Saturday, February 9, 2008

حاجة تقرف

بسم الله الرحمن الرحيم



العنوان يخليك تقول انى هتكلم عن حال البلد او عن الوضع المهبب للانترنت لكن مش كدة خالص

في حاجة مضيقاني اوي وبتخلى تصفح المدونات امر بالغ القرف
ايه بقى المقرف في الموضوع ؟... المقرف في الموضوع ان فيه بعض المدونين بيحطوا مقاطع من اغاني اول لما تفتح المدونة لدرجة ان احدهم او احدهن مش فاكر والله حاطط خطبة كاملة للسديس في ابتداء المدونة يعني في شرع مين ده يارب ... ده طبعا غير الهوس اللى بيجيبلي لما افتح كذا مدونة مع بعض الاقى عمرو دياب شغال مع خطبة اتقوا النار مع موسيقى جاز مع اغنية لمنير مع قران والمشكلة مش ببقى عارف انهو مدونة اللى مشغلة الحاجة المعينة دي فبضطر اقفل كل المدونات اللى مفتوحة لحد ما اعرف مين اللى مشغل ايه !! حاجة مقرفة فعلا

واللى يقرف اكتر انك لو حاولت تلاقى مشغل الصوت اللى في المدونة عشان تقفله يا اما تلاقي صاحبه حاطه في مكان مستخبي يا اما متعرفش هوا حاطه فين اساسا وان دوست على ستوب عشان تقفله ميتقفلش ويصير لزاما عليك انك تقفل المدونة ككل


حقا إنه لعالم افتراضي مقرف

3 comments:

رفقة عمر said...

الحمد لله عبدالله انا بطلت احط اناشيد واغانى على مدوناتى علشان مش ازعل حد منى زى ما انت زعلان كدة
انا عن نفسى دايما قافله السمعات علشان الموضوع دة
لما تتصفح المدونات حاول تفصل الصوت
وتريح نفسك بدل كل العصبيه دى كلها
وانت كدة تعتبر اغتبتنا كلنا لما قلت علينا عالم مقرف ربنا يسامحك
:)
المهم اخبار نتيجه الامتحانات ايه يارب نسمع اخبار حلوة اللهم امين
ربنا ينجحك اللهم امين يارب العالمين

abdallah mortada said...

اهلا رفقة

اولا مينفعش اقفل السماعات
لانى ساعات ببقى مشغلها عشان اسمع اللى عايز اسمعه
ثانيا اذا كان رغبة صاحب المدونة انو يشاركنا افكاره او خواطره او ذوقه الموسيقي
ياريت يحط قايمة اغاني او كليبات عايز يعرف الناس ذوقه
بس من غير ما تشتغل تلقائيا
وانا اعرف مدونات كتير عاملة الحكاية دي

يعني مش لازم تشتغل تلقائي بمجرد دخولى
من حقه يحط اللى عايزه انما مش من حقه يشلنى كل ما ادخل مدونته واسمع بالعافية

شكرا لمرورك الدائم

عاشــــــ النقاب ـقــــة"نونو" said...

تصدق فعلا عندك حق جدا جدا
بس انا بقى اشطر منك بعمل ايه بقى بقفل الصوت من عندي لحد ما اقفل كل الصوت اللي في المدونات
ملحوظتك انا معاها جدا خصوصا اني كتيرر بدخل والعيال نايمة جنبي فبيتفزعوا
دمت بخير