سامحنى

مش محتاج مقدمة عشان اقول ولا محتاج واسطة عشان تسمعنى يارب انا غلطت كتير ومش عارف الجم نفسي ... الدنيا متلخبطة ... ولحظات فقدت فيها الامل بس انا ايه بالنسبالك عشان تزعل منى انا ولا حاجة اذا كان الكون كله كأنه حلقة في فلاة يبقى انا ايه بقى ده انا ولا حاجة خلقتنى من عدم وأوجدت فيا نعم لا تحصى وانا مشكرتش بالشكل المطلوب .. بعصى وبندم وارجع اعصى تاني ... مش بطلب مكنش عبد عاصي لانه مستحيل لبشر انو ميكنش عاصي ولكن يارب اقابلك وتكون حسناتى اكتر من ذنوبي ... انا عارف ان اللى بقوله ده مكرر لانك جلالتك عارفه قبل كدة يارب ولكن بجد انا مش عارف اعمل ايه انا عندك ايه يارب من المغضوب عليهم ولا من المرضى عنهم يارب ارحمنى يارب انا اضعف من انى اترمي في النار اضعف من انى اقف قدامك وانت بتواجهنى بذوبي قدام البشر .. استر عليا يارب انقلنى من الذل اللى انا فيه لعز طاعتك

يارب انت عارف عقدتى وسبب معصيتي انا عارف انك مش هتساعدني غير لما اساعد نفسي وابين خطوة جدية لكن كل ما اقول او احاول ارجع الاقى نفسي بتروح للموضوع ده تاني شهوتى غالبة عليا يارب .. يارب عجل بجوازي من دعاء عشان الموضوع ده ينتهي بقى ياااااارب

لا اله الا نت يارب العالمين ... سبحان الله وبحمده سبحان الله العظيم ... سبحانك ربي سبحانك ... سبحانك ما اعظم شأنك ... طامع في غفرانك فلا تحرمنى منه يارب ارزقنى التقوى يا ارحم الراحمين واعنى على نفسي يا خير من يستعان به على شر ما خلقت يارب اعنى على نفسي الآمرة بالسوء من ذا الذي يعصي امرك وهوا عالم
سبحانك اللهم لا اله الا نت خلقتنى وانا عبدك وانا على عهدك ووعدك ما استطعت اعوذ بك من شر ما صنعت ابوء لك بنعمتك على وابوء بذنبي انه لايغفر الذنوب الا نت
اللهم صلى على محمد وعلى ال محمد كما صليت على ابراهيم وعلى ال ابراهيم انك حميد مجيد وبارك على محمد وعلى ال محمد كما باركت على ابراهيم وعلى ال ابراهيم في العالمين انك حميد مجيد

22

بسم الله الرحمن الرحيم

كل سنة كنت بنسى يوم ميلادي ... مكنش في داعى انى افتكره اصلا ولا كان حد بيفكرنى بيه والموضوع لا يمثل لي اي اهمية فعلا اه وانا صغير ماما كانت بتعمل عيد ميلاد وتورتة وبتاع ومش عارف ايه ولكن ده وانا صغير بقى لما كبرت 1/11 مبقاش ليه اي تأثير

امبارح بقى افتكرت يوم ميلادي قبل ما يجي مش عشان صحيت لنفسي فجأة بس عشان انا كنت عارف ان هناك من سيذكرنى به وفعلا جت الساعة 12 من هنا 12 ودقيقة كانت مبعوتة رسالة جميلة اوي ... رسالة صادقة وطالعة من قلب اللى باعتها
ودي مشكلة كبيرة لانى مش عارف اعمل ايه عشان ارد على المسج دي ربنا يخليلي اللى بحبهم ويفضلوا يحبونى على طول
------------------------------
السنة دي هيبقى فيها اكتر ضغط عصبي ممكن اكون جربته في اي سنة قبلها
يعني اخر سنة بقى وفيها تحول مفاجئ لتحول المسئولية .. الواحد كان كل مرحلة بيزيد احتماله بالمسئولية ولكن كان كله بيتم في اطار الدراسة يعني نقطة التحول بتاعت ثانوي مثلا كان كل الضغط مرتكز على انك المسئول عن مستقبلك وبتاع بس في الاخر انتقلت من طالب ثانوي لطالب جامعة دلوقتى لما اخلص ( ان شاء الله ) هبقى انتقلت من طالب جامعة لراجل عنده 23 سنة يحمل لقب مهندس ودي بروبلم تانية لانى كدة لازم اروح اتقدم بس طبعا في مشكلة تانية مترتبة على انى مهندس الا وهي انى لازم ادور على شغل الاول عشان لما اروح اتقدم ابقى على الاقل معايا مصروف خاص ليا بس الشغل مش بالساهل اول حاجة لازم اقدم ضريبة الدم لبلدى واخش جيشها العقيم اللى تحس انهم بيدخلوك الجيش عشان تدفع تمن جنسيتك المصرية .... ما علينا

