان بانك يا تبقى زي الشيخ محمد حسان يا اما ابقى قابلنى ان دخلت الجنة والنوع ده بيوجع دماغك يوميا انه بيفهم الناس من النظرة الاولى ومؤهل تماما انه يحللك شخصيتك بول وبراز ان استلزم الامر عشان يقلك انت فيك ايه وانك كتاب مفتوح ومراية 40 × 60 وانه بسلامته يعاني من انه يفهم الناس ويقلهم على عيوبهم وعادة ما تنتهي المناقشة بان يطلب منى اقرار مواهبه بسؤال ... ها ايه رايك مش انفع استاذ علم نفس ؟

نوع تالت يميل الى تأليه كل ما هو معجب به فلا تجرؤ على ان تقول ان فيه شيخ يقرى القران احسن من الشيخ عبدالباسط ولا واعظ اعظم من الشيخ محمد حسان وامك اكيد مش راضية عنك لما تقوله ان فيه لعبة كورة احسن من الفيفا ..... متستغربش كلامى وحاول تفهمه لو سمحت
نوع رابع يسخر منك ليل نهار وقلك انا عايز افهم انت على قدا ما بتصلى وتصوم بس بيتنجح بمقبول وايه علاقة العبادة بالدراسة انا عايز افهم ... معنى كدة ان الكافر ربنا بيسقطه ( افلا تعقلون )

على غير المتوقع لما بدأت اتعمق في فهم ديني وتقربي من ربنا بدأ الناس يحطونى في قالب جديد تماما ففجأة من يوم وليلة اصبحت عم الشيخ عبدالله ... الموضوع كان موجود من زمان بس بدأ بقى ياخد طابع رسمي لما مبقتش افوت صلاةالتراويح في رمضان وبدأت اواظب على الصلاة في المسجد بعد رمضان ... مع انى كنت مواظب على الصلاة في البيت او الكلية ولكن فرقت مع الناس اوي حكاية الصلاة في الجامع ...

في رمضان اللى فات ده حياتى اتغيرت اوي .. من ناحيتي نويت بعد كدة انى افهم الدين ده صح ومن ناحية تانية بدأت الناس تهاجمنى فمثلا ممكن يتبصلك باستغراب ممكن يوصل لاحتقار احيانا لما تقول لفلان هعدى عليك بعد المغرب مثلا ولما يقلك اقابلك فين تقله هقابلك في الجامع اللى عندكو الاقيه يضايق فعلا ويقول ربنا يتقبل يا عم الشيخ ... ساعات مبيقلهاش ببقه لكن كتير من الناس بيقولها ..... يعني مش واجب عليا كل مرة انى ابين للناس يا جماعة انه لا يستحق احد لقب شيخ في عصرنا الحالى الا لما يكون واحد متخرج من الازهر او من معاهد اعداد الدعاه المهم يبقى معاه شئ يؤهله انو يبقى شيخ مينفعش ابدأ اقول على واحد شيخ لمجرد انوبيصلى او بيقرى قران او انا " بشوفه " بيعمل كدة

واحد من الناس قالى اللى انت فيه ده يابنى مرحلة وتعدي ... سبحن الله يعني كدة بقوا يصنفوا التدين على انه نزوة عابرة زيها زي شرب الحشيش ومصاحبة البنات ..مش دي فترة وهتعدي برضه ؟

وان خلصت من دول يجيلي ناس تانية بيحاول بس انو يعمل معاك مناظرة ويكون كلامى ليه ... انت شفتنى قبل ما
" استشيخ " على حد تعبيرك كنت بشرب سجاير مثلا وبطلت او كنت مصاحب بنات ودلوقتى تبت وانبت هل كنت بتشوفنى ليل نهار عمال اسب واشتم يقلك لا ..طيب طلاما لا ايه الضرر اللى طايلك من انى بواظب على الصلاة في المسجد

حاجة غريبة جدا انى احس بخوف وانا بقرى قران او لما اعوز اقرى قران بحاول اشوف مكان مفهوش حد خوفا لحد يتريق عليا او يحطنى في قالب انا المفروض ما اتحطش فيه وفي نفس الوقت ده بدأ يجذب ناس ليا عمرهم ما كانوا بيسلموا عليا ولا يعبرونى ودلوقتى بقيت اشوفه يضحكلى وفجأة بقيت حبيبه في الله وياريت كمان اربي دقنى وكفاية " الضلال " المبين اللى كنت فيه ... طيب يا اخي الفاضل يعني هل مجرد وجودى في المسجد جنبك خلاك تعاملنى بالشكل ده طب لو انك مطمئن بالايمان كان فين ده من زمان ولا دلوقتى بقيت تصنفنى وتحطنى في قالب " الاخ"
فين تقوى الله ومعاملة الناس لوجه الله ... لا يعرف ما في نفس الانسان الا الله يبقى منحكمش على الظاهر ونسيب الناس في حالها احسن

