Friday, July 20, 2007

إمـــــــــام الدعاة

بسم الله الرحمن الرحيم

بصراحة مش عارف ابدأ منين ... حاسس ان الموضوع اكبر مني اوي

بس زي النهاردة كدة من 10 او 15 سنة كنا بنتجمع حوالين التلفزيون بعد الصلاة عشان نتفرج على برنامج الشعراوي

لحد دلوقتى موسيقى التتر بترن في ودني

كان بسيط لابعد حد حتى لو مش بتحب النوع ده من البرامج هتحب تسمع ليه كشخص ... كأنسان

مش هقدر بقى اقول ولد الشيخ الفلانى في مدينة كذا سنة كذا وتجرع العلم منذ نعومة اظفاره والكلام ده

بس الشعراوي كان بيتعامل مع القران ببساطة شديدة بيتعامل مع القران اكنه حكاية بتتحكي وكان بيعجبنى اوي توضيحه لمعانى القران بكل بساطة كانه واحد قاعد معاك في اتوبيس او حتى واقف جنبك في طابور عيش

سمعت من ناس اثق فيهم انهم استضافوا ابن الشيخ الشعراوي في برنامج
فوهو بيحكي عن والده الشيخ الشعراوي رحمه الله قال ان لما الشيخ الشعرواى كان في سكرات الموت قال " ياااه
انت جايلى بنفسك .. انا مستاهلش مجيتك دي

وقبل ما يتوفاه الله قال ( اشهد ان لا اله الا الله وانك رسول الله ) طبعا اكيد فاهمين معناه ايه اللى هوا قاله ده

بس اللى مش لاقيله فايدة ان حسن يوسف يعمل مسلسل عن الشعراوي يعني محبذتهاش اوي الفكرة دي
ولا حتى دخل قلبي تمثيله ده... كل اللى عجبني في المسلسل اغنية التتر بتاعة محمد فؤاد

صحيح من المفارقات اللى في حياة الشعراوى انو اتجوز وهوا في المرحلة الابتدائية كعادة ابناء الريف الوقت ده .... وخلف 5 ابناء 3اولاد وبنتين
سافر السعودية ورجع مصر لما عبدالناصر اتخانق مع الملك سعود وقتها
ومسك مكتب شيخ الازهر وبعديها تدرج في الوظائف لحد ما مسك وزارة الاوقاف المصرية واستقال لسبب ما انا اجهله

مش عارف مش قادر اقول كل اللى جوايا عن الراجل العظيم ده
يارب اكرمنا بشيخ جليل زيه كدة يااااااارب
عارف ان التدوينة مش قد كدة
بس اهو الواحد بيحاول
وحضرتنى الاية دي دلوقتى

قال الله تعالى : ( مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلا ) . صدق الله العظيم


تحديث





8 comments:

رفقة عمر said...

الله انا بحب الشيخ الشعرواى بشكل
تعرف انى عرفت طريق الهدايه بعد فضل الله سبحانه وتعالى عن طريق الشيخ الشعراوى
قد ايه لما باشوفه بينشرح صدرى احساس غريب باحسه ناحيته عارف ولا شيخ من العصر الحديث كلامه بيدخل قلبى زى الشيخ الشعرواى
طريقته سلسله تواضعه الفظيع
انا باكره التكبر والغرور
قبوله للاخرين
تعرف انى كنت عايزة اكتب عنه بس انت سبقتنى ربنا يكرمك
ااقولك على حاجه كمان
انا من كتر حبى فيه
شوفت رؤيا انا وهو ماشين مع بعض وهو وضع يدة على كتفى وسالنى انتى بتحبينى فعلا قلتله ايوة رد طبطب عليا وقالى وانا كمان احبك
لا تتخيلى الرؤيه دى اسعدتنى قد ايه
جمعنا الله به والرسول الكريم والصحابه رضوان الله عليهم فى الفردوس الاعلى
اكتر متعه فى الجنه انك تكون مع من احببت
ربنا يكرمك عبدالله ويوفقك يارب
ويحقق لك كل امالك اللهم امين يارب العالمين

أمــانــى said...

الله اول موضوع على الشيخ الشعراوى
الله يسلم ايدك فعلا مازال صوت التتر بتاع البرنامج كان لازم نسمعه
واكتر واحد حببنى فيه عمى الله يرحمه
وعمى يوم وفاته الله يرحمه الشيخ الشعراوى كان تعبان شوية وبيكح قاله سلمتك اختى قالتله تلاقيه هيودع
قالها حرام عليكى ونسمع مين اختى قالتلها بدون قصد بس والله ما شفت عمى لونه متغير وانقبض لما قالت الكلمة دى
سبحان الله عمى اللى اتوفى فى نفس اليوم
الشيخ الشعرواى رحمة الله عليه ربنا يدخله جنات وعيون يااااااااارب آمـــــــــين
تحياتى لك يـا عبـدالله وجزاك الله خيــرا ومبروك على المدونة ويجعلها خير عليك ولك

abdallah mortada said...

رفقة

اسف على التأخير بس عشان ظروف التدريب بس

الحمد لله اللى هداكى على ايد اعظم دعاة الامة
وادعيلي ربنا يهديني ويثبت رجلى على طريق الصلاح
امين

-------------------------


اهلا امانى

شكرا على ردك

ربنا يرحم عمك ويخفف عنه بدعائك


ويهدينا ويهدي كل شبابا المسلمين ياااااااااارب

امين

BinO said...

السلام عليكم ورحمة الله وبركاته
أخي في الله
مرحب بك في عالم التدوين
الشيخ الشعراوي من الناس اللي أثروا في قطاع عريض من الشعب ونحسبه علي خير ولا نزكي علي الله أحداً
وأذكر أن أحد المشايخ قد أثني علي الشيخ الشعرواي في نهاية حياته ذاكراً أن الشيخ تخلي عن صوفيات الأزهر وأثني علي المنهج السلفي جداً
الشيخ له مؤلفات عظيمة في عدة مواضيع خاصة حين تحدث عن النساء وشرح التعدد وأهميته وعمل المرأة وكراهته وغيرها من المواضيع
ولكن بالنسبة لموضوع حضور الرسول لأحد عند الموت فنحتاج لسؤال العلماء أن شاء الله

جزاكم الله خيراً وعطر يداك دائماً بالدعوة لله

abdallah mortada said...

bino

شكرا ليك انك نورت مدونتى المتواضعة

وللعلم بس ان دي مش اول مدونة ليا انا كان ليا مدونة على ال egyblogs
بس نقلت هنا اريح يعني
وربنا يوفقنى واكتب حاجة كويسة ان شاء الله
مدونى القديمة في اللينكات

ftataljanna said...

السلام عليكم ورحمة الله وبركاته

اهلا بك اخى الكريم

انا لا اعرف الكثير عن الشيخ الشعراوى

ولربما اقل القليل

والغريبه بقى انى عمرى ما سمعت له ولا حلقة على بعضها ولا نص واحدة اصلا

لانه دايما كان بييجي فى رمضان قبل الفطار على طول

ربنا يسهل

انا بجد دلوقتى حزينه حاسه انه فاتنى شيء عظيم

عالعموم اخى ربنا معلك فى المدونة الجديدة وفعلا البلوج سبوت مريح

ربنا معاك يا اخى وثبت خطاك ان شاء الله

abdallah mortada said...

فتاة الجنة


شكرا لمتابعتك ليا
واتمنى حضرتك تنورينا على طول
وانا شفت مدونتك ومعجب بيها جدا

تحياتي
سلام

الفاروق said...

رحم الله الشيخ رحمة واسعة وأسكن فسيح جناته