Friday, October 12, 2007

يا جماعة ...رمضان مخلصش ولا حاجة

بسم الله الرحمن الرحيم


والله مش عارف ابدأ منين ... بس بجد بجد رمضان ده احلى حاجة قضيتها في حياتى ....
مع ان ده اول رمضان يعدي عليا ومعرفش ماما مخبية الزبيب والقراصية فين الا انو برضو حلو
وكان حلو لاننا اول مرة نفطر خمسة بحضور مرات اخويا من ساعة ما بابا توفى ( ربنا يرحمه ويفتح عليه من ابواب الجنة )
كمان اول مرة اعرف ان فيه اكلة اسمها كانيلونى ... مش عارف انا ازاي اكل اكلة معرفش اسمها ... بس اهى اتاكلت وربنا سهلها والحمد لله :)


طز في حمادة عزو اللى جه خرف على اخر عمره ... وطز في اللى فاكرة نفسها بتدافع عن حقوق المغتصبات وهيا اكبر واحدة بتدعو للاغتصاب ... وطز في اللى فاكرين نفسهم ظراف وبيعملوا مسسلسلات سيت كوم امريكي بطريقة بشعة ومليانة تجاوزات سواء كلامية او بصرية وطز في اللى شايفين ان رمضان سجن وليلة الوقفة تلاقيهم بيحششوا
وطز في اللى كانت لابسة الحجاب في رمضان وقلعتوا واللى كانت شايلة المكياج وحطته واللى كانت لابسة لبس محتشم وقلعته لما رمضان خلص .... بجد هوا الناس فاهمة رمضان انو ايه.

طز في اللى بيسرق .. وطز في اللى بيغش وطز في اللى بيبص على الستات في السوق وهما قد ولادوا اصلا
طز بجد في كل ده .. انا فرحان اوي ان رمضان عدى عليا بالشكل ده ... انا جالى فترة من بعد ما كنت في اولى اعدادى لحد السنة دي وفقدت الامل ان رمضان يبقى كويس .. ولكن الحمد لله رمضان رجع احلى واحلى .. واحلى

بصراحة لما كنت بسمع اللى بيقولوا دوق طعم القران كنت بقول هوا القران بينداق يا جدعان ... بصراحة اه ... وطعمه ملهوش وصف من كتر حلاوته ... يعني لو صليت على اساس انك في رمضان وكل الناس بتصلى فانت لازم تصلى ...غير لما تصلى في رمضان وتتخيل ان انت واقف قدام اللى خلقك وبتسمع كلامه ليك

متخيلين انا اقصد ايه .. مش هقعد ادي امثلة الموضوع ابسط من كدة بكتيييير اوي

الموضوع وما فيه ان ربنا خلق الانسان وعارف الانسان ده هيقصر وهيعصي ويفسد في الارض ... ربنا عمل شهر كامل للى عايز يتوب ويرجع ... عارفين ربنا اسمه الكريم ليه ؟ مش عشان بيدينا رزق او عشان بيحفظنا من مهلكات كتير

لا ربنا كريم عشان بيديك فرصة ترجعله بعد ما سبته .. ربنا كريم عشان بيقلك اعبدنى الشهر ده صح وانا هديك اضعاف اللى بتعمله في غيره ... ربنا كريم .... عشان هو كريم ... ومحدش عنده كرم ربنا .. ومينفعش يبقى حد عنده كرم ربنا

جربتوا مرة يا ترى تقعدوا تقروا في سورة لمدة ساعة كاملة سورة بسيطة ممكن تبقى سورة الاخلاص ممكن تبقى حتى سورة الكوثر .... جربت مرة تقف على ايه وتقول ليه ربنا قال كدة ومقلش كدة ... جربت مرة وانت بتقرى تقول يااااااااااه بقى ربنا يقصد كدة وميقصدش كدة

جربت تقعد في المسجد او في بيتك من غير ماتشغل حاجة ومن غير ما تكون نايم ومن غير ما تكون بتتفرج على التلفزيون ... مجرد انك عمال تفكر في ربنا ....