هل من الطبيعي ومن الفطرى انى المفروض ادافع عن نفسي عشان بصلى وبقرى قران وببين اهتمامى بالفلسفة الاسلامية والتفكر في الله ... يعني المفروض اكتم ده على اساس ان كفار قريش محاصرين البيت

هل من الطبيعي اتعرض للهجوم لما زي اي انسان طبيعي عايش حياته الطبيعية بيضحك ويغضب وممكن يتفرج على فيلم او يسمع اغنية او يقول رايه في حاجة او يشجع فريق معين .. واحد مرة سمعنى بقول لواحد عايزين نروح ساقية الصاوي خدنى على جنب بعدها وبيقلى انت مش كان ربنا تاب عليك ساقية الصاوي ايه اللى عايز تروحها على اساس ان ساقية الصاوي دي porno club مثلا حاجة غريبة جدا

مين اللى قال انك عشان شفتنى بصلى الصلوات اللى هيا اصلا فرض تحطنى في القالب ده يعني المفروض ان ده كدة خلاص غاية الايمان امال لو كنت بصلى النوافل والسنن الرواتب وقيام الليل كنت قلت ايه
مين قال ان الصيام هوا صيام رمضان بس وانت مالك اصلا اصوم اتنين وخميس ولا لا ومنيش مجبر انى اقلك الاسباب كمان ... الناس لما تعرف انى صايم بالرغم انى بخبي ده بتبصلى بصة غريبة اوي بجد يعني صيام النوافل ده غاية الايمان في نظرك ولا زلام دقنى طوله امترين عشان متستغربش صيامي

واحد يقلى استعينوا على قضاء حوائجكم بالكتمان ... بس هل الكتمان يتدرج تحته كتمان في العبادة ... ده حاجة ظاهرة ومطلوب مننا اننا نظهرها منيش انا في امريكا ولا هولندا عشان اتكسف من ديني بالعكس الدول دي ممكن تلاقى فيها هناك حرية عبادة اكتر من هنا ... اللى انا فيه ده مش تدين ومينفعش تحطنى في القالب ده ليل نهار ... ليه بتضايق لما تلاقيني بقول نكتة ليه تضايق لما اقلك انى مش هخش الفيلم الفلانى عشان فيه لقطات خارجة ...طب ما انا مكنتش بخش زمان قبل ما ابقى عم " الشيخ " افلام هابطة او فيها مناظر ليه دلوقتى اتنبهت فجأة انى مبخشش الافلام دي ... عشان طلعلى علامة في جبهتى !!!

ياربى ايه ده... ليه انا مضطر ادافع عن نفسي في حاجة بديهية ومسلم بيها اللى انا بعمله ده حاجة زي ال minimum requirements يعني طبيعي جدا ان رصيدي في الحسنات يبقى صفر وعادي جدا لومدخلتش الجنة ( اللهم احفظنا ) بعد ده كله ..لانى بعمل اللى المفروض عليا اعمله وحتى لو كل يوم بقوم الليل ومش مفوت طاعة مبعملهاش يكون ليا الحق انى اعتقد انى بعملى ده هخش الجنة كدة يبقى انا بضحك على نفسي وعلى اللى حواليا

انا متشتت اوي وكل زعلى انى مضطر ادافع عن نفسي وبتهاجم واللى بيشرب خمرة وحشيش وكل يوم مع واحدة في الحرام بيكون ليه هيبة ولايضطر على الاطلاق انو يدافع عن نفسه لانه عمره ما هيتعرض للهجوم

الطف بيا يارب واهديني وثبتني وارحمنى من نفسي ... يارب عايز اقرب ليك اوي عايز ابقى عبد بمعنى عبد لو الناس فاهمة ان عبوديتك عز مش هيبقى ده حالنا يارب مش عايز اكتر من رضاك لان اي حاجة في سخطك ملهاش لازمة يارب اهديني وثبتني وصبرنى على الابتلاء يارب ... يارب مش عايز اكتر من انى ابقى في حالى والناس كمان في حالها ويارب متخليش الغرور يسترب لنفسي ... امين


الرجاء التركيز في عنوان الموضوع كويس اوي وياريت متاخدوهوش على ان الغرض منه الاستسلام لكلام الناس .... ليه معنى تاني خالص انا قاصده

سلام