بديهيا لازم الواحد يركز على الدراسة في اخر سنة دي بس المشكلة ان اللود بيبقى كبير اوي في اخر سنة دي الدكاترة مبترحمش وانت اي حاجة مبتفهمهاش بتحس بالعجز لانك المفروض دي اخر سنة ليك وبعدها تخرج لسوق العمل ذاك المصير المجهول فمينفعش يبقى في حاجة الواحد مش عارفها .... في كورسات كتير لازم الواحد ياخدها كمان ده غير حمل المشروع الرهييييييب اللى على الواحد انا قايم نايم بفكر في المشروع ده خصوصا انى داخل مشروع مجهول وبدور فيه من A to Z وفي ناس في المشروع مش متحمسة ومش بتتحرك بالشكل المطلوب وناس تانية محمسانى والله وبتشتغل بجد ضغط رهيب اوي حكاية المشروع دي المفرضو يعملوا سنة كاملة للمشروع ده وتكون فاضية او يخلونا نعمله على سنتين تالتة ورابعة ... كل يوم مطلوب شيتات وبرزنتيشنات وتقارير الخ الخ والمفروض في حاجات عايز ازاكرها خارج دراستى يعني حاجات قديمة عايز ازاكرها ... ما علينا تاني

... وفيما يختص بسوق العمل الواحد بقى يقعد يسمع عن الحقد الطبقى والازلى بين العمال والمهندسين والنصب والسرقة اللى بتحصل للمهندسين من اصحاب العمل خصوصا المهندسين حديثي التخرج بيستغلوا ظروفو انو عايز يشتغل ومتحمس وبتاع فيقطموا وسطه في المرتب ويدولو فتافيت وهوا يستحق اكتر من كدة كمان الواحد برضو بيبقى باصص للمهندسين اللى شغالين ب8 و 10 الاف جنيه في الشهر واصلا الناس في البلد باصة ان المهندس ده بياخد على قلبه قد كدة وصاحب العمل مستنى المهندس يحل له كل مشاكله او منتظر انو يحل كل المشاكل باقل عدد من المهندسين وبكدة ممكن يتحط عليا ليل نهار لانى شغال شغل اتنين
كمان الواحد يبدأ يدور على شغل ازاي (دي الفكرة) يعني جرايد وبتاع ولا انزل اقعد الف على المصانع والشركات كمان انا لحد دلوقتى مش عارف اشتغل في ايه ومش عارف انا اصلا حلو في ايه عشان اشتغل فيه او انا وحش في ايه عشان مشتغلش فيه طيب ايه خطتى بعد 10 سنين عايز ابقى ايه كمان 10 سنين

طيب لو دخلت الجيش ودخلت ظابط اعمل ايه اتجوز خلال فترة الجيش طيب انا ازاي هقبل وضعى لما اشوف اصحابي اشتغلوا وانا قاعد محلك سر في الجيش ... طيب ازاي اتجوز اصلا وانا في الجيش انا اول سنة جواز دي عايزها اجازة اصلا

طيب بالنسبالى الدنيا مش مزاكرة وشغل وبس ... في جزء منها عشان انمى عقلى بالقراية الثقافة وجزء احافظ بيه على جسمي بالتمارين وجزءاحافظ فيه على روحي بالقران والمتابعة مع الشيخ بتاعى وجزء مختص بممارسة الهوايات حاجة تخنق
اجيب منين وقت اقرى فيه ووقت اروح فيه الجيم ووقت امارس هواية الخط العربي ووقت اتفرج في على التلفزيون ووقت احفظ فيه قران واتابع مع شيخي ... والمواصلات بتضيع وقت كبير اوي من يومي ممكن تضيعلي 4 ساعات و6ساعات نوم كدة اتبقى 14ساعة ساعة للصلوات الخمس اتبقى 13 محاضرات والذى منه يبقى اتبقى 6ساعات المفروض مش هاكل ولا هخش الحمام هل 6 ساعات كفاية انى اوزعهم على الثقافة الورياضة والقران والخط اللى مش عارف اتعلمه لحد دلوقتى

بس انا واثق في ربنا ودايما ربنا كان بيسهل الحال وكان بيرضيني في الاخر وانا مش هاجى دلوقتى وافقد الثقة فيه ده والعياذ بالله كفر وسوء ادب مع الخالق ... ربنا بس يسهل لى الحال وييسر السنة دي عليا ياااارب

عارف موضوع غير مناسب لواحد بيعلن عن يوم ميلاده بس بنفس عن نفسي شوية

سلام