جربت احساس ان جسمك يقشعر وانك تلافى نفسك بتنتفض لما تسمع اية زي ( لواحة للبشر * عليها تسعة عشر*) اية زي (
انا جعلنا في اعناقهم اغلالا فهي الى الاذقان فهم مقمحون) يعني بجد اسمع حاجة زي كدة ازاي ومرتعش ... ولما اسمع اية زي ( هل جزاء الإحسان إلا الإحسان) ليه جسمى ميرتحش وليه محسش ان ربنا ان شاء الله محضرلى الخير ...كل الخير

والله اول سنة ابقى زعلان ان رمضان هيخلص بجد ... مش عايزه يخلص ... مع ان ربنا له حكمة انو يجعل رمضان شهر واحد بس ... لا اكثر ولا اقل ... سبحان الله العزيز الحكيم

انا البوست ده اساسا كنت عايز اتكلم فيه على ايات غيرت منى اوي بس مش عارف بصراحة اقول ايه ولا ايه
اتكلم عن سورة طه ولا الرحمان ولا الانبياء ولايوسف ولا الكهف والواقعة ولا الزخرف ولا هود ولا الحشر ولا مريم ولا ايه ولا ايه ... ياااااااااارب متخليش شعوري بيك في رمضان يتغير بعد رمضان
يا مقلب القلوب ثبت قلبي على دينك ... اللهم قوني على طاعتك .. اللهم لا غيرك يستعان به على طاعتك .. اللهم انا ان تركناك هلكنا فلا تتركنا نتركك انك انت الحليم الكريم .... اللهم كره الينا المعاصي والفسوق والفجور .. اللهم حبب الينا طاعتك ... واقسم لنا من رحمتك .. اللهم لا تتركنا عرايا فمن لم تستره فهو عريان لا ساتر له .. اللهم انك انت الواحد الفرد الصمد ... ان لم افهم هذه الحقيقة منك على لسان حبيبك المصفى فسأفهمها من تعاقب الليل والنهار ورزق الاسماك في اعماق البحار .... ربنا ظلمنا انفسنا لاننا ضعاف امام المعاصي ولكن من يغفر لنا سوى العالم بامرنا .... اللهم خضع لك الكون كله ما علمنا منه ومالم نعلم ... ولم يخضع ابليس فجعلته رجيما وحاول الانسان الا يخضع لك فجعلته اية وعبرة لمن يعتبر ..... اللهم لاتزغ قلوبنا بعد اذ هديتنا انك انت الوهاب ... يارب ان في قلبي لحلاوة ما وجدتها قبل الان فلا تزلها من قلبي حتى تقبضنى اليك يا ارحم الراحمين .. اللهم اجعل عملى خالصا لك ... لا اريد ان ينقص عملى رياءا ولا يمعة ... انك علام الغيوب ... اللهم اغفرلى ما ظلمت به نفسي وارحمنى رحمة اكون بعدها عبدا خالصا لك سائرا على نهج لا يضل من انتهجه
اللهم عبدا ناجاك... ولما امرته دعاك وانت علام الغيبوب غفار الذنوب .. ساتر العيوب.. مقلب القلوب .. مفرج الكروب
اللهم افرغ علينا صبرا وثبت اقدامنا وانصرنا على القوم الكافرين ..ز اللهم احشرنى مع من احب ... احشرني مع حبيبي ... احشرني مع حبيبي يارب ... وامنن علي بشربة من كفه لا اظمأ بعدها ابدا
يارب عايز اقابل الرسول في الجنة يارب ... نفسي اقابله وميكونش زعلان منى ... نفسي محسسوش انو تعب على الفاضي ...انو اتأذى بسببي على لافاضي ... يابر نفسي ابقى في الجنة مع الحصرى والشعراوي وكل الدعاة والصالحين ... يارب هل ممكن اقعد مع عمر بن الخطاب في يوم من الايام ..؟ واسلم على ابو بكر واقرى قران في الحنة مع عثمان واتناقش في الحديث مع علي ؟

انا شكلى اتكلمت كتير ... بس مش عارف اجيب كل اللى جواي ... على العموم اعتبروا ان فيه واحد اولد اسمه عبدالله

كل سنة وانتو طيبين

تحــــــديث

شوفوا الفيديو ده مش صعب انكو تفهموه لان انا شخصيا فهمتو لوحدي ... وهتكلم عن صاحب الفيديو ده البوست الجاي ان شاء الله


7 comments:

رفقة عمر said...

