Follow by Email

Saturday, November 9, 2013

لك يا سيدتي

بسم الله الرحمن الرحيم  

9 نوفمبر 2013 (بعد أطول مشوار على مصر الإسكندرية الصحراوي)

بصي انا عارف انك يوما ما  وبصدفة  بحتة  هتقري الكلام ده .. لما ده يحصل  اعرفي انك اللى  طلبتي ده .. وزي ما قلتلك  أكتر من مرة  انتى الكسبانة في كل الأحوال .. لو سمحتِ متكرهينيش .. انا عندي  أسباب كتيرة جدا - وأهم - من اللى انتى بتكرهيني عشانها .. وفري  طاقة الكره دي  لحاجة  تستاهل .. حقيقي يعني ..  انا كنت واضح وصادق في  كل  حاجة قلتها .. والغلط بس إني  ورطتك  معايا  وربطتك  في نفس الهلب .. بس  ياريت  تفتكريلي  انى مضحكتش  عليكي ..  وده  أكيد اللى  هيحصل .

 في  يوم  ما  هتبقى واقفة على البوتاجاز  بتقلبي في حلة الرز  بلبن .. وهتفتكري تحديدا  البوست ده .. هتضحكي  بسخرية  ..  بس  هتعرفي  انى  كان عندي  حق  .. وان  دي  من الحاجات الصح القليلة اللى عملتها  في  حياتى  .. ساعتها هتفوقي من الذكريات دي لما  ابنك  هيشد  جلابية البيت  اللى انتى  لابساها  ويقلك  : " ماما أنا  عايز رز بلبن ثخن " 

أنا  زي ما أنا  .. ساعات بتفلسف وساعات ببقى تافه .. ساعات سوداوي وعدمي  زي مثقفي التكعيبة  وساعات مقبل على الحياة زي العرسان الجداد .. ساعات اقوى من الغوريلا .. وساعات أضعف من الفراشة.. بس في كل الأحوال دي  مبدعيش  ولا بكدب .. 

كل اللى حصل  اننا  عرفنا  بعض في  ظروف  غير مناسبة  تماما ... غلطي الأكبر اني   مكنش  ينفع  اطلعك على كل التفاصيل بتاعت التجربة اللى فاتت بس  للأسف  الحمل كان تقيل اوي وتراكم الذكريات خلاها  تتخمر وتتعتق   .. وغلطتك  انك سبتيني  أحكي  وأحكي وأحكي .. بالظبط زي  اللى حبت واحد فاقد الذاكرة ..  المشكلة  انى  ذاكرتي مرجعتليش  .. 

مكنش  ينفع  ابني حياة  كاملة  في الدنيا والاخرة  على انقاض .. مينفعش تعوضي  في  معادلة بناتج معادلة  تانية   وانتى مش عارفة الاولانية اتحلت  ازاي ..واتحلت  صح ولا غلط .. انا  اكتر واحد  عارف  خطورة انى  اغامر بتكوين  اسرة وانا مش مقتنع 100% اني بحب مراتي .. كل  سيستم ليه  كفاءة  .. ومفيش  سيستم كفاءته بتقرب لل 95% مهما كان مثالي .. بس الحب مش سيستم .. اللى يعرف  يعرّف الحب يبقى محبش .. السؤال من نوعية " حبيت فيا ايه ؟ .. او حبتني  ليه ؟ " ملوش  اجابة  .. ومينفعش  يبقى ليه  اجابة 

انا مش ملاك ولا عايز ابقى .. بس  بحاول على الاقل مبقاش  شيطان  .. انا عارف  ان النسيان  صعب .. وانتى عارفة انى اكتر واحد  عارف .. بس  على الاقل  حالك  افضل من ناس  كتير والمعنى في بطن الشاعر .. كل اللى عملتيه  صح من الاول  للاخر  باستثناء بس  الغلط اللى قلته في الأول .. عموما  اغفري يتغفرلك ..  وسامحي تتسامحي .. تعقيداتي  اكيد هيجيلها  يوم وتتحل .. لما أنا  اسامحها  السماح ده محتاج قوة جبارة .. مش متوفرة دلوقتى للأسف .. عشان كدة الوقت هيطول اكتر .. هل فيه  تغيير ؟ مظنش .. بس  هل انا زي ما بدأت  ؟ .. أكيد  لأ .. المشكلة في النسيان انه  بيهرب  لما تحتاجه وبيرجع  لما  متكونش عايزه .. وهي عارفة وانا عارف .. في  حاجات  محكيتهاش ليكي ولا ليها وهتموت معايا لما أموت ..

 بس عموما  اكيد  التجربة  دي  فادتك بشكل ما  ..  وانا استفدت برضو  اكيد .. انا  خدت قراري .. بس  ربنا  خلّاف الظنون .. واللى هيحصلي  مكتوب ومفيش منه مفر 

No comments: