بسم الله الرحمن الرحيم
لما سألتيني .. بصيت للأرض .. كنت دايما ببص لأي حاجة الا عنيكي .. وانتى كنتى بكل هدوء تفضلي بصالي .. لانك عارفة انى مش هعرف أقاوم كتير.. وهرجع ابص في عنيكي من تاني .. واصالحك .. خليتيني واثق من نفسي .. وبقيت أكره الأغانى عشان حرقولي كلام كتير كنت عايز اقولهولك .. بقيت عارف من ساعتها انك بتاعتي .. وعرفت برضو ان احلى حاجة في الحب اني ملاقيش سبب واحد يقلي بحبك ليه .. وقد إيه
احلى حاجة فيكي انك بتعرفي امتى تعامليني كأنك أمى .. بتعرفي توازني بين صرامة الأم وحنيتها ... بتعرفي تكوني صاحبتي اللى مبتكسفش اقلها حاجة .. وبتعرفي تكوني بنتي اللى باخدها في حضني واحس انى واخد العالم كله في حضني .. بتعرفي تضحكي .. ضحكتك مظبوطة في صوتها وضيقان عنيكي ونغزين خدودك بيخلوني ارتجل ايفهات تليق بالجمال ده .. ضحكتك بتخش قلبي زي ما الجواهرجي بيدخل فص الكهرمان في العقد ..
مببقاش زهقان من اللف معاكي في المولات .. لانى عارف انك هتفاجئيني بذوقك .. زي كل مرة..
بحب لما بتفردي ضهرك قدام المراية .. وعارف انك عارفة انى عارف انك بتبقى قاصداها ..
وكل مرة بستغرب ازاي بتعرفي تعملي المكياج بالسهولة والسرعة دي .. وأوعدك هحاول اغير جملة " انتى احلى من غير مكياج اللى بقولهالك على طول دي "
بحب مناخيرك لما تنزل على طرفها نضارة القراية .. وبتبقى بصالي عشان اسيب شغلي واركز معاكي .. ببقى عارف فرحتك قد ايه لما بتضيفيلي معلومة جديدة .. او تسمعيني اقتباس من رواية بحبها ..او تسمعيني اغنية جديدة وخايفة تطلع وحشة عشان متريقش عليكي
لما بنبقى قاعدين في البلكونة عصر يوم الجمعة ... الشاي بالنعناع من إديكي بيبقى ليه طعم تاني .. بحب أفكارك اللى بتطلعيها من سورة الكهف بعد ما بخلصها .. كل مرة بتخليني اقراها بشكل مختلف .. بحب اشوف وشك لما بتكوني عاملة مصيبة ومش عارفة تواجهيني بيها عشان عارفة انو مش وقت مناسب .. بحب طفولتك وانتى بتحكي الموضوع زي ما حصل من عير ما تزوقي الكلام بحب شجاعتك في الاعتراف بغلطك .. وعارفة ان كل حاجة سلف ودين زي ما بتمسكيلي على الغلطة وتعايريني بيبقى جه دورك عشان اتريق عليكي شوية .. واسيبك في حيرة هو يا ترى سامحني ولا لأ ..
انا مش عارف انتى بتعرفي تعاملي امي كدة ازاي .. زي ما تكوني عارفة هي هتقول ايه قبل ما تقوله .. بحبك لما بتنقذيني من المواقف اللى لازم اشترى فيها خاطر امي .. انتى فاهماها احسن مني .. ازاي مش عارف
بحب نظرة " حقك عليا " اللى بتبصيهالي لما أمك تغلس عليا كالعادة .. وبحبك لما بتفتحي موضوع من العدم عشان تهدي الجو
بحبك لما تعكنني عليا يوم السبت وانتى بتنضفي الشقة .. بحب نضافتك واهتمامك بالتفاصيل .. شكلك وانتى تعبانة اليوم ده بيخليني اتجنبك .. زي ما بتتجنبيتي طول الأسبوع بعد ما ارجع من الشغل ..
ياريت متسألينيش تاني بقى بحبك قد إيه
No comments:
Post a Comment