السلام عليكم عبدالله
لا تتخيل سعيدة بالبوست دة قد ايه
عارف ليه رمضان دة حسيت بحلاوته لانك اخلصت النيه ودعوت ان ربنا يعينك فيه على حسن طاعته والله يجازى ويعينى على النوايا الحسنه
الايمان ما وقر فى القلب وصدقه العمل
ربنا يزيدك من فضله ويثبتك ويجعلك من اهل طاعته ويجعلك من عبادة المقربين ومن عبادة السعدا فى الدنيا والاخرة

خالى بالك انت قلتلى ادعيلى ان ربنا يقدرنى على العمل الصالح فى رمضان والحمدلله الدعوه استجابت بفضل الله
لسه دعوتك ليه مش استجابت
حاول تكون متوضى وانت بتتدعى وتخلص النيه شويه ربنا يكرمك
اختك محتاجه لدعاءك جدا جدا فوق ما انت تتخيل
اللهم يامن رفعت السموات بغير عمد اللهم يا رازق الطير فى اوكارها
اكرم عبدك عبدالله
وحقق له مايرجو من خيرى الدنيا والدين اللهم امين يارب العالمين
اخبار الرجيم ايه
ولا بوظته فى رمضان

abdallah mortada said...

اولا زي ما انتى فرحانة بالبوست انا فرحان جدا بردك عليه
ثانيا : استجابة الدعاء دي حاجة مش احنا اللى نعرفها ممكن تكون استجابة دعاءك دي تكون موجودة بس متأخرة شوية
ثالثا: رجيم مين يا فندم ... هو احنا بتوع ريجيم بردو
ايموشن تخين وحاطط ايدو على خدو

بس ان شاء الله بعد رمضان نبدأ بقى بعون الله

رابعا بالنسبة للدعوة : اللهم امين

الباحث عن الحقيقة said...

وانا بقرأ فى الاول وكل شوية اقرأ طز بقيت اقول خير يا جماعة ده ماله ده اهدى يابنى شوية ربنا يكرمك
اهدى انت بس واحنا هنعملك مساكن شعبية
المهم لميتلك القرشين دول
خمسة وتلاتين قرش يلا روح اتفسح واركب عجل مع زمايلك فى الحارة

الموضوع جامد وحماسى ومكتوب بقلب
اعتقد انه هيوصل لكل اللى هيقراه
بس لو ترجع تغير طز دى وتخليها مثلا : فى داهية اللى عمل كذا

كل عام وانتم بخير
ما تصرفش الفلوس كلها

قوت القلوب said...

السلام عليكم



بوست اكثر من رائع

أسأل الله أن يوفقك ويثبتك ويزيدك في العلم والدين

تقبل الله منك صالح الأعمال وجعلك ممن غفر لهم وعتقوا من النار في هذا الشهر الكريم..اللهم آمين

أعاده الله عليك وعلى المسلمين أجمعين بالخير والبركة

تحياتي

عصفور المدينة said...

ياااااه
جميل أوي الإحساس ده
ربنا يثبتك كمان

abdallah mortada said...

ينهررررر ابيض

ابن حجر ذات نفسه بيكبورده بماوسه علق عندى

انا مش مصدق نفسي

بالنسبة لكلمة طز .. معتقدش حاجة اكثر ادبا تقدر تعبر عن اللى جوايا تجاه المسلسلات دي غير كدة

بالنسبة لل 35 قرش ... اتصرفوا الحمد لله :)

abdallah mortada said...

الاخ الكبييييييييير الفاض
عصفور المدينة

انا كنت خايف اتكى على اللينك متطلعش انت اللى رادد ... بس طلعت انت انت :D

اللهم آمين