Thursday, August 23, 2012

كنت عايز ابقى ....

بسم الله الرحمن الرحيم

امممم اول حاجة افتكر انى كنت عايز ابقاها لما كان حد بيسألنى عايز تطلع ايه لما تكبر كنت برد نفس رد الاطفال الطبيعيين عايز ابقى ظابط وكان نفس رد السائل ايضا طبيعي كأى شخص يسأل هذا السؤال ( وظابط ساعتك على كام ) ؟ طبعا ضحكت مرة واتنين وتلاتة لكن كفاية بقى هوا الناس كلها عارفة النكتة ولا ايه طب حد يغير طيب

بعدها كنت عايز ابقى لعيب كورة مش عارف ليه ؟.. مع انى مكنتش ومازلت مش حريف كورة اوي بس بعرف العب على قدى يعني ومهتم دلوقتى بالكورة ومش عارف انا اهلاوى ليه مع انى فترة حبي للكورة كان الاهلي بيخسر فيها ولكن مش عارف ليه كنت بحب الاهلى المهم كنت عايز العب كورة وكنت بقعد اتخيل سيناريوهات انى نجم مشهور وانى غنى اوي .. بس مكنتش متابع اخبار الكورة اول بأول يعني ولا حاجة


بعدها رحنا السعودية فمش فاكر انى كنت عايز ابقى حاجة لما اكبر مش عارف انا بكره فترة السعودية دي ليه كدة ؟.. ولكن ده اكيد احسن حاجة كانت ممكن تحصلى ... هناك  كان محلات كل شئ بريالين دي منتشرة اوي .. كان غاية استمتاعى انى اشترى عربية بريالين بريموت كنترول اللى بسلك دي العب بيها شوية وبعدين افكها .. العربية كان مبدأ عملها واحد متور كهربا صغير ورا وقدام فيه لمبتين صغيرين كدة عشان يعملوا كشاف كنت افك الماتور واللمبتين
اوصل اللمبة بطرف في البطارية وبالطرف التانى الماتور وادخل الريموت في النص واتكى على الريموت اللمبة تنور والماتور يدور وافتكر بقى انى اهم مخترع في الكون واقعد اغير في التوصيلات ومرا احرك الماتور يمين ومرة يتحرك شمال وكان تخيلي ان الزرار اليمين بيوزع الكهراب ناحية اليمين فالماتور يتحرك يمين وينطبق الكلام على الزرار الشمال لكن لما اتعلمت عرفت انى كنت جاهل وزعلت اوي انى لا مخترع ولا حاجة وانى كنت جاهل اوي وان مينفعش يبقى واحد مخترع وحمار كدة كنت فاكر المخترعين دول بيعملوا الحاجة من اول مرة وان المخترع ده اذكى واحد في البشر ... المهم قعدت حوالى سنتين فاكر انى لما اكبر هبقى مخترع زمانى وكانت اختراعاتى مروحة صغيره ... محاولة اختراع غسالة شرابات صغيرة ... محاولة اختراع اباجورة تشتغل باللمس ( مكنتش باللمس ولا حاجة كنت بقرب السلكين من بعض اوي ومبوصلهمش واحطها في حتة مستخبية في الاباجورة ولما المس جسم الاباجورة السلكين يتوصلوا والاباجورة تنور ) وكنت فرحان اوي واخواتى كانوا مبهورين بيا لكن بابا كان عارف كل الهبل اللى كنت بعمله ده .. لكن كان سايبني على اساس بكرة اكبر وافهم .. وفهمت

بعد ما تخليت عن حلم الاختراع جبنا كومبيوتر ... واوبااااا محدش كان بيحب يقعد عليه غيري رغم انى كان ممكن اقعد 6 ساعات متواصل العب سوليتير واكتب حاجات في الوورد واغير في الفونت  واللون .. يااااه كنت فرحان اوي انا مش متخيل نفسي دلوقتى ازاي كنت بقعد كدة من غير ما ازهق .... وكنت بسمع عن الهاكر واللى بيعملوه استهوتنى الفكرة اوي وكنت اسعى انى ابقى هاكر ... وطبعا عشان ابقى هاكر لازم انترنت ... ماما انا عايز انترنت .. ليه يا عبدالله ما انت عندك الكومبيوتر ( محدش يضحك ) يا ماما مليش دعوة انا عايز اخش عالم جديد ومبحبش ابقى مش عارف كدة طيب يا عبدالله ..  جبت كارت انترنت وقريت الطريقة ووصلت الانترنت .. وبعدين بقى ؟
يعني وصلت انترنت وبعدين هعمل ايه بعد ما وصلته ... سألت عيال في المدرسة قالولى اعمل ايميل بس غير مكان سكنك عشان لو عملت حاجة محدش يعرف مكانك :D عملت ايميل وكل شوية كان يقلى اسمك موجود يلاهوي معقول ممكن يبقى في حد اسمه زيي :D   طيب وبعدين من هنا لهنا عملت ايميل على الهوت ميل ولحد دلوقتى مش عايز افرط فيه لانه جه بعد جهد كبير اوي .. :)

