Follow by Email

Saturday, August 25, 2007

اول الضحايا

بسم الله الرحمن الرحيم 

24-8-2007
تم بحمد لله تعالى زواج اخى محمود محمد مرتضى - بكالوريوس علوم - على مدام محمود محمد مرتضى :) بكالوريوس طب بيطري


وتم الزفاف بعد مضايقات ورفض منى لاعتراضى على تكاليف الفرح الباهظة جدا جدا
واعتراضى على ان العروسة هتروح الفرح بفستان مكشوف
ودب خلاف ممكن وصفه بالحاد بيني وبين اخويا على قبوله بهذا الموقف

ولكن بعد ان اجمع الكل على انهم احرار يعملوا اللى يعملوه .... لم يكن صوتى مسموعا وسط هذة الغاغة

لكن كل واحد وليه تحفظاته وليه تجوازاته

المهم ان اخويا اتغير شوية بعد الجواز وان لم يظهر احساسه بالمسؤولية بعد

كمان الحمد لله انى ارتحت من وجع الدماغ بتاع العمال ومن الوقوف طول النهار مع العمال وطلع شاي ونزل شاي وهات فلوس وودى فلوس ...

وبعد الجواز ناس طالعى وناس نازلة وكل ما يقولوا مبروك يا عريس يقولولى عقبالك لحد ما بقى نفسي اقلهم عقبالى من قبل ما هما يقولوا
يلا اخويا كان اول المغامرين ... وعقبال اسلام اخويا الاوسط ان شاء الله
وفي الاخر يجي اخر العنقود اللى هو ا انا :)

بس بجد الجواز ده اكبر من انه ارتباط جنسي او وضع اجتماعى
دى شراكة قايمة على الحب والرحمة والتقوى
متهيالى ده اكتر 3 حاجات تؤدي لزواج ناجح الحب اولا الرحمة فيما بينهم ثانيا والتقوى ثالثا

كمان الزواج بيملى على الواحد واجبات تجاه شريكته اللى بقت دلوقتى ملزومة منه بقى مسؤول عن اسعادها وامنها واكلها وشربها وكل حاجة تطلبها مقابل اسعاد الزوج والسهر على راحته ... وكمان فرض عليه واجابات تجاه اهل العروسة والعروسة برضه فرضت عليها واجبات تجاه اهل العريس

بجد الجواز ده مش كلمتين حب مع بنت والنتيجة تبقى الجواز ... لا ... المفروض الجواز ده يبقى السبب
زي ما قلت الجواز مش عشان شاب عايز يفرغ شهوته بالحلال فقط ... ولكن دى شراكة قائمة مدى العمر على الحلوة والمرة والحب والزعل و .. و ... و ...

يعني الواحد المفروض يبقى حاطط في دماغه فكرة انو داخل يشيل مسئولية اسرة وربما ذرية كاملة
على الله افتكر الكام كلمة دول لما اجي اتجوز
يلا كان نفسي انزل حبة صور بس مش ذنبي ان 3310 مفوهش كاميرا :) بس الحمد لله على كل شئ

اللهم بارك لهم وبارك عليهم واجمع بينهما في خير وارزقهم الذرية الصالحة باذن الله التى تخدم دينك وتدفع الخطر عن امتك وامة نبيك
وعقبالى :):)

5 comments:

رفقة عمر said...

الف مبروووووووووووك عبدالله
وعقبالك ياااااااااارب
وتحقق كل امالك اللهم امين يارب العالمين
وطبعع انت كلامك صح جدا ماشاء الله عليك
عارف مشكله الطلاق السريع ايه
انهم مش عارفين الزواج مسئوليه
وادارة فبينصدموا اول ما يبدأو لتحمل المسئوليه
ربنا يرزق جميع شباب وبنات المسلمين بالزواج الصالح اللهم امين يارب العالمين

ftataljanna said...

مبروووووووووووك

اللهم بارك لهما وبارك عليهما واجمع بينهما فى خير

وعقبالك يا سيدي

انا كمان اخويا لسه خاطب والناي قاعدين يقولوا لى عقبالك لما عيني طلعت وكرهت الخطوبة والجواز من كتر عقبالك

اصل انا الصغيرة بقى والمفروض ان انا اللى عليا الدور

:)

عقبالك وتكون زوجة صالحة يا عبيد الله

Future_Preacher said...

ماشاء الله لا قوة الا بالله
انا سعيدة ان أول تعليقاتي عند حضرتك تهنئة
:)
حاجة جميلة جدا
الف مليون مبرووووك لأخيك
و عقبال حضرتك بس متزعلش ماهو لازم اقولك عقبالك:)
ولي بس تعقيب بسيط اخي الكريم ان الزواج مش قائم اول حاجة عن الحب
لأ لأننا مش أعلم من الله عز و جل لأنه قال في كتابه و جعل بينكم مودة و رحمة و مقلش حب و رحمة هو ده الحب اللي احنا نعرفه و ربنا سماه مودة
لكن بصراحة عندك حق في كل ما قلته
وربنا يزيدك حكمة و عقل و يرزقك ان شاء الله الزوجة الصالحة اللي تكون لك قرة عين
اللهم بارك لهما وبارك عليهما واجمع بينهما فى خير

قوت القلوب said...

الف مبروك

اللهم بارك لهما وبارك عليهما واجمع بينهما في خير..وارزقهم بالذرية الصالحة..اللهم آمين

كلامك جميل وعقلاني..ربنا يباركلك ويرزقك كل ما تتمنى

وعقبالك :D

allah-slave said...

اسف يا جماعة على تأخرى في الرد بس عندى تدريب اليومين دول مش مخليني عارف اتلفت حواليا

رفقة
الله يبارك فيكي وعقبال ما نسمع عنك خير باذن الله

-----------------
فتاة الجنة

الله يبارك فيكي
عقبالك ان شاء الله ونصيحة ابعدى عن المهندسين :D

-------------
داعية المستقبل
شرفتيني بحضورك
بس انا ملتزم بكلامى الحب اساس الجواز بس مش قصدي الحب الاهبل اللى في الافلام ده
انا قصدي المودة اللى ربنا اتكلم عنها وربنا قال وجعهل بينكم مودة ورجمة
يعني ربنا سبق المودة على الرحمة اهه
انا مجتش حاجة من عندى
:)

وشكرا لحضورك وياريت حضورك ميقلش

-------------
قوت القلوب

ما تدوريلي على عروسة على بال ما اتخرج

""