المهم وبعدين انا عايز بقى اخبار ومعلومات عشان ده سبب انى ادخل انترنت اصلا واحد دلنى على موقع اسمه ayna قالى ده فيه كل حاجة عملت عليه ايميل برضو.. كنت بعمل ايميلات كتير اوي ياااه .... المهم بقيت اخش على اي حاجة عشان اعرفها بعدين واجهتنى مشكلة البرامج كنت عايز اعرف كل البرامج اللى في الدنيا وكنت لما احول امتداد اغنية كنت احس انى عبقرى زمانى ... في السعودية مكنش فيه فك هاردات ولا الكلام من ده وانا اصلا كان الكومبيوتر عندى مقدس .. مش متخيل انو ممكن يتفك رغم انى كان عادي عندي افك اي حاجة (مرة فكيت الراديو .. فكيته ورجعته زي ما كان وكنت فاكر برضو انى عبقرى ساعتها)  لكن الكومبيوتر ده كان حاجة بعيدة اوي عن خيالى انى العب فيها .... نكمل مع الانترنت ودخلت على الشات ياااه كنت فرحان اوي انك بتكلم حد وبيرد عليك كانت تكنولوجيا حلوة اوي ولكن اول يوم دخلت فيه على الشات واحد كلمنى ولا قال سلام ولا كلام هوا دخل حط اللنك ومشي ... قعدت اكلمه من هنا من هنا مكنش بيرد المهم فتحت اللنك ولأول مرة في حياتى  طلع لنك موقع اباحي ... مكنش موقع بمعنى الموقع كان صفحة كدة عادية وفيها  صور وخلاص .. طبعا مكنتش اعرف موضوع الاتور ريسبوند ده  خالص ..
مش عارف مفيش حاجة اتحركت فيا قلت ايه الهبل ده بقى ايه الموقع اللى مفهوش لنكات ده قمت قافل بس مقفلتش عشان محترم او عشان متدين قفلت عشان ملوش لازمة او دماغى مكنتش بتروح للحاجات دي ... ومرة في مرة بقيت بتفرج على الصور دي وفيما بعد من مراحل عمرى المتأخرة بقيت اضحك على نفسي اوي لان اللى كنت بتفرج عليه مكنش سكس بالمفهوم المعروف انا كنت فاكر ان الاباحية ان الست تبقى لابسة شورت مثلا ويااااه بقى لو لابسة بيكيني كان ده يبقى قمة الاباحية وكنت اخاف اقول لحد عليه بس مبدأ الثواب والعقاب والضمير ده مكنش بيلح عليا مش عارف ليه

المهم بجانب الكومبيوتر طوال الفترة اللى هناك كنت بجيب جرنان الاهرام واقراه واقرى فيه كل حاجة صفحة السياسة الحوادث الاقتصاد كل حاجة كنت عايز اي حاجة تربطنى بمصر والسلام وكنت اقعد احل الكلمات المتقاطعة كتير ... كانت بحب اوي لما يجيبوا نصر اكتوبر في الجرنان والقصص اللى عرفت فيما بعد مدى صحتها من مدى فتيها وفبركتها وكان نفسي اكون جندي اوي كلمت بابا في  الموضوع قالى خلاص ركز وخش الكلية الحربية قالى بس مش هتحارب كدة اول ما تتخرج لازم يكون فيه حرب الاول عشان تحارب ... فقررت انى اكون ظابط واول ما اتخرج هعمل حرب عشان احارب :) ... بس  لما دخلت الجيش قلت الحمد لله فيما قدرت  .. ده ربنا  نجانى ... وكدة  كدة مكنتش هخش حربية عشان نظرى 

بعدها بابا فهمنى الليلة دي كلها واقسام الجيش والمشاة والجوية وايه اللى حصل في اكتوبر وكدة ... ولما دخلت الجيش  عرفت اكتر 

انا  زمان كنت  بحلم  ..  كنت برئ .. كنت جميل .. محدش  لا جرح قلبى ولا كنت لسة عملت اي  ذنوب  ولكن دوام الحال من المحال 

دلوقتى عايز ابقى مهندس تصميم ميكانيكي ... اتخصصت في المجال ده .. ولكن علم الكلية  لا يكفى .. وانا مكنتش  بحصله بالطريقة الصحيحة .. ان شاء الله خلال 3 سنوات عايز ابقى مهندس ديزاين محترف  .. اتعلمه على أصوله مش  بسم رسم هندسي  او انى ارسم حاجة ثلاثية الأبعاد على الكومبيوتر ... مرة لما انطلب من واحدة زميلتي  تعمل مشروع  واحنا في سنة تالتة .. شورت عليها تعمل برج تبريد .. ولكن  مش هنسي  اليوم  اللى فضلت مطبق  فيه  لتاني  يوم وانا برسملها البرج ده  ومكنش فيه معلومات متوفرة كتير على النت .. بس الحمد لله عملته  واديتهولها الصبح  تطبعه  على ورق  كبير اوي A0 .. الدكتورة انبسطت اوي وانا كنت مبسوط بنتيجة مجهودي وتعبي .

خلال 6 سنين ان شاء الله  ناوى اخش في كارير ال R&D  البحث والتطوير .. حابب المجال وحاسس انو مناسب  ليا .. فربنا  ييسر الحال ان شاء الله 

 وخلال  20 سنة عايز ابقى   مهندس استشارى تصميم  بس ده لسة  قدامه وقت طويل اوي

